Read Sahu Efesus 5 Bible Online

Efesus 5 - Sahu bible

Efesus 5

¹Ngini Ma Jou'ongu Madutu 'ai ngowa-ngowa'a ga'a 'a dadalara. Sababu gena-ge, ngini balasu ni cuḏuḏu'u 'Ai de'oso re ḏegoro.

²Taninga 'ahu ma dara balasu romanga reo dadalara, ma tero sa'olo Kristus ḏi'i 'O dadalara ngene. Unanga 'ai lese 'a sidoa'a sa'olo jou-jou di'a ngene sa'olo jou-jou rimoi ga'a ma bounu lai sa'i re sisanangi Ma Jou'ongu Madutu 'ai 'akala re sinyingara.

³Ngini Ma Jou'ongu Madutu 'ai 'umata. Sababu gena-ge: Tinikai bolo sudala awa, da-danata awa sababu 'ahu ma duhu so'o gena-ge 'i patasa ua di'a ngini, Unanga 'ai 'umata. Mo-moini gena-ge awa 'age taninga sigolona singadolo toma ngowa-ngowa'a lelegu 'i osama 'akala ua, ninga 'ahu ma duhu so'o gena-ge.

⁴Patasa ua ḏi'i, ngini ni kanau demo-demo ma cafarune, ma faeda 'i cua, masipaḏala'a. Siḏibo ḏi'i, ngini balasu ni sibere ie murasa ma la ra Ma Jou'ongu Madutu.

⁵Ni tailako la-la ino: Ngowa'a ga'a su-sudala, 'a'a tinikai bolo da-danata ma tero sa'olo ngowa'a ga'a 'aḏi silamo'o re siḏubuso jou'ongu ma somoara. Sababu gena-ge, ngowa'a so'o gena-ge 'aḏi sanga warisi ua ra Kristus re ra Ma Jou'ongu Madutu 'ai Pareta ma dara.

⁶Awa ngini ngowa'a nu'u sihaga reo ngowa-ngowa'a manga demo ma faeda 'i cua. Ananga gena-ge 'aḏi kanau 'o ḏosa ua mo-moini so'o ne: su-sudala, tinikai, da-danata. Ḏuanga i'a, ngowa'a gena-ge ga'a mete'e ua Ma Jou'ongu Madutu 'ai 'akala ma mau, 'aḏi sibaolo Unanga 'ai borata.

⁷Sababu gena-ge, awa ngini ni maḏagilomu reo ngowa-ngowa'a ga'a manga 'ahu ma duhu so'o gena-ge.

⁸'Au nga'ene, ngini ni 'ahu toma hafu-hafu, dadi ngini madiga'a so'o gena. Mada'a 'orasa nange-ne, ngini reni dadi Ma Jou 'ai 'umata, dadi ngini reni tegoro toma tarangi ma dara. Sababu gena-ge, ngini balasu 'ahu toma tarangi tau-taunu.

⁹Sababu na'o ngini ni 'ahu toma tarangi gena-ge, ngini ḏuanga i'a madaga'a 'ori i'a la-la mo-moini re ninga de'oso re ḏegoro 'i boloto re banari ra Ma Jou'ongu Madutu 'ai momina.

¹⁰Ni makutale ni madaga'a 'oru ḇato ga'a sisanangi Ma Jou'ongu Madutu 'ai 'akala re sinyingara.

¹¹Awa ni madaga'a 'ori i'a ma faeda 'i cua, sa'olo ngowa'a 'aḏi 'ahu toma hafu-hafu ma dara. Siḏibo ḏi'i, ngini balasu ni sitaḇela'a i'a ananga manga duhu ma jira.

¹²Na'o ngene wo sijarita mangale manga duhu ma faja ga'a ananga gena-ge 'aḏi si'a'a 'aḏi masigo-gogoro, ngene basono wo mara'a.

¹³Mada'a na'o ngini ni sitaḇela'a i'a manga duhu ma faja, gena-ge ma tero sa'olo ni tagala lapuru toma hafu-hafu. Ḏua ngowa'a ya oḏi'i re 'aḏi 'a'a rawara duhu gena-ge,

¹⁴kara ngowa'a gena-ge 'aḏi 'ahu toma tarangi sababu 'o tarangi. Ma sababu gena-ge, ngowa'a 'aḏi kanau, “Momi'i, ngana ga'a no otu re dadunu no 'ahu moju toma ngowa'a senge-sengene ma sigolona. Ḏua Kristus 'ai cahaya ḏuanga i'a 'age ra ngana.”

¹⁵Sababu gena-ge, ni tailako la-la ino ninga 'ahu ma duhu. Awa ninga 'ahu ma tero sa'olo ngowa'a haga, mada'a 'ahu ma tero sa'olo ngowa'a manga 'akala soro'unu.

¹⁶Na'o reni sanga donga, ni pake la-la donga gena-ge, sababu 'orasa nange-ne 'orasa ma jira.

¹⁷Sababu gena-ge, awa ni dadi sa'olo ngowa'a haga, mada'a ni disa waro Ma Jou'ongu Madutu 'ai 'akala ma mau.

¹⁸Gena-ge: Awa ni ka'e singadolo ni 'etolo, sababu na'o reni 'etolo ni waro diri riwara. Siḏibo ḏi'i, ngini balasu ni sidoa'a ninga 'ahu toma Ngagara 'Ofi-'Ofi, la nu'u ḏegoro:

¹⁹Ni pake mazmur, nyanyi Rohani re puji-pujiana di'a ni puji re silamo'o Ma Jou'ongu Madutu, la ni site'e matengo re matengo ninga ngo-ngaku. Ni manyanyi reninga 'akala re sinyingara mode-mode'e ra Ma Jou'ongu Madutu.

²⁰Ni sibere ie murasa ma la tau-taunu ra Ma Jou'ongu Madutu, nanga Ḇaḇa, di'a 'ori i'a mo-moini, sababu ngini ni marimoi rananga Jou Yesus Kristus.

²¹Ni ma'u ta'aloko matengo re matengo, la ngini ni silamo'o Kristus:

²²Were'a balasu ni ta'aloko taninga nau'u, ma tero sa'olo ni ta'aloko ra Ma Jou.

²³Nau'u 'o dadi sae'e tai were'a, ma tero ḇato sa'olo Kristus 'o dadi sae'e Tai jama'ata. Re Unanga masiretene 'a sisalamata ngowa-ngowa'a ngaku Unanga; ananga gena-ge ga'a ma tero sa'olo bageanga-bageanga Tai lese.

²⁴Ma tero sa'olo jama'ata ta'aloko ra Kristus, so'o gena ḏi'i toma 'oru ḇato were'a balasu ta'aloko tami nau'u.

²⁵Nau'u balasu ni dadalara ninga were'a ma tero sa'olo Kristus 'o dadalara 'Ai jama'ata, singadolo 'A sidoa'a 'Ai diri di'a ngowa'a 'U sisengene, la 'O sisalamata 'Ai jama'ata

²⁶Kristus 'o 'a'a so'o gena, la Unanga 'a sidadi ngene 'Ai 'umata. Unanga gena-ge ro si'ofi 'Ai jama'ata reo 'Ai do-doto'o re ḇanyo na'o wo sanga baptis.

²⁷Unanga 'o 'a'a gena-ge, la 'Ai jama'ata nyengara talaḏi ra Unanga 'ai biono sa'olo 'ofi-'ofi kamanga ḏosa ua; ma tero sa'olo mosolese mo madiai ro-rousu mo totoma 'ami tubaie di'a mo molo'ara.

²⁸So'o gena ḏi'i, nau'u balasu ni dadalara ninga were'a ma tero sa'olo ni dadalara ninga lese masiretene. Unanga ga'a 'a dadalara 'ai were'a, ma duhu gena-ge unanga 'a dadalara 'ai lese masiretene ḏi'i,

²⁹sababu matengo i'a mai ua 'a emono 'ai diri masiretene! Siḏibo ḏi'i unanga 'a kalesanga re 'a jaga, ma tero sa'olo Kristus 'a palihara re 'A jaga 'Ai jama'ata,

³⁰sababu ngene wo dadi bageanga-bageanga ra Unanga 'ai lese.

³¹Toma Boku 'Ofi-'Ofi 'i silefo so'o ne: “Sababu gena-ge, na-nau'u matengo ḏuanga i'a 'a sisoi'i tala 'ai ḇaḇa re ngina, di'a 'o marimoi tai were'a re ananga nga muḏiḏi raḏi dadi rimoi.”

³²Bu-bula'a gena-ge, enanga ma maksudu lai ngido. Mada'a ngoi ta site-tero sa'olo nau'u re were'a ma tero sa'olo Kristus re 'Ai jama'ata.

³³Kalaha so'o gena, bu-bula'a gena-ge di'a ngini ḏi'i: Nau'u balasu 'o dadalara 'ai were'a ma tero sa'olo unanga 'o dadalara 'ai lese re were'a balasu mo silamo'o 'ami nau'u.