Read Sahu 2 Timotius 4 Bible Online

2 Timotius 4 - Sahu bible

2 Timotius 4

¹Kristus Yesus ḏuanga i'a 'o sapolo moju toma dungia nena-ne di'a sijuruhakimi ngowa'a 'ahu-'ahu re ngowa'a senge-sengene. Unanga ḏuanga i'a 'o sapolo sa'olo 'olana. Sababu gena-ge, ra Ma Jou'ongu Madutu 'ai momina re ra Kristus Yesus 'ai momina, ngoi to golo'o mode-mode'e ra ngana:

²Ngana balasu no singadolo tau-taunu Habari ra Ma Jou'ongu Madutu ino, re ngana balasu no ḏu-ḏuanga ḏua singadolo habari gena-ge ra ananga, la ananga ya 'isene: bae 'aḏi nyengara bolo 'aḏi oḏu'u. Ngana balasu na'u site'e manga ngo-ngaku ra Ma Jou Yesus re na'u sitarangi manga sala re na'u babata ananga. Mada'a ngana balasu na'u doto'o pake 'akala ḇanyo.

³Sababu ḏuanga i'a enanga ma 'orasa 'i ngadolo, ngowa'a 'aḏi dawongo riwara do-doto'o banari. Ananga 'aḏi mete'e manga nyafusu masiretene. Sababu gena-ge, ananga 'aḏi lomu guru-guru manga repe, la sidoto'o do-doto'o ga'a 'aḏi 'isene lai rousu.

⁴Ananga ya pu'i manga ngau'u, sababu 'aḏi 'isene ḇusuru 'ori i'a ma ba-banari. Siḏibo ḏi'i, ananga ya pilata manga ngau'u, la 'aḏi 'isene jarita-jarita sa-sakala.

⁵Kalaha so'o gena, ngana balasu nga'unu na manahana 'ani nyafusu ma jira toma 'orasa 'oru ḇato re no manahana toma sangisara. Ngana balasu no munara tau-taunu di'a singadolo Habari Roanga re sa'olo Ma Jou'ongu Madutu 'ai falalomu, ngana na siḏagi 'ani munara mo-moini ga'a Unanga 'a siwatasa ḏua ra ngana.

⁶Mangale ngoi, ti'ara riwara ta sisoi'i tala dungia nena-ne. Ngoi ḏuanga i'a ta sidoa'a 'ari 'ahu sa'olo jou-jou rimoi ra Ma Jou'ongu Madutu.

⁷Ngoi reto singadolo tau-taunu Habari Roanga ma tero sa'olo ngowa'a 'aḏi mete'e ma lelebe lalara re ngoi to ngadolo ma ḏo-ḏogumu toma la-la re rousu ma dara. Ngoi reto mete'e tau-taunu Kristus Yesus 'ai do-doto'o banari singadolo 'ari 'ahu ma ḏo-ḏogumu.

⁸'Orasa nange-ne, ngoi pa'i ta totoma ma ngogele ḇato ga'a Ma Jou'ongu Madutu ro gogono ḏua toma soroga di'a ngoi. Toma Kiamata ma Wangere, Ma Jou 'o dadi juruhakimi 'adili, ḏuanga i'a 'O sipula'a 'ari ngogele gena-ge, sababu ngoi 'ari 'ahu 'i mete'e Ma Jou'ongu Madutu 'ai 'akala ma mau. Pa'i ngoi ḇato ua mada'a ngowa'a mo-moini ga'a 'aḏi dadalara re 'aḏi totoma Ma Jou dadunu 'o sapolo moju.

⁹Timotius, ngana no makutale mode-mode'e di'a capati no sapolo ra ngoi; no mako-kohi awa,

¹⁰sababu 'a Demas ga'a 'o mete'e dungia ma nyafusu unanga gena-ge 'o sisoi'i tala ngoi re ro tagi toma limau Tesalonika. 'A Kreskes ro tagi toma daeraha Galatia re 'a Titus toma daeraha Dalmatia.

¹¹Pa'i 'a Lukas ḇato 'o tegoro ra ngoi. Ngana no sidola'a 'a Markus re no gasa ino sababu unanga nyengara 'o riono ngoi 'ari munara.

¹²Ngoi to soma'a ḏua 'a Tikhikus 'o tagi toma limau Efesus.

¹³Ngana na gasa 'ari mantel ga'a ngoi ta sisoi'i tala toma limau Troas ra Karpus 'ai wala na'o ngana no sapolo. Na gasa ḏi'i 'ari boku-boku, ma la-lamo'o i'a boku-boku ga'a si'a'a reo haiwani ma 'eno'o.

¹⁴Ngana masiretene balasu no ma'istiari ra 'a Aleksander ga'a 'o 'a'a tamḇaga. Unanga gena-ge 'a dola'aku ngene nanga munara re 'o si'a'a 'ori i'a ma jira ra ngoi. Maha ḏuanga i'a Ma Jou 'a balasa ra unanga 'i mete'e unanga 'ai kajahatana.

¹⁶Wakutu ma mulaingi, ngowa'a ri sijuruhakimi ngoi, matengo ua 'aḏi ḏagilomu ngoi, ananga mo-moini 'aḏi sisoi'i tala. Ngoi to golo'o ra Ma Jou'ongu Madutu mangale mo-moini nena-ne Unanga 'o sisala ananga awa.

¹⁷Mada'a Ma Jou'ongu Madutu 'o sieanga i'a ngoi ua, Unanga 'a site'e 'ari 'akala re sinyingara singadolo ngoi ta nga'unu ta singadolo Habari Roanga gena-ge, la ngowa'a Yahudi ua ya 'isene mo-moini. Re Ma Jou'ongu Madutu 'o silalo'o ngoi toma ngowa'a ma jira ga'a mau sisengene ngoi.

¹⁸Tantu ḏua, Ma Jou'ongu Madutu ḏuanga i'a 'o silalo'o ngoi toma ngowa'a manga 'ulungu ma jira re Unanga ḏuanga i'a 'o gasa ngoi toma salamata Tai pareta ma dara toma soroga. Ino ngene wo silamo'o re siḏubuso Unanga re wo puji re silamo'o 'Ai lomanga kasingado-ngadolo i'a. 'Amin.

¹⁹Tabea ra ngo Priskila re 'a Akwila re 'a Onisiforus 'ai ngitu re ngale.

²⁰'A Erastus 'o tegoro toma limau Korintus re ngoi to sisoi'i tala Trofimus toma limau Miletus, sababu 'o gagama.

²¹Ngana no makutale mode-mode'e no disa ngo'omo, la no sapolo caiti ra ngoi wakutu 'orasa 'alo-'alo enanga ngadolo nyangu. 'A Ebulus, 'a Pudes, 'a Linus, ngo Klaudia re ioronongoḏu ngo-ngaku rimoi mo-moini, ananga 'aḏi siḏingoto manga tabea ra ngana.

²²Ngoi to golo'o ra Ma Jou mangale Unanga 'o sieanga i'a ua ngana re 'Ai mura re dadalara sieanga i'a ua ngana ḏi'i.