Read Sahu 1 Tesalonika 2 Bible Online

1 Tesalonika 2 - Sahu bible

1 Tesalonika 2

¹Ioronongoḏu ngo-ngaku rimoi, ngini masiretene na waro, mangale ngomi minga ta-sapolo ra ngini, 'i parasaja ua.

²So'o gena ḏi'i ngini na waro, ngomi mi sapolo nyangu ra ngini toma limau Tesalonika, ngomi toma Filipi. I'a da'a, ngowa'a 'aḏi sisikisa re 'aḏi sije-jengere ngomi. Mada'a kalaha ngowa'a manga repe ga'a 'aḏi lawana ngomi, nanga Jou'ongu Madutu, Unanga gena-ge 'o site'e minga 'akala re sinyingara, la ngomi mi mojongo ua di'a mi singadolo Habari Roanga ra ngini ḏi'i.

³Ioronongoḏu ngo-ngaku rimoi, ngomi mi golo'o ua mangale ngini ni mete'e do-doto'o sa-sakala bolo minga 'ulungu ma jira cua, bolo di'a sihaga ua.

⁴'Orasa nange-ne, Ma Jou'ongu Madutu 'a tai'i minga 'akala re sinyingara ḏua re 'A sitantukanga ḏua 'O pake ngomi di'a singadolo Habari Roanga. Sababu gena-ge, ngomi minga maksudu ua di'a minga demo-demo mi sisanangi ngowa'a manga 'akala re sinyingara, mada'a pa'i mi mau sisanangi Ma Jou'ongu Madutu 'ai 'akala re sinyingara ḇato.

⁵Ngini masiretene na waro, ngomi mi pake ua demo-demo ma mami. Re ngomi mi sapolo magogono ua 'akala re sinyingara ga'a da-danata, Ma Jou'ongu Madutu 'a waro gena-ge 'i banari.

⁶Ngomi ḏi'i mi golo'o ua ngini bolo 'a guna ḇato 'aḏi sihie-hie ngomi. Kalaha ngomi nyengara mi golo'o ngini bolo 'a guna ḇato balasu 'aḏi silamo'o ngomi sababu ngomi Yesus 'ai so-soma'a di'a Kristus.

⁷Siḏibo ḏi'i, wakutu ngomi taninga sigolona, ngomi mi 'angoto la-la ma tero sa'olo ngina matengo mo 'angoto 'ami ngowa-ngowa'a.

⁸Dadi sababu ngomi mi dadalara mode-mode'e, ngomi mi sanangi masala di'a singadolo Habari Roanga ra ngini. Re pa'i enanga gena-ge ḇato ua, mada'a ngomi ḏi'i mi madaga'a 'oru ḇato di'a riono ngini ḏi'i, sababu ngini dadi ngowa'a ga'a ngomi ma'u dadalara masala.

⁹Tantu ḏua, ngini na sidaioranga ua, wakutu ngomi mi singadolo Habari Roanga ra Ma Jou'ongu Madutu ino ra ngini. Lobi'i re wangere, ngomi mi 'a'a munara mode-mode'e di'a mi sanga ngo-ngoromo re pakeanga, la matengo i'a ua ngomi ma'u sikangela.

¹⁰Ngini masiretene re Ma Jou'ongu Madutu ḏi'i dadi sakisi mangale ngomi nena-ne, ngowa'a loasa re banari, minga de'oso re ḏegoro 'i 'ofi-'ofi re mi madaga'a 'ori i'a ma rapu ua wakutu ngomi mi tegoro taninga sigolona, ngini ga'a reni ngaku Yesus.

¹¹Ngini ni waro ngomi mi 'angoto ngini matengo-matengo ma tero sa'olo ḇaḇa matengo 'o 'angoto 'ai ngowa'a masiretene:

¹²Ngomi mi golo'o mode-mode'e re babata tau-taunu ngini di'a ni 'ahu mete'e Ma Jou Yesus 'ai do-doto'o, la ni sisanangi Ma Jou'ongu Madutu 'ai 'akala re sinyingara; sababu Unanga nu 'aro'o ngini ni dadi 'Ai ngowa-ngowa'a masiretene, ga'a Unanga ḏuanga i'a nu parenta rema kabasarana.

¹³'Age fara moi moju 'i si'a'a ngomi mi sibere ie minga murasa ma la tau-taunu ra Ma Jou'ongu Madutu, sababu wakutu ngomi mi singadolo habari ra Ma Jou'ongu Madutu ino, ngini ni 'isene re ni ngaku habari gena-ge ma tero ua manusia manga demo, mada'a sa'olo demo ra Ma Jou'ongu Madutu ino, ga'a 'i banari. Unanga 'o munara tau-taunu sipake habari gena-ge taninga 'akala re sinyingara ma dara, ngini gena-ge ga'a reni ngaku Kristus.

¹⁴Ioronongoḏu ngo-ngaku rimoi, ngomi mi waro ḏua ngini ni dawongo habari gena-ge taninga 'akala re sinyingara ma dara sababu 'oru 'i dadi toma Yudea manga jama'ata ga'a 'i mete'e Yesus Kristus ma tero sa'olo 'i dadi ra ngini: Ngowa-ngowa'a Tesalonika, ga'a 'aḏi ngaku Yesus ua, 'aḏi sisikisa ngini ma tero sa'olo ngowa'a Yahudi 'aḏi sisikisa jama'ata toma daeraha Yudea.

¹⁵Ngowa-ngowa'a Yahudi gena-ge 'aḏi sisengene Ma Jou Yesus re nabi-nabi re so'o gena ḏi'i 'aḏi sisikisa ngomi. Ananga gena-ge 'aḏi sisanangi ua Ma Jou'ongu Madutu 'ai 'akala re sinyingara re 'aḏi lawana ngowa'a mo-moini.

¹⁶Ananga gena-ge 'aḏi dola'aku ngomi, la mi singadolo awa Habari Roanga mangale salamata toma ngowa-ngowa'a Yahudi ua la ananga 'aḏi sanga salamata awa. Ma duhu so'o gena-ge, ananga manga ḏosa 'i madogo-dogo taunu singadolo ma ju-juguri 'i romanga. Sababu gena-ge, Ma Jou'ongu Madutu 'o ruta re ḏuanga i'a 'O sihukumu ananga.

¹⁷Ioronongoḏu ngo-ngaku rimoi, wakutu ngomi mi sieanga tala ngini toma 'orasa 'i ti'ara ua — ma tero sa'olo tananga momina ḇato, mada'a toma 'akala re sinyingara so'o gena ua — ngomi mi 'elingi ngini tau-taunu singadolo masidisa ma ngo'omo, la wo ma'u sanga moju.

¹⁸Ngomi minga 'akala ma sanga mi mau tutumu ngini re ngoi ta sitai'i soi moi-soi ḏiḏi ḏua, mada'a 'Iblisi 'i dola'aku tau-taunu.

¹⁹Ngomi mi mau tutumu ngini sababu ngini ni macako'o namo-namoto ra Yesus. Sababu gena-ge, ngini gena-ge ngomi minga ngo-nganono re ni si'a'a ngomi maroanga. Re wakutu Ma Jou Yesus dadunu 'o sapolo moju re ngene wo talaḏi Unanga, ngini ni dadi ngomi minga biono gau'u.

²⁰Mode-mode'e, ngini gena-ge ni si'a'a ngomi mi maroanga re minga biono gau'u.