Read Sahu Filipi 4 Bible Online

Filipi 4 - Sahu bible

Filipi 4

¹Sababu gena-ge, 'ari ioronongoḏu ngo-ngaku rimoi ga'a ngoi tini dadalara re tini duka, ngini nena-ne ga'a 'ari roanga re si'a'a ngoi 'ari biono gau'u, ngini balasu ni macako'o namo-namoto ra Ma Jou re ni ngaku mode-mode'e Unanga tau-taunu.

²Ngoi to golo'o mode-mode'e ngo Euodia re ngoi to golo'o mode-mode'e ngo Sintike ḏi'i mangale ngini balasu ninga 'akala re sinyingara na sirimoi, sababu ngini reni marimoi ra Ma Jou.

³Ngoi to golo'o toma ḏagilomu munara matengo[2] ga'a cufala munara no riono ananga we-were'a nga muḏiḏi gena-ge. Ananga raḏi munara mode-mode'e mamete'e ra ngoi, la Habari Roanga 'i rera re walata. Ananga gena-ge ma tero sa'olo 'a Klemen, re ngowa-ngowa'a lelegu raḏi munara mamete'e ra ngoi ga'a manga lomanga 'i silefo ḏua toma ngowa'a 'ahu-'ahu manga boku.[3]

⁴Ngini balasu ni maroanga tau-taunu sababu ngini reni 'ahu marimoi ra Ma Jou. Ngoi to kanau soi moi moju: Ni maroanga tau-taunu!

⁵Ngowa'a mo-moini balasu ya oḏi'i ninga 'akala re sinyingara ma mereoso. Ni 'elingi, 'orasa ti'ara riwara Ma Jou dadunu 'o sapolo moju.

⁶Ngini awa ninga 'akala kangela mangale 'oru ḇato. Mada'a toma 'ori i'a mo-moini, ngini balasu ni manyiata re sibere ninga go-golo'o reninga murasa ma la ra Ma Jou'ongu Madutu.

⁷Ḏua dame ra Ma Jou'ongu Madutu, ga'a manusia 'aḏi sahe yoḏu'u, enanga ḏuanga i'a 'i kadiarata ninga 'akala re sinyingara sababu ngini reni marimoi ra Kristus Yesus.

⁸Ioronongoḏu ngo-ngaku rimoi, ma ḏo-ḏogumu ngini balasu ni fikiri tau-taunu mangale 'oru ḇato ga'a 'i la-la, ga'a 'i banari, ga'a ngowa'a ya silamo'o, ga'a 'i rousu, ga'a 'i bo-boloto, ga'a 'i mami-mami re 'i la-la. 'Oru ḇato ga'a la-la re 'i patasa ngowa'a ya'u puji re silamo'o, ngini balasu na fikiri mangale 'ori i'a gena-ge.

⁹'Oru ḇato ngoi tunu doto'o re ga'a ngini reni sanga ra ngoi: bae ra ngoi 'ari demo re ganau, bolo 'ari de'oso re ḏegoro — mo-moini gena-ge na siḏagi! Ḏua Ma Jou'ongu Madutu ga'a 'o pula'a 'Ai dame ra ngini, ḏuanga i'a 'O sieanga i'a ngini ua.

¹⁰Ngoi to puji re silamo'o Ma Jou'ongu Madutu re to basono maroanga masala sababu kalaha ma di'ara ḏua ngini ni riono ngoi ua, nange-ne reni riono ngoi. Ngoi 'ari maksudu ua, to kanau ngini 'elingi ngoi ua. Siḏibo ḏi'i, ngini sanga donga nyangu di'a ni riono ngoi.

¹¹Ngoi to kanau so'o gena, mada'a ngoi ta basono 'ari 'ahu ma paralu 'i kuranga ua. Sababu ngoi reto madoto'o to basono sanangi masala 'oru ga'a 'age ra ngoi:

¹²Ngoi reta basono ḏua 'ari 'ahu ma paralu 'i ngadolo ua, re 'ahu pai-pai'i. 'Oru ḇato 'i dadi ra ngoi, ngoi 'ari 'akala re sinyingara 'i sanangi moju: bae ngoi to dadi ngowa'a rema-enanga bolo ngowa'a ma dinga'unu ua; bae ngoi to sawini bolo to wunusu, ngoi ta kalesanga ua.

¹³Kristus 'o pula'a kuasa ra ngoi, dadi ngoi rari de-de'e to talaḏi 'oru ḇato.

¹⁴Kalaha so'o gena, ngini reni riono ngoi re ni sikare 'ari gina ma ḏubuso.

¹⁵Ioronongoḏu ngo-ngaku rimoi toma limau Filipi, ngini masiretene na waro, ma mulaingi wakutu ngoi tini sisoi'i tala daeraha Makedonia, pa'i ngini ḇato reni riono ngoi: Ngini ni pula'a pipisi ra ngoi, la ngoi nyengara to singadolo Habari Roanga toma ngowa'a lelegu.

¹⁶Kalaha ngoi toma limau Tesalonika, ngini ni riono ngoi moju ni siḏingoto pipisi ra ngoi soi ḏiḏi.

¹⁷Ngoi 'ari maksudu ua, ngoi to nyafusu to dawongo ninga bu-bula'a! Mada'a ngoi to nyafusu Ma Jou'ongu Madutu 'o pula'a barakati 'i madogo-dogo ra ngini sababu ngini ni riono ngoi pasala ḏua.

¹⁸Nange-ne ngoi to paralu riwara 'oru ḇato sababu ngoi reto dawongo ḏua ninga bu-bula'a mo-moini ga'a ni siḏingoto ra Epafroditus re 'age rema enanga moju. Ninga bu-bula'a gena-ge ma tero sa'olo jou-jou ra Ma Jou'ongu Madutu ga'a ma bo-bounu lai sa'i re 'A dawongo ninga jou-jou gena-ge Rai 'akala re sinyingara sa-sanangi.

¹⁹Re 'ari Jou'ongu Madutu, Unanga ga'a kai kuranga 'oru ua. Unanga gena-ge ḏuanga i'a 'o pula'a 'oru ḇato ga'a ngini ni paralu sababu ni marimoi ra Kristus Yesus.

²⁰Puji re silamo'o Ma Jou'ongu Madutu nanga Ḇaḇa kasingado-ngadolo i'a 'Amin.

²¹Ngoi to singadolo 'ari tabea ra ngini, Ma Jou'ongu Madutu 'ai 'umata mo-moini ga'a marimoi ra Kristus Yesus. Re ioronongoḏu ngo-ngaku rimoi ga'a raḏi mamete'e ra ngoi 'ane-ne, ananga gena-ge 'aḏi singadolo manga tabea ḏi'i.

²²Ma Jou'ongu Madutu 'ai 'umata toma limau 'ane-ne, ma la-lamo'o i'a ananga ga'a 'aḏi munara ra Kaisar, ananga mo-moini 'aḏi siḏingoto manga tabea ra ngini.

²³Ngoi to golo'o ra Ma Jou Yesus Kristus mangale 'Ai mura re dadalara sieanga i'a ua ngini. 'Amin.