Read Sahu Galatia 1 Bible Online

Galatia 1 - Sahu bible

Galatia 1

¹Jama'ata-jama'ata mo-moini toma daeraha Galatia. Surata nena-ne ma 'asala ra ngoi, Paulus, Yesus 'ai so-soma'a, re ḏi'i ngowa'a ngaku Yesus mo-moini ga'a mamete'e ra ngoi. Ngomi mi manyiata mi golo'o ra Ma Jou'ongu Madutu, nanga Ḇaḇa, re nanga Jou Yesus Kristus di'a pula'a dame re ḏi'i pula'a mura re dadalara ra ngini. Ma Jou'ongu Madutu ga'a dadunu ro si'ahu Yesus Kristus toma ngowa'a senge-sengene manga sigolona, pa'i Unanga gena-ge re Yesus Kristus ḇato 'aḏi sitede ngoi to dadi Yesus 'ai so-soma'a — ngowa'a toropo moi i'a ua 'aḏi sitede ngoi, bolo matengo i'a ua 'o siḏingoto ngoi.

⁴Yesus Kristus 'o sengene di'a 'a tuusu ngene tananga ḏosa-ḏosa, la ngene bebasa toma bo-baja ma jira toma dungia nena-ne. Unanga 'o 'a'a so'o gena-ge, sababu 'O mete'e mode-mode'e Ma Jou'ongu Madutu 'ai 'akala ma mau, Unanga gena-ge nanga Ḇaḇa.

⁵Puji re silamo'o Ma Jou'ongu Madutu kasingado-ngadolo i'a! 'Amin.

⁶Ngoi to heranga mode-mode'e mangale ngini lani caiti ni sisoi'i tala Ma Jou'ongu Madutu, ga'a Ro 'aro'o ngini mete'e 'a Kristus, sababu Unanga mau 'o sijumu 'Ai mura re dadalara ra ngini. Mada'a nange-ne, ngini rini mete'e do-doto'o lelegu ga'a 'i ma tero ua do-doto'o toma Habari Roanga ra Ma Jou'ongu Madutu ino.

⁷Habari Roanga gena-ge ga'a ngomi mi singadolo ra ngini, enanga pa'i habari mangale salamata ḇato ra Ma Jou'ongu Madutu. Habari mangale salamata ma lelegu 'i cua ra Ma Jou'ongu Madutu. Mada'a 'age rema ngowa'a ga'a raḏi sihaga ngini, ananga mau ya singali do-doto'o toma Habari Roanga mangale Kristus.

⁸Bae ngomi, bae mala'ekata toma soroga mau singadolo habari mangale salamata ma lelegu reo Habari Roanga ga'a ngomi mi singadolo pasala ḏua ra ngini; ngoi to nyafusu ananga gena-ge 'aḏi sanga hukumu toma naraka kasingado-ngadolo i'a.

⁹'Au nga'ene, ngomi remi kanau re nange-ne ngoi dadunu to kanau: Na'o matengo i'a 'o singadolo habari mangale salamata ga'a 'i ma tero ua Habari Roanga ga'a ngini reni dawongo ra ngomi; ngoi to nyafusu unanga gena-ge 'o sanga hukumu toma naraka kasingado-ngadolo i'a.

¹⁰Wakutu ngoi to kanau so'o gena, ngoi to disa lomanga ua, la ngowa'a ri sitoro. Re ḏi'i ngoi 'ari maksudu ua di'a ngoi to sisanangi manusia manga 'akala re sinyingara! Siḏibo ḏi'i, ngoi to mau Ma Jou'ongu Madutu 'o sitoro ngoi. Na'o ngoi to mau sisanangi manusia manga 'akala re sinyingara moju, ngoi to munara yoḏu'u di'a Kristus ma tero sa'olo 'Ai budaka.[1]

¹¹Ioronongoḏu ngo-ngaku rimoi, mangale Habari Roanga ga'a ngoi reta singadolo ra ngini, ngoi to mau ngini na waro mangale ma 'asala toma manusia ino ua.

¹²Ngoi to dawongo ua Habari Roanga gena-ge toma manusia, re matengo i'a mai ua ri doto'o ngoi. Mada'a mo-moini gena-ge Yesus Kristus masiretene 'a siwaiti ra ngoi.

¹³Tantu ḏua, ngini mo-moini na 'isene ḏua mangale ngoi 'ari 'ahu ma siḏa, wakutu to mete'e 'agama Yahudi ma 'atoranga: Ngoi to sisikisa madutu Ma Jou'ongu Madutu 'ai 'umata re to makutale ta singi-ngiranga Ma Jou'ongu Madutu 'ai jama'ata.

¹⁴'Ahu be-bere moi ra ngoi wakutu gena-ge 'aḏi nga'unu ngoi ua di'a mete'e 'agama Yahudi ma 'atoranga. Ngoi to cufala madutu mete'e ete re dotumu manga 'atoranga.

¹⁵Mada'a Ma Jou'ongu Madutu 'o cumutu ngoi wakutu ngoi tari ngina 'ami po'olo moju. Re sababu 'Ai mura re dadalara, Unanga 'o 'aro'o ngoi di'a to singadolo Habari Roanga toma ngowa-ngowa'a Yahudi ua. Dadi wakutu Ma Jou'ongu Madutu ro sitantukanga enanga ma 'orasa 'i tero-tero, Unanga gena-ge 'o sijumu 'ai Ngowa'a Nau'u ra ngoi. Togumu i'a, ngoi to tagi ra matengo i'a mai ua to golo'o ngowa'a di'a 'aḏi doto'o ngoi mangale Habari Roanga.

¹⁷Ngoi to tagi ua ra ananga ga'a raḏi dadi Yesus 'ai so-soma'a siḏa toma limau Yerusalem. Mada'a kage-kage ngoi to tagi toma nagara Arab. Togumu i'a, kara to tagi toma limau Damsyik.

¹⁸Musungu ro'ange togumu i'a, kara ngoi to tagi toma limau Yerusalem di'a ma'u sanga ra Petrus. Ma di'ara wange nyagi moi re romotoa ngoi to tegoro ra Petrus 'ai wala.

¹⁹Ngoi pa'i to ma'u sanga 'a Yakobus, Ma Jou Yesus 'ai nongoḏu; Yesus 'ai so-soma'a ma lelegu to ma'u sanga ua.

²⁰'Oru ga'a ngoi to lefo nena-ne 'i banari. Ma Jou'ongu Madutu 'a waro ngoi to sa-sakala ua.

²¹Pasala i'a, ngoi to tagi toma daeraha-daeraha Siria re Kilikia.

²²Wakutu gena-ge jama'ata-jama'ata Kristus toma daeraha Yudea 'aḏi nana'o ngoi nyangu.

²³Ananga pa'i 'aḏi 'isene ngowa'a 'aḏi kanau, “Ngowa'a ga'a 'au nga'ene 'o sisikisa ngomi, nange-ne unanga gena-ge 'o singadolo Habari Roanga mangale Kristus. Momongolo ua 'au nga'ene unanga gena-ge mau sitogumu ngowa'a 'aḏi dadi ngowa'a ngaku Yesus.”

²⁴Sababu gena-ge, ananga 'aḏi puji re silamo'o Ma Jou'ongu Madutu, sababu Unanga gena-ge ro tuhu ngoi 'ari 'ahu su-sungi.