Read Sahu Roma 8 Bible Online

Roma 8 - Sahu bible

Roma 8

¹Sababu gena-ge, ngowa'a ga'a manga 'ahu ri marimoi ra Kristus Yesus, ananga sanga hukumu riwara.

²Ma Ngagara 'Ofi-'Ofi ma kuasa ri sibebasa ngene toma ḏosa ma kuasa re sengene kasingado-ngadolo i'a re pula'a 'ahu su-sungi ra ngene, sababu ngene rewo marimoi ra Kristus Yesus.

³Musa 'ai hukumu 'i sibebasa ngene yoḏu'u toma ḏosa ma kuasa; sababu manusia wo lamahana woḏi di'a mete'e ti-tiai hukumu gena-ge. Mada'a Ma Jou'ongu Madutu nyengara 'o sibebasa ngene toma ḏosa ma kuasa gena-ge: Unanga 'o 'utusu 'Ai Ngowa'a Nau'u di'a dadi jou-jou rimoi, la 'O tuusu ngene tananga ḏosa. Unanga gena-ge 'o sapolo toma dungia nena-ne ma tero sa'olo manusia, mada'a Unanga 'o 'a'a ḏosa ua.

⁴Ma Jou'ongu Madutu 'o 'a'a so'o gena-ge, la ngene ga'a nanga 'ahu mete'e Ma Ngagara 'Ofi-'Ofi ma mau, re mete'e riwara manusia ma tabeata baraḏosa, ngene gena-ge nyengara mete'e mo-moini ga'a ra Musa 'ai hukumu.

⁵Ngowa-ngowa'a ga'a 'aḏi 'ahu mete'e manusia ma tabeata baraḏosa, 'aḏi mafikiri pa'i manga tabeata nyafusu gena-ge ḇato. Mada'a ngowa-ngowa'a ga'a 'aḏi 'ahu mete'e Ma Ngagara 'Ofi-'Ofi ma mau, 'aḏi mafikiri pa'i Enanga ma mau ḇato.

⁶Na'o ninga fikirana 'i mete'e manusia ma tabeata baraḏosa, ma ḏo-ḏogumu tala 'i sigasa ngini toma sengene kasingado-ngadolo i'a. Mada'a na'o ninga fikirana 'i mete'e Ma Ngagara 'Ofi-'Ofi ma mau, ma ḏo-ḏogumu tala sigasa ngini toma 'ahu mode-mode'e re ngini ninga 'ahu rema dame ra Ma Jou'ongu Madutu.

⁷Ngowa'a ga'a manga 'ahu mete'e manusia ma tabeata baraḏosa, ngowa'a gena-ge 'o lawana Ma Jou'ongu Madutu, sababu ngowa'a gena-ge 'aḏi ta'aloko ua ra Ma Jou'ongu Madutu 'ai hukumu. Ma nyonyata, ananga gena-ge nga'unu ua ya ta'aloko!

⁸Ngowa'a ga'a manga 'ahu mete'e manusia ma tabeata baraḏosa, ananga gena-ge sisanangi yoḏu'u Ma Jou'ongu Madutu 'ai 'akala re sinyingara.

⁹Mada'a ngini ni 'ahu mete'e riwara manusia ma tabeata baraḏosa. Na'o mode-mode'e Ma Jou'ongu Madutu 'ai Roh 'i tegoro taninga 'akala re sinyingara, ngini ni 'ahu mete'e Ma Ngagara 'Ofi-'Ofi ma mau. Mada'a ngowa'a ga'a Kristus 'ai Roh gena-ge 'i cua ra ananga, ananga gena-ge marimoi ra Kristus ua.

¹⁰Mada'a, kalaha ninga lese ḏuanga i'a 'i sengene sababu ḏosa, na'o Kristus 'age taninga 'akala re sinyingara ma dara, Ma Ngagara 'Ofi-'Ofi 'i pula'a ngini 'ahu kasingado-ngadolo i'a sababu ngini reni dadi ngowa'a loasa re banari ra Ma Jou'ongu Madutu 'ai momina.

¹¹Ma Jou'ongu Madutu ro pake Ma Ngagara 'Ofi-'Ofi di'a dadunu 'O si'ahu Kristus moju toma ngowa'a senge-sengene manga sigolona. Dadi sababu Ma Ngagara 'Ofi-'Ofi 'age taninga 'akala re sinyingara, tantu ḏua Ma Jou'ongu Madutu ḏuanga i'a 'O si'ahu ngini moju. Kalaha ninga lese ḏuanga i'a 'i sengene, Unanga 'a siḏagi so'o gena-ge 'a pake Ma Ngagara 'Ofi-'Ofi ga'a 'age taninga 'akala re sinyingara.

¹²Sababu gena-ge ioronongoḏu ngo-ngaku rimoi, ngene nanga banyatoro so'o ne: Awa ngene wo 'ahu mete'e manusia ma tabeata baraḏosa, mada'a ngene balasu wo 'ahu mete'e Ma Ngagara 'Ofi-'Ofi ma mau.

¹³Sababu na'o ngini 'ahu mete'e manusia ma tabeata baraḏosa, tantu ḏua ḏuanga i'a ngini ni sengene kasingado-ngadolo i'a. Mada'a na'o Ma Ngagara 'Ofi-'Ofi 'i sinyanyasele ninga 'ahu, ngini nga'unu ni 'ahu mete'e riwara manusia ma tabeata baraḏosa re ḏuanga i'a ni sanga 'ahu kasingado-ngadolo i'a.

¹⁴Sababu ngowa-ngowa'a ga'a Ma Ngagara 'Ofi-'Ofi ya'u sinyanyasele, ananga gena-ge Ma Jou'ongu Madutu 'ai ngowa-ngowa'a nau'u.

¹⁵Sababu Ma Ngagara 'Ofi-'Ofi ga'a Ma Jou'ongu Madutu 'a pula'a ra ngini, si'a'a ua ngini ni dadi ngowa'a budaka, singadolo ngini ni 'ahu mojongo ma hukumu ra Ma Jou'ongu Madutu. Siḏibo ḏi'i, Ma Ngagara 'Ofi-'Ofi 'i si'a'a ngini dadi Unanga 'ai ngowa-ngowa'a nau'u. Re sababu Ma Ngagara 'Ofi-'Ofi ma kuasa, ngene nga'unu wo 'aro'o Ma Jou'ongu Madutu, “Baba, ngene nanga Ḇaḇa.”

¹⁶Ma Ngagara 'Ofi-'Ofi masiretene 'i sisakisi mamete'e ra ngene nanga roh, mangale ngene Ma Jou'ongu Madutu 'ai ngowa-ngowa'a.

¹⁷Re sababu ngene Unanga 'ai ngowa-ngowa'a, tantu ḏua ḏuanga i'a ngene wo sanga warisi ga'a Unanga 'o sidodahe di'a 'Ai ngowa-ngowa'a. Re ngene ḏuanga i'a sanga warisi gena-ge mamete'e ra Kristus. Sababu toma dungia nena-ne ngene wo sanga sikisa ma tero sa'olo Kristus, dadi ḏuanga i'a ngene wo sanga 'Ai mulia ma balangu ḏi'i.

¹⁸Sababu ngoi to ngaku mode-mode'e mangale ma mulia ga'a Ma Jou'ongu Madutu ḏuanga i'a 'o sijumu ra ngene, mulia gena-ge lai lamo'o reo sangisara mo-moini ga'a ngene wa basono toma 'orasa nange-ne.

¹⁹'Oru ḇato Ma Jou'ongu Madutu 'ai do-dadi toma dungia nena-ne ma dara, enanga mo-moini 'i totoma re 'i ga-ganutu madutu di'a Unanga 'o sijumu 'Ai ngowa-ngowa'a nau'u.

²⁰Sababu dungia re ma dara mo-moini ri sanga katula, dadi mo-moini gena-ge ma faeda ri cua. Gena-ge 'i dadi mete'e enanga ma mau ua, mada'a mete'e Ma Jou'ongu Madutu masiretene 'Ai 'akala ma mau, Unanga ga'a 'o sisasi dungia nena-ne. Kalaha so'o gena, enanga ḏi'i rema ngo-nganono so'o ne:

²¹Mangale 'orasa ḏuanga i'a 'i ngadolo, wakutu Ma Jou'ongu Madutu 'o sibebasa dungia re ma dara mo-moini toma kuasa hafu-hafu ga'a ya siwejere enanga. Dadi toma 'orasa gena-ge, dungia re ma dara mo-moini 'i 'ahu bebasa re 'i basono 'Ai mulia mamete'e reo Ma Jou'ongu Madutu 'ai ngowa-ngowa'a.

²²Ngene wo waro singadolo 'orasa nange-ne dungia re ma dara mo-moini 'i balisa, sababu enanga 'i basono sangisara ma tero sa'olo were'a rami lese mo basono sangisara wakutu mo maḏe-ḏegoro i'a.

²³Re pa'i dungia re ma dara mo-moini ḇato ua, mada'a ngene masiretene ḏi'i wo balisa tananga 'akala re sinyingara ma dara. Ngene ga'a rewo dawongo Ma Ngagara 'Ofi-'Ofi sa'olo bu-bula'a ma jomolo ga'a Ma Jou'ongu Madutu 'o pula'a ra ngene. Mada'a kalaha so'o gena, ngene wo totoma moju Ma Jou'ongu Madutu 'o sitede ngene di'a wo dadi 'Ai ngowa-ngowa'a nau'u re Unanga 'o sibebasa ngene mo-moini nanga 'ahu toma jira.

²⁴Siḏa-siḏa wakutu ngene rewo salamata, ngene wo masinganono di'a dawongo mo-moini gena-ge. Mada'a na'o ngene rewa dawongo mo-moini gena-ge, tantu ḏua ngene wo masinganono riwara. Sababu matengo i'a mai ua 'o masinganono moju di'a 'oru ga'a ra sanga ḏua!

²⁵Mada'a 'oru ga'a ngene wo masinganono moju, ngene wa totoma renanga 'akala ḇanyo.

²⁶So'o gena ḏi'i Ma Ngagara 'Ofi-'Ofi na riono ngene sababu ngene wo lamahana: Ngene wa waro ua ga'a 'oru balasu wo manyiata. Dadi Ma Ngagara 'Ofi-'Ofi masiretene 'i golo'o rema balisa ra Ma Jou'ongu Madutu, di'a ngene. Balisa gena-ge, enanga ma ngale ngene wa sahe ua.

²⁷Dadi Ma Jou'ongu Madutu ga'a 'o waro manusia nanga 'akala re sinyingara ma dara, Unanga ḏi'i 'o sahe Ma Ngagara 'Ofi-'Ofi ma mau sababu Enanga gena-ge 'i golo'o ra Ma Jou'ongu Madutu di'a 'Ai 'umata re go-golo'o gena-ge mete'e Unanga 'ai mau.

²⁸Re ngene wa waro mangale mo-moini ga'a Ma Jou'ongu Madutu 'o 'aturu di'a ngene nanga la-la. Ngene gena-ge ga'a dadalara Unanga, re Unanga na 'aro'o mete'e Unanga 'ai 'akala ma mau.

²⁹Sababu 'ua re 'au wali ananga ga'a Ma Jou'ongu Madutu ro cumutu di'a dadi 'Ai ngowa-ngowa'a, Unanga ya'u sitantukanga ḏua mangale ananga gena-ge manga tabeata 'i ma tero sa'olo 'Ai Ngowa'a Nau'u 'Ai tabeata. Dadi Yesus gena-ge 'o dadi ngowa'a nau'u ma jomolo, re ngene wo dadi 'Ai no-nongoḏu ma repe.

³⁰Ananga ga'a Ma Jou'ongu Madutu ya'u sitantukanga ḏua di'a dadi ma tero sa'olo 'Ai Ngowa'a Nau'u toma 'ua re 'au wali, Unanga 'o 'aro'o ananga gena-ge di'a 'aḏi dadi 'Ai ngowa-ngowa'a. Ananga ga'a Unanga ya'u 'aro'o ḏua, Unanga ya'u sidadi ngowa'a kamanga sala ua Tai momina. Re ananga ga'a ngowa'a kamanga sala ua Tai momina, Unanga ḏuanga i'a ya'u sidadi manga tabeata ma tero sa'olo 'Ai Ngowa'a Nau'u 'Ai tabeata ga'a mulia.

³¹Mangale mo-moini ga'a Ma Jou'ongu Madutu 'a si'a'a gena-ge, ngene wo kanau 'oru?! Mode-mode'e Ma Jou'ongu Madutu ra ngene ino! Na'o so'o gena-ge 'a guna nga'unu 'o lawana ngene?! Tantu ḏua, matengo i'a mai ua!

³²'Ai Ngowa'a Nau'u masiretene Unanga 'a sidoa'a toma ngowa'a ma jira, la ananga 'U sisengene di'a sisalamata ngene mo-moini ga'a ngowa'a baraḏosa. Dadi, tantu ḏua Unanga 'o pula'a 'oru ḇato ga'a ngene wo paralu!

³³'A guna nga'unu 'o da'awa ngene ga'a Ma Jou'ongu Madutu ro cumutu?! Tantu ḏua, matengo i'a mai ua! Sababu Unanga 'o sidadi ngene ngowa'a kamanga sala ua Tai momina!

³⁴'A guna nga'unu 'o singe-ngeta'a hukumu ra ngene?! Tantu ḏua matengo i'a mai ua! Sababu Yesus Kristus masiretene ro sengene di'a tuusu ngene tananga ḏosa. Sidogo ḏi'i, Unanga dadunu 'o 'ahu moju toma ngowa'a senge-sengene manga sigolona re Ro tegoro ra Ma Jou'ongu Madutu 'ai giama ma kuwiḏa i'a. Re Unanga gena-ge masiretene nanga lese to golona.

³⁵'Age 'ori i'a i'a ga'a nga'unu dola'aku Kristus 'ai dadalara ra ngene?! Cua! Bae ngene nanga 'ahu basono kangela bolo sangisara, bae ngene wo sanga sikisa bolo sawini bolo 'ahu ma dinga'unu ua, bae ngene wo sanga bahala, bolo wo sengene; Kristus 'ai dadalara 'i sieanga i'a ua ngene.

³⁶Gena-ge ma tero sa'olo 'i silefo toma Boku 'Ofi-'Ofi ma dara so'o ne: “Wangere ma giḏanga i'a, ngowa'a 'aḏi tai'i sisengene ngomi, sababu mi mete'e Ma Jou'ongu Madutu. Ngowa'a 'aḏi ta'ajiri ngomi ma tero sa'olo doba-doba ga'a mau ya tola'a.”

³⁷Kalaha ngene wo sanga susa re sangisara mo-moini gena-ge, ngene wo 'utungu 'i ti-tiai sababu Unanga ga'a dadalara ngene.

³⁸Sababu ngoi to ngaku mode-mode'e mangale toma dungia sitabi donga, bae sengene bolo 'ahu, bae mala'ekata bolo kuasa hafu-hafu, bae 'oru ga'a 'i dadi 'orasa nange-ne bolo ḏuanga i'a, bae kuasa 'oru ḇato toma dungia ma dara nena-ne,

³⁹bae 'ori i'a toma diwanga bolo toma dungia ma dara, bolo 'oru ma lelegu ra Ma Jou'ongu Madutu 'ai do-dadi, mo-moini gena-ge ya dola'aku yoḏu'u Ma Jou'ongu Madutu 'ai dadalara ra ngene, sababu Kristus Yesus nanga Jou.