Read Sahu 2 Timotius 1 Bible Online

2 Timotius 1 - Sahu bible

2 Timotius 1

¹Ngoi, Paulus, to lefo surata nena-ne ra ngana Timotius, ga'a ma tero ḇato sa'olo 'ari ngowa'a nau'u ga'a ngoi tini dadalara. Ma Jou'ongu Madutu 'o sitede ngoi di'a Yesus 'ai so-soma'a mete'e 'Ai mau re to sanga 'utusu di'a sihabari Ma Jou'ongu Madutu 'ai jaji mangale 'ahu kasingado-ngadolo i'a. 'Ahu gena-ge ngene wa sanga, sababu wo marimoi ra Kristus Yesus. Ngoi to lefo surata nena-ne ra ngana re to golo'o Ma Jou'ongu Madutu nanga Ḇaḇa re Yesus Kristus nanga Jou 'aḏi sijumu 'akala re sinyingara ma la-la re pula'a dame re ḏi'i mura re dadalara ra ngana.

³Ngoi to sibere ie murasa ma la ra Ma Jou'ongu Madutu ga'a ngoi to de-de'oso rari 'akala re sinyingara ma kanau 'i 'ofi-'ofi ma tero sa'olo nanga ete re dotumu 'ua re 'au wali ya si'a'a pasala ḏua. Ngoi to sibere ie murasa ma la ra Ma Jou'ongu Madutu tau-taunu, sababu ngana Timotius. Re ḏi'i ngoi to si'elingi ngana tau-taunu tari nyiata ma dara: bae wangere, bae lobi'i.

⁴Ngoi ta 'elingi tau-taunu ngana 'ani 'akala re sinyingara 'i kangela wakutu ngoi to sisoi'i tala ngana. Sababu gena-ge, ngoi to mau ma'u sanga ra ngana, la ngoi 'ari 'akala re sinyingara 'i sanangi mode-mode'e.

⁵Ngoi ta 'elingi ngana 'ani ngo-ngaku mode-mode'e ra Kristus ga'a 'i ma tero sa'olo ngo bi'i Lois re 'ani ngina ngo Eunike, ananga ga'a raḏi ngaku siḏa, kara ngana. Re ngoi to ngaku mode-mode'e ngana ḏi'i so'o gena.

⁶Sababu gena-ge, ngoi to babata ngana balasu no pake cocatu gena-ge lebe cufala i'a ḏi'i ga'a Ma Jou'ongu Madutu 'o pula'a ḏua. Ngana na dawongo cocatu gena-ge wakutu ngoi to siteru 'ari giama ra ngana.

⁷Mojongo awa na pake cocatu gena-ge. I'a sa'olo Ma Jou'ongu Madutu 'o pula'a Ma Ngagara 'Ofi-'Ofi ra ngene?! Dadi ngene wo mojongo?! So'o gena-ge ua! Unanga 'o pula'a Ma Ngagara 'Ofi-'Ofi gena-ge, la ngene wo dadi te'e tananga munara di'a Ma Jou'ongu Madutu re nanga 'akala re sinyingara 'i romanga reo dadalara re nga'unu wo manahana nanga nyafusu ma jira.

⁸Sababu gena-ge, awa no mara'a no pula'a sakisi mangale Ma Jou'ongu Madutu ga'a ngene wo silamo'o re siḏubuso, bolo mangale ngoi ga'a to osama bui, sababu Unanga gena-ge. Siḏibo ḏi'i, ngana balasu no ḏu-ḏuanga ḏua di'a basono sangisara na'o na singadolo Habari Roanga. Ma Jou'ongu Madutu ḏuanga i'a site'e 'ani 'akala re sinyingara, la ngana nga'unu doiti sangisara gena-ge.

⁹Ma Jou'ongu Madutu na sisalamata ngene re 'O 'aro'o ngene, la wo dadi Unanga 'ai ngowa-ngowa'a masiretene ga'a Unanga 'o cumutu ḏua. I'a sa'olo Ma Jou'ongu Madutu 'a si'a'a so'o gena? Sababu ngene wo madaga'a 'ori i'a ma la-la; so'o gena-ge ua! Mada'a, sababu mete'e Unanga 'ai mau re Unanga 'ai mura re dadalara ḇato. Wakutu Unanga 'o sidadi nyangu dungia, Unanga ro sitantukanga ḏua 'O pula'a 'Ai mura re dadalara gena-ge ra ngene sababu Kristus Yesus.

¹⁰Re nange-ne Ma Jou'ongu Madutu 'a sijumu 'ai mura re dadalara ra ngene, sababu Salamata ma Cimi, Kristus Yesus 'o sapolo ḏua. Unanga gena-ge ga'a Ra singi-ngiranga maut ma kuasa re 'O pula'a 'ahu kasingado-ngadolo i'a ra ngene, na'o ngene wo ngaku Habari Roanga mangale Unanga gena-ge.

¹¹Sababu gena-ge, Ma Jou'ongu Madutu ri sitede ngoi to dadi Yesus 'ai so-soma'a re to singadolo re to sidoto'o mangale Habari Roanga gena-ge.

¹²Ma sababu gena-ge, ngoi ta sanga ma sangisara. Mada'a ngoi to mara'a ua, sababu ta waro mode-mode'e Yesus Kristus ga'a ngoi reto ngaku re ḏi'i Unanga 'o saolo Habari Roanga ga'a Unanga 'a siwatasa ḏua ra ngoi singadolo Kiamata ma Wangere.[1]

¹³Nange-ne, ngana balasu na mete'e rani 'akala re sinyingara mode-mode'e do-doto'o banari; enanga gena-ge 'i dadi nana'o rimoi ga'a ngoi to pula'a ra ngana. Ngana balasu no macako'o ḇato tani ngo-ngaku re no dadalara ngowa'a lelegu. Gena-ge 'i nyengara, sababu wo marimoi ra Kristus Yesus.

¹⁴Ma Ngagara 'Ofi-'Ofi, ga'a tananga 'akala re sinyingara ma dara, 'i riono ngene dadi ngana nga'unu na kadiarata la-la do-doto'o gena-ge, la guru sa-sakala 'aḏi sijira yoḏu'u. Do-doto'o gena-ge ga'a Ma Jou'ongu Madutu 'a siwatasa ḏua ra ngana.

¹⁵Ngana na waro ḏua ngowa'a ngaku Yesus manga repe toma daeraha Asia 'aḏi sisoi'i tala ngoi. So'o gena ḏi'i, 'a Figelus re 'a Hermogenes.

¹⁶Ngoi to golo'o Ma Jou'ongu Madutu 'a sijumu 'Ai 'akala re sinyingara ma la-la ra Onisiforus 'ai ngitu re ngale, sababu wakutu 'a Onisiforus 'o sapolo toma limau Roma, unanga 'o disa ngoi tau-taunu singadolo mi ma'u sanga. Re kalaha ngoi toma bui ma dara, Onisiforus 'o mara'a ua 'o tutumu ngoi tau-taunu re 'o sisanangi 'ari 'akala re sinyingara.

¹⁸Re ngana na waro ḏua wakutu ngoi toma limau Epesus, ma jelele ḏua unanga ri riono ngoi. Ngoi to golo'o Ma Jou'ongu Madutu 'a sijumu 'Ai 'akala re sinyingara ma la-la ra unanga, wakutu Ma Jou Yesus ḏuanga i'a 'a sijuruhakimi manusia mo-moini.