Read Sahu 2 Korintus 4 Bible Online

2 Korintus 4 - Sahu bible

2 Korintus 4

¹Dadi sababu Ma Jou'ongu Madutu 'o sijumu 'ai 'akala re sinyingara ma la-la ra ngomi, Unanga gena-ge 'o cumutu ngomi di'a singadolo mangale jaji ma su-sungi. Sababu gena-ge, ngomi minga 'akala re sinyingara 'i rapo'o ua.

²Siḏibo ḏi'i, ngomi ma sipake ua duhu ga'a 'i go-gogono ga'a sipula'a mara'a ngomi: Ngomi mi sihaga ngowa'a ua bolo ma ngali Ma Jou'ongu Madutu 'ai demo ua. Mada'a ngomi reminga 'akala re sinyingara ma ba-banari mi de-de'oso re mi mete'e Unanga 'ai mau. Sababu gena-ge, Ma Jou'ongu Madutu minga sakisi mangale ngomi mi siajele pa'i ba-banari ḇato dadi ngowa'a mo-moini nyengara 'aḏi ngaku Habari Roanga ga'a ngomi ma singadolo.

³Mada'a 'age rema ngowa'a 'aḏi ngaku ua Habari Roanga ga'a ngomi ma singadolo ḏua. Ngowa'a gena-ge ma tero sa'olo ngowa'a ga'a manga fikirana 'i kuci, gena-ge ma tero sa'olo daku manga biono reo jujuwurungu. Re 'aḏi tagi toma ngo'omo sigasa toma naraka.

⁴'Iblisi ga'a 'i kuasa dungia ya kuci ngowa'a manga fikirana singadolo ananga 'aḏi ngaku awa, re 'aḏi oḏi'i yoḏu'u Habari Roanga ma cahaya ga'a 'i waiti ra Kristus 'ai mulia. Unanga gena-ge ma tero Ma Jou'ongu Madutu 'ai gabara.

⁵Ngomi mi singadolo ra ngini mangale minga diri ua, mada'a mangale Yesus Kristus, Unanga gena-ge Ma Jou. Re ngomi mi de-de'oso ngini munara ma tero sa'olo ninga budaka di'a Unanga.

⁶Sababu Ma Jou'ongu Madutu ga'a 'o kanau, “Toma hafu-hafu, balasu 'i waiti tarangi,” Unanga gena-ge ro sigare 'Ai tarangi tananga 'akala re sinyingara ma dara. Ma Jou'ongu Madutu ro si'a'a so'o gena-ge, la ngene nyengara wa sahe Unanga 'ai mulia. Unanga 'ai mulia gena-ge 'i ma tero sa'olo ma tarangi ga'a wa oḏi'i ra Kristus 'ai biono. Dadi Unanga 'a siwaiti Ma Jou'ongu Madutu 'ai mulia ra ngene.

⁷Ngomi ma tero sa'olo giu'u tana'a ga'a ma ijana 'i cua, mada'a mi gasa harata soroga. Enanga so'o gena-ge, la ngowa-ngowa'a 'aḏi waro mangale kuasa ma pari cua, pa'i ra Ma Jou'ongu Madutu ḇato; ra ngomi ua.

⁸Ngowa'a 'aḏi bitungu ngomi, mada'a mi palatu ua. Ngomi ma waro minga gogare riwara, mada'a minga 'akala re sinyingara 'i rapo'o ua.

⁹Ngowa'a 'aḏi sikisa ngomi, mada'a Ma Jou'ongu Madutu 'o sieanga i'a ngomi ua. Soi rai o'o i'a ngomi mi sanga ca'olo singadolo mi ruba, mada'a mi sengene ua.

¹⁰Wakutu ngomi mi tagi toma ngi'i le'a ḇato, ma waro 'age rema ngowa'a mau 'aḏi sisengene ngomi, ma tero sa'olo ngowa'a mau 'aḏi sisengene Yesus. Enanga so'o gena, la ngowa'a ya oḏi'i Yesus mode-mode'e 'o 'ahu taminga 'ahu ma dara.

¹¹Ngomi mi 'ahu-'ahu moju toma dungia nena-ne, ngowa'a 'aḏi sinati-nati tau-taunu mau sengene ngomi, sababu ngomi mi singadolo Habari Roanga mangale Yesus. Enanga so'o gena-ge, la ngowa'a ya oḏi'i Yesus mode-mode'e 'o 'ahu-'ahu taminga 'ahu ma dara.

¹²Dadi, ngomi mi fikiri mangale ḏuanga i'a ḏa ngowa'a 'aḏi sisengene ngomi. Mada'a 'oru ua! Sababu minga munara, ngini ḏuanga i'a ni sanga 'ahu kasingado-ngadolo i'a.

¹³Toma Boku 'Ofi-'Ofi ma dara 'i silefo so'o ne: “Ngoi to ngaku Ma Jou'ongu Madutu nyengara 'o saolo ngoi, sababu gena-ge ngoi to kanau.” Minga ngo-ngaku ma tero sa'olo unanga gena-ge 'Ai ngo-ngaku. Dadi ngomi mi singadolo Ma Jou'ongu Madutu 'ai demo.

¹⁴Sababu ngomi mi ngaku mode-mode'e Ma Jou'ongu Madutu, ga'a dadunu Ro si'ahu Yesus toma ngowa'a senge-sengene manga sigolona, Unanga gena-ge ḏuanga i'a 'O si'ahu ngomi ḏi'i mamete'e rea Yesus. Re kara Yesus 'o gasa ngomi re ngini sitalaḏi ra Ma Jou'ongu Madutu 'ai biono.

¹⁵Minga sangisara mo-moini gena-ge di'a ngini, la lebe repe ngowa'a ya basono mura re dadalara ra Ma Jou'ongu Madutu. Ḏua ngowa'a ya sibere ie manga murasa ma la ra Ma Jou'ongu Madutu singadolo Unanga gena-ge 'o sanga puji re silamo'o.

¹⁶Kalaha minga lese 'i dadi cira wange moi-wange moi, minga 'akala re sinyingara ma dara 'i dadi su-sungi wange moi-wange moi. Sababu gena-ge, ngomi minga 'akala re sinyingara 'i rapo'o ua.

¹⁷Nange-ne ngomi basono sangisara mada'a gena-ge 'i ti'ara ua re ḏubuso woḏi ua. Ḏuanga i'a ngomi mi sanga ngogele lai lamo'o. Re na'o site-tero ngogele gena-ge reo sangisara ga'a mi basono, ngogele gena-ge ma pari cua re kama ḏo-ḏogumu ua.

¹⁸Dadi ngomi ma tailako ua 'ori i'a ga'a ngomi ma oḏi'i, siḏibo ḏi'i ngomi ma tailako 'ori i'a ga'a ngomi ma oḏi'i ua. Sababu 'oru ḇato ga'a ma oḏi'i, enanga ma dahana ti'ara ua. Mada'a 'oru ḇato ga'a ma oḏi'i ua, enanga ma dahana kasingado-ngadolo i'a.