Read Sahu 2 Tesalonika 1 Bible Online

2 Tesalonika 1 - Sahu bible

2 Tesalonika 1

¹Ngomi, Paulus, Silas re Timotius mi siḏingoto surata ne tananga ioronongoḏu ngo-ngaku rimoi toma jama'ata Tesalonika, ngini ga'a ni marimoi ra Ma Jou'ongu Madutu nanga Ḇaḇa re Yesus Kristus nanga Jou.

²Ngomi mi manyiata ra Ma Jou'ongu Madutu, Ḇaḇa, re Yesus Kristus nanga Jou di'a ḏuanga i'a ya pula'a manga mura re dadalara re ya pula'a ḏi'i dame tau-taunu ra ngini mo-moini.

³Ngomi mi sibere ie minga murasa ma la tau-taunu ra Ma Jou'ongu Madutu, sababu ngini. Gena-ge 'i banari mode-mode'e re ngomi balasu masi'a'a so'o gena, sababu ngini ninga ngo-ngaku ra Ma Jou Yesus 'i madogo-dogo ḇato re ḏi'i ganapu ni ma'u dadalara matengo re matengo.

⁴Sababu gena-ge, wakutu ngomi mi tutumu jama'ata-jama'ata lelegu, ngomi masiajele mangale ngini ni dadi ngomi minga biono gau'u, sababu ngini ninga ngo-ngaku lai te'e ra Yesus Kristus. Kalaha ngowa-ngowa'a nu'u sisikisa re ni sanga sangisara, ngini ninga ngo-ngaku gena-ge kama elala ua.

⁵Mo-moini gena-ge ḏuanga i'a 'i dadi bukiti rimoi mangale Ma Jou'ongu Madutu 'o sijuruhakimi ngowa'a mete'e 'adili re banari. Dadi Unanga 'a putusu tala ni patasa ni osama ra Unanga 'Ai pareta toma soroga, sababu ngini ni sanga sangisara, mada'a ni mete'e tau-taunu Ma Jou Yesus.

⁶Ma Jou'ongu Madutu 'o 'adili re banari re 'a balasa ngowa'a ga'a 'aḏi sisikisa ngini mete'e ananga manga ga'a.

⁷'A guna ḇato reni sanga sangisara sababu reni mete'e Unanga, ngini gena-ge ni ma'u mete'e ra ngomi, ni sanga sangisara riwara. Gena-ge 'i dadi wakutu Ma Jou Yesus ḏuanga i'a 'o 'uci da'u soroga tala re 'O masijumu mamete'e Rai mala'ekata-mala'ekata ma kabasarana.

⁸Unanga ḏuanga i'a 'o 'uci da'u soroga tala Rai u'u leja-lejanga di'a sihukumu 'a guna ḇato 'aḏi nana'o ua Ma Jou'ongu Madutu, bolo mete'e ua Habari Roanga mangale Yesus nanga Jou.

⁹Ananga gena-ge 'aḏi sanga hukumu kasingado-ngadolo i'a: ananga sanga upa'a toma giḏanga ra Ma Jou, dadi 'aḏi oḏi'i yoḏu'u 'Ai mulia re 'Ai kuasa lai lamo'o.

¹⁰Mo-moini gena-ge 'i dadi wakutu Ma Jou ḏuanga i'a 'o sapolo moju, la Ma Jou'ongu Madutu 'ai 'umata 'aḏi sihie-hie Unanga sababu 'oru ga'a Unanga ro si'a'a di'a ananga gena-ge. Ngini ḏi'i ni osama nyo-nyoimi ra Unanga 'ai 'umata, sababu ngini reni ngaku Habari Roanga ga'a ngomi mi masingadolo ra ngini.

¹¹Sababu gena-ge, ngomi mi golo'o tau-taunu tananga Jou'ongu Madutu, la Unanga 'o sidadi ngini ni patasa ni dadi ngowa'a 'ofi-'ofi, ga'a Unanga ro 'aro'o. Na'o nyengara gari'a Ma Jou'ongu Madutu rai kuasa nu riono ngini, la ngini ni nyanyaḏi ni 'a'a 'ori i'a ma la-la re ḏi'i ngini ni siḏuanga ninga munara mo-moini, ga'a ngini na 'a'a sababu ninga ngo-ngaku ra Yesus Kristus.

¹²Ngomi mi manyiata so'o gena, la ngowa'a 'aḏi sihie-hie Ma Jou Yesus 'ai lomanga sababu ninga de'oso re ḏegoro so'o gena-ge. Re Unanga ḏi'i 'o sihie-hie ngini. Gena-ge 'i dadi, sababu nanga Jou'ongu Madutu, re nanga Jou Yesus Kristus, Ananga gena-ge manga mura re dadalara ra ngini.