Read Sahu 1 Tesalonika 5 Bible Online

1 Tesalonika 5 - Sahu bible

1 Tesalonika 5

¹Ioronongoḏu ngo-ngaku rimoi, ngomi paralu mi lefo surata riwara masiḏingoto ra ngini mangale ma 'orasa bolo ma wangere ngau wakutu Ma Jou dadunu 'o sapolo moju,

²sababu ngini masiretene na waro ḏua Unanga gena-ge dadunu 'o sapolo moju ma tero sa'olo ngowa'a tori-tori'i 'aḏi sapolo toma 'orasa lobi'i.

³Toma 'orasa gena-ge, ngowa'a ḏuanga i'a 'aḏi makanau, “Ngene mo-moini wo 'ahu toma la re wo salamata.” Mada'a toma 'orasa gena-ge kage-kage ananga 'aḏi sanga bahala re matengo i'a ua 'aḏi poloi'i. Gena-ge ma tero ḇato sa'olo we-were'a matengo kage-kage 'ami 'orasa ma ḏe-ḏegoro i'a enanga ri ngadolo mo mabasono mo go-goḏi, re munanga mo wiḏi yoḏu'u singadolo mo maḏe-ḏegoro i'a.

⁴Mada'a ngini ioronongoḏu ngo-ngaku rimoi ga'a ni 'ahu toma hafu-hafu riwara, sababu ni nana'o Ma Jou Yesus. Sababu gena-ge, ngini kama heranga riwara wakutu enanga ma 'orasa 'i ngadolo ma tero sa'olo ngowa'a to-tori'i 'aḏi sapolo.

⁵Ngini mo-moini sa'olo ngowa'a ngaku Yesus ga'a ni 'ahu re ninga de'oso re ḏegoro ma tero sa'olo ngowa-ngowa'a ga'a 'ahu toma tarangi ma dara, sababu ngini reni ngaku Yesus. Sababu gena-ge, ngene mo-moini wo si'a'a awa 'oru i'a ma jira, sababu ngene wo 'ahu toma hafu-hafu riwara.

⁶Sababu gena-ge, ngene balasu pa'i maotu-otu awa ma tero sa'olo ngowa'a 'aḏi 'ahu toma hafu-hafu, ngene balasu ma'istiari re wo manahana nanga nyafusu ma jira sa'olo ngowa'a 'aḏi 'ahu toma tarangi.

⁷Sababu toma wakutu lobi'i ngowa'a 'aḏi maotu-otu 'aḏi ma'istiari ua, re toma wakutu lobi'i ḏi'i ngowa'a 'aḏi dadi 'etolo re nga'unu ua manahana manga nyafusu ma jira.

⁸Mada'a sababu ngene ne wo osama nyo-nyoimi toma ngowa'a ga'a 'aḏi 'ahu toma tarangi ma dara, ngene balasu wo manahana nanga nyafusu ma jira: Ngene balasu wo ngaku tau-taunu Ma Jou Yesus re wo dadalara ngowa'a lelegu. Na'o so'o gena-ge, ngene wo jaga nanga ngo-ngaku, la 'i elala ua ma tero sa'olo sordado 'o mapake baju jaga di'a 'o jaga 'ai diri. So'o gena ḏi'i, ngene balasu wo masinganono mode-mode'e mangale Ma Jou Yesus dadunu 'o sapolo moju di'a sisalamata ngene. Na'o so'o gena-ge, ngene wo jaga nanga ngo-nganono, la 'i sitaka-taka ua ma tero sa'olo sordado ga'a 'o mapake 'ai capeo waja di'a 'o jaga 'ai sae'e. Ḏua ngene wo ḏu-ḏuanga ḏua di'a Ma Jou Yesus 'o sapolo moju ma tero sa'olo sordado matengo 'o ḏuanga ḏua 'o osama jaga.

⁹Ma Jou'ongu Madutu 'o cumutu ngene di'a sihukumu ua mada'a na sisalamata ngene sababu nanga Jou Yesus Kristus 'ai se-sengene.

¹⁰Unanga 'o sengene, la 'O sisalamata ngene re ḏuanga i'a Unanga dadunu 'o sapolo moju, ngene ne wo 'ahu moju bolo ḏa wo sengene ḏua, ngene mo-moini wo 'ahu marimoi ra Unanga.

¹¹Sababu gena-ge, ngini ni ma'u si'elingi re ni ma'u babata matengo re matengo ma tero sa'olo ngini na si'a'a ḏua 'au wali singadolo 'orasa nange-ne.

¹²Ioronongoḏu ngo-ngaku rimoi, ngomi mi golo'o mode-mode'e ra ngini ni silamo'o ngowa'a ga'a 'aḏi side-de'oso ngini. Re ma la-lamo'o i'a ninga bi-biri'i ga'a nu'u sibi-biri'i re siajele ngini, la ninga ngo-ngaku kama elala ua.

¹³Ni silamo'o mode-mode'e ananga re na'u dadalara sababu manga munara di'a ngini. Ngini ni 'ahu balasu ma'u 'aro'o la ino matengo re matengo.

¹⁴Ngomi golo'o mode-mode'e ḏi'i ngini ni ḇangata ngowa'a ga'a 'aḏi munara ḇusuru, ni site'e ngowa'a ga'a manga 'akala re sinyingara 'i namoto ua, ni riono ngowa'a ma dinga'unu ua re ruta-ruta awa ra guna ḇato.

¹⁵Ni ma'istiari ino: Na'o ngowa'a 'aḏi 'a'a cira ngini, ngini 'a'a cira ananga awa. Siḏibo ḏi'i, ngini balasu ni ma'u riono re ni ma'u sioḏi'i matengo re matengo ra guna ḇato.

¹⁶Sababu ngini reni marimoi ra Yesus Kristus, Ma Jou'ongu Madutu 'o mau ngini ni 'ahu toma roanga re monere ma dara re ni manyiata tau-taunu re sibere ie murasa ma la ra Ma Jou'ongu Madutu toma ngi'i re 'orasa mo-moini.

¹⁹Awa ni lawana Ma Ngagara 'Ofi-'Ofi.

²⁰Sababu gena-ge, na'o ngowa'a 'aḏi singadolo habari toma Ngagara 'Ofi-'Ofi ino; ni dawongo ua awa.

²¹Mada'a balasu ni tailako la-la, la ni waro habari gena-ge mode-mode'e toma Ngagara 'Ofi-'Ofi ino. Na'o so'o gena, balasu ni mete'e Ma Ngagara 'Ofi-'Ofi ma mau.

²²Mada'a ni mete'e awa 'oru ḇato ga'a 'i cira.

²³Ngomi manyiata ra Ma Jou'ongu Madutu, ga'a 'O sipula'a dame ra ngene, mangale Unanga masiretene 'O sidadi ngini mode-mode'e sa'olo 'Ai ngowa'a 'ofi-'ofi: bae ninga nyawa, ninga 'akala re sinyingara re ninga de'oso re ḏegoro kama rapu ua singadolo nanga Jou Yesus Kristus dadunu 'o sapolo moju.

²⁴Ma Jou'ongu Madutu ga'a 'o 'aro'o ngini ni dadi ngowa'a 'ofi-'ofi, Unanga ḏuanga i'a 'o 'a'a mo-moini gena-ge sababu Unanga 'ai jaji kama ngali ua.

²⁵Ioronongoḏu ngo-ngaku rimoi, sidaioranga ngomi awa wakutu ni manyiata.

²⁶Ma singadolo minga tabea reminga dadalara di'a ioronongoḏu ngo-ngaku rimoi mo-moini.

²⁷Ra Ma Jou 'ai kuasa, ngoi to soma'a ngini mangale surata nena-ne ma betongo na singadolo re na si'isene taninga ioronongoḏu ngo-ngaku rimoi mo-moini.

²⁸Ngoi to golo'o ra Yesus Kristus, nanga Jou, mangale 'Ai mura re dadalara sieanga i'a ua ngini.