Read Sahu Galatia 5 Bible Online

Galatia 5 - Sahu bible

Galatia 5

¹'Orasa nange-ne, ngene rewo bebasa sababu Kristus na sibebasa ngene ra Musa 'ai hukumu. Sababu gena-ge, ngene wo macako'o namo-namoto bebasa gena-ge, la awa wo dadi budaka moju.

²'Elingi la-la! Ngoi, Paulus, masiretene to siajele ra ngini so'o ne: Na'o ngini ni golo'o masuna sababu ni fikiri pa'i ma duhu gena-ge ḇato ni dadi ngowa'a kamanga sala ua ra Ma Jou'ongu Madutu 'ai momina, Kristus ma faeda 'i cua ra ngini.

³Soi moi moju, ngoi to sipo-poma ra ngini ga'a mau ni masuna, ngini balasu ni siḏagi Musa 'ai hukumu mo-moini, la ni dadi ngowa'a kamanga sala ua ra Ma Jou'ongu Madutu 'ai momina.

⁴Ngini ga'a ni makutale ni dadi ngowa'a kamanga sala ua ra Ma Jou'ongu Madutu 'ai momina, sababu ni mete'e Musa 'ai hukumu, ngini masiretene reni sito-tola'a rea Kristus. Re ngini masiretene ḏi'i ni itomo Ma Jou'ongu Madutu 'ai mura re dadalara ra ngini.

⁵Mada'a mangale ngomi, Ma Ngagara 'Ofi-'Ofi 'i munara ra ngomi minga 'akala re sinyingara ma dara, singadolo ngomi mi masinganano pa'i ra Ma Jou'ongu Madutu ḇato, la ngomi ḏuanga i'a mi talaḏi ra Unanga sa'olo ngowa'a kaminga sala ua sababu ngomi minga ngo-ngaku pa'i ra Kristus ḇato. Gena-ge ngomi ma totoma re ma ga-ganutu.

⁶Sababu na'o ngene rewo marimoi ra Kristus Yesus bae ngene rewo masuna bae wo masuna ua; enanga gena-ge 'i 'oru ua. Mada'a enanga ga'a ma la-lamo'o ma re'u i'a so'o ne: Ngene wo sigare nanga ngo-ngaku ra Kristus. Re nanga ngo-ngaku gena-ge 'i waiti na'o ngene wo dadalara ngowa-ngowa'a lelegu.

⁷'Au nga'ene, ngini ni sijumu ninga cufala di'a ni mete'e do-doto'o 'i banari. I'a sa'olo 'orasa nange-ne ngini ni mete'e riwara do-doto'o gena-ge?! 'Au nga'ene, ngini ni ma tero sa'olo ngowa'a 'aḏi lalara lai siḏi, kara ngowa'a ma lelegu 'aḏi dola'aku ngini, singadolo ngini ni matogumu ni lalara. 'A guna nu'u sihaga ngini?!

⁸Tantu ḏua, Ma Jou'ongu Madutu ua! Sababu Unanga masiretene Nu 'aro'o ngini di'a dadi 'Ai ngowa-ngowa'a.

⁹'Age rema ngowa'a ga'a 'aḏi kanau, “ 'O ragi pa'i ceka'a ua, mada'a 'i sikaluba toma tarigu, singadolo tarigu mo-moini 'i ramasa.”

¹⁰Kalaha so'o gena, sababu 'ari ngo-ngaku ra Ma Jou Yesus, ngoi masiretene to ngaku mode-mode'e mangale ngini tau-taunu ni mete'e ua ngowa-ngowa'a lelegu ga'a mau sihaga ngini. Re tantu ḏua Ma Jou'ongu Madutu ḏuanga i'a 'o hukumu ananga, 'a guna ḇato.

¹¹Ioronongoḏu ngo-ngaku rimoi, mete'e 'oru ga'a ananga 'aḏi siajele mangale ngoi, ngoi to singadolo moju mangale ngowa'a balasu 'aḏi sanga suna! Tantu ḏua ananga gena-ge rapu. Re na'o so'o gena, i'a sa'olo ngoi to sanga sikisa moju?! Sababu ngoi to singadolo mangale pa'i Yesus 'ai se-sengene toma salib ḇato sidadi ngene ngowa'a kananga sala ua ra Ma Jou'ongu Madutu 'ai momina. Sababu habari gena-ge ngowa'a Yahudi 'aḏi emono ngoi, singadolo 'aḏi sisikisa ngoi.

¹²Mete'e ngoi: Jobilaha na'o ngowa'a ga'a 'aḏi sikaco ngini ninga ngo-ngaku, ananga gena-ge 'aḏi makabiri tala manga diri masiretene!

¹³Ngini, 'ari ioronongoḏu ngo-ngaku rimoi, Ma Jou'ongu Madutu ro 'aro'o ngini, la ni dadi ngowa'a bebasa. Mada'a awa ngini ni madaga'a 'oru ḇato mete'e ngini ninga mau ma jira, sababu ni bebasa. Siḏibo ḏi'i, ngini balasu ni ma'u dadalara re ni ma'u riono matengo re matengo.

¹⁴Sababu 'age Ma Jou'ongu Madutu 'ai hukumu rimoi so'o ne: “Ngana balasu dadalara 'a guna ḇato sa'olo no dadalara 'ani diri masiretene.” Na'o ngene wo mete'e ti-tiai pa'i hukumu rimoi ḇato; enanga gena-ge 'i ma tero sa'olo ngene wo sidagi Musa 'ai hukumu mo-moini.

¹⁵Mada'a na'o ngini ni madaga'a jira matengo re matengo, ngini ma tero sa'olo haiwani-haiwani nga-ngabala, ga'a ma'u goḏi. Ni ma'istiari, ma ḏo-ḏogumu tala ngini ḏuanga i'a ni dadi cira mo-moini.

¹⁶Ngoi 'ari maksudu so'o ne: Biara Ma Ngagara 'Ofi-'Ofi 'i sinyanyasele ninga 'ahu, la ni mete'e ua manusia manga nyafusu ma jira.

¹⁷Sababu manusia manga nyafusu ma jira enanga 'i lawana Ma Ngagara 'Ofi-'Ofi ma nyafusu. Re so'o gena ḏi'i, Ma Ngagara 'Ofi-'Ofi ma nyafusu enanga 'i lawana manusia manga nyafusu. Fara ḏiḏi gena-ge enanga ma'u tolabe. Dadi sanga ua, ngini ni madaga'a tau-taunu 'ori i'a ma la-la, ga'a 'i mete'e ngini ninga mau.

¹⁸Mada'a na'o Ma Ngagara 'Ofi-'Ofi 'i sinyanyasele ngini, Musa 'ai hukumu 'i parenta ngini yoḏu'u.

¹⁹Manusia manga nyafusu ma jira 'i waiti tarangi tamanga ga'a sa'olo: tinikai, sudala re oḏi'i we-were'a 'i yoḏu'u,

²⁰silamo'o re siḏubuso jou'ongu ma somoara, 'a'a guna-guna, ma'u emono, ma'u saturu, ma'u telengoro, capati ruta, mafikiri pa'i 'ai diri masiretene, ma'u salira, ma'u pia'olo,

²¹'akala go-goḏi, ma'eto-'etolo, 'a'a laya 'i pai-pai'i re ma repe moju. Mo-moini gena-ge, ngoi dadunu to sipo-poma moju ra ngini ma tero sa'olo 'au nga'ene ngoi to sipo-poma ḏua ra ngini: Na'o 'a guna ḇato manga ga'a so'o gena-ge, ananga ḏuanga i'a 'aḏi osama nyo-nyoimi ua ra Ma Jou'ongu Madutu 'ai ngowa-ngowa'a.

²²Siḏibo ḏi'i, ngowa-ngowa'a ga'a Ma Ngagara 'Ofi-'Ofi ya'u ḏegoro, ananga manga de'oso re ḏegoro so'o ne: Ananga gena-ge 'aḏi ma'u dadalara matengo re matengo, 'aḏi monere tamanga 'akala re sinyingara, 'akala ogoro, pake 'akala ḇanyo re ananga remanga sere 'i re go-gasa, ananga nyanyaḏi ma'u la-la reo ngowa-ngowa'a lelegu, jaji sa-sakala ua,

²³maholo 'akala re sinyingara re ananga ya nga'unu tahana manga diri. Ra Musa 'ai hukumu enanga 'i cua, ga'a 'i simaha ua de'oso re ḏegoro so'o gena-ge.

²⁴Ngowa-ngowa'a ga'a raḏi osama nyo-nyoimi ra Kristus Yesus, ananga gena-ge raḏi sisengene manusia manga de'oso re ḏegoro ma jira re manga nyafusu ma jira tamanga 'akala re sinyingara.

²⁵Ma Ngagara 'Ofi-'Ofi ri sipula'a 'ahu su-sungi ra ngene. Sababu gena-ge, ngene balasu wo mete'e Ma Ngagara 'Ofi-'Ofi ma nyafusu

²⁶Ngene wo momole awa, re awa ma'u sigo-goḏi 'akala re sinyingara matengo re matengo, re awa ma'u gogono 'akala re sinyingara matengo re matengo.