Read Sahu 1 Tesalonika 1 Bible Online

1 Tesalonika 1 - Sahu bible

1 Tesalonika 1

¹Ngomi, Paulus, Silas re Timotius mi siḏingoto surata ne tananga ioronongoḏu ngo-ngaku rimoi toma jama'ata Tesalonika, ngini ga'a ni marimoi ra Ma Jou'ongu Madutu nanga Ḇaḇa re Yesus Kristus nanga Jou. Ngomi mi manyiata ra Ma Jou'ongu Madutu nanga Ḇaḇa, re Yesus Kristus nanga Jou, la ḏuanga i'a 'Aḏi pula'a manga mura re dadalara re 'Aḏi pula'a ḏi'i manga dame tau-taunu ra ngini mo-moini.

²Ngomi mi sibere ie minga murasa ma la ra Ma Jou'ongu Madutu tau-taunu sababu ngini mo-moini. Wakutu ngomi mi manyiata ra Ma Jou'ongu Madutu nanga Ḇaḇa, ngomi mi si'elingi ngini ḏi'i. Ngomi mi si'elingi ie ma duhu sa'olo ngini ni munara ḏua di'a Ma Jou'ongu Madutu, sababu ninga ngo-ngaku lai te'e ra Ma Jou Yesus. Ma duhu sa'olo ngini ni riono ḏua ngowa-ngowa'a lelegu sababu ni dadalara ananga. Re ḏi'i ma duhu sa'olo ngini ni doiti sikisa ḏua sababu ninga ngo-nganono lai te'e mangale nanga Jou Yesus Kristus dadunu 'o sapolo moju.

⁴Ioronongoḏu ngo-ngaku rimoi, ngini ga'a Ma Jou'ongu Madutu 'o dadalara re 'o 'aro'o ngini ni dadi Unanga 'ai ngowa-ngowa'a ga'a Unanga 'o cumutu ḏua.

⁵Ngomi mawaro gena-ge 'i banari, sababu wakutu ngomi mi singadolo Habari Roanga ra ngini 'i mete'e pa'i ngomi minga demo-demo ḇato ua, mada'a 'i mete'e rema Ngagara 'Ofi-'Ofi ma kuasa. Sidogo ḏi'i, ngomi mi sijumu ra ngini mangale ngomi mi ngaku mode-mode'e Habari Roanga gena-ge 'i banari, sababu ngini masiretene ni waro ma duhu sa'olo ngomi mi 'ahu de-de'oso ngini wakutu ngomi taninga sigolona.

⁶Sidogo ḏi'i, ngomi waro Ma Jou'ongu Madutu ro cumutu ḏua ngini sababu ninga 'ahu ma duhu 'i dadi ma tero sa'olo ngomi minga 'ahu ma duhu re Ma Jou Yesus 'ai 'ahu ma duhu, wakutu 'au nga'ene ngomi mi sanga sikisa ḏua. Ngini ni sanga sikisa sababu ngini reni ngaku Habari Roanga ga'a ngomi ma singadolo ḏua ra ngini. Kalaha so'o gena, ngini ninga 'akala re sinyingara 'i maroanga sababu Ma Ngagara 'Ofi-'Ofi ma munara.

⁷Ninga 'ahu ma duhu so'o gena-ge singadolo ngowa'a ngo-ngaku rimoi toma daeraha Makedonia re Akhaya ya cuḏuḏu'u re ya mete'e.

⁸Pa'i toma daeraha Makedonia re Akhaya ḇato ua mada'a Habari Roanga mangale Ma Jou Yesus 'i rera re walata ngadolo le'a bolo le'a sababu ngini. So'o gena ḏi'i, habari mangale ninga ngo-ngaku ra Ma Jou'ongu Madutu 'i rera re walata ngadolo le'a bolo le'a ḏi'i. Sababu gena-ge, ngomi kama dogo demo riwara toma ngowa'a gena-ge.

⁹Ngowa'a mo-moini ya sijarita mangale ma duhu sa'olo 'au nga'ene ngomi mi sapolo i'a, re ma duhu sa'olo ngini ni dawongo minga do-doto'o: Ngini rena upa'a ninga jou'ongu ma somoara re ni silamo'o re siḏubuso mode-mode'e re ni de-de'oso Ma Jou'ongu Madutu pa'i matengo ḇato, Unanga ga'a 'o 'ahu.

¹⁰Ananga ya sijarita ḏi'i mangale ma duhu sa'olo ngini ni totoma wakutu Ma Jou'ongu Madutu 'ai Ngowa'a Nau'u dadunu 'O sapolo moju da'u soroga tala. Unanga gena-ge ga'a 'O sengene ḏua mada'a Ma Jou'ongu Madutu dadunu 'o si'ahu moju re Unanga gena-ge na sisalamata ngene ra Ma Jou'ongu Madutu 'ai borata ga'a 'i dadi toma biono i'a.