Read Sahu Galatia 2 Bible Online

Galatia 2 - Sahu bible

Galatia 2

¹Palisi'i i'a musungu nyagi moi re rata, ngoi to maḏibo toma limau Yerusalem mamete'e ra Barnabas re to gasa 'a Titus ḏi'i.

²Ngoi to tagi toma limau Yerusalem sababu Ma Jou'ongu Madutu 'o soma'a ngoi di'a to tagi toma ngi'i gena-ge. Toma Yerusalem, ngoi ta'u lomu pa'i jama'ata manga bi-biri'i ḇato. Ra ananga gena-ge, ngoi to kanau sitarangi mangale Habari Roanga ga'a ngoi reta singadolo toma ngowa'a Yahudi ua, la ananga 'aḏi 'akoru bolo ua mangale 'ari munara. Na'o ananga 'aḏi 'akoru ua, ngoi to dodato mangale 'ari galasau'u ma duduala, bae ri palisi'i ḏua bae toma biono i'a, 'i parasaja ḇato.

³Ma nyonyata, kalaha Titus ngowa'a Yunani ga'a ma ḏagilomu ngoi toma lo-lomu gena-ge, jama'ata manga bi-biri'i gena-ge 'aḏi simau-mau ua unanga 'o sanga suna.

⁴Mada'a 'age mamuni'a 'aḏi mau Titus 'o sanga suna 'i mete'e Musa 'ai hukumu. Ananga gena-ge 'aḏi masa-sakala matuhu sa'olo ngowa'a ngaku Yesus. Ananga 'aḏi osama masigo-gogoro ra ngene nanga lo-lomu, sa'olo mata-mata. Ananga 'aḏi mau ngene wo maḏibo ḏuḏunu wo dadi Yahudi manga 'agama ma 'atoranga ma budaka. Mada'a ngene rewo sanga bebasa toma 'agama ma 'atoranga gena-ge, sababu ngene rewo marimoi ra Yesus Kristus.

⁵Ngomi mi mamaha ananga ceka'a i'a mai ua, sababu Habari Roanga 'i banari. Re ngomi ma kadiarata tau-taunu di'a ngini, la enanga gena-ge 'i sicapuru awa reo Yahudi manga 'agama ma hukumu.

⁶Dadi, ngowa'a ga'a 'o sayanga ma jingi'i, ananga 'aḏi simau-mau ua ngoi di'a to dogo 'oru ḇato tari do-doto'o. (Mete'e ngoi, ngowa'a sayanga ma jingi'i bolo ua, ma tero ḇato; sababu Ma Jou'ongu Madutu 'o oḏi'i biono ua.)

⁷Siḏibo ḏi'i, ananga ga'a ngowa'a sayanga ma jingi'i 'aḏi sanangi mangale Ma Jou'ongu Madutu 'o siwatasa ngoi di'a singadolo Habari Roanga toma ngowa'a Yahudi ua. Gena-ge ma tero sa'olo Unanga 'o siwatasa 'a Petrus di'a singadolo Habari Roanga toma ngowa'a Yahudi.

⁸Sababu Ma Jou'ongu Madutu ro pula'a de-de'e ra Petrus di'a 'o dadi Yesus 'ai so-soma'a toma ngowa'a Yahudi; ma tero sa'olo Unanga ro pula'a de-de'e ḏi'i ra ngoi di'a to dadi Yesus 'ai so-soma'a toma ngowa'a Yahudi ua.

⁹Yakobus, Petrus re Yohanes, ananga gena-ge ga'a 'aḏi dadi jama'ata manga bi-biri'i 'aḏi ngaku mangale Ma Jou'ongu Madutu ro pula'a ra ngoi munara gena-ge. Dadi ananga 'aḏi ma'u cako'o giama ra Barnabas re ngoi, sa'olo nana'o rimoi mangale gia ḏagilomu munara. Ngomi mo-moini mi mafakati ma tero: Ngomi mi munara toma ngowa'a Yahudi ua, ananga 'aḏi munara toma ngowa'a Yahudi.

¹⁰Pa'i rimoi ḇato ananga 'aḏi golo'o ra ngomi: Ngomi balasu mi sioḏi'i ngowa'a ma dinga'unu ua. Re ngoi rari roanga ta si'a'a so'o gena-ge.

¹¹Wakutu 'a Petrus 'o sapolo toma limau Antiokhia, ngoi to kanau sitaḇela'a i'a ra unanga, mangale 'ai de'oso re ḏegoro 'i rapu.

¹²Ma mulaingi, unanga 'o tegoro oromo mamete'e reo ioronongoḏu ngo-ngaku rimoi ga'a ngowa'a Yahudi ua. Mada'a togumu i'a 'a Yakobus 'ai ḏagilomu 'aḏi sapolo, Petrus 'o maki-kiḏanga toma ioronongoḏu ngo-ngaku rimoi ga'a ngowa'a Yahudi ua re ro oḏu'u oromo mamete'e ra ananga. Unanga 'o mojongo Yakobus 'ai ḏagilomu, ga'a 'aḏi mau ngowa'a mo-moini 'aḏi sanga suna.

¹³Ioronongoḏu ngo-ngaku rimoi ga'a ngowa'a Yahudi ma lelegu ḏi'i 'aḏi mete'e 'a Petrus 'ai de'oso re ḏegoro ma rapu toma ioronongoḏu ngo-ngaku rimoi ga'a ngowa'a Yahudi ua; singadolo 'a Barnabas ḏi'i 'a mete'e manga de'oso re ḏegoro ma rapu!

¹⁴Wakutu ngoi to oḏi'i ananga manga de'oso re ḏegoro 'i mete'e ua do-doto'o banari toma Habari Roanga; ngoi to kanau ra Petrus toma jama'ata manga biono, “Na'o ngana sa'olo ngowa'a Yahudi no mete'e Yahudi manga 'atoranga ua, ngana no 'ahu ma tero sa'olo ngowa'a Yahudi ua! Dadi, i'a sa'olo nange-ne ngana mau no simau-mau ioronongoḏu ngo-ngaku rimoi ga'a ngowa'a Yahudi ua 'aḏi sanga suna, dadi 'aḏi 'ahu ma tero sa'olo ngowa'a Yahudi?!”

¹⁵Ngomi Yahudi manga ngowa'a re danongo ma tero ua sa'olo “ngowa'a Yahudi ua ga'a 'aḏi baraḏosa” sababu 'aḏi mete'e ua Musa 'ai hukumu.

¹⁶Kalaha so'o gena, ngomi remi waro mangale na'o ngowa'a 'aḏi mete'e Musa 'ai hukumu ḇato, sanga ua 'aḏi dadi ngowa'a kamanga sala ua ra Ma Jou'ongu Madutu 'ai momina. Siḏibo ḏi'i ngowa'a 'aḏi dadi ngowa'a kamanga sala ua ra Ma Jou'ongu Madutu 'ai momina sababu pa'i 'aḏi ngaku Yesus Kristus ḇato. Ngomi masiretene remi ngaku Yesus Kristus, la ngomi mi dadi ngowa'a kamanga sala ua ra Ma Jou'ongu Madutu 'ai momina. Ngomi mi mete'e ua Musa 'ai hukumu, sababu matengo i'a mai ua nyengara 'o dadi ngowa'a kamanga sala ua ra Ma Jou'ongu Madutu 'ai momina, na'o 'aḏi mete'e Musa 'ai hukumu.

¹⁷Dadi ngomi ga'a mau mi dadi ngowa'a kamanga sala ua sababu mi marimoi ra Kristus, mi mete'e riwara Musa 'ai hukumu. Sababu gena-ge toma ngowa'a Yahudi manga momina, ngomi remi dadi ma tero sa'olo ngowa'a Yahudi ua, ngowa'a baraḏosa. Dadi 'a Kristus 'o soma'a ngowa'a 'aḏi madiga'a ḏosa?! So'o gena ua!

¹⁸Mada'a na'o ngoi dadunu to mete'e Musa 'ai hukumu moju ga'a ma siḏa ngoi reta sisoi'i tala, ngoi to sijumu reto dadi ngowa'a baraḏosa mode-mode'e.

¹⁹Wakutu ngoi to mete'e Musa 'ai hukumu, ngoi ngowa'a baraḏosa ga'a to dadi yoḏu'u ngowa'a kamanga sala ua ra Ma Jou'ongu Madutu 'ai momina. Mada'a nange-ne ngoi ma tero sa'olo ngowa'a ga'a ro sisalib mamete'e rea Kristus, ngoi reto bebasa ra Musa 'ai hukumu, la ngoi nyengara to 'ahu di'a to silamo'o Ma Jou'ongu Madutu.

²⁰'Ari 'ahu ne, ngoi 'ari 'ahu 'ua mada'a Kristus masiretene ro 'ahu ra ngoi. 'Ahu ga'a ngoi ta basono nange-ne sababu ngoi to ngaku Ma Jou'ongu Madutu 'ai Ngowa'a Nau'u ga'a 'o dadalara ngoi re Unanga 'o sengene di'a ngoi.

²¹Ngoi ta itomo ua Ma Jou'ongu Madutu 'ai mura re dadalara toma manusia. Na'o matengo nyengara 'o dadi ngowa'a kai sala ua sababu 'o mete'e 'a Musa 'ai hukumu, Kristus 'ai se-sengene toma salib ma faeda 'i cua.