Read Sahu 1 Korintus 3 Bible Online

1 Korintus 3 - Sahu bible

1 Korintus 3

¹Ioronongoḏu ngo-ngaku rimoi, 'au nga'ene ngoi to kanau ua ra ngini ma tero sa'olo ngini ngowa'a ga'a raḏi dawongo Ma Ngagara 'Ofi-'Ofi ra Ma Jou'ongu Madutu tala. Mada'a ngoi to kanau ra ngini ma tero sa'olo ngini ngowa-ngowa'a ga'a manga 'ahu mete'e biasa dungia ma nyafusu! Ngoi to kanau so'o gena-ge ra ngini sababu ngini ninga ngo-ngaku re ninga wo-waro mangale Kristus 'ai do-doto'o ma tero sa'olo ngowa kiau moju.

²Ngoi to pula'a susu di'a ngini na ka'e ma tero sa'olo ngowa kiau. Ngoi to pula'a ua ngo-ngoromo te-te'e di'a ngini na oromo, sababu ngini ni nga'unu nyangu ni oromo ngo-ngoromo te-te'e. Re 'orasa nange-ne mai ni camu si'alusu na nga'unu nyangu.

³Ngini ninga 'akala 'i go-goḏi matengo re matengo, ma'u rubutu matengo re matengo sababu mete'e ninga 'akala re sinyingara ma mau. Gena-ge 'i dadi didina'o rimoi mangale ngini dungia ma nyafusu nu'u piri'u re ngini ninga de'oso re ḏegoro ma tero sa'olo ngowa-ngowa'a 'aḏi nana'o Ma Jou'ongu Madutu nyangu.

⁴'Age rema ngowa'a 'aḏi kanau, “Ngoi 'ari guru 'a Paulus,” mamuni'a ḏi'i 'aḏi kanau, “Ngoi 'ari guru 'a Apolos.” Ngini ninga de'oso re ḏegoro gena-ge ma tero sa'olo ngowa'a dungia!

⁵Le'a lebe la-lamo'o i'a: Apolos bolo Paulus?! Ngomi nena-ne pa'i falalomu ḇato ga'a Ma Jou'ongu Madutu 'o pake di'a riono ngini, la ngini ni ngaku Kristus. Ngomi matengo re matengo pa'i masi'a'a munara ga'a Ma Jou'ongu Madutu 'o siwatasa ra ngomi.

⁶Ngoi to so'ana, 'a Apolos 'a ajala. Mada'a Ma Jou'ongu Madutu masiretene 'a sikonyo joro gena-ge.

⁷Dadi ngowa'a so'a-so'ana bolo ngowa'a aja-ajala paralu madutu ua. Mada'a Unanga ga'a 'a sikonyo joro gena-ge paralu madutu, Unanga gena-ge Ma Jou'ongu Madutu.

⁸Ngowa'a matengo ga'a 'o so'ana re 'o ajala go-gahu, ananga manga ḏe-ḏegoro ma tero. Ananga ḏuanga i'a 'aḏi sanga ngogele ra Ma Jou'ongu Madutu mete'e manga munara, matengo re matengo.

⁹Ngomi mi munara di'a Ma Jou'ongu Madutu, re ngini ma tero sa'olo Ma Jou'ongu Madutu 'ai guḏa. Ngini ḏi'i sa'olo Ma Jou'ongu Madutu 'ai Wala di'a Unanga 'o tegoro.

¹⁰Pahe ga'a Ma Jou'ongu Madutu 'o pula'a ḏua ra ngoi, ngoi ta pake di'a singadolo Habari Roanga ra ngini. Ngoi ma tero sa'olo wala ma tukanga ga'a 'a'a wala ma bangini. Mada'a ngowa'a lelegu 'aḏi sapolo doto'o ngini, ma tero sa'olo ngowa'a ga'a 'aḏi side'oso manga wala, ya side'oso toma bangini gena-ge ma re'u. Mada'a matengo re matengo balasu 'aḏi tailako manga munara di'a Ma Jou'ongu Madutu, ma tero sa'olo wala ma tukanga tailako 'ai munara wakutu 'o side'oso wala toma bangini gena-ge.

¹¹Sababu Ma Jou'ongu Madutu masiretene 'a siḏe-ḏegoro Yesus Kristus sa'olo bangini gena-ge. Re bangini gena-ge di'a side'oso wala; bangini ma lelegu 'i cua.

¹²'Age tukanga wala mode-mode'e side'oso wala toma bangini gena-ge ma re'u, ananga 'aḏi pake wala ma pakakasa reo guraci, reo salaka, re 'age ḏi'i reo maḏi permata. Mada'a 'age ḏi'i tukanga wala sa-sakala 'aḏi side'oso wala toma bangini gena-ge ma re'u, ananga 'aḏi pake wala ma pakakasa reo ate, reo 'usumu reo e'a ma 'oi.

¹³Matengo nanga munara ḏuanga i'a ngowa'a ya oḏi'i wakutu Kristus dadunu 'o sapolo soi moi moju di'a sijuruhakimi ngowa'a. Toma wangere gena-ge u'u ya disa waro matengo re matengo nanga munara 'i rousu bolo ua. Na'o 'ai munara 'i rousu, 'i ro'u ua. Mada'a na'o 'ai munara 'i rousu ua, 'i ro'u.

¹⁴Na'o ngowa'a ga'a 'aḏi side'oso manga wala toma bangini gena-ge, 'aḏi sipake wala ma pakakasa 'i rousu singadolo 'ai wala 'i ro'u ua, ngowa'a gena-ge ḏuanga i'a 'aḏi dawongo manga ngogele.

¹⁵Mada'a na'o manga wala gena-ge 'i ro'u, ananga ḏuanga i'a 'aḏi sanga ngogele ua. Tantu ḏua, ananga 'aḏi sanga salamata moju. Mada'a ananga gena-ge ma tero sa'olo ngowa'a matengo 'o lalara supu tai wala ga'a ma u'u leja-lejanga re unanga gena-ge sa'i 'o ro'u.

¹⁶Ngini ni waro bolo ua, mangale ngini gena-ge sa'olo Ma Jou'ongu Madutu 'ai Wala?! Re Ma Ngagara 'Ofi-'Ofi ra Ma Jou'ongu Madutu tala, Enanga 'i tegoro taninga sigolona?!

¹⁷Na'o ngowa'a ya camari Ma Jou'ongu Madutu 'ai Wala, Unanga 'o sihukumu ngowa'a gena-ge sababu ngini Ma Jou'ongu Madutu 'ai Wala ga'a Ma Jou'ongu Madutu 'o cumutu di'a Unanga masiretene.

¹⁸Awa ni sihaga ninga diri masiretene. Na'o 'age taninga sigolona matengo i'a ga'a 'o ta'ajiri unanga ngowa'a 'akala soro'unu toma manusia ma momina; unanga gena-ge balasu 'o madadi sa'olo ngowa'a haga toma manusia ma momina, la unanga mode-mode'e ngowa'a 'akala soro'unu ra Ma Jou'ongu Madutu 'ai momina.

¹⁹Ananga ga'a ngowa'a 'akala soro'unu toma manusia ma momina; ra Ma Jou'ongu Madutu 'ai momina ngowa'a gena-ge 'aḏi haga. Sababu 'ua re 'au wali moju 'i silefo ḏua toma Boku 'Ofi-'Ofi, “Ma Jou'ongu Madutu 'o pake ananga gena-ge ngowa'a 'akala soro'unu sa'olo jojoḏi di'a sisado ananga.”

²⁰'Age ḏi'i 'i silefo so'o ne: “Ma Jou'ongu Madutu 'a waro ananga ga'a ngowa'a 'akala soro'unu toma manusia ma momina mangale manga fikirana ma faeda 'i cua.”

²¹Sababu gena-ge, matengo i'a mai awa 'o sihie ngowa'a, sababu mo-moini ninga paralu Ma Jou'ongu Madutu ro pula'a ra ngini re 'i dadi di'a ngini:

²²bae Paulus, bae Apolos, bae Petrus, bae dungia ne, bae 'ahu bae sengene, bae 'orasa nena-ne bolo toma biono i'a; mo-moini gena-ge di'a ngini ninga la-la.

²³Re ngini ni marimoi ra Kristus re 'a Kristus 'o marimoi ra Ma Jou'ongu Madutu.