Read Sahu Galatia 3 Bible Online

Galatia 3 - Sahu bible

Galatia 3

¹Hai ngowa-ngowa'a Galatia, ngini ngowa'a haga! I'a sa'olo ngini ni nyengara ngowa'a di'a 'aḏi sihaga ngini, singadolo ni mete'e riwara do-doto'o banari?! Ngoi reta siajele reta sitarangi ra ngini mangale Yesus Kristus 'o sengene toma salib di'a ngini!

²Ni sangoro 'ari so-sano rimoi ne: Ngini ni dawongo Ma Ngagara 'Ofi-'Ofi sababu ngini ni mete'e Musa 'ai hukumu, bolo sababu ni ngaku Kristus wakutu ni 'isene Habari Roanga?! Tantu ḏua, sababu ni ngaku Kristus!

³Dadi, i'a sa'olo ngini ni haga so'o gena-ge?! Ngini ni mulaingi ninga 'ahu su-sungi sababu Ma Ngagara 'Ofi-'Ofi ma kuasa. Dadi i'a sa'olo nange-ne reninga de-de'e masiretene mau ni siḏuanga Ma Jou'ongu Madutu 'ai munara taninga 'akala re sinyingara ma dara?!

⁴Ngini reni sanga sangisara ma repe, sababu ngini ni ngaku Yesus. Nange-ne ngini mau dadunu mete'e Musa 'ai hukumu moju! Na'o so'o gena, ma tero sa'olo ninga sangisara mo-moini, 'i parasaja! Mada'a, ngoi to nganono so'o gena ua.

⁵Ma Jou'ongu Madutu 'o pula'a Ma Ngagara 'Ofi-'Ofi ra ngini re Unanga 'o 'a'a ga'a hera-heranga taninga sigolona. Mo-moini gena-ge Unanga 'o 'a'a di'a ngini sababu ngini mete'e Musa 'ai hukumu, bolo ngini 'isene mangale Kristus re ni ngaku Unanga?! Tantu ḏua, sababu ni ngaku Kristus!

⁶Totoho la-la 'a Abraham 'ai 'ahu. Toma Boku 'Ofi-'Ofi ma dara 'i silefo so'o ne, “ 'A Abraham 'o sigare 'ai ngo-ngaku ra Ma Jou'ongu Madutu. Sababu gena-ge Ma Jou'ongu Madutu 'u dawongo unanga sa'olo ngowa'a loasa re banari.”

⁷Sababu gena-ge, ngini ni sahe mode-mode'e mangale ngowa-ngowa'a 'aḏi sigare manga ngo-ngaku ra Ma Jou'ongu Madutu, ananga gena-ge 'aḏi dadi 'a Abraham 'ai ju'uda.

⁸Ma siḏa moju, ngene wa waro toma Boku 'Ofi-'Ofi ma dara mangale Ma Jou'ongu Madutu ro sitantukanga mangale na'o ngowa'a Yahudi ua 'aḏi ngaku Unanga, ananga gena-ge 'aḏi dadi ngowa'a kamanga sala ua ra Unanga 'ai momina. Habari Roanga gena-ge sipula'a siḏa ra Abraham sababu toma Boku 'Ofi-'Ofi 'i silefo so'o ne: “Manusia mo-moini, Ngoi ḏuanga i'a ta'u sibarakati sababu ngana.”

⁹'A Abraham 'o sigare 'ai ngo-ngaku ra Ma Jou'ongu Madutu, dadi unanga 'o sanga barakati. So'o gena ḏi'i, ngowa-ngowa'a 'aḏi sigare manga ngo-ngaku ra Ma Jou'ongu Madutu, ananga mo-moini sanga barakati mamete'e ra Abraham.

¹⁰Ngowa-ngowa'a ga'a 'aḏi sigare manga ngo-ngaku ra Musa 'ai hukumu, ḏuanga i'a ananga mo-moini gena-ge 'aḏi sanga hukumu kasingado-ngadolo i'a ra Ma Jou'ongu Madutu. Sababu toma Boku 'Ofi-'Ofi 'i silefo so'o ne: “Ngowa'a ga'a 'aḏi mete'e Musa 'ai hukumu mo-moini ua, ḏuanga i'a 'aḏi sanga hukumu ra Ma Jou'ongu Madutu!”

¹¹Tantu ḏua, matengo i'a mai ua nyengara 'aḏi dadi ngowa'a kamanga sala ua ra Ma Jou'ongu Madutu 'ai momina sababu 'aḏi mete'e Musa 'ai hukumu gena-ge. Sababu toma Boku 'Ofi-'Ofi 'i silefo so'o ne: “Ngowa'a loasa re banari 'aḏi sanga 'ahu kasingado-ngadolo i'a pa'i sababu manga ngo-ngaku ḇato.”

¹²Mada'a na'o ngowa'a 'aḏi sigare manga ngo-ngaku ra Musa 'ai hukumu, ngowa'a gena-ge 'aḏi sigare ua manga ngo-ngaku ra Yesus Kristus. Sababu toma Boku 'Ofi-'Ofi 'i silefo so'o ne: “Ngowa'a ga'a 'aḏi mete'e Musa 'ai hukumu, ananga balasu ya mete'e mo-moini re tau-taunu tamanga 'ahu ma dara.”

¹³Mada'a Kristus ro tuusu ngene, la ngene wo mete'e riwara Musa 'ai hukumu ga'a 'i sigasa hukumu ra Ma Jou'ongu Madutu ra ngene. Gena-ge ri dadi sababu Unanga 'ai se-sengene toma salib. Dadi Unanga gena-ge ro sanga hukumu ra Ma Jou'ongu Madutu di'a ngene. Sababu toma Boku 'Ofi-'Ofi 'i silefo so'o ne: “Ngowa'a ga'a 'aḏi sengene toma gantongan ma ngasu'u, ananga gena-ge sanga hukumu ra Ma Jou'ongu Madutu.”

¹⁴Yesus Kristus ro tuusu ngene, la barakati ga'a Ma Jou'ongu Madutu ro sijaji ḏua ra Abraham, Unanga 'o pula'a ḏi'i toma ngowa'a Yahudi ua sababu ananga gena-ge 'aḏi marimoi ra Kristus. Re sababu ngene wo sigare nanga ngo-ngaku ra Kristus, ngene wo sanga ḏi'i Ma Ngagara 'Ofi-'Ofi ga'a Ma Jou'ongu Madutu ro sijaji pasala ḏua.

¹⁵Ioronongoḏu ngo-ngaku rimoi, ngoi mau to si'ade-'ade ra ngene nanga 'ahu wange moi-wange moi. Na'o ngowa'a fara ḏiḏi mau 'a'a jaji re raḏi mafakati; matengo i'a mai ua ya 'ekara bolo ya dogo. So'o gena ḏi'i ma tero sa'olo Ma Jou'ongu Madutu 'ai jaji ra ngene.

¹⁶Ma Jou'ongu Madutu 'ai jaji, Unanga masiretene madiga'a di'a Abraham re unanga 'ai ju'uda matengo. Toma Boku 'Ofi-'Ofi 'i silefo ua mangale Unanga 'ai jaji di'a “ 'A Abraham 'ai ju'uda-ju'uda” gena-ge ma ngale: di'a ngowa'a repe. Mada'a jaji gena-ge ri silefo ḏua di'a pa'i “ju'uda matengo” ḇato: gena-ge Kristus.

¹⁷Dadi ngoi to kanau so'o ne: Jaji ra Ma Jou'ongu Madutu ro 'a'a siḏa ḏua di'a Abraham. Ḏua musungu latu rata re nyagi ro'ange, kara Unanga gena-ge 'o pula'a 'Ai hukumu ra Musa. Dadi Musa 'ai hukumu gena-ge 'i singi-ngiranga yoḏu'u Ma Jou'ongu Madutu 'ai jaji 'ua re 'au wali.

¹⁸Sababu na'o Ma Jou'ongu Madutu 'o pula'a barakati sababu ngowa'a raḏi mete'e Musa 'ai hukumu, ananga sanga barakati gena-ge 'i mete'e ua Ma Jou'ongu Madutu 'ai jaji. Mada'a Ma Jou'ongu Madutu ro pula'a barakati ra Abraham 'i mete'e 'Ai jaji sababu Unanga 'ai mura re dadalara.

¹⁹Na'o so'o gena, i'a sa'olo Ma Jou'ongu Madutu ro pula'a hukumu ra Musa?! Ma sa-sangoro Unanga 'o pula'a Hukumu ra Musa, la ngene wo waro mangale ngene nanga ḏosa. Ngene balasu wo mete'e Musa 'ai hukumu singadolo Abraham 'ai ju'uda matengo, Kristus ro sapolo. Unanga gena-ge, Ma Jou'ongu Madutu ro sijaji pasala ḏua. Musa 'ai hukumu gena-ge 'o mala'ekata-mala'ekata ya pula'a ra Musa. Unanga gena-ge 'o dadi lese to golona ga'a 'o siajele hukumu toma manusia.

²⁰Lese to golona masiretene 'ai kuasa 'i cua; unanga gena-ge pa'i lese to golona ḇato toma ngowa'a fara ḏiḏi. Mada'a 'age pa'i Ma Jou'ongu Madutu ḇato wakutu Unanga 'o pula'a 'ai jaji ra Abraham. Unanga 'o paralu ua lese to golona, sababu Unanga masiretene rai kuasa.

²¹Na'o so'o gena, Musa 'ai hukumu re Ma Jou'ongu Madutu 'ai jaji 'i ma'u sabi ḏuḏunu?! Tantu ḏua ua! Sababu na'o Musa 'ai hukumu nyengara 'i sigasa 'ahu kasingado-ngadolo i'a toma manusia, manusia ḏi'i nyengara 'aḏi dadi ngowa'a loasa re banari, sababu 'aḏi mete'e Musa 'ai hukumu.

²²Mada'a toma Boku 'Ofi-'Ofi ma dara 'i silefo mangale manusia mo-moini 'o ḏosa ya'u kuasa. Dadi manusia ya nga'unu ua 'aḏi mete'e Musa 'ai hukumu mo-moini. Sababu gena-ge, barakati ga'a Ma Jou'ongu Madutu 'o sijaji pasala ḏua di'a pula'a toma ngowa'a ga'a 'aḏi ngaku Yesus Kristus; pa'i ngowa'a ga'a 'aḏi ngaku Unanga gena-ge nyengara ya sanga.

²³Toma 'orasa Yesus Kristus sibuoro nyangu, Musa 'ai hukumu 'i jaga-jaga ngene, ma tero sa'olo ngowa'a 'aḏi jaga-jaga ngowa'a bui. Enanga 'i dadi singadolo Ma Jou'ongu Madutu 'o siwaiti Kristus, la ngene nyengara wo ngaku Unanga gena-ge.

²⁴Dadi Musa 'ai hukumu ma tero sa'olo ngowa'a 'aḏi jaga-jaga singadolo Kristus 'o sapolo. Ḏua, ngene nyengara wo dadi ngowa'a kamanga sala ua ra Ma Jou'ongu Madutu 'ai momina sababu nanga ngo-ngaku ra Kristus.

²⁵Mada'a nange-ne, sababu ngene rewo ngaku 'O Kristus, Musa 'ai hukumu 'i jaga-jaga ngene riwara.

²⁶Siḏibo ḏi'i, sababu ngini reni ngaku Kristus Yesus, ngini mo-moini ni dadi Ma Jou'ongu Madutu 'ai ngowa-ngowa'a.

²⁷Re sababu ngini mo-moini reni sanga baptis ra Kristus 'ai lomanga, ngini reni dawongo Kristus ma tero sa'olo ni mapake 'Ai pakeanga.

²⁸Sababu gena-ge, ngini mo-moini ni ma tero: bae Yahudi bolo Yahudi ua, bae budaka bolo budaka ua, bae na-nau'u bolo we-were'a. Gena-ge 'i dadi sababu ngini mo-moini ni marimoi ra Kristus Yesus.

²⁹Re sababu ngini ni marimoi ra Kristus, ngini reni dadi Abraham 'ai ju'uda. Dadi ngini ḏi'i ni dawongo 'oru ḇato ga'a Ma Jou'ongu Madutu 'a sijaji ra Abraham pasala ḏua.