Read Sahu Efesus 4 Bible Online

Efesus 4 - Sahu bible

Efesus 4

¹Sababu gena-ge, ngoi — ga'a to osama bui sababu 'ari munara di'a Ma Jou'ongu Madutu — to golo'o mode-mode'e ra ngini mangale ninga 'ahu balasu 'i patasa sa'olo ngowa'a ga'a Ma Jou'ongu Madutu ro 'aro'o di'a dadi 'Ai ngowa-ngowa'a masiretene.

²Ngini balasu ni maholo ninga 'akala re sinyingara, 'akala re sinyingara mereoso, pake 'akala ḇanyo, ni manahana ninga diri sababu ninga dadalara di'a ngowa'a lelegu, wakutu manga de'oso re ḏegoro 'i ma'u rapu ra ngini.

³Ma Ngagara 'Ofi-'Ofi ri sirimoi ngini, dadi ngini balasu ni makutale mode-mode'e di'a ni 'ahu toma dame, la ni 'ahu marimoi tau-taunu.

⁴Ngene mo-moini ga'a ngowa'a ngaku Yesus ma tero sa'olo lese rimoi re pa'i Ma Ngagara 'Ofi-'Ofi rimoi ḇato 'i tegoro tananga 'akala re sinyingara. So'o gena ḏi'i, ngene renanga ngo-nganono pa'i rimoi ḏi'i, sababu Ma Jou'ongu Madutu ro 'aro'o ngene wo dadi 'Ai 'umata.

⁵Ma Jou pa'i matengo ḇato, nanga ngo-ngaku rimoi, sanga baptis toma lomanga ma tero,

⁶re Ma Jou'ongu Madutu pa'i matengo ḇato 'O dadi Ḇaḇa di'a ngowa'a ngaku Yesus mo-moini. Unanga rai kuasa 'O parenta mo-moini, 'O munara toma 'ori i'a mo-moini re 'O tegoro taninga 'akala re sinyingara mo-moini ga'a ngowa'a ngaku Yesus.

⁷Mada'a ngene matengo re matengo wo dawongo cocatu ma tero ua di'a wo 'a'a Ma Jou'ongu Madutu 'ai munara 'i mete'e 'oru ga'a Kristus 'O siwatasa ḏua.

⁸Sababu gena-ge, toma Boku 'Ofi-'Ofi ma dara 'i silefo so'o ne: “Wakutu Unanga 'o pere toma ngi'i lai kau'u, 'O gasa dawana manga repe. Re Unanga 'o pula'a cocatu-cocatu toma manusia.”

⁹Nah na'o wo aje, “Unanga 'o pere,” gena-ge ma ngale Unanga ro 'uci ḏua ngadolo toma ngi'i dau 'aḏu. Gena-ge ma ngale toma dungia nena-ne.

¹⁰Re Unanga ga'a ro 'uci ḏua, Unanga gena-ge ḏi'i ga'a ro pere lebe kau'u reo diwanga, la Unanga 'o parenta 'ori i'a mo-moini.

¹¹Unanga gena-ge, “ 'O pula'a cocatu toma manusia,” la 'age rema ngowa'a 'aḏi dadi Yesus 'ai so-soma'a, 'age rema ngowa'a 'aḏi dadi nabi, 'age rema ngowa'a ga'a 'aḏi singadolo Habari Roanga, re guru-guru ga'a 'aḏi doto'o ngowa'a ngaku Yesus.

¹²Unanga 'o 'a'a so'o gena-ge, la Ma Jou'ongu Madutu 'ai 'umata kama kuranga ua di'a nga'unu munara ra Ma Jou'ongu Madutu re site'e jama'ata ga'a ma tero sa'olo Kristus 'ai lese.

¹³Ma duhu so'o gena-ge, ngene mo-moini wo dadi rimoi sababu nanga ngo-ngaku marimoi re nanga wo-waro 'i ma tero mangale Ma Jou'ongu Madutu 'ai Ngowa'a Nau'u. Dadi, ngene ḏuanga i'a wo dadi bi-biri'i, ga'a lebe ti'ara lebe dogo tiai, singadolo ngene wo dadi ma tero sa'olo Kristus.

¹⁴Dadi ngene sa'olo ngowa 'olo riwara: Ngowa'a sa-sakala 'aḏi sihaga ngene yoḏu'u re ḏi'i ngene wo ngaku ua do-doto'o sa-sakala. Dadi ngene ma tero ua sa'olo kapala ga'a 'i tagi i'a ino, wakutu sanga baoso bolo karawiana lai siḏi.

¹⁵Siḏibo ḏi'i, ngene balasu kanau renanga 'akala re sinyingara 'i romanga reo dadalara mangale 'ori i'a ga'a banari. Dadi toma 'ori i'a mo-moini, ngene wo 'a'a lebe ti'ara lebe tiai, singadolo ngene wo dadi ma tero sa'olo Kristus. Unanga gena-ge ma tero sa'olo nanga sae'e.

¹⁶Dadi sababu ngene ma tero sa'olo 'Ai lese, Unanga 'a sirimoi 'Ai 'umata mo-moini ma tero sa'olo nguḏoto 'i marimoi toma lese. Na'o bageanga-bageanga toma lese 'i munara masiretene, tantu ḏua lese 'i ramasa re 'i dadi te'e. Gena-ge ma tero sa'olo Kristus 'ai lese, 'Ai Jama'ata. Re matengo re matengo manga ngo-ngaku lebe dogo re ganapu ma'u dadalara, na'o ananga gena-ge 'aḏi 'a'a munara masiretene.

¹⁷Sababu gena-ge, ngoi to kanau re to mate'e reo Ma Jou'ongu Madutu 'ai kuasa: Awa ni 'ahu ma tero sa'olo ngowa'a 'aḏi nana'o Ma Jou'ongu Madutu ua, re ga'a ninga fikirana ma faeda 'i cua.

¹⁸Ananga gena-ge manga fikirana 'i hafu-hafu re manga 'akala re sinyingara lai te'e. Sababu gena-ge, ananga ya nana'o ceka'a i'a mai ua mangale Ma Jou'ongu Madutu, re ḏi'i ananga ya dawongo ua 'ahu ga'a Ma Jou'ongu Madutu nyengara 'o pula'a ra ananga.

¹⁹Ananga kamanga mara'a riwara, singadolo 'aḏi su-sudala mete'e manga lese ma nyafusu re 'aḏi 'ahu toma su-sudala ma dara 'i mete'e manga 'akala ma mau-mau.

²⁰Mada'a Kristus 'o doto'o ngini ua mangale de'oso re ḏegoro so'o gena-ge.

²¹Ngoi ta waro mode-mode'e mangale ngini reni 'isene mangale Kristus. Re sababu ngini ni marimoi ra Unanga gena-ge, ngini reni sanga do-doto'o banari mangale Kristus:

²²Ngini reni dawongo do-doto'o mangale ngini ni upa'a ninga de'oso re ḏegoro ma jira ga'a ni mete'e duhu ma siḏa rema nyafusu mo-moini ga'a 'i sijira re 'i sihaga ngini.

²³Ngini reni dawongo do-doto'o mangale ngini balasu ni sipula'a ninga fikirana ra Ma Jou'ongu Madutu, la 'A singali reo fikirana su-sungi.

²⁴Re ngini reni dawongo do-doto'o ḏi'i mangale ngini balasu ninga 'ahu ma tero sa'olo manusia su-sungi ga'a Ma Jou'ongu Madutu ro si'a'a: Ngini balasu ni mete'e Unanga 'ai de'oso re ḏegoro ga'a ma banari, boloto re 'ofi-'ofi.

²⁵Sababu gena-ge, ioronongoḏu ngo-ngaku rimoi, awa ni sa-sakala. Siḏibo ḏi'i, ngini ni kanau balasu ba-banari matengo re matengo, sababu ngene mo-moini wo dadi bageanga-bageanga ra Kristus 'ai lese.

²⁶Awa ngini ni ruta, singadolo 'i dadi ḏosa. Re awa ni ruta singadolo wangere 'i jala,

²⁷la awa ngini ni pula'a donga rimoi toma 'Iblisi di'a 'i sigasa ngini toma ḏosa.

²⁸Ngowa'a to-tori'i, ni tori'i rawara. Siḏibo ḏi'i, ngini balasu ni munara reninga galasau'u ma duduala, la ni sanga ngo-ngoromo di'a sibalangu toma ngowa'a ma dinga'unu ua.

²⁹Awa ni kanau demo ma jira, mada'a balasu ni kanau demo toma ngowa-ngowa'a lelegu mete'e manga paralu: demo-demo ga'a sigasa ri-riono re site'e manga 'akala re sinyingara, la na'o ngowa'a ya 'isene demo-demo gena-ge 'i sigasa ananga toma la-la ma dara.

³⁰Awa ninga de'oso re ḏegoro si'a'a Ma Ngagara 'Ofi-'Ofi 'i garura, sababu Ma Jou'ongu Madutu ro pula'a Enanga gena-ge ra ngene. 'Elingi: Enanga gena-ge 'i dadi nana'o rimoi di'a ngini reni osama nyo-nyoimi ra Unanga 'ai 'umata singadolo enanga ma 'orasa Yesus ḏuanga i'a 'o sapolo moju di'a 'O sibebasa ngini toma dungia ma jira nena-ne.

³¹Singi-ngiranga 'akala re sinyingara ma mamaḏi mo-moini. Ni porata re ni ruta awa, ni tolabe awa, ni do-doana awa, ni ma'u emono awa, bolo 'akala ma sanga 'i daene 'akala ua awa.

³²Siḏibo ḏi'i, ngini balasu ninga 'akala re sinyingara lai rousu, ni ma'u dadalara re ma'u si'apongo matengo re matengo, ma tero sa'olo Ma Jou'ongu Madutu 'o singi-ngiranga ninga ḏosa sababu ni marimoi ra Kristus.