Read Sahu 2 Korintus 1 Bible Online

2 Korintus 1 - Sahu bible

2 Korintus 1

¹Surata nena-ne ma 'asala ra ngoi Paulus re 'a Timotius, unanga gena-ge ga'a ngene nanga ioronongoḏu ngo-ngaku rimoi ḏi'i. Ngomi ma siḏingoto surata nena-ne di'a ioronongoḏu ngo-ngaku rimoi toma jama'ata Korintus. Ngini ga'a Ma Jou'ongu Madutu ro 'aro'o di'a ni dadi Unanga 'ai Jama'ata. Re ngomi siḏingoto ḏi'i surata nena-ne di'a Ma Jou'ongu Madutu 'ai 'umata toma daeraha Akhaya mo-moini. Ngoi, Paulus, masiretene to dadi Yesus Kristus 'ai so-soma'a sababu Ma Jou'ongu Madutu 'o 'aro'o ngoi, gena-ge 'i mete'e Unanga 'ai mau.

²Ngoi re 'a Timotius, ngomi mi manyiata ra Ma Jou'ongu Madutu nanga Ḇaḇa, re Yesus Kristus nanga Jou, la 'O pula'a dame re pula'a ḏi'i mura re dadalara ra ngini.

³Puji re silamo'o Ma Jou'ongu Madutu ga'a nanga Jou Yesus Kristus 'ai Ḇaḇa. Unanga gena-ge nanga Ḇaḇa ḏi'i ga'a 'O sijumu 'Ai 'akala re sinyingara ma la-la tau-taunu ra ngene re Ma Jou'ongu Madutu ga'a 'O site'e nanga 'akala re sinyingara.

⁴Toma 'orasa ngomi mi basono kangela 'oru ḇato, Unanga 'o site'e minga 'akala re sinyingara. Dadi sababu ngomi remi basono de-de'e gena-ge ra Ma Jou'ongu Madutu ino, ngomi nga'unu site'e ngowa'a lelegu manga 'akala re sinyingara toma 'orasa ananga basono kangela 'oru ḇato ḏi'i.

⁵Ma Jou Yesus Kristus 'a basono sangisara ma repe, re 'Ai sangisara gena-ge ngomi rema basono ḏi'i. Re ngomi sanga de-de'e 'i mamete'e rea Kristus ḏi'i.

⁶Sababu gena-ge ngomi mi basono sangisara, la ngomi nga'unu mi site'e ninga 'akala re sinyingara, re la ngini ni basono Ma Jou'ongu Madutu 'ai salamata ḏi'i. Ma Jou'ongu Madutu ro site'e minga 'akala re sinyingara, la ngomi nga'unu mi site'e ḏi'i ngini ninga 'akala re sinyingara. Dadi ngini nga'unu matahana reninga 'akala ḇanyo wakutu ni basono sangisara. Sangisara gena-ge, ma tero sa'olo ngomi ḏi'i ga'a rema basono.

⁷Sababu gena-ge, ngomi minga ngo-nganono 'i sitaka-taka ua mangale ngini nga'unu ni tahana sangisara tau-taunu. Sababu ngomi waro ngini reni basono sangisara ma tero sa'olo ngomi ḏi'i So'o gena ḏi'i, Ma Jou'ongu Madutu ḏuanga i'a 'o site'e ninga 'akala re sinyingara ma tero sa'olo Unanga 'o site'e minga 'akala re sinyingara.

⁸Ioronongoḏu ngo-ngaku rimoi, ngomi mau ngini ni waro mangale 'oru ga'a ngomi basono sangisara toma daeraha Asia. Sangisara ga'a ngomi ma doiti tubuso masala, singadolo ngomi ma tahana nga'unu ua. Dadi ngomi minga ngo-nganono ri cua di'a nyengara mi 'ahu moju!

⁹Ngomi mi basono tala ma tero sa'olo singe-ngeta'a hukumu sengene. Mada'a enanga gena-ge 'i dadi, la awa ngomi masidiriwa taminga de-de'e masiretene. Siḏibo ḏi'i, pa'i mi masidiriwa ḇato ra Ma Jou'ongu Madutu ga'a si'ahu ngowa-ngowa'a ga'a raḏi sengene.

¹⁰Unanga ro sisalamata ngomi toma bahala lamo'o gena-ge, singadolo mi sengene ua. Re Unanga ḏuanga i'a 'o sisalamata ngomi toma bahala 'oru ḇato ga'a ngomi ma sanga toma 'orasa nange-ne. Sababu gena-ge ra Ma Jou'ongu Madutu ḇato ngomi ma singanono mangale Unanga ḏi'i ḏuanga i'a 'O sisalamata ngomi toma bio-biono i'a.

¹¹Mada'a ngomi mi masidiriwa ḏi'i ra ngini ninga nyiata ra Ma Jou'ongu Madutu di'a ngomi, la Unanga ḏuanga i'a 'o sisalamata ngomi toma bahala. Dadi wakutu ngowa'a manga repe 'aḏi manyiata ra Ma Jou'ongu Madutu di'a ngomi, kara Unanga 'o sisalamata ngomi toma bahala. Sababu gena-ge, ngowa'a manga repe ḏi'i ḏuanga i'a 'aḏi sibere ie manga murasa ma la ra Ma Jou'ongu Madutu.

¹²Ngomi mi basono tala sanangi masala, sababu minga 'akala re sinyingara ma kanau 'i dadi minga sakisi mangale minga 'ahu ma duhu: Ngomi remi sijumu tau-taunu de'oso re ḏegoro 'ofi-'ofi reminga 'akala re sinyingara 'i ba-banari toma ngowa'a mo-moini, re la-lamo'o i'a ra ngini wakutu mi tegoro taninga sigolona pasala ḏua. 'Ahu ma duhu gena-ge 'i sisanangi Ma Jou'ongu Madutu 'ai 'akala re sinyingara. Re ḏi'i, ngomi minga de'oso re ḏegoro gena-ge 'i mete'e ua manusia manga 'akala ma soro'unu, mada'a 'i mete'e Ma Jou'ongu Madutu 'ai mura re dadalara ga'a 'O pula'a ra ngomi.

¹³'Oru ga'a ngomi remi lefo di'a ngini, ma pake pa'i demo-demo ḇato ga'a ngini nga'unu na baca re na sahe. Nange-ne ngini ni sahe ngomi minga maksudu mo-moini nyangu. Mada'a ngoi to nganono ḏuanga i'a ngini nga'unu ni sahe 'oru ga'a ngomi minga maksudu. Dadi toma 'orasa Ma Jou Yesus ḏuanga i'a dadunu 'o sapolo moju, ngini nyengara ni sitoro mangale ngomi, ma tero sa'olo ngomi ḏi'i mi sitoro mangale ngini.

¹⁵Ngoi to ngaku mode-mode'e ngini nga'unu ni sitoro mangale ngomi. Dadi ngoi 'ari maksudu di'a tini tutumu ngini siḏa tari ḏo-ḏagi toma daeraha Makedonia. Re tini tutumu moju wakutu ngoi to maḏibo. Dadi ngini ni sanga 'utungu soi ḏiḏi. Togumu i'a, ngini nga'unu ni riono ngoi ta sikiḏanga 'ari ḏo-ḏagi toma daeraha Yudea.

¹⁷Mada'a ngoi reta ngali 'ari maksudu gena-ge. Awa ni mafikiri 'i gapanga ngoi ta ngali 'ari maksudu! Re awa ni mafikiri ḏi'i, ngoi ta si'a'a 'ari maksudu ma tero sa'olo ngowa'a ga'a 'aḏi ngaku Yesus ua. Ngowa'a gena-ge 'aḏi kanau, “Ya” mada'a 'aḏi si'a'a ua. Ngoi ma tero ua sa'olo ngowa'a gena-ge!

¹⁸Mada'a Ma Jou'ongu Madutu 'ai jaji 'i ngali yoḏu'u ra ngene. So'o gena-ge ḏi'i, ngomi minga maksudu 'i ngali ua: Soi moi ngoi to kanau, “Ya, ngoi ḏuanga i'a to tutumu ngini,” mada'a ḏuanga i'a ngoi to tuḏu ua ra ngini.

¹⁹Ngoi, 'a Timotius re 'a Silas, ngomi mi singadolo habari mangale Yesus Kristus, Ma Jou'ongu Madutu 'ai Ngowa'a Nau'u, taninga sigolona. Ngomi mi siajele ra ngini mangale, 'oru ḇato Yesus Kristus 'o siajele; Unanga 'a si'a'a! Soi moi nyangu Unanga 'o siajele, “Ya, ngoi ḏuanga i'a ta si'a'a 'ori i'a,” mada'a Unanga 'a si'a'a ua gena-ge.

²⁰Ma Jou'ongu Madutu 'ai jaji mo-moini ra ngene, Yesus Kristus ḏuanga i'a 'a sitotomo sababu ngene rewo marimoi ra Unanga gena-ge. Sababu gena-ge, ngene nyengara wa kanau, “ 'Amin”[1] ra Ma Jou'ongu Madutu sababu Kristus ḏuanga i'a 'a si'a'a. Sidogo ḏi'i, wakutu ngene wo kanau, “ 'Amin” ngene wo simulia Ma Jou'ongu Madutu.

²¹Re Unanga masiretene 'o pula'a de-de'e ra ngomi re ra ngini, la ngene nanga ngo-ngaku ra Kristus kama elala ua. Re Ma Jou'ongu Madutu ḏi'i 'o cumutu re 'A siwola i'a ngene di'a 'Ai 'umata.

²²Re Unanga 'a sitantukanga ḏua ngene wo dadi Unanga 'ai 'umata, sababu Ro pula'a 'Ai Ngagara 'Ofi-'Ofi ra ngene nanga 'akala re sinyingara sa'olo didina'o rimoi, ga'a ḏuanga i'a Unanga 'o pula'a ra ngene mo-moini ga'a 'a sijaji pasala ḏua.

²³Ngoi to sa-sakala ua: Ma Jou'ongu Madutu, Unanga 'ari sakisi. Unanga gena-ge 'a waro 'ari 'akala re sinyingara ma dara mangale ngoi to tagi di'a tutumu ngini toma limau Korintus 'i dadi nyangu, sababu to oḏu'u sikangela ngini ninga 'akala re sinyingara.

²⁴Ngoi to simau-mau ngini ua mangale 'oru ga'a ngini balasu ni ngaku sababu ninga ngo-ngaku lai te'e ḏua. Siḏibo ḏi'i, ngoi pa'i to dadi ḏagilomu munara ra ngini, la ngini ninga 'akala re sinyingara lebe maroanga.