Read Sahu 2 Korintus 13 Bible Online

2 Korintus 13 - Sahu bible

2 Korintus 13

¹Ngoi ḏuanga i'a to sapolo tutumu ngini, nena-ne ma soi ro'ange. 'Elingi toma Boku 'Ofi-'Ofi ma dara 'i silefo so'o ne, “Na'o ngowa'a mau da'awa ngowa'a lelegu, balasu 'age rema sakisi nga muḏiḏi bolo nga ḏu'ange, kara 'urusu hali gena-ge.”

²Ngoi reto si'elingi ra ngini wakutu to sapolo tutumu ngini ma soi ḏiḏi. 'Orasa nange-ne wakutu ngoi to ma'u kiḏanga moju ra ngini, ngoi dadunu tini si'elingi. Wakutu ngoi dadunu to sapolo, ngoi to hukumu ngowa'a mo-moini ga'a 'aḏi baraḏosa: Ananga ga'a baraḏosa wakutu to sapolo tutumu ngini ma soi ḏiḏi nyangu re ananga ga'a baraḏosa wakutu to sapolo tutumu ngini ma soi ḏiḏi pasala i'a.

³Ngoi ḏuanga i'a ta si'a'a so'o gena-ge, sababu ngini ni mau oḏi'i ma bukiti mangale Kristus 'o pake ngoi di'a siajele 'Ai demo-demo ra ngini. Dadi wakutu ngoi to sapolo re Kristus 'o ḇangata ananga ga'a 'aḏi baraḏosa taninga sigolona, 'Ai demo-demo gena-ge 'i mereoso ua mada'a rema kuasa.

⁴Wakutu ngowa'a 'aḏi sisalib Unanga, Unanga 'o lamahana. Mada'a 'orasa nange-ne Unanga ro dadunu 'ahu moju sababu Ma Jou'ongu Madutu 'ai kuasa. Ngomi ḏi'i mi lamahana ma tero sa'olo Kristus, mada'a ngomi mi sanga 'ahu su-sungi sababu mi marimoi ra Kristus. Re wakutu ngomi mi talaḏi ngini, ngini ni oḏi'i Kristus 'ai kuasa ra Ma Jou'ongu Madutu ino, 'age ra ngomi.

⁵Ngini ni parikisa ninga diri masiretene: Ngini ni ngaku Kristus mode-mode'e bolo ua?! Tantu ḏua, ngini ni ma'insafu masiretene mangale Yesus Kristus ro 'ahu taninga 'akala re sinyingara, bolo awa-awa ngini ninga ngo-ngaku 'i mode-mode'e ua?!

⁶Re ngoi to nganono ngini ni ma'insafu mangale ngomi mode-mode'e Yesus 'ai so-soma'a.

⁷Ngomi mi manyiata ra Ma Jou'ongu Madutu mangale Unanga ḏuanga i'a 'o riono ngini, la ni madaga'a 'ori i'a ma ḏosa awa. Dadi ngomi, Yesus 'ai so-soma'a, mi paralu ua sijumu minga kuasa sa'olo di'a sihukumu ngini. Minga nyiata gena-ge ma maksudu, la ngini ni 'a'a 'oru ḇato mete'e Ma Jou'ongu Madutu 'ai 'akala ma mau. Na'o ngini ni 'a'a so'o gena, ngomi mi sanga donga ua di'a sijumu minga kuasa di'a sihukumu ngini. Mada'a 'oru ua, ngomi mi matuhu sa'olo ngowa'a lamahana taminga lawana

⁸sababu ngomi mi oḏu'u madaga'a 'ori i'a ga'a 'i mete'e ua 'ori i'a banari; ngomi pa'i mi mete'e ga'a banari ḇato.

⁹Ngomi sanangi, na'o ngowa'a 'aḏi fikiri ngini ninga ngo-ngaku 'i te'e mada'a ananga 'aḏi ta'ajiri ngomi mi lamahana sababu mi sijumu ua minga kuasa di'a sihukumu ngini. Re ngomi ḏi'i mi manyiata mangale ngini dadunu ni dadi ngowa'a ga'a 'aḏi 'a'a 'oru ḇato mete'e tau-taunu Ma Jou'ongu Madutu 'ai 'akala ma mau.

¹⁰Ma sababu gena-ge ngoi to lefo surata nena-ne, wakutu ngoi 'age taninga sigolona nyangu. Dadi na'o ḏuanga i'a ngoi to sapolo ra ngini, ngoi to pake ua Ma Jou Yesus 'ai kuasa di'a to ḇangata ngini. Sababu Ma Jou Yesus 'ai kuasa ga'a 'o pula'a ra ngoi, enanga gena-ge di'a ta site'e ninga ngo-ngaku, ta siwejere ua ninga ngo-ngaku.

¹¹Ioronongoḏu ngo-ngaku rimoi, ma ḏo-ḏogumu, ngini balasu ni maroanga re makutale ni dadi ngowa'a 'aḏi 'a'a 'oru ḇato mete'e tau-taunu Ma Jou'ongu Madutu 'ai 'akala ma mau, re na dawongo 'ari ajele mangale mo-moini. Ngini balasu ninga 'akala re sinyingara 'i dadi rimoi re ninga 'ahu balasu toma dame ma dara. Ma Jou'ongu Madutu ga'a 'o dadalara re dame ma cimi, Unanga ḏuanga i'a 'o sieanga i'a ngini ua.

¹²Ni ma'u tabea matengo re matengo reninga 'akala re sinyingara 'i ba-banari. Ma Jou'ongu Madutu 'ai 'umata mo-moini toma ngi'i nena-ne, 'aḏi siḏingoto manga tabea ra ngini.

¹³Ngoi to manyiata mangale Ma Jou Yesus Kristus 'Ai mura re dadalara, Ma Jou'ongu Madutu 'Ai dadalara re Ma Ngagara 'Ofi-'Ofi; mo-moini gena-ge 'aḏi sieanga i'a ua ra ngini mo-moini.