Read Sahu 2 Korintus 7 Bible Online

2 Korintus 7 - Sahu bible

2 Korintus 7

¹Ioronongoḏu ngo-ngaku rimoi ga'a ngoi tini dadalara, ngene rewo sanga Ma Jou'ongu Madutu 'ai jaji mo-moini. Sababu gena-ge, ngene balasu wa si'ofi nanga diri toma 'ori i'a faja-faja mo-moini ga'a sifaja nanga lese re nyawa. Ngene balasu wo mete'e Ma Jou'ongu Madutu renanga 'akala re sinyingara mode-mode'e re wo mojongo madiga'a 'oru ḇato ga'a Unanga 'o nyanyaḏi ua.

²Ni dawongo ngomi taninga 'akala re sinyingara ma dara. Sababu ra matengo i'a mai ua, ngomi 'a'a sala; re matengo i'a mai ua ngomi ma'u sirugi. Ngomi soi moi nyangu mi 'oro 'utungu ra guna ḇato.

³Wakutu ngoi to kanau so'o gena, ngoi to sisala ngini ua. Sababu ma tero sa'olo ngoi reto kanau siḏa ra ngini: bae ngomi minga munara 'i sigasa ngomi toma sengene, bae ngomi minga munara 'i sigasa ngomi toma sengene ua; ngomi mi dadalara masala ngini.

⁴Ngoi to basono to nyengara to kanau ta sitaḇela'a i'a ra ngini. Ngoi to sitoro mode-mode'e ngini. Kalaha ngomi ma sanga susa re sangisara lai repe, ngini ni babata ngomi. Re ngomi minga 'akala re sinyingara 'i romanga reo roanga sababu ngini.

⁵Ngoi to kanau so'o gena, sababu wakutu ngomi mi ngadolo 'ane toma daeraha Makedonia,[3] ngomi kaminga ngomasa ua. Toma 'oru ḇato mo-moini ngomi sanga susa: Ngowa'a 'aḏi lawana ngomi tau-taunu, re ngomi minga 'akala re sinyingara ma dara 'i mojongo.

⁶Mada'a Ma Jou'ongu Madutu ga'a 'o babata tau-taunu ngowa'a ga'a manga 'akala re sinyingara 'i rapo'o, Unanga gena-ge 'a babata ngomi minga 'akala re sinyingara sababu 'a Titus 'o sapolo ino.

⁷Minga 'akala re sinyingara sanga babata pa'i 'a Titus 'o sapolo ḇato ua, mada'a unanga 'a sijarita mangale ngini ni babata unanga 'ai 'akala re sinyingara ḏi'i. Unanga gena-ge 'o siajele ra ngomi mangale ngini ni nyanyaḏi masala di'a ma'u sanga ra ngoi moju, re ngini ni matuduba taninga de'oso re ḏegoro ma siḏa, re nange-ne ngini ni riono ngoi reninga 'akala re sinyingara sa-sanangi. Enanga gena-ge 'i si'a'a ngoi lebe to maroanga ḏi'i.

⁸Kalaha 'au nga'ene ngoi 'ari surata 'i si'a'a ngini ninga 'akala re sinyingara kangela, ngoi to matuduba ua to lefo surata gena-ge. Mode'e wakutu ngoi to siḏingoto 'ari surata, to matuduba sababu ngoi to waro ngini ninga 'akala re sinyingara 'i dadi kangela. Mada'a gena-ge pa'i ngomasa moi ḇato.

⁹Dadi nange-ne ngoi to sanangi masala. Sanangi gena-ge sababu ngini ninga 'akala re sinyingara 'i kangela?! So'o gena ua! 'Ari 'akala re sinyingara 'i sanangi sababu ninga 'akala re sinyingara kangela 'i sigasa ngini ni maḏibo toma ngo'omo boloto re ngali ninga de'oso re ḏegoro ma jira reo de'oso re ḏegoro ma la-la. Mode-mode'e ninga 'akala re sinyingara kangela gena-ge 'i mete'e Ma Jou'ongu Madutu 'ai 'akala ma mau. Dadi ngini ni sanga rugi ua sababu ngomi.

¹⁰Sababu 'akala re sinyingara kangela so'o gena-ge 'i sigasa ngene di'a wo maḏibo toma ngo'omo boloto, re wa ngali nanga de'oso re ḏegoro singadolo ngene wo sanga salamata. Dadi 'akala re sinyingara kangela gena-ge, matengo i'a mai ua 'a tuduba. Siḏibo ḏi'i, 'akala re sinyingara kangela ga'a ngowa'a 'aḏi ngaku Ma Jou'ongu Madutu ua 'aḏi basono, 'akala re sinyingara kangela gena-ge 'i sigasa ua ngowa'a 'aḏi maḏibo toma ngo'omo boloto. Dadi ngowa'a gena-ge 'aḏi sanga hukumu kasingado-ngadolo i'a.

¹¹Ni tailako la-la ino. Ngini ninga 'akala re sinyingara kangela ga'a 'i mete'e Ma Jou'ongu Madutu 'ai 'akala ma mau, enanga ma sowo'o 'oru ra ngini?! Ma sowo'o so'o ne: Ngini ni makutale mode-mode'e ni mete'e de'oso re ḏegoro ga'a 'i boloto. Ngini ni nyafusu mode-mode'e ni sikalaere 'oru ga'a somu'u. Ngini reni emono ḏosa ga'a ngowa'a baraḏosa ya si'a'a. Ngini mojongo mangale ḏosa gena-ge 'i sigasa hukumu. Ngini ni nyanyaḏi mode-mode'e ma'u sanga ra ngoi moju. Ngini ni riono ngoi mode-mode'e reninga 'akala re sinyingara sa-sanangi. Ngini ni nau'u di'a sihukumu ngowa'a baraḏosa gena-ge. Dadi toma 'ori i'a mo-moini gena-ge, ngini reni sijumu mangale ngini kaninga sala ua.

¹²Dadi kalaha ngoi reto lefo surata gena-ge ra ngini, ngoi ta lefo ua di'a pa'i ngowa'a baraḏosa ḇato. Ngoi ḏi'i ta lefo ua di'a pa'i ngowa'a ga'a 'ai 'ahu kangela sababu 'o ḏosa gena-ge. Mada'a ngoi to lefo surata gena-ge, la ngini ni waro masiretene mangale ni dadalara ngomi mode-mode'e. Re Ma Jou'ongu Madutu 'ari sakisi!

¹³Sababu gena-ge, ngomi ma basono mi sanga babata. Sidogo ḏi'i, ngomi mi oḏi'i 'a Titus 'o maroanga sababu ngini mo-moini ga'a reni babata 'ai 'akala re sinyingara.

¹⁴Ngoi reto sitoro mangale ngini ra Titus, re ngoi to sanangi sababu ngini ni pula'a mara'a ngoi ua. 'Oru ga'a ngomi mi kanau ra ngini mo-moini, gena-ge 'i banari. So'o gena ḏi'i, 'oru ga'a ngomi sitoro mangale ngini ra Titus, ma nyonyata 'i banari ḏi'i.

¹⁵'Orasa nange-ne, unanga lebe dadalara ngini sababu unanga 'a si'elingi ie ngini mo-moini ni mete'e unanga 'ai parenta re ni dawongo unanga reninga hormati re ta'aloko ra unanga.

¹⁶Ngoi to sanangi masala sababu ngoi nga'unu to ngaku toma 'ori i'a mo-moini.