Read Sahu Filipi 2 Bible Online

Filipi 2 - Sahu bible

Filipi 2

¹Ngoi reto waro ngini ninga ngo-ngaku 'i te'e sababu ni marimoi ra Kristus! Ngini ni sanga hiburu sababu Kristus 'o dadalara ngini. Ma Ngagara 'Ofi-'Ofi 'i babata re 'i marimoi ra ngini singadolo ngini ma'u dadalara matengo re matengo.

²Sababu mo-moini gena-ge, la ngini ni sitiai 'ari roanga, ngoi to golo'o ngini ni 'a'a so'o ne: Ngini ninga 'ahu ma'u 'aro'o la matengo re matengo, ni sirimoi ninga dadalara matengo re matengo, ni sirimoi ninga putusanga re ni sirimoi ninga maksudu.

³Awa ngini ni 'a'a 'ori i'a, la ngini ni mau dadi ngowa'a la-lamo'o, bolo la ngini nyengara ni matoro. Siḏibo ḏi'i, ngini matengo re matengo balasu ni siholo ninga 'akala re sinyingara re ni fikiri ngowa-ngowa'a lelegu lebe la-lamo'o i'a ra ngini.

⁴Awa pa'i singa'unu ninga diri masiretene, mada'a ngini balasu ni oḏi'i ngowa-ngowa'a lelegu manga ngadolo ua ḏi'i.

⁵Ngini ninga 'akala re sinyingara balasu ma tero sa'olo Kristus Yesus 'ai 'akala re sinyingara:

⁶Yesus ma tero ra Ma Jou'ongu Madutu, mada'a 'Ai ḏe-ḏegoro gena-ge, Yesus 'o matahana ua.

⁷Mada'a Unanga 'a sieanga, di'a sanga ḏe-ḏegoro sa'olo budaka matengo re Unanga 'o dadi sa'olo manusia, re 'Ai rupa wa oḏi'i i'a ma tero sa'olo manusia.

⁸Unanga 'o maholo 'Ai diri, re 'O 'ahu mete'e mode-mode'e ra Ma Jou'ongu Madutu singadolo ngowa'a 'U sisengene: Unanga 'U sisalib ma tero sa'olo ngowa'a ma jira.

⁹Sababu gena-ge, Ma Jou'ongu Madutu 'o sitede Unanga kau-kau'u re 'O pula'a kuasa, lebe kau'u reo kuasa mo-moini,

¹⁰la mo-moini toma soroga, toma dungia re toma ngowa-ngowa'a senge-sengene ma sigolona, ḏuanga i'a 'aḏi maḏipolono di'a silamo'o re siḏubuso Unanga.

¹¹Ananga mo-moini ḏuanga i'a 'aḏi mangaku mangale Yesus Kristus, Unanga gena-ge “Ma Jou.” Sababu gena-ge, Ma Jou'ongu Madutu 'o sanga mulia.

¹²Sababu gena-ge, ioronongoḏu ngo-ngaku rimoi ga'a ngoi tini dadalara re ga'a toma mulaingi ngini reni mete'e Ma Jou'ongu Madutu tau-taunu, ngoi to golo'o mangale ngini balasu ni makutale mode-mode'e di'a ni si'a'a ti-tiai reninga 'akala re sinyingara 'i boloto, 'oru ḇato ga'a 'i patasa di'a ngowa'a ga'a Ma Jou'ongu Madutu ro sisalamata ḏua. Awa ngini na si'a'a pa'i wakutu ngoi taninga sigolona ḇato; mada'a ma la-lamo'o i'a wakutu ngoi to kiḏanga ra ngini.

¹³Sababu Ma Jou'ongu Madutu masiretene 'o munara tau-taunu ra ngini ninga diri, la ngini mau ni mete'e Unanga 'ai mau, re ḏi'i Unanga 'o riono ngini di'a ni si'a'a so'o gena-ge.

¹⁴Ni si'a'a mo-moini reninga guḏubungu awa, bolo ni ma'u rubutu awa.

¹⁵Dadi ngini ni sijumu mangale ngini mode-mode'e Ma Jou'ongu Madutu 'ai ngowa-ngowa'a 'ofi-'ofi re kaninga sala ua, ni 'ahu loasa re banari toma ngowa'a ma jira re ngowa'a baraḏosa manga sigolona. Wakutu ngini ni singadolo Habari Roanga ga'a sigasa 'ahu toma ngowa-ngowa'a, ngini ma tero sa'olo mumuḏungu ma cahaya ga'a 'i sitarangi dungia ma hafu-hafu. Na'o ngini ninga 'ahu so'o gena 'i dadi nana'o rimoi, la ngoi ḏuanga i'a to maroanga wakutu Kristus dadunu 'o sapolo moju. Sababu enanga 'i dadi bukiti mangale 'ari galasau'u ma duduala 'i parasaja ua.

¹⁷Ngowa'a ḏa 'aḏi sisengene ngoi re 'ari ngaunu 'i dadi ma tero sa'olo 'anggur di'a jou-jou ra Ma Jou'ongu Madutu. 'Anggur di'a jou-jou gena-ge ga'a enanga ya siajala toma jou-jou haiwani ma re'u. Haiwani di'a jou-jou gena-ge ma tero sa'olo ninga munara di'a Ma Jou'ongu Madutu sababu ngini ninga ngo-ngaku. Na'o 'i dadi so'o gena, ngoi to sibere ie 'ari 'akala re sinyingara re to maroanga mamete'e ra ngini.

¹⁸So'o gena-ge ḏi'i, ngini balasu ni basono maroanga re ni monere ḏi'i mamete'e ra ngoi.

¹⁹Na'o enanga 'i mete'e Ma Jou 'ai mau, ngoi to masinganono to siḏingoto capati 'a Timotius 'o tagi ra ngini. Dadi ngoi 'ari 'akala re sinyingara 'i maroanga wakutu unanga ro maḏibo 'o gasa habari mangale ngini.

²⁰Pa'i 'a Timotius re ngoi ḇato, ngomi minga 'akala re sinyingara 'i marimoi mangale mi kalesanga mode-mode'e ngini.

²¹Ngowa'a lelegu mo-moini pa'i ya fikiri mangale manga 'ahu masiretene ḇato, ya fikiri ua mangale Yesus Kristus 'ai mau.

²²Ngini masiretene reni oḏi'i ḏua mangale Timotius unanga 'o munara cufala. Unanga gena-ge ro munara mode-mode'e mamete'e ra ngoi di'a singadolo Habari Roanga. Ngomi nga muḏiḏi ma tero sa'olo ḇaḇa re ngowa'a nau'u.

²³Sababu gena-ge, wakutu ngoi ta waro 'ari hali ma ḏo-ḏogumu, kara ngoi tu siḏingoto unanga ra ngini.

²⁴Ngoi to ngaku Ma Jou'ongu Madutu ri riono, la ti'ara riwara ngoi masiretene to sapolo ḏi'i tini tutumu ngini.

²⁵Ngoi reto sitantukanga soma'a Epafroditus 'o maḏibo i'a ra ngini. Unanga gena-ge nanga ioronongoḏu ngo-ngaku rimoi ga'a ngini siḏingoto, la 'o riono ngoi. Unanga 'o mamete'e ra ngoi re 'o riono ngoi tari munara ma dara ma tero sa'olo sordado matengo 'o ḏagilomu ngoi di'a mi parangi

²⁶Epafroditus 'o duka re 'o mau ma'u sanga ra ngini mo-moini. Sidogo ḏi'i, unanga 'ai 'akala re sinyingara 'i kangela, sababu 'au nga'ene ngini reni isene unanga 'o siḏi.

²⁷Mode-mode'e unanga 'o siḏi singadolo sa'i 'o sengene. Mada'a unanga ro la, sababu Ma Jou'ongu Madutu 'o sijumu 'Ai 'akala re sinyingara ma la-la di'a unanga re pa'i unanga ḇato ua, mada'a ngoi ḏi'i. Sababu na'o unanga gena-ge 'o sengene, 'i sidogo ngoi 'ari sangisara.

²⁸Sababu gena-ge 'ari nyafusu lai te'e di'a to soma'a unanga 'o maḏibo i'a ra ngini, la ngini ni maroanga wakutu ni ma'u sanga ra unanga, re ḏi'i 'ari 'akala re sinyingara 'i ogoro.

²⁹Dadi ngini ni dawongo unanga reninga 'akala re sinyingara sa-sanangi sa'olo nanga ioronongoḏu ngo-ngaku rimoi. Ni silamo'o ngowa'a mo-moini ma tero 'a Epafroditus,

³⁰sababu unanga ceka'a ḇato si sa'i 'o sengene sababu 'o munara di'a Kristus. Unanga gena-ge 'a sitaini 'ai 'ahu di'a 'o riono ngoi. Mo-moini gena-ge Unanga 'o si'a'a di'a riono ngoi, sababu ngini masiretene ninga donga cua sapolo di'a riono ngoi.