Read Sahu 1 Korintus 14 Bible Online

1 Korintus 14 - Sahu bible

1 Korintus 14

¹Ngini balasu ni makutale mode-mode'e ni dadalara ngowa'a lelegu, re ni nyafusu mode-mode'e cocatu toma Ngagara 'Ofi-'Ofi. Cocatu ma la-lamo'o ma re'u i'a, gena-ge kuasa di'a siajele habari da'u ra Ma Jou'ongu Madutu tala.

²'A guna ga'a sanga kuasa di'a 'o kanau pake Ngagara 'Ofi-'Ofi ma demo, unanga 'o kanau toma manusia ua, mada'a 'o kanau ra Ma Jou'ongu Madutu. Matengo i'a mai ua ya sahe 'oru ga'a unanga 'o kanau gena-ge, sababu Ma Ngagara 'Ofi-'Ofi 'u ḏegoro singadolo 'ai demo gena-ge pa'i Ma Jou'ongu Madutu ḇato nga'unu 'a sahe.

³Siḏibo ḏi'i, ngowa'a ga'a siajele habari da'u ra Ma Jou'ongu Madutu tala, 'aḏi siajele toma manusia di'a site'e manga ngo-ngaku, dogo manga cufala re sibabata manga 'akala re sinyingara.

⁴Ngowa'a ga'a 'aḏi kanau pake Ma Ngagara 'Ofi-'Ofi ma demo, gena-ge pa'i ananga 'aḏi sanga 'utungu masiretene ḇato. Mada'a ngowa'a ga'a siajele habari da'u ra Ma Jou'ongu Madutu tala, ngowa'a ngaku Yesus ma lelegu ya sanga ma 'utungu ḏi'i.

⁵Ngoi to nyanyaḏi ngini mo-moini nga'unu ni kanau pake Ma Ngagara 'Ofi-'Ofi ma demo. Mada'a lebe bae na'o ngini ni siajele habari da'u ra Ma Jou'ongu Madutu tala. Sababu ngowa'a ga'a 'aḏi siajele habari da'u ra Ma Jou'ongu Madutu tala, ananga manga faeda lebe lamo'o i'a reo ngowa'a ga'a 'aḏi kanau pake Ma Ngagara 'Ofi-'Ofi ma demo. Pa'i na'o ngowa'a ga'a 'aḏi kanau reo demo gena-ge, nga'unu 'aḏi sitarangi demo-demo ma ngale, nyengara ngowa'a ngaku Yesus ma lelegu ya sanga ma 'utungu ḏi'i.

⁶Ioronongoḏu ngo-ngaku rimoi, si'ade-'ade i'a ngoi to sapolo ra ngini re to kanau pake Ma Ngagara 'Ofi-'Ofi ma demo, gena-ge ma 'utungu 'oru ra ngini?! Ma 'utungu ceka'a i'a mai ua! Mada'a ngini ni sanga 'utungu ḇato na'o ngoi to gasa demo ga'a da'u ra Ma Jou'ongu Madutu tala ga'a Unanga 'a sipula'a ra ngoi, bolo to siajele demo wo-waro da'u ra Ma Jou'ongu Madutu tala, bolo to siajele habari da'u ra Ma Jou'ongu Madutu tala, bolo ngoi to doto'o ngini do-doto'o da'u ra Ma Jou'ongu Madutu tala.

⁷Gena-ge ma tero sa'olo sulingi re kecapi, fara ḏiḏi nena-ne ma ngagara cua. Mada'a na'o ngowa'a ya wusu bolo ya ḇisa la-la ua. Tantu ḏua, ngowa'a ya 'isene, ananga ya sahe ua enanga ma maksudu 'oru!

⁸So'o gena ḏi'i, na'o sordado matengo 'o wusu terompet, la sordado-sordado 'aḏi ḏu-ḏuanga ḏua di'a parangi. Mada'a ma iḏingi 'i rousu ua, matengo i'a mai ua tagi parangi!

⁹So'o gena-ge ḏi'i ra ngini: Na'o ngini ni kanau demo-demo ga'a ngowa'a lelegu ya waro ua, marai matengo i'a mai ua nga'unu ya sahe 'oru ga'a ngini kanau gena-ge. Ma ḏo-ḏogumu tala, ninga demo gena-ge ma faeda 'i cua!

¹⁰Toma dungia nena-ne ma dara, 'age demo ma repe, mada'a demo rimoi i'a mai ua ga'a ma ngale cua.

¹¹Mada'a na'o ngoi ta sahe ua matengo i'a 'ai demo, ngowa'a ga'a 'o kanau demo gena-ge ma tero sa'olo ngowa'a tagi-tagi ino ra ngoi. Re ngoi ma tero sa'olo ngowa'a tagi-tagi i'a ra unanga gena-ge.

¹²So'o gena-ge ḏi'i ra ngini: Ngoi to waro ngini ni makutale mode-mode'e ni sanga kuasa-kuasa toma Ngagara 'Ofi-'Ofi ino. Dadi ngini ni makutale sanga cocatu lebe repe i'a ga'a ngowa'a ngaku Yesus ya sanga ma 'utungu.

¹³Sababu gena-ge, ngowa'a ga'a 'aḏi kanau pake Ma Ngagara 'Ofi-'Ofi ma demo balasu 'aḏi manyiata ra Ma Jou'ongu Madutu di'a 'O sipula'a tala ra ananga demo-demo gena-ge ma ngale.

¹⁴Sababu wakutu ngoi to manyiata to kanau pake Ma Ngagara 'Ofi-'Ofi ma demo, 'ari roh 'i manyiata mada'a 'ari fikirana 'i mamete'e ua.

¹⁵Dadi ngoi balasu to 'a'a 'oru?! Ngoi balasu to manyiata rari roh, re rari fikirana ḏi'i. Ngoi to manyanyi rari roh re rari fikirana ḏi'i.

¹⁶Si'ade-'ade i'a ngini ni sibere ie ninga murasa ma la ra Ma Jou'ongu Madutu pa'i ninga roh ḇato, re ngowa'a lelegu ga'a 'a waro ua Ma Ngagara 'Ofi-'Ofi ma demo gena-ge. Tantu ḏua unanga gena-ge 'o kanau yoḏu'u, “Ngoi to 'akoru” taninga nyiata murasa ma la gena-ge, sababu unanga 'a sahe ua.

¹⁷Kalaha ninga nyiata mangale murasa ma la ra Ma Jou'ongu Madutu gena-ge lai rousu masala, mada'a ma 'utungu 'i cua di'a ngowa'a lelegu.

¹⁸Ngoi to sibere ie murasa ma la ra Ma Jou'ongu Madutu sababu ngoi masiretene rari bai'i nga'unu to kanau pake Ma Ngagara 'Ofi-'Ofi ma demo reo ngini mo-moini.

¹⁹Mada'a toma lo-lomu ngowa'a ngaku Yesus, ngoi lebe to sanangi to kanau demo bale moi bale ḏiḏi ḇato ga'a ngowa'a nga'unu ya sahe, la ananga 'aḏi sanga do-doto'o reo ngoi to kanau demo rema cala nyagi pake Ma Ngagara 'Ofi-'Ofi ma demo, mada'a ngowa'a ya sahe ua!

²⁰Ioronongoḏu ngo-ngaku rimoi, mangale kajahatana, ngini balasu ni ma tero sa'olo ngowa 'olo. Siḏibo ḏi'i mangale Ma Ngagara 'Ofi-'Ofi ma demo, awa ngini mafikiri ma tero sa'olo ngowa 'olo mada'a ngini balasu ni mafikiri ma tero sa'olo bi-biri'i.

²¹Toma Boku 'Ofi-'Ofi ma dara 'i silefo so'o ne: “Ma Jou'ongu Madutu 'o kanau, ‘Kalaha Ngoi ḏuanga i'a to pake ngowa'a tagi-tagi ino manga madanga re Ngoi ḏuanga i'a to pake ngowa'a tagi-tagi ino manga demo di'a To kanau Tari ngowa-ngowa'a, ananga 'aḏi oḏu'u 'isene 'Ari demo.’ ”[2]

²²Sababu gena-ge, Ma Ngagara 'Ofi-'Ofi ma demo 'i dadi didina'o ra Ma Jou'ongu Madutu tala di'a pa'i ngowa'a ga'a ngaku Yesus nyangu ḇato. Enanga gena-ge 'i dadi didina'o ua di'a ananga ngowa'a ngaku Yesus. Siḏibo ḏi'i habari da'u ra Ma Jou'ongu Madutu tala, 'i dadi didina'o ra Ma Jou'ongu Madutu tala di'a pa'i ngowa'a ngaku Yesus ḇato. Enanga gena-ge 'i dadi didina'o ua di'a ngowa'a ga'a 'aḏi ngaku Yesus ua.

²³Sababu gena-ge, si'ade-'ade toma lo-lomu jama'ata, ngini mo-moini ni kanau pake Ma Ngagara 'Ofi-'Ofi ma demo, kage ngowa'a lelegu 'aḏi sapolo ga'a sahe ua ma demo gena-ge bolo ngowa'a ga'a 'aḏi ngaku Yesus ua. Tantu ḏua ananga gena-ge 'aḏi ta'ajiri ngini mo-moini reni pona!

²⁴Mada'a si'ade-'ade ngini mo-moini ni siajele habari da'u ra Ma Jou'ongu Madutu tala, kage 'age rema ngowa'a matengo 'o sapolo unanga gena-ge 'o ngaku Yesus nyangu bolo matengo ga'a 'o sahe ua Ma Ngagara 'Ofi-'Ofi ma demo, 'o sapolo. 'Oru ga'a ngini mo-moini ni kanau, enanga gena-ge ya sijumu mangale unanga ngowa'a baraḏosa ga'a na'o unanga 'o maḏibo ua toma ngo'omo boloto, ḏuanga i'a Ma Jou'ongu Madutu 'u sihukumu.

²⁵Re 'oru ga'a 'i gogono tai 'akala re sinyingara ma dara 'i supu mo-moini, singadolo unanga gena-ge 'o maḏipolono tala 'o silamo'o re siḏubuso Ma Jou'ongu Madutu re 'o kanau, “Mode-mode'e, Ma Jou'ongu Madutu taninga sigolona!”

²⁶Dadi ioronongoḏu ngo-ngaku rimoi, gena-ge mo-moini ma maksudu 'oru?! Wakutu ngini ni malomu di'a ni silamo'o re siḏubuso Ma Jou'ongu Madutu, 'age mamuni'a ga'a 'aḏi manyanyi, mamuni'a ga'a 'aḏi doto'o. 'Age mamuni'a ga'a gasa demo-demo da'u ra Ma Jou'ongu Madutu tala ga'a 'A sipula'a ra unanga. Mamuni'a ga'a 'aḏi kanau pake Ma Ngagara 'Ofi-'Ofi ma demo re mamuni'a ga'a nga'unu siguci demo-demo gena-ge. Mada'a gena-ge mo-moini ngini ni si'a'a, la ngowa'a ngaku Yesus sanga ma 'utungu.

²⁷Na'o 'age rema ngowa'a ga'a mau kanau pake Ma Ngagara 'Ofi-'Ofi ma demo, nyengara nga muḏiḏi bolo nga ḏu'ange ḇato; mada'a balasu 'aḏi kanau matengo togumu matengo. Re balasu 'age ngowa'a lelegu ḏi'i ga'a siguci demo-demo gena-ge.

²⁸Na'o 'age rema ngowa'a matengo i'a mai ua nga'unu ya siguci demo-demo gena-ge, ḏua ngowa'a ga'a kanau pake Ma Ngagara 'Ofi-'Ofi ma demo, ananga balasu masiogoro ḇato re 'aḏi kanau ḇato tamanga 'akala re sinyingara ma dara ra Ma Jou'ongu Madutu.

²⁹Nabi nga muḏiḏi bolo nga ḏu'ange nyengara 'aḏi siajele habari da'u ra Ma Jou'ongu Madutu tala, kara ma lelegu ngini na tagafi la-la mangale habari gena-ge.

³⁰Mada'a si'ade-'ade i'a demo ra Ma Jou'ongu Madutu tala gena-ge kage-kage 'i sapolo ra matengo i'a ga'a tegoro toma lo-lomu gena-ge ma dara. Ngowa'a ma mulaingi ga'a ka-kanau moju, unanga balasu matogumu 'o kanau.

³¹Reo duhu so'o gena-ge, ngini mo-moini matengo re matengo nga'unu ni siajele habari da'u ra Ma Jou'ongu Madutu tala, la ngini mo-moini sanga do-doto'o re ninga ngo-ngaku lebe te'e.

³²Sababu nabi ga'a 'o siajele habari da'u ra Ma Jou'ongu Madutu tala nga'unu 'a si'aturu cocatu toma Ngagara 'Ofi-'Ofi. Dadi nga'unu 'o siajele bolo 'o siogoro; mete'e 'ai mau.

³³Ma Jou'ongu Madutu 'o ḇusuru ninga lo-lomu 'i kaco, sababu Unanga 'O kaco ua. Mada'a Unanga 'o nyanyaḏi ninga lo-lomu 'i tagi toma la re rousu ma dara.

³⁴Ma tero sa'olo 'i dadi ḏua Tai jama'ata mo-moini na'o jama'ata 'aḏi malomu, we-were'a balasu masiogoro. Ananga simaha ua 'aḏi kanau mada'a balasu 'aḏi ta'aloko tamanga nau'u. Gena-ge 'i mete'e 'a Musa 'ai hukumu.

³⁵Na'o ananga 'aḏi mau ya waro 'ori i'a rimoi i'a, ananga balasu 'aḏi sano tamanga nau'u toma wala. Sababu na'o we-were'a 'aḏi kanau toma lo-lomu jama'ata, 'aḏi sipula'a mara'a ananga masiretene.

³⁶I'a sa'olo mamuni'a taninga sigolona ni oḏu'u mete'e 'ari parenta?! Ma Jou'ongu Madutu 'ai habari 'i sapolo ra ngini ino?! Bolo pa'i ra ngini ḇato Ma Jou'ongu Madutu 'ai habari gena-ge 'i singadolo?!

³⁷Na'o 'age rema ngowa'a 'aḏi mabasono tala remanga kuasa di'a siajele habari da'u ra Ma Jou'ongu Madutu tala, bolo 'age remanga kuasa lelegu toma Ngagara 'Ofi-'Ofi; ngowa'a gena-ge balasu 'o ma'insafu mangale 'oru ga'a ngoi ta lefo, gena-ge Ma Jou 'ai parenta.

³⁸Mada'a na'o 'age rema ngowa'a matengo ga'a 'o oḏu'u dawongo gena-ge; awa ngini ni tailako unanga!

³⁹Sababu gena-ge ioronongoḏu ngo-ngaku rimoi, ni nyafusu mode-mode'e cocatu toma Ngagara 'Ofi-'Ofi di'a ni siajele habari da'u ra Ma Jou'ongu Madutu tala. Mada'a ni sieanga i'a ngowa'a 'aḏi kanau pake Ngagara 'Ofi-'Ofi ma demo.

⁴⁰Mada'a mo-moini gena-ge ngini ni si'a'a ma duhu ga'a patasa re 'i kaco ua.