Read Sahu 2 Korintus 6 Bible Online

2 Korintus 6 - Sahu bible

2 Korintus 6

¹Sababu ngomi mi munara mamete'e ra Ma Jou'ongu Madutu, mi golo'o mode-mode'e ra ngini, awa ni siparasaja Ma Jou'ongu Madutu 'ai mura re dadalara ra ngini.

²Toma Boku 'Ofi-'Ofi ma dara Ma Jou'ongu Madutu 'o kanau so'o ne: “Toma 'orasa Ngoi to cumutu ngini, Ngoi to sijumu 'ari mura re dadalara re To dawongo ngini ninga nyiata, re salamata ma wangere, Ngoi tini riono ngini.” Ngoi, Paulus to siajele ra ngini: Totoho la-la ino! Nange-ne, enanga ma 'orasa Ma Jou'ongu Madutu ro cumutu di'a sijumu 'Ai mura re dadalara. Nange-ne, enanga ma 'orasa Unanga mau 'o sisalamata ngini.

³Matengo i'a mai ua, ngomi mau mi siruwahe 'ai rorasa, dadi ngowa'a manga 'alasana 'i cua di'a 'aḏi sisala ngomi minga munara di'a Ma Jou'ongu Madutu. Sababu gena-ge, ngomi mi ma'istiari taminga de'oso re ḏegoro 'age 'ori i'a ceka'a i'a mai ua ga'a dola'aku ngowa'a manga ngo-ngaku.

⁴Siḏibo ḏi'i taminga de'oso re ḏegoro ma dara, ngomi mi sijumu toma ngowa-ngowa'a mo-moini, ngomi mi dadi Ma Jou'ongu Madutu 'ai falalomu mode-mode'e. Dadi ngomi mi tahana reminga 'akala ḇanyo bae susa re sangisara, bae dola'aku 'oru ḇato ga'a ngomi mi sanga:

⁵Ngomi sanga ca'olo, sanga bui, ngowa'a repe 'aḏi malomu di'a mau 'a'a kaco sababu ngomi. Ngomi mi munara tubuso, singadolo soi rai o'o i'a mi otu ua, bolo mi sanga ngo-ngoromo ua.

⁶Re ḏi'i ngomi sijumu mangale ngomi mi dadi Ma Jou'ongu Madutu 'ai falalomu mode-mode'e, sababu mi sijumu minga 'akala re sinyingara boloto, minga wo-waro lai ngido mangale Ma Jou'ongu Madutu 'ai demo, minga 'akala ḇanyo re 'akala rousu ra guna ḇato. Ngomi mi masidiriwa ra Ma Jou'ongu Madutu 'ai de-de'e toma Ngagara 'Ofi-'Ofi, re mi dadalara mode-mode'e 'a guna ḇato.

⁷Sidogo ḏi'i, ngomi sijumu mangale ngomi Ma Jou'ongu Madutu 'ai falalomu mode-mode'e. Sababu ngomi mi singadolo do-doto'o banari mi pake kuasa ra Ma Jou'ongu Madutu ino. Ngomi mi sijumu minga 'ahu ga'a 'i loasa re banari di'a mi lawana ngowa-ngowa'a ma tero sa'olo sordado 'aḏi mapake samaranga re tai-taini.

⁸Ngomi sijumu mangale ngomi Ma Jou'ongu Madutu 'ai falalomu mode-mode'e sababu ngomi mi siḏagi tau-taunu Unanga 'ai munara, bae ngowa'a 'aḏi silamo'o ngomi bolo mu'u si'u'ua, bae ngowa'a 'aḏi puji re silamo'o ngomi bolo mu'u sije-jengere, bae ngowa'a 'aḏi kanau ngomi ngowa'a 'akala re sinyingara boloto, bolo 'aḏi kanau ngomi ngowa'a sa-sakala.

⁹Sidogo ḏi'i, ngomi sijumu mangale ngomi Ma Jou'ongu Madutu 'ai falalomu mode-mode'e sababu ngomi mi siḏagi tau-taunu Unanga 'ai munara: bae ngowa'a ga'a 'aḏi nana'o ngomi 'aḏi ngaku ngomi Ma Jou'ongu Madutu 'ai falalomu, bae ngowa'a ga'a 'aḏi nana'o ngomi 'aḏi ngaku ua ngomi Ma Jou'ongu Madutu 'ai falalomu. Bae ngowa'a 'aḏi ta'ajiri ngomi ḏuanga i'a mi sengene mada'a ngomi mi 'ahu moju. Kalaha ananga 'aḏi ca'olo, ngomi mi sengene nyangu!

¹⁰Kalaha ananga ya sikangela minga 'akala re sinyingara, ngomi reminga roanga! Ngowa'a 'aḏi ta'ajiri ngomi sa'olo ngowa'a ma dinga'unu ua, mada'a re mi si'a'a ngowa'a repe raḏi dadi ngowa'a rema-enanga sababu 'aḏi dawongo Habari Roanga. Ngowa'a 'aḏi oḏi'i ngomi kaminga 'ori i'a ua, mada'a 'ori i'a mo-moini ta ngomi, sababu Kristus.

¹¹Ioronongoḏu ngo-ngaku rimoi toma limau Korintus ga'a ngoi tini dadalara. Ngomi rema siajele sitarangi i'a mo-moini ra ngini taminga 'akala re sinyingara ma dara; ma gogono ceka'a i'a mai ua mangale minga dadalara di'a ngini.

¹²Ngomi remi sijumu minga dadalara di'a ngini, mada'a pa'i ngini na sijumu ua ninga dadalara di'a ngomi.

¹³Nange-ne ngoi to kanau ra ngini ma tero sa'olo ngini 'ari ngowa'a masiretene. Ngoi to golo'o mode-mode'e ra ngini, ni sijumu ḏi'i ninga dadalara di'a ngomi!

¹⁴Ngini marimoi awa reo ngowa'a ngaku Yesus ua. Sanga ua, ngowa'a loasa re banari ma tero sa'olo ngowa'a ma jira. Sanga ua, tarangi 'i marimoi reo hafu-hafu ḏi'i.

¹⁵Sanga ua ḏi'i, Kristus 'o ma'u ḏagilomu reo 'Iblisi. 'Ori i'a rimoi i'a mai ua 'i piri'u ma'u mete'e ngowa'a ngaku Yesus reo ngowa'a ngaku Yesus ua.

¹⁶Sanga ua, Ma Jou'ongu Madutu 'ai Wala ma ngi'i ma tero sa'olo jou'ongu ma somoara ma wala! Re ngene ma tero sa'olo Ma Jou'ongu Madutu 'ai Wala, sababu Unanga gena-ge ga'a 'O 'ahu kasingado-ngadolo i'a 'O tegoro tananga 'akala re sinyingara ma dara. Ma Jou'ongu Madutu masiretene ro kanau so'o ne: “Ngoi ḏuanga i'a to tegoro tamanga sigolona re To 'ahu ma'u mete'e ra ananga. Ngoi ḏuanga i'a to dadi Ma Jou'ongu Madutu ga'a ananga 'aḏi silamo'o re siḏubuso, re ananga 'aḏi dadi Ngoi 'ari 'umata.”

¹⁷Sababu gena-ge, Ma Jou'ongu Madutu 'o kanau so'o ne: “Ni sisoi'i tala ngowa-ngowa'a ga'a nana'o Ngoi ua, re ni marimoi awa ra ananga. Ngini ni marimoi awa toma 'ori i'a ma faja, la Ngoi ḏuanga i'a tini dawongo.”

¹⁸“Ngoi to dadi ngini ninga Ḇaḇa, re ngini ni dadi Ngoi 'ari ngowa-ngowa'a. Ma Jou'ongu Madutu ga'a 'Ai kuasa ma pari cua 'O kanau so'o gena-ge.”