Read Sahu 1 Korintus 16 Bible Online

1 Korintus 16 - Sahu bible

1 Korintus 16

¹Nange-ne ngoi to kanau mangale pipisi ga'a ngini na lomu ni pula'a di'a Ma Jou'ongu Madutu 'ai 'umata toma limau Yerusalem, balasu ni mete'e 'oru ga'a ngoi ta siajele ḏua toma jama'ata Galatia.

²Migu ma wangere ma jelele i'a ioronongoḏu ngo-ngaku rimoi balasu na wola i'a ninga pipisi mete'e 'oru ga'a ngini na sanga. Pipisi gena-ge na gogono, la wakutu to sapolo ra ngini pipisi gena-ge 'i lomu ḏua.

³Wakutu ngoi to sapolo ra ngini, ngoi to pula'a surata siwatasa toma ngowa-ngowa'a ga'a ngini ngaku re to 'utusu ananga ya gasa pipisi bu-bula'a gena-ge toma jama'ata Yerusalem.

⁴Na'o paralu, ngoi to tagi mamete'e ra ananga.

⁵Ngoi to tola'a i'a daeraha Makedonia sababu ngoi rari maksudu, kara to tutumu ngini

⁶Ngoi to tegoro 'age ra ngini ḏa ngasamoi. Mada'a na'o 'orasa 'alo-'alo 'i ngadolo, ngoi ḏa to tegoro ra ngini gasa tiara i'a. Dadi 'orasa gena-ge 'i togumu i'a ngini nyengara ni riono ngoi ta dowanga 'ari ḏo-ḏagi toma limau ma sebanga.

⁷Ngoi to mau to tutumu ngini pa'i to tuḏu i'a ua, mada'a na'o Ma Jou'ongu Madutu 'o pula'a donga ra ngoi, ngoi to tegoro 'age ra ngini ḏa gasa ti'ara i'a.

⁸Mada'a nange-ne ngoi to tegoro toma limau Epesus singadolo 'o Pentakosta ma Wangere 'i ngadolo.

⁹Sababu kalaha 'age tamanga sigolona rema ngowa'a ga'a 'aḏi dola'aku ngoi, 'age ḏi'i donga ma repe rema faeda lai lamo'o toma ngi'i gena-ge di'a ngoi ta singadolo Habari Roanga ra Ma Jou'ongu Madutu tala.

¹⁰Na'o 'a Timotius 'o sapolo ra ngini, nu dawongo unanga reninga 'akala re sinyingara sa-sanangi, la unanga ḏi'i basono sanangi 'o tegoro taninga sigolona. Sababu unanga munara di'a Ma Jou, ma tero sa'olo ngoi.

¹¹Awa taninga sigolona, 'age rema ngowa'a matengo ga'a si'u'ua unanga. Siḏibo ḏi'i, ni riono unanga, la unanga nga'unu 'a dowanga 'ai ḏo-ḏagi singadolo unanga 'o maḏibo ino ra ngoi rema salamata, sababu ngoi tu totoma unanga re ioronongoḏu ngo-ngaku rimoi ma lelegu ḏi'i.

¹²Mangale nanga ioronongoḏu matengo ngo-ngaku rimoi, 'a Apolos. Soi muḏuo i'a ḏua, ngoi to golo'o mode-mode'e ra unanga, la unanga re ioronongoḏu ngo-ngaku rimoi ma lelegu, ananga gena-ge 'aḏi tutumu ngini. Mada'a nange-ne unanga 'o oḏu'u sapolo ra ngini. Mada'a na'o 'o sanga donga ḏuanga i'a unanga 'o sapolo ra ngini.

¹³Ngini balasu ni ma'istiari re ni macako'o namo-namoto taninga ngo-ngaku. Ninga 'akala re sinyingara balasu lai nau'u re ni mate'e.

¹⁴'Oru ḇato ngini ni 'a'a, si'a'a reo dadalara.

¹⁵Tantu ḏua, ngini nu nana'o 'a Stefanus re 'ai ngitu re ngale, ananga siḏa-siḏa 'aḏi dadi ngowa'a ngaku Yesus toma daeraha Akhaya. Ananga 'aḏi munara di'a Ma Jou'ongu Madutu 'ai 'umata remanga 'akala re sinyingara 'i boloto.

¹⁶Ngoi to golo'o mode-mode'e ra ngini, la ngini mode-mode'e ni mete'e ninga bi-biri'i sa'olo 'a Stefanus re ngowa'a lelegu ga'a marimoi ra ananga di'a 'aḏi munara di'a Ma Jou'ongu Madutu.

¹⁷Ngoi to sanangi wakutu 'a Stefanus, Fortunatus re 'a Akhaikus manga ta-sapolo ḏua, ananga gena-ge ma tero sa'olo ngini ninga nga-ngali.

¹⁸Ananga 'aḏi 'a'a ngoi 'ari 'akala re sinyingara 'i maroanga ma tero sa'olo ananga 'aḏi 'a'a ngini ninga 'akala re sinyingara 'i maroanga ḏi'i. Ngowa-ngowa'a ma tero ananga, ngene balasu wa'u silamo'o.

¹⁹Jama'ata-jama'ata toma daeraha Asia, ananga 'aḏi siḏingoto manga tabea ra ngini. Akwila re Priskila re jama'ata ga'a 'aḏi malomu ra ananga manga wala mai 'aḏi siḏingoto ḏi'i manga tabea ra ngini.

²⁰Ioronongoḏu ngo-ngaku rimoi 'ane mo-moini 'aḏi siḏingoto manga tabea ra ngini. Ni ma'u pula'a tabea matengo re matengo sa'olo 'i patasa di'a ngowa'a ngaku Yesus.

²¹'Ane-ne ngoi to dogo ta silefo ngoi 'ari tabea masiretene, Tabea ra ngoi Paulus.

²²Ngowa'a ga'a 'aḏi dadalara Ma Jou ua, eanga i'a 'aḏi sanga katula. Maranatha — nanga Jou 'o sapolo!

²³Ngoi to golo'o ra Ma Jou Yesus mangale 'Ai mura re dadalara sieanga i'a ua ngini.

²⁴Ngoi 'ari dadalara ra ngini mo-moini ga'a reni marimoi ra Kristus Yesus. 'Amin.