Read Sahu 2 Timotius 3 Bible Online

2 Timotius 3 - Sahu bible

2 Timotius 3

¹Ngana na 'elingi-'elingi nena-ne: Wakutu Kiamata ma Wangere enanga 'i co-cori ngadolo, wa sanga ma susa re sangisara.

²Toma 'orasa gena-ge, ngowa'a 'aḏi kalesanga pa'i manga 'ahu masiretene, 'aḏi mafikiri pa'i pipisi, 'aḏi matoro, 'aḏi momole, 'aḏi jajaha demo, 'aḏi 'isene bi-biri'i ua, 'aḏi si'a'a ua murasa ma la, re 'aḏi emono 'ori i'a 'ofi-'ofi.

³Ananga 'aḏi ma'u dadalara ua matengo re matengo, 'aḏi ma'u si'apongo ua, 'aḏi nyanyaḏi ma'u sijira lomanga, 'aḏi siḏagi de'e, 'aḏi ruta-ruta re 'aḏi ḇusuru 'ori i'a la-la.

⁴Ananga nyanyaḏi ma'u sijira, 'aḏi momole, re 'aḏi madibanga kiḏanga ua, ananga lebe nyanyaḏi dungia ma nyafusu, 'aḏi ḇusuru mete'e Ma Jou'ongu Madutu 'ai 'akala ma mau.

⁵Wa oḏi'i i'a manga 'ahu ma duhu: Ananga ya mete'e re ya siḏagi manga 'agama ma 'atoranga, mada'a tamanga 'akala re sinyingara ma dara 'i kiḏanga ra Ma Jou'ongu Madutu. Sababu gena-ge, ngana no maki-kiḏanga toma ngowa-ngowa'a gena-ge!

⁶'Age tamanga sigolona, ngowa'a ga'a 'aḏi mete'e ua Ma Jou'ongu Madutu 'ai do-doto'o gena-ge. Guru-guru sa-sakala gena-ge 'aḏi supu osama wala-wala re 'aḏi sihaga we-were'a—we-were'a ga'a manga 'akala re sinyingara mereoso re manga ḏosa lai repe re manga nyafusu lai repe ḏi'i.

⁷We-were'a—we-were'a gena-ge 'aḏi golo'o tau-taunu do-doto'o mada'a wakutu ngowa'a 'aḏi pula'a do-doto'o banari gena-ge ra ananga, soi moi nyangu we-were'a—we-were'a gena-ge ya sahe do-doto'o gena-ge.

⁸Guru-guru sa-sakala gena-ge ma tero sa'olo 'a Yanes re Yambres ga'a 'ua re 'au wali 'aḏi malawana 'a Musa. So'o gena ḏi'i, guru sa-sakala gena-ge 'aḏi dola'aku do-doto'o ra Ma Jou'ongu Madutu ino. Ananga manga 'akala re sinyingara 'i kaco re manga ngo-ngaku pa'i taḇe i'a. Sababu gena-ge Ma Jou'ongu Madutu dawongo ananga ua.

⁹Ngowa-ngowa'a gena-ge manga do-doto'o 'i rera re walata ua re ḏuanga i'a sanga 'oru-'oru ua. Sababu ngowa'a ya waro ananga manga do-doto'o 'i banari ua, ma tero sa'olo 'a Yanes re 'a Yambres manga do-doto'o 'i banari ua ḏi'i.

¹⁰Mada'a ngana no waro ḏua ngoi 'ari do-doto'o, ngoi 'ari de'oso re ḏegoro, re 'ari 'ahu ma maksudu. Ngana masiretene no oḏi'i ḏua 'ari ngo-ngaku mode-mode'e ra Yesus re to dadalara 'a guna ḇato. Ngana ḏi'i no waro ḏua ngoi 'ari 'akala ḇanyo re ma duhu sa'olo ngoi to manahana wakutu ngoi ta basono susa re sangisara.

¹¹Ngana no oḏi'i ḏua ma duhu sa'olo ngoi to manahana wakutu ta sanga enanga ma sangisara re sikisa toma limau Antiokhia, limau Ikonium re toma Limau Listra. Mo-moini gena-ge, ngana no oḏi'i re no waro ḏua mada'a mo-moini gena-ge Ma Jou'ongu Madutu 'a silalo'o ra ngoi.

¹²'A guna ḇato mau 'ahu, la ananga 'aḏi sisanangi Ma Jou'ongu Madutu 'ai 'akala re sinyingara re 'ahu marimoi ra Kristus Yesus, ananga gena-ge ḏuanga i'a sanga sikisa.

¹³Ngowa-ngowa'a ga'a manga 'akala re sinyingara 'i cira, re ngowa-ngowa'a ga'a sihaga ngowa'a, ananga gena-ge manga 'akala re sinyingara ma jira 'i ganapu madogo-dogo ḇato. Ananga mau sihaga ngowa'a lelegu. Momongolo ua ananga 'aḏi masihaga tala manga diri ḏi'i!

¹⁴Mada'a ngana Timotius, ngana balasu na cako'o namo-namoto do-doto'o banari ga'a sidoto'o ḏua ra ngana, re ga'a ngana na ngaku mode-mode'e, sababu ngana no waro 'ani guru-guru ga'a 'aḏi sidoto'o do-doto'o banari gena-ge ra ngana.

¹⁵Ngana balasu no 'elingi tau-taunu mangale wakutu no ce-ceka'a ie moju, ngana reno sahe Boku 'Ofi-'Ofi ga'a pula'a wo-waro toma ngowa'a, la ngowa'a nyengara 'aḏi sanga salamata sababu manga ngo-ngaku ra Yesus Kristus.

¹⁶Mo-moini gena-ge 'i silefo ḏua toma Boku 'Ofi-'Ofi ma dara, enanga gena-ge ra Ma Jou'ongu Madutu ino. Boku 'Ofi-'Ofi gena-ge rema faeda di'a ngowa'a ga'a doto'o do-doto'o banari, di'a ḇangata re sidiai 'ori i'a ma rapu, re sidoto'o ngowa'a, la 'aḏi 'ahu mete'e Ma Jou'ongu Madutu 'ai 'akala ma mau ḇato.

¹⁷Dadi ngowa'a ga'a de-de'oso Ma Jou'ongu Madutu, ananga nga'unu 'aḏi siḏagi tamanga munara 'oru ḇato 'i ti-tiai.