Read Sahu Efesus 3 Bible Online

Efesus 3 - Sahu bible

Efesus 3

¹Ma sababu gena-ge ngoi, Paulus to manyiata di'a ngini. Ngoi to osama bui sababu to singadolo Habari Roanga ra ngini, ngowa'a Yahudi ua, sababu ngoi to munara di'a Kristus Yesus.

²Tantu ḏua, ngini reni 'isene mangale Ma Jou'ongu Madutu ro siwatasa munara ra ngoi di'a to singadolo Habari Roanga ra ngini sababu Unanga 'ai mura re dadalara.

³Ma Jou'ongu Madutu 'ai maksudu ga'a ma siḏa 'i rahasia, mada'a 'orasa nange-ne 'A sijumu re 'A siajele ra ngoi. Re gena-ge ga'a kiḏanga ua, ngoi ta lefo ḏua.

⁴Wakutu ngini ni baca 'oru ga'a ngoi reta lefo, ngini ḏuanga i'a ni sahe mangale rahasia gena-ge, ma tero sa'olo ngoi ta sahe. Rahasia gena-ge mangale Kristus.

⁵'Au nga'ene, rahasia gena-ge matengo mai ua ya sikanau toma manusia. Mada'a 'orasa nange-ne, Ma Ngagara 'Ofi-'Ofi ri sijumu toma nabi-nabi re Yesus 'ai so-soma'a ga'a Ma Jou'ongu Madutu ya'u cumutu ḏua.

⁶Rahasia gena-ge so'o ne: Na'o ngowa'a Yahudi ua 'aḏi ngaku Habari Roanga, ananga gena-ge ḏi'i mamete'e reo ngowa'a Yahudi, ḏuanga i'a ya basono Ma Jou'ongu Madutu 'ai barakati ga'a 'ua re 'au wali moju 'O sidodahe ḏua di'a 'Ai 'umata. Re ngowa'a Yahudi ua gena-ge ḏi'i raḏi marimoi reo ngowa'a Yahudi re ananga mo-moini 'aḏi osama nyo-nyoimi ra Kristus Yesus 'ai lese. Sidogo ḏi'i, ngowa'a Yahudi ua gena-ge 'aḏi dawongo 'oru ḇato ga'a Ma Jou'ongu Madutu ro sijaji pasala ḏua di'a 'Ai 'umata sababu raḏi marimoi ra Kristus Yesus.

⁷Ngoi reto dadi falalomu di'a singadolo Habari Roanga toma ngowa'a Yahudi ua, sababu Ma Jou'ongu Madutu 'ai mura re dadalara mamete'e Rai kuasa ga'a si'a'a tari lese.

⁸Pa'i ngoi ḇato kari ijana ua ra Ma Jou'ongu Madutu 'ai 'umata mo-moini. Mada'a sababu Ma Jou'ongu Madutu 'ai mura re dadalara Unanga 'a siwatasa munara ra ngoi di'a to singadolo toma ngowa-ngowa'a Yahudi ua mangale 'Ai barakati ga'a kama moini ua sababu 'a Kristus.

⁹Re Unanga ḏi'i 'o siwatasa munara ra ngoi di'a to sitarangi rahasia gena-ge. Dadi ngowa'a mo-moini ya waro ma duhu sa'olo Ma Jou'ongu Madutu 'a siḏagi 'Ai maksudu ma rahasia gena-ge ga'a 'ua re 'au wali moju matengo i'a mai ua 'a waro. Unanga gena-ge 'O sidadi diwanga re dungia re ma dara mo-moini.

¹⁰Toma 'orasa nange-ne, Ma Jou'ongu Madutu 'ai maksudu gena-ge di'a 'A sijumu ma duhu lai repe mangale 'ai 'akala ma soro'unu toma roh-roh ma jira, ga'a 'i kuasa toma ngawa-ngawa. Dadi enanga gena-ge nyengara 'i oḏi'i 'oru ga'a Ma Jou'ongu Madutu ra si'a'a tai jama'ata.

¹¹Unanga ra si'a'a so'o gena-ge mete'e 'Ai maksudu ga'a Ri sitantukanga wakutu dungia 'i dadi nyangu. Nange-ne, Unanga 'a sitotomo 'ai maksudu sababu Kristus Yesus 'ai se-sengene, Unanga gena-ge nanga Jou.

¹²Ngene ga'a rewo ngaku Kristus re marimoi ra Unanga ḏua, ngene sanga bebasa di'a wo masebanga ra Ma Jou'ongu Madutu, kananga mojongo ua.

¹³Sababu gena-ge, ngoi to golo'o ra ngini awa ninga 'akala re sinyingara rapo'o sababu 'oru ga'a ngoi ta sanga ma sangisara re to osama bui. Sababu mo-moini gena-ge di'a ngini ninga la.

¹⁴Sababu mo-moini gena-ge, ngoi to maḏipolono di'a to manyiata ra Ma Jou'ongu Madutu, nanga Ḇaḇa.

¹⁵Unanga ga'a Ro dadi ngowa'a ngaku Yesus mo-moini manga Ḇaḇa. Re ananga gena-ge raḏi dadi 'Ai ngitu re ngale: bae toma soroga, bae toma dungia.

¹⁶Ngoi to manyiata ra Ma Jou'ongu Madutu ga'a 'o tegoro toma mulia ma pari cua, re 'Ai barakati kama moini ua. Ngoi to manyiata to golo'o ra Unanga gena-ge mangale 'Ai Ngagara 'Ofi-'Ofi 'i site'e ngini ninga 'akala re sinyingara.

¹⁷Ḏua 'a Kristus 'o tegoro tau-taunu ra ngini ninga 'akala re sinyingara sababu ninga ngo-ngaku. Ḏua ngini ninga 'ahu 'i romanga reo dadalara ma tero sa'olo ate ma utu'u 'i osama lai kiḏanga toma tana'a ma dara re ma tero ḏi'i sa'olo simomi'i wala toma bangini te-te'e ma re'u.

¹⁸Ngoi to manyiata so'o gena-ge, la ngini mamete'e ra Unanga 'ai 'umata mo-moini, nga'unu ni basono Kristus 'ai dadalara lai lamo'o ra ngene: wa waro enanga ma giḏanga, ma roata, ma gau'u re ma ngido.

¹⁹'Ai dadalara gena-ge ngene wa du-dumunu yoḏu'u renanga 'akala. Kalaha so'o gena, ngoi to golo'o ra Ma Jou'ongu Madutu mangale ngini ni basono Kristus 'ai dadalara. Dadi ngini ninga 'akala re sinyingara 'i romanga reo Kristus 'ai dadalara di'a ngini, ma tero sa'olo Ma Jou'ongu Madutu 'o romanga reo dadalara.

²⁰Ma Jou'ongu Madutu 'ai kuasa lai lamo'o ga'a 'i si'a'a ra ngene nanga 'akala re sinyingara ma dara. Sababu 'ai kuasa gena-ge, Unanga nyengara 'a si'a'a lebe lamo'o i'a reo 'oru ngene nga'unu wa fikiri re wo golo'o ra Unanga.

²¹Ino ngene mo-moini ga'a ngowa'a ngaku Yesus, wo silamo'o re siḏubuso Ma Jou'ongu Madutu nange-ge re si'a kasingado-ngadolo i'a, sababu ngene rewo marimoi ra Kristus Yesus. 'Amin.