Read Sahu 2 Korintus 5 Bible Online

2 Korintus 5 - Sahu bible

2 Korintus 5

¹Sababu ngomi remi waro mangale nanga lese toma dungia nena-ne, 'i ma tero sa'olo wala ga'a 'orasa nange-ne ngene wa tegoro. Re ngomi remi waro, na'o lese gena-ge 'i pinya'olo[2] Ma Jou'ongu Madutu ḏuanga i'a 'o sidodahe lese su-sungi ḏu moi toma soroga di'a ngene. Lese su-sungi gena-ge manusia 'aḏi 'a'a ua, mada'a Ma Jou'ongu Madutu masiretene 'A 'a'a, re enanga kama sengene riwara kasingado-ngadolo i'a.

²Mada'a toma 'orasa nange-ne, wakutu ngene wo 'ahu-'ahu moju toma dungia, ngene wo iḏala nanga sangagara sababu wa nyanyaḏi masala di'a wo tegoro tananga lese su-sungi ga'a toma soroga.

³Sababu wakutu ngene wo dawongo lese su-sungi gena-ge, ngene nanga nyawa 'i wa-watolo ua.

⁴Wakutu ngene wo tegoro moju tananga lese toma dungia nena-ne, ngene wo iḏala nanga sangagara sababu nanga gina lai tubuso. Mada'a ngene nyafusu wo sengene, la ngene wo sisoi'i tala nanga lese toma dungia nena-ne! Siḏibo ḏi'i, ngene mau wo pake lese su-sungi ga'a si'a'a toma soroga. Dadi ngene nanga lese ga'a ḏuanga i'a 'i sengene, 'i singali reo lese su-sungi ga'a 'ahu kasingado-ngadolo i'a.

⁵Ma Jou'ongu Madutu masiretene ra sidodahe ngene di'a wa dawongo lese su-sungi gena-ge. Re Unanga ro pula'a Ma Ngagara 'Ofi-'Ofi ra ngene sa'olo bukiti ga'a ḏuanga i'a ngene wo dawongo lese su-sungi gena-ge.

⁶Sababu gena-ge, ngomi basono minga 'akala re sinyingara te'e tau-taunu. Ngomi mi waro mangale minga lese ma tero sa'olo wala ga'a mi tegoro moju toma dungia nena-ne. Dadi ngomi tegoro mamete'e nyangu ra Ma Jou Yesus toma soroga.

⁷Re dadi ngomi mi 'ahu ma dasara reo minga ngo-ngaku ra Kristus, enanga ma dasara ua ga'a ngomi nyengara ma oḏi'i.

⁸Ngoi dadunu to kanau: Ngomi minga 'akala re sinyingara 'i te'e. Re ḏi'i, ngomi lebe mi nyanyaḏi mi sisoi'i tala nanga lese, la nga'unu mi tegoro marimoi ra Ma Jou Yesus.

⁹Sababu gena-ge, ngomi makutale mode-mode'e di'a ma sisanangi Unanga 'ai 'akala re sinyingara: bae ngomi mi tegoro toma dungia nena-ne moju, bae ngomi mi tegoro marimoi ra Unanga da'u toma soroga.

¹⁰Sababu ngene mo-moini ḏuanga i'a wo talaḏi toma Juruhakimi, gena-ge Kristus. Re na'o ngene nanga ga'a 'i la-la toma dungia nena-ne, sanga ngogele. Mada'a na'o ngene nanga ga'a 'i cira, sanga ngogele ua.

¹¹Sababu gena-ge, ngomi mi silamo'o re mojongo nanga Jou Yesus sababu Unanga ḏuanga i'a 'O sijuruhakimi ngene. Dadi ngomi makutale mi baja ngowa-ngowa'a di'a 'aḏi ngaku Kristus. Ma Jou'ongu Madutu 'a waro ngomi minga 'akala re sinyingara ma dara re ngomi mi nganono ngini ḏi'i ni waro ngomi taninga 'akala re sinyingara ma dara.

¹²Wakutu ngoi to kanau so'o gena-ge, ngomi mi matoro ua minga diri. Siḏibo ḏi'i, ngomi pa'i mi mau pula'a 'alasana rimoi ra ngini, la ngini nyengara ni sitoro mangale ngomi toma ngowa'a ga'a 'aḏi dawongo ngomi ua. Dadi ngini ni waro ma duhu sa'olo ngini balasu ni sangoro ngowa'a gena-ge ga'a pa'i matoro mangale manga 'ori i'a i'a ga'a nyengara maoḏi'i, mada'a manga 'akala re sinyingara ma dara 'i cira.

¹³'Age mamuni'a ga'a 'aḏi ta'ajiri ngomi sa'olo ngowa'a pona. Gena-ge sababu ngomi mi munara reminga galasau'u, la mi sisanangi Ma Jou'ongu Madutu. 'Age mamuni'a ḏi'i 'aḏi ta'ajiri ngomi ma tero sa'olo ngowa'a 'akala romanga. Gena-ge sababu ngomi mi munara reminga galasau'u, la riono ngini.

¹⁴Ngomi mi 'a'a so'o gena-ge sababu Kristus 'ai dadalara 'i sinyanyasele minga 'akala re sinyingara. Sababu ngomi mi ngaku mode-mode'e ga'a ngowa'a matengo 'O sengene di'a ngowa'a mo-moini. Sababu gena-ge, ma tero sa'olo ngowa'a mo-moini raḏi sengene.

¹⁵Gena-ge ma ngale: Kristus ro sengene di'a 'o tuusu ngowa'a mo-moini, la ngowa'a 'aḏi 'ahu di'a pa'i 'aḏi sisanangi manga 'akala re sinyingara ḇato ua, mada'a di'a 'aḏi sisanangi Unanga 'ai 'akala re sinyingara. Unanga gena-ge ga'a Ro sengene, dadunu Ro 'ahu moju di'a ananga.

¹⁶Sababu gena-ge, ngomi mi ta'ajiri riwara ngowa'a mete'e manusia manga fikirana. Kalaha, 'au nga'ene ngomi ḏi'i mi ta'ajiri Kristus, mete'e manusia manga fikirana. Mada'a 'orasa nange-ne, ngomi mi 'a'a so'o gena riwara.

¹⁷Sababu gena-ge, na'o 'age rema ngowa'a ga'a raḏi marimoi ra Kristus, ananga gena-ge raḏi dadi manusia su-sungi. Manusia manga 'ahu ma siḏa ri cua. 'Orasa nange-ne, ananga manga 'ahu 'i dadi su-sungi.

¹⁸Mo-moini gena-ge Ma Jou'ongu Madutu 'ai munara. Ma Jou'ongu Madutu 'o sirimoi ngene ra Unanga masiretene, sababu Kristus. Re Unanga 'o 'utusu ngomi di'a mi singadolo habari gena-ge toma ngowa-ngowa'a lelegu, la ananga nyengara 'aḏi sirimoi ra Ma Jou'ongu Madutu.

¹⁹Gena-ge, ngomi ma singadolo habari mangale sababu Kristus 'ai se-sengene toma salib, Ma Jou'ongu Madutu nyengara 'o sirimoi manusia ra Unanga masiretene. Sababu gena-ge, Ma Jou'ongu Madutu 'o roimi riwara manusia manga ḏosa ga'a manusia raḏi 'a'a. Re Ma Jou'ongu Madutu ro pula'a tugasa ra ngomi di'a mi singadolo habari gena-ge.

²⁰Sababu gena-ge, ngomi remi dadi Kristus 'ai 'utusana. Enanga ma tero sa'olo Ma Jou'ongu Madutu masiretene 'o pake ngomi di'a siajele 'Ai demo-demo ra ngini. Dadi ngomi mi golo'o mode-mode'e ra ngini rea Kristus 'ai lomanga: Ni marimoi ra Ma Jou'ongu Madutu!

²¹Kristus 'o 'a'a ḏosa ua, mada'a Ma Jou'ongu Madutu 'o 'a'a Unanga 'a doiti ngene nanga ḏosa. Ma Jou'ongu Madutu 'o 'a'a so'o gena, la ngene nyengara marimoi ra Unanga re kananga ḏosa ua ra Unanga 'ai momina.