Read Sahu Kolose 1 Bible Online

Kolose 1 - Sahu bible

Kolose 1

¹Ioronongoḏu ngo-ngaku rimoi, Ma Jou'ongu Madutu 'ai 'umata toma limau Kolose, ga'a reni marimoi ra Kristus Yesus re ni macako'o namo-namoto ra Unanga. Ngoi, Paulus Kristus Yesus 'ai so-soma'a mete'e Ma Jou'ongu Madutu 'ai 'akala ma mau. Ngoi, mamete'e renanga ioronongoḏu matengo ngo-ngaku rimoi 'a Timotius, ngomi golo'o ra Ma Jou'ongu Madutu nanga Ḇaḇa 'O pula'a dame re 'O pula'a ḏi'i mura re dadalara ra ngini.

³Ngomi remi 'isene mangale ngini reni ngaku Yesus Kristus re ngini ni dadalara Ma Jou'ongu Madutu 'ai 'umata mo-moini. Sababu gena-ge, wakutu ngomi mi manyiata di'a ngini, ngomi mi sibere ie murasa ma la tau-taunu ra Ma Jou'ongu Madutu, nanga Jou Yesus Kristus 'ai Ḇaḇa.

⁵Ngini ni ngaku Yesus Kristus re ni dadalara Ma Jou'ongu Madutu 'ai 'umata, sababu ngini ni masinganono mode-mode'e ḏuanga i'a ni sanga barakati ga'a Ma Jou'ongu Madutu 'o sidodahe ḏua toma soroga di'a ngini. Ngini reni 'isene mangale Habari Roanga ga'a 'i ba-banari, wakutu ngowa'a ya singadolo gena-ge ra ngini.

⁶Habari Roanga gena-ge 'i singadolo ḏua toma dungia sitabi donga, singadolo ganapu dogo ngowa-ngowa'a ngaku Yesus re ya si'a'a tamanga de'oso re ḏegoro re demo re ganau 'i dadi la-la. So'o gena-ge ḏi'i, wakutu ngini reni 'isene, ngini ni ngaku Yesus re ni basono mode-mode'e Ma Jou'ongu Madutu 'ai mura re dadalara singadolo ninga de'oso re ḏegoro 'i dadi la-la.

⁷Habari Roanga gena-ge 'a Epafras ra singadolo ra ngini. Epafras 'o dadi Kristus 'ai falalomu ga'a 'o munara cufala madutu di'a 'o riono ngini. Unanga gena-ge ḏi'i ngomi minga ḏagilomu munara, ga'a mu dadalara.

⁸Epafras ro siajele ra ngomi mangale ngini ni ma'u dadalara matengo re matengo, sababu Ma Ngagara 'Ofi-'Ofi 'i ḏegoro taninga 'akala re sinyingara ma dara.

⁹Sababu gena-ge, ngomi mi manyiata tau-taunu di'a ngini. Wakutu ma mulaingi i'a ngomi mi 'isene mangale ngini, ngomi golo'o ra Ma Jou'ongu Madutu mangale 'Ai Ngagara 'Ofi-'Ofi 'i sipula'a 'akala soro'unu re wo-waro ra ngini, singadolo ngini nyengara ni waro ti-tiai, 'oru ga'a Ma Jou'ongu Madutu 'ai 'akala ma mau.

¹⁰Dadi, ngini nga'unu ni 'ahu mete'e Ma Jou'ongu Madutu 'ai 'akala ma mau, la ni sisanangi Unanga 'ai 'akala re sinyingara. Re ḏi'i ngini ninga ga'a la-la fara muḏuo i'a re ninga wo-waro mangale Ma Jou'ongu Madutu, enanga gena-ge 'i ganapu madogo-dogo toma 'ori i'a mo-moini.

¹¹Ngomi mi golo'o ra Ma Jou'ongu Madutu ga'a 'Ai kuasa ma pari cua, mangale Unanga 'a sinamoto ninga 'akala re sinyingara Rai kuasa mo-moini, la ngini nga'unu ni tahana sikisa tau-taunu reninga 'akala ḇanyo reninga 'akala re sinyingara sa-sanangi.

¹²re ni sibere ie murasa ma la ra Ma Jou'ongu Madutu ḏi'i. Sababu Unanga gena-ge ga'a 'o sidadi ngini ni patasa di'a ni dawongo 'oru ga'a Unanga 'a sidodahe pasala ḏua di'a 'Ai 'umata Tai pareta ma dara ga'a 'i tarangi.

¹³Unanga ro sibebasa ngini toma kuasa hafu-hafu, kara 'O sigasa re 'O singosama ngini tai Ngowa'a Nau'u 'Ai pareta ma dara. Unanga gena-ge, Ma Jou'ongu Madutu 'U dadalara.

¹⁴'Ai Ngowa'a Nau'u gena-ge ro tuusu ngene, re Ma Jou'ongu Madutu ro singi-ngiranga nanga ḏosa-ḏosa.

¹⁵Ngene wo oḏi'i yoḏu'u Ma Jou'ongu Madutu mada'a 'a Kristus unanga gena-ge Ma Jou'ongu Madutu 'ai gabara mode-mode'e. Kristus 'o parenta Ma Jou'ongu Madutu 'ai do-dadi mo-moini, ma tero sa'olo ngowa'a nau'u ma jomolo ga'a 'o parenta 'ai nongoḏu,

¹⁶sababu Ma Jou'ongu Madutu 'U 'utusu Unanga gena-ge 'o sidadi 'ori i'a mo-moini: bae toma soroga, bae toma dungia: bae 'ori i'a i'a ga'a wa oḏi'i, bae 'ori i'a i'a ga'a wa oḏi'i ua. So'o gena ḏi'i bae roh, bae mala'ekata ga'a 'i parenta rema kuasa. Mo-moini gena-ge Kristus 'a sidadi, la mo-moini gena-ge 'i simulia Unanga.

¹⁷'Ori i'a mo-moini toma dungia nena-ne 'i cua moju, Kristus 'age rema enanga ḏua. Re Unanga 'a siḏe-ḏegoro 'ori i'a mo-moini ma ngi'i, re ḏi'i Unanga 'a parenta.

¹⁸Kristus gena-ge 'Ai kuasa ma pari cua toma jama'ata ma tero sa'olo sae'e 'i kuasa toma lese. Unanga jama'ata manga 'ahu ma cimi sababu Unanga ma mulaingi dadunu Ro 'ahu moju toma ngowa'a senge-sengene manga sigolona ma tero sa'olo ngowa nau'u ma jomolo. Dadi pa'i Unanga masiretene ḇato 'o kuasa lai lamo'o re lai kau'u toma 'ori i'a i'a mo-moini,

¹⁹sababu Ma Jou'ongu Madutu 'o sitantukanga pasala ḏua 'Ai duhu re 'Ai kuasa mo-moini kama kuranga ua 'a sipa'ala Tai Ngowa'a Nau'u, Kristus.

²⁰'Ua re 'au wali moju, Ma Jou'ongu Madutu 'o sitantukanga ḏua 'O sirimoi moju 'ori i'a mo-moini: bae toma soroga, bae toma dungia, ra Unanga masiretene. Unanga ro 'a'a so'o gena-ge sababu 'a Kristus 'ai ngaunu ri pa'ala di'a ngene wakutu 'O sengene toma salib.

²¹'Au nga'ene, ngini ni kiḏanga ra Ma Jou'ongu Madutu re ni lawana Unanga, sababu taninga 'akala re sinyingara ma dara 'i cira singadolo 'i waiti taninga de'oso re ḏegoro.

²²Kalaha so'o gena-ge, Ma Jou'ongu Madutu 'a sirimoi moju ngene ra Unanga sababu Unanga 'ai Ngowa'a Nau'u 'O sengene sa'olo manusia. 'Ai se-sengene gena-ge 'i sidadi ngini ninga 'ahu 'i 'ofi-'ofi, kama faja ua, re kaninga sala ua ra Ma Jou'ongu Madutu 'ai momina.

²³Mada'a ngini balasu ni cako'o namo-namoto ninga ngo-ngaku kama elala awa toma Habari Roanga. Re ḏi'i ngini ni matogumu awa ni masinganono mangale 'oru ga'a toma Habari Roanga ra Ma Jou'ongu Madutu ga'a ro sijaji ra ngini. Habari Roanga gena-ge ya singadolo ḏua di'a ngowa-ngowa'a toma dungia sitabi donga. Ngoi, Paulus, reto dadi falalomu ḏi'i di'a singadolo Habari Roanga gena-ge.

²⁴Nange-ne, ngoi to sanangi to sanga sangisara di'a ngini ninga la. Sababu so'o gena-ge, ngoi ta sitotomo 'oru ga'a Kristus 'o siwatasa ra ngoi. Gena-ge ngoi balasu to sangisara di'a jama'ata manga la. Jama'ata gena-ge ma tero sa'olo Kristus 'ai lese.

²⁵Ma Jou'ongu Madutu 'o siwatasa ngoi to dadi jama'ata manga falalomu di'a ta singadolo Ma Jou'ongu Madutu 'ai habari, kama kuranga ua.

²⁶Ma Jou'ongu Madutu 'ai habari gena-ge Unanga 'a sirahasia moju musungu rema latu-latu toma ḏuḏunu toma ngowa'a mo-moini. Mada'a nange-ne, Ma Jou'ongu Madutu ra siwaiti Tai 'umata.

²⁷Ma Jou'ongu Madutu mau 'a siwaiti Tai 'umata mangale 'ai rahasia ga'a 'i rousu re mulia gena-ge di'a ngini, ngowa'a Yahudi ua. Rahasia gena-ge Kristus 'o tegoro taninga 'akala re sinyingara ma dara. Dadi ngini ni waro mode-mode'e ḏuanga i'a Ma Jou'ongu Madutu 'o pula'a 'Ai mulia ma balangu ra ngini.

²⁸Kristus gena-ge ngomi mi singadolo ra guna ḇato. Ngomi mi si'elingi re mi doto'o ananga mo-moini reminga 'akala ma soro'unu. Ngomi minga maksudu di'a sigasa re sitalaḏi ngowa'a mo-moini ga'a raḏi marimoi ra Kristus, sa'olo ngowa'a ti-tiai ra Ma Jou'ongu Madutu.

²⁹Sababu gena-ge, ngoi to munara mode-mode'e to pake 'ari de-de'e mo-moini ga'a Kristus 'o pula'a ra ngoi. De-de'e gena-ge 'i munara rema kuasa tari 'ahu ma dara ḏi'i.