Read Sahu 1 Tesalonika 4 Bible Online

1 Tesalonika 4 - Sahu bible

1 Tesalonika 4

¹Ioronongoḏu ngo-ngaku rimoi, ma ḏo-ḏogumu ngomi ma siajele re masijumu pasala ḏua ra ngini mangale ma duhu sa'olo ninga 'ahu balasu mete'e Ma Jou Yesus 'ai mau, la taninga 'ahu 'i sisanangi Ma Jou'ongu Madutu 'ai 'akala re sinyingara. Ngomi ma waro, ngini rena si'a'a mada'a nange-ne sababu ngene wo marimoi ra Ma Jou Yesus, ngomi mi golo'o mode-mode'e ngini lebe cufala i'a ḏi'i.

²Ngomi mi golo'o so'o gena, sababu ngini ni waro ḏua mangale minga do-doto'o, ga'a ngomi pula'a ra ngini, ngomi ma doto'o gena-ge rema Ma Jou Yesus 'ai kuasa.

³Ma Jou'ongu Madutu 'ai 'akala ma mau nena-ne: Ngini ninga 'ahu balasu 'ofi-'ofi. Sababu gena-ge, ni sudala awa.

⁴Nau'u balasu 'ahu loasa re banari taninga were'a, la ngini ni sisanangi Ma Jou'ongu Madutu 'ai 'akala re manusia manga 'akala re sinyingara ḏi'i.[1]

⁵Awa ngini ni mete'e ninga nyafusu ma jira ma tero sa'olo ngowa'a 'aḏi nana'o Ma Jou'ongu Madutu ua.

⁶Toma dara ma tero so'o gena-ge, awa ngini ni 'a'a sala bolo ni sihaga taninga ioronongoḏu ngo-ngaku rimoi. 'Au wali, ngomi mi sipo-poma ḏua ra ngini sababu na'o ni 'a'a so'o gena, Ma Jou'ongu Madutu nu sihukumu.

⁷I'a sa'olo Ma Jou'ongu Madutu 'aro'o ngene, la wo sudala?! Sanga ua! Siḏibo ḏi'i, la nanga 'ahu balasu 'i dadi 'ofi-'ofi.

⁸Sababu gena-ge, 'a guna ḇato ya mete'e ua do-doto'o nena-ne, ananga gena-ge 'aḏi dawongo pa'i ngene manusia ḇato ua mada'a 'aḏi dawongo ua ḏi'i Ma Jou'ongu Madutu ga'a pula'a Ma Ngagara 'Ofi-'Ofi ra ngene, la nanga 'ahu 'i dadi 'ofi-'ofi.

⁹Paralu riwara ngomi mi lefo surata ra ngini mangale ma duhu sa'olo ni ma'u dadalara matengo re matengo, sababu Ma Jou'ongu Madutu masiretene ro doto'o ngini mangale balasu ni ma'u dadalara.

¹⁰Toma dara gena-ge, ngini ni si'a'a ḏua re na sijumu ḏua taninga ioronongoḏu ngo-ngaku rimoi le'a bolo le'a toma daeraha Makedonia, mada'a ngomi golo'o mode-mode'e ra ngini mangale toma biono i'a, ngini balasu ni ma'u dadalara matengo re matengo lebe madogo-dogo i'a ḏi'i.

¹¹So'o gena ḏi'i, ngomi mi golo'o mode-mode'e ra ngini mangale ni makutale mode-mode'e ni 'ahu dame toma ngowa'a lelegu, ni disa oromo re ngini ninga galasau'u ma duduala masiretene re ni capuru awa ngowa'a lelegu manga 'urusana. Fara muḏuo i'a gena-ge, ngomi mi siajele pasala ḏua.

¹²Na'o ninga 'ahu ma duhu so'o gena, ninga 'ahu ni masinganono toma ngowa'a lelegu ua re ngowa'a 'aḏi ngaku Yesus ua mai 'aḏi silamo'o ngini.

¹³Ioronongoḏu ngo-ngaku rimoi, ngomi mi mau ngini mo-moini na waro mangale ngowa'a ngaku Yesus ga'a 'aḏi sengene pasala ḏua, la ngini ni rerese ma gaḏi awa ma tero sa'olo ngowa'a ngaku Yesus ua ga'a kamanga ngo-nganono ua.

¹⁴Ngene wo ngaku mangale Yesus 'o sengene ḏua mada'a Ma Jou'ongu Madutu dadunu 'o si'ahu Unanga moju. Sababu gena-ge, ngene wo ngaku ḏi'i mangale ḏuanga i'a Ma Jou'ongu Madutu dadunu 'o si'ahu moju ngowa'a senge-sengene mo-moini ga'a ngowa'a ngaku Yesus, la ananga 'aḏi 'ahu marimoi ra Unanga.

¹⁵Mangale do-doto'o ga'a ngomi mi dawongo ra Ma Jou, ngomi mau masingadolo ra ngini nena-ne: Wakutu Ma Jou Yesus ḏuanga i'a 'O sapolo moju, ngowa'a ngaku Yesus ga'a 'aḏi sengene siḏa, 'aḏi ma'u sanga ra Unanga gena-ge, kara ngene ḏi'i ga'a wo 'ahu moju wo ma'u sanga Unanga.

¹⁶Toma 'orasa gena-ge, mala'ekata ma sae'e unanga ḏuanga i'a 'o kanau 'o siduga-duga re 'o wusu Ma Jou'ongu Madutu 'ai terompet. Enanga gena-ge 'i dadi didina'o mangale Ma Jou masiretene 'O 'uci da'u soroga tala, kara Unanga 'o dadunu si'ahu moju ngowa'a ngaku Yesus ga'a raḏi sengene siḏa.

¹⁷Gena ḏua, ngene wo 'ahu moju re ananga 'aḏi sengene siḏa, Ma Jou na tede singosama toma kakamo ma dara, la ngene ma'u sanga ra Unanga toma diwanga. Gena-ge ḏua, ḏuanga i'a ngene wo 'ahu marimoi ra Unanga kasingado-ngadolo i'a.

¹⁸Sababu gena-ge, ngini mo-moini balasu ni ma'u site'e ninga 'akala re sinyingara matengo re matengo re demo-demo gena-ge.