Read Sahu 1 Timotius 5 Bible Online

1 Timotius 5 - Sahu bible

1 Timotius 5

¹Awa ngana no ḇangata ngowa'a 'aḏi ioro i'a rani demo lai te'e, mada'a na'u ajele ma ngale la-la ma tero sa'olo ngowa'a gena-ge 'ani ḇaḇa. Ngowa'a ra-ramasa ie na'u ajele ma ngale sa'olo 'ani nongoḏu.

²re we-were'a ioro i'a, na'u ajele ma ngale sa'olo 'ani ngina, re were'a mosolese na'u ajele ma ngale rani 'akala re sinyingara 'ofi-'ofi sa'olo ni biḏanga madutu.

³Jama'ata balasu ya'u sioḏi'i we-were'a balo ga'a kamanga ioro re nongoḏu ua.

⁴Mada'a na'o we-were'a balo rami ngowa'a bolo rami danongo, balasu na'u ajele ma ngale ra ananga, ma siḏa-siḏa ananga balasu ya sidodai manga ngo-ngaku tamanga de'oso re ḏegoro tamanga ngitu re ngale re ya'u sioḏi'i manga bi-biri'i bolo manga bi'i, la ya balasa manga ngina bolo manga bi'i manga mura re la. Sababu madaga'a so'o gena-ge 'i sisanangi Ma Jou'ongu Madutu 'ai 'akala re sinyingara.

⁵Na'o were'a balo kami ioro re nongoḏu ua ga'a sioḏi'i munanga, lobi'i re wangere munanga balasu mo manyiata tau-taunu ra Ma Jou'ongu Madutu, sababu munanga mo masinganono pa'i ra Unanga ḇato, ga'a 'O riono munanga.

⁶Mada'a were'a balo ga'a mo madaga'a ua 'ori i'a ma la-la, mada'a mo disa 'ahu pai-pai'i re mau sanangi tau-taunu; kalaha munanga mo 'ahu moju, munanga ma tero sa'olo romo sengene!

⁷Singadolo bererongo-bererongo gena-ge ra ananga, la manga 'ahu kama rapu ua.

⁸Mada'a na'o 'age rema ngowa'a ga'a 'aḏi sioḏi'i ua manga ioro re nongoḏu, ma la-lamo'o i'a ananga manga ngitu re ngale masiretene; ngowa'a gena-ge ya soloto manga ngo-ngaku re lebe cira siupa'a reo ngowa'a ngaku Yesus ua!

⁹Pa'i were'a balo nyengara 'aḏi osama nyo-nyoimi toma balo-balo ga'a ya mete'e enanga ma 'atoranga nena-ne: manga umuru nyagi rarama re sie, re 'aḏi molo'ara pa'i soi moi,[4]

¹⁰re we-were'a remanga lomanga re ngongaje sa'olo we-were'a ga'a si'a'a 'ori i'a ma la-la ma tero sa'olo: ya dadanu manga ngowa'a ce-ceka'a i'a moju singadolo 'aḏi la-lamo'o, 'aḏi sanangi tamanga ioro re nongoḏu na'o 'aḏi tuḏu tamanga wala, 'aḏi de-de'oso ngowa'a ngaku Yesus, riono ngowa-ngowa'a ma dinga'unu ua, re 'aḏi madaga'a mode-mode'e munara 'oru ḇato ma la-la.

¹¹Silefo awa balo-balo manga lomanga ga'a umuru musungu nyagi rarama tuwaḏi, sababu awa-awa togumu i'a 'aḏi nyafusu molo'ara. Ḏua na'o ananga gena-ge 'aḏi molo'ara moju, ananga 'aḏi soloto manga jaji ra Kristus di'a molo'ara riwara.

¹²Dadi Ma Jou'ongu Madutu ḏuanga i'a 'o sihukumu balo gena-ge, sababu ananga raḏi soloto manga jaji di'a 'aḏi molo'ara riwara.

¹³'Age ḏi'i rema were'a balo gena-ge pa'i 'aḏi upa-upa'a manga wakutu, re 'aḏi supu-osama tau-taunu toma ngowa'a manga wala. Lebe cira ḏi'i, ananga 'aḏi dowanga demo re capuru ngowa'a lelegu manga 'urusana re jajaha demo.

¹⁴Sababu gena-ge, ngoi to mau we-were'a balo ga'a umuru musungu nyagi rarama tuwaḏi ananga 'aḏi molo'ara si. Dadi ananga gena-ge 'aḏi de-de'oso manga ngitu re ngale re 'aḏi sanga ngowa'a, la ngene nanga lawana 'aḏi sanga donga ua 'aḏi sijira ngene nanga lomanga ga'a ngowa'a ngaku Yesus.

¹⁵Ngoi to kanau so'o gena-ge, sababu 'age rema were'a balo nga muḏuo i'a, ga'a raḏi rapu ngo'omo re raḏi mete'e 'Iblisi.

¹⁶Mada'a na'o we-were'a ga'a ngowa'a ngaku Yesus matengo i'a rami ioro re nongoḏu ga'a remo balo ḏua tami wala; munanga balasu ma'u sioḏi'i balo-balo gena-ge. Awa singadolo sikangela jama'ata, la jama'ata nga'unu sioḏi'i we-were'a balo ga'a mode-mode'e manga ioro re nongoḏu raḏi cua.

¹⁷Jama'ata ma bi-biri'i—bi-biri'i ga'a 'aḏi cufala ya siḏagi manga munara, gena-ge enanga ma ngi'i ngowa'a ya'u silamo'o mode-mode'e re ya'u pula'a ngogele, ma la-lamo'o i'a ngowa'a ga'a 'aḏi singadolo bolo 'aḏi doto'o mangale Habari Roanga.

¹⁸Sababu silefo ḏua toma Boku 'Ofi-'Ofi ma dara so'o nena-ne: “Sapi ga'a sipake ruju gandum, awa na sao ma madanga.”[5] So'o gena ḏi'i 'i silefo ḏua so'o nena-ne: “Ngowa'a ga'a 'aḏi munara, manga haku 'aḏi sanga enanga ma ngogele.”

¹⁹Awa na dawongo ḇato gamamu mangale jama'ata ma bi-biri'i matengo i'a ga'a 'o 'a'a ḏosa. Mada'a nyengara na dawongo na'o rema ngowa'a nga muḏiḏi bolo pai'i ya sisakisi tala.

²⁰Jama'ata ma bi-biri'i ga'a 'a'a ḏosa balasu na'u ḇangata toma jama'ata manga biono, la ngowa'a lelegu ḏi'i 'aḏi mamojongo di'a 'aḏi 'a'a so'o gena-ge.

²¹Ra Ma Jou'ongu Madutu, Kristus Yesus, re mala'ekata-mala'ekata ga'a cumutu ḏua ra ananga mo-moini manga momina, ngoi to golo'o mode-mode'e ra ngana: balasu no ḇangata jama'ata ma bi-biri'i gena-ge toma jama'ata manga biono; awa no ta'ajiri ngowa'a bolo no ḏubuso kaci moi.

²²Awa no cautu i'a no sitede matengo i'a 'o dadi jama'ata ma bi-biri'i, sababu na'o ngowa'a gena-ge 'o madiga'a ḏosa 'i ma tero sa'olo ngana no masipata tai ḏosa. Na jaga la-la ino 'ani de'oso re ḏegoro, la ni 'ahu loasa re banari.

²³Awa pa'i no ka'e ḇanyo ḇato mada'a no ka'e 'anggur ceka'a i'a ḏi'i di'a siiranga 'ani po'olo ma si-siḏi, sababu ngana ceka'a ua siḏi ceka'a ua siḏi.

²⁴Kalaha ngowa'a manga ḏosa ya sigasa ra Ma Jou'ongu Madutu nyangu di'a Unanga 'o sijuruhakimi, ngowa'a ya waro ḏua. Mada'a ngowa'a ma lelegu ḏi'i manga ḏosa ga'a ngowa'a ya waro nyangu, enanga gena-ge ḏuanga i'a 'i waiti, kara ya waro ḏi'i.

²⁵So'o gena ḏi'i, ngowa'a manga ga'a ma la-la 'i waiti lai cautu. Re kalaha ga'a ma la-la ya gogono lai siḏi ti'ara ua, enanga 'i baolo ḇato.