Read Sahu 1 Korintus 1 Bible Online

1 Korintus 1 - Sahu bible

1 Korintus 1

¹Surata nena-ne ma 'asala ra ngoi Paulus re ra Sostenes, unanga gena-ge ga'a ngene nanga ioronongoḏu ngo-ngaku rimoi. Ngomi ma siḏingoto surata gena-ge di'a ioronongoḏu ngo-ngaku rimoi toma jama'ata Korintus. Ngini ga'a Ma Jou'ongu Madutu ro 'aro'o di'a ni dadi Unanga 'ai Jama'ata sababu Kristus Yesus 'o si'ofi ngini ḏua. Ngomi ma siḏingoto ḏi'i surata gena-ge toma ngowa'a mo-moini toma ngi'i le'a ḇato ga'a raḏi silamo'o re siḏubuso Ma Jou Yesus Kristus, manga Jou re nanga Jou. Ngoi, Paulus, masiretene to dadi Kristus Yesus 'ai so-soma'a sababu Ma Jou'ongu Madutu 'o 'aro'o ngoi, gena-ge 'i mete'e 'Ai mau.

³Ngoi re Sostenes, ngomi mi manyiata ra Ma Jou'ongu Madutu nanga Ḇaḇa, re Yesus Kristus nanga Jou, la 'Aḏi pula'a dame re 'Aḏi pula'a ḏi'i mura re dadalara ra ngini.

⁴Ngoi to sibere ie murasa ma la tau-taunu tari Jou'ongu Madutu mangale ngini, sababu Unanga 'Ai mura re dadalara ngini reni dawongo cocatu-cocatu. Gena-ge 'i dadi pa'i sababu ngini ni marimoi ra Kristus Yesus ḇato.

⁵Ma Jou'ongu Madutu 'o pula'a ḏua cocatu fara muḏuo i'a ga'a ni paralu, sababu ngini reni marimoi ra Kristus: Ma Jou'ongu Madutu ro pula'a wo-waro fara muḏuo i'a re Unanga ro pula'a ḏi'i kuasa di'a singadolo 'Ai demo ra ngini.

⁶Enanga gena-ge 'i dadi bukiti rimoi mangale habari ga'a ngoi ta singadolo mangale Kristus ra ngini, 'i banari sababu 'i waiti ḏua taninga 'ahu ma dara,

⁷singadolo reni dawongo cocatu mo-moini kama kuranga ua wakutu ngini totoma nanga Jou Yesus Kristus dadunu 'o sapolo moju.

⁸Ma Jou'ongu Madutu ḏuanga i'a 'o riono ngini di'a ni macako'o namo-namoto taninga ngo-ngaku singadolo dungia ma ḏo-ḏogumu, la toma 'orasa gena-ge nanga Jou Yesus Kristus dadunu 'o sapolo moju, ngini ninga de'oso re ḏegoro kama rapu ua.

⁹Ma Jou'ongu Madutu ḏuanga i'a 'o 'a'a so'o gena-ge sababu 'O cufala di'a sitotomo 'Ai jaji. Unanga gena-ge ga'a ro 'aro'o ngini di'a ni marimoi Tai Ngowa'a Nau'u, Yesus Kristus, nanga Jou.

¹⁰Ioronongoḏu ngo-ngaku rimoi, rema Ma Jou Yesus 'ai kuasa, ngoi to golo'o mode-mode'e balasu ni sirimoi ninga 'akala ma sanga. Awa ni ma'u tolabe singadolo ni ma'u salira. Ngini balasu ni marimoi, ni sirimoi ninga wo-waro re ninga 'akala ma sanga.

¹¹'Ari ioronongoḏu ngo-ngaku rimoi, ngoi to sanga waro toma ngowa'a mamuni'a ra ngo Kloe 'ami ngitu re ngale, mangale ngini ma'u tolabe.

¹²'Ari maksudu nena-ne: 'Age mamuni'a taninga sigolona ga'a 'aḏi kanau, “Ngoi 'ari guru 'a Apolos,” mamuni'a ḏi'i 'aḏi kanau, “Ngoi 'ari guru 'a Paulus,” re mamuni'a ḏi'i 'aḏi kanau, “Ngoi 'ari guru 'a Petrus” re 'age ḏi'i mamuni'a 'aḏi kanau, “Ngoi 'ari guru 'a Kristus.”

¹³'A Kristus, ngene wo sibalangu yoḏu'u! Ngoi, Paulus to sengene toma salib di'a ngini?! So'o gena ua! Ngini ni sanga baptis ua ra Paulus 'ai lomanga?!

¹⁴Ngoi to sibere ie murasa ma la ra Ma Jou'ongu Madutu sababu taninga sigolona ngoi tini baptis ngini ua, ḏuga-ḏuga pa'i 'a Krispus re 'a Gayus ḇato.

¹⁵Sababu gena-ge, matengo i'a mai ua nga'unu 'o kanau mangale ngoi to baptis unanga ra ngoi 'ari lomanga.

¹⁶(Oh ya, nange-ne kara ngoi ta si'elingi ie, 'a Stefanus 'ai ngitu re ngale ngoi ta'u baptis, mada'a ma lelegu ḏi'i ta 'elingi riwara.)

¹⁷Kristus 'o 'utusu ngoi di'a to baptis ngowa'a ua, mada'a di'a to singadolo Habari Roanga ra Ma Jou'ongu Madutu tala. Mada'a ngoi ta pake ua demo ga'a manusia 'aḏi ta'ajiri 'akala soro'unu. Sababu na'o ngoi to 'a'a so'o gena-ge ngowa'a 'aḏi basono ua Yesus 'ai se-sengene toma salib ma kuasa.

¹⁸Ngowa-ngowa'a ḏuanga i'a ga'a 'aḏi sanga sengene kasingado-ngadolo i'a, manga goro ino habari mangale Kristus 'O sengene toma salib 'i ma tero sa'olo 'ori i'a ga'a osama 'akala ua. Mada'a ra ngene ga'a Ma Jou'ongu Madutu 'o sisalamata ḏua, habari gena-ge 'i sijumu Ma Jou'ongu Madutu 'ai kuasa di'a 'O sisalamata ngowa'a.

¹⁹Toma Boku 'Ofi-'Ofi ma dara 'i silefo so'o ne: “ 'Akala ma soro'unu ga'a mete'e manusia manga pahe, Ngoi ta singi-ngiranga. Re ngowa-ngowa'a pahe manga wo-waro, ngoi ta siruwahe.”

²⁰Dadi, ma faeda 'oru toma ngowa'a pahe?! Ma faeda 'oru guru 'agama?! Ma faeda 'oru ngowa'a dungia tukanga ma'u lawana?! Mo-moini gena-ge ma faeda 'i cua! Sababu Ma Jou'ongu Madutu ro sijumu manusia manga 'akala soro'unu ma tero sa'olo manusia manga haga.

²¹Sababu manusia manga 'akala ma soro'unu, enanga sanga ua nana'o Ma Jou'ongu Madutu. Mada'a sababu Ma Jou'ongu Madutu 'ai 'akala ma soro'unu ma pari cua, Unanga gena-ge ro sitantukanga di'a 'O sisalamata ngowa'a ga'a raḏi ngaku 'Ai Habari Roanga. Habari Roanga gena-ge ngowa'a dungia 'aḏi ta'ajiri habari ma faeda 'i cua.

²²Ngowa-ngowa'a Yahudi 'aḏi golo'o didina'o-didina'o heranga sa'olo bukiti rimoi, la ananga 'aḏi ngaku Habari Roanga gena-ge. Re ngowa-ngowa'a Yunani, 'aḏi disa 'akala ma soro'unu, la ananga 'aḏi ngaku 'Ai Habari Roanga.

²³Mada'a ngene, pa'i wo singadolo habari mangale Kristus ga'a 'O sengene toma salib di'a 'O sisalamata ngene. Habari gena-ge ya siruwahe ngowa'a Yahudi manga rorasa. Re ngowa-ngowa'a Yahudi ua 'aḏi ta'ajiri habari gena-ge 'ori i'a ma haga.

²⁴Mada'a di'a ngowa-ngowa'a ga'a Ma Jou'ongu Madutu ro 'aro'o, bae ngowa'a Yahudi bae ngowa'a Yahudi ua, Habari Roanga gena-ge Ma Jou'ongu Madutu 'ai duhu di'a sijumu mangale 'Ai kuasa re 'Ai 'akala ma soro'unu.

²⁵Sababu enanga 'i waiti habari gena-ge mangale Kristus 'o sengene toma salib di'a 'O sisalamata ngene ga'a manusia 'aḏi ta'ajiri haga ra Ma Jou'ongu Madutu. Ma nyonyata haga gena-ge lebe kau'u reo manusia manga 'akala ma soro'unu! Re ḏi'i habari gena-ge 'i waiti 'oru ga'a manusia ta'ajiri lamahana ra Ma Jou'ongu Madutu, enanga lebe te'e reo manusia manga de-de'e.

²⁶Ioronongoḏu ngo-ngaku rimoi, na si'elingi ie ninga 'ahu wakutu Ma Jou'ongu Madutu 'o 'aro'o ngini nyangu. Taninga sigolona ni repe nyangu ga'a remanga 'akala ma soro'unu bolo remanga ḏe-ḏegoro, bolo remanga kuasa toma manusia manga momina.

²⁷Ma Jou'ongu Madutu ro sitantukanga di'a 'O cumutu ngowa'a ga'a ngowa'a dungia 'aḏi ta'ajiri ngowa'a haga, la 'O sipula'a mara'a toma ngowa'a dungia ga'a mabasono tala ananga ngowa'a 'akala soro'unu. Re Ma Jou'ongu Madutu 'o cumutu ngowa'a ga'a ngowa'a dungia 'aḏi ta'ajiri ngowa'a lamahana, la 'O sipula'a mara'a toma ngowa'a ga'a 'aḏi basono tala laḏi te'e.

²⁸Ma Jou'ongu Madutu 'o cumutu ḏua ngowa-ngowa'a ga'a kamanga ḏe-ḏegoro ua, sayanga ma jingi'i ua, ngowa-ngowa'a mapake ua, la Unanga 'a siwejere 'oru ḇato ga'a ngowa'a dungia 'aḏi ta'ajiri lebe ma re'u i'a.

²⁹Sababu gena-ge matengo i'a mai ua nga'unu 'o mahie 'ai diri ra Ma Jou'ongu Madutu 'ai biono.

³⁰Ma Jou'ongu Madutu masiretene 'O sirimoi ngini ra Kristus. Re Kristus gena-ge 'o dadi ma tero sa'olo Ma Jou'ongu Madutu 'ai 'akala ma soro'unu ra ngene. Re sababu ngene rewo marimoi ra Kristus, ngene wo dadi loasa re banari re wo dadi Ma Jou'ongu Madutu 'ai ngowa-ngowa'a 'ofi-'ofi re Unanga 'O tuusu ngene.

³¹Sababu gena-ge ma tero sa'olo 'i silefo toma Boku 'Ofi-'Ofi: “Ngowa'a ga'a mau matoro, ngowa'a gena-ge balasu 'a sitoro mangale ga'a Ma Jou 'a si'a'a ra ananga.”