Read Sahu Filemon 1 Bible Online

Filemon 1 - Sahu bible

Filemon 1

¹Surata ne ra ngoi Paulus, ngowa'a bui sababu 'ari munara di'a Kristus Yesus, re ra Timotius ḏi'i nanga ioronongoḏu ngo-ngaku rimoi. Ngomi mi siḏingoto surata nena-ne ra ngana Filemon, minga ḏagilomu munara re dowara ga'a mi dadalara. Re ngomi mi siḏingoto surata nena-ne taminga biḏanga ngo-ngaku rimoi, ngo Apfia, re 'a Arkhipus ga'a ma tero sa'olo 'ari ḏagilomu sordado re ḏi'i jama'ata ga'a raḏi malomu tani wala.

³Ngomi mi golo'o ra Ma Jou'ongu Madutu nanga Ḇaḇa re Ma Jou Yesus Kristus di'a 'aḏi pula'a mura re dadalara re 'aḏi pula'a ḏi'i dame ra ngini mo-moini.

⁴Wakutu ngoi to manyiata di'a ngana, ngoi to sibere ie murasa ma la tari Jou'ongu Madutu,

⁵sababu ngoi reto 'isene mangale 'ani ngo-ngaku mode-mode'e ra Ma Jou Yesus. Re ḏi'i 'ani dadalara di'a Ma Jou'ongu Madutu 'ai 'umata mo-moini.

⁶Ngoi to manyiata sababu ngene rewo ma'u ḏagilomu sa'olo ngowa'a ngaku Yesus, ma hasili wa sahe lebe lamo'o i'a mangale barakati mo-moini ga'a ngene rewa sanga sababu wo marimoi ra Kristus.

⁷Dowara Filemon, 'ani dadalara ra Ma Jou'ongu Madutu 'ai 'umata mo-moini, enanga gena-ge 'i dadi roanga masala ra ngoi, re 'i pula'a babata ra ngoi ḏi'i. Sababu dowara, ngana no pula'a babata ra Ma Jou'ongu Madutu 'ai 'umata manga 'akala re sinyingara.

⁸Sababu gena-ge, kalaha ngoi to waro sa'olo Yesus 'ai so-soma'a, ngoi reto sanga kuasa di'a to soma'a 'a dowara no 'a'a 'oru balasu no si'a'a,

⁹mada'a ngoi pa'i to golo'o ḇato sababu ngana no dadalara Ma Jou'ongu Madutu 'ai 'umata. Ngoi ne, reto piri'i, re nange-ne ngoi toma bui sababu 'ari munara di'a Kristus Yesus.

¹⁰Ngoi, Paulus to singadolo 'ari go-golo'o ra ngana dowara, mangale 'a Onesimus[1] ga'a ma tero sa'olo 'ari ngowa'a, sababu unanga ro ngaku Habari Roanga ga'a ngoi to siajele ra unanga. Dadi toma bui ma dara, ngoi to dadi ma tero sa'olo unanga 'ai ḇaḇa.

¹¹'Au nga'ene, unanga gena-ge kai faeda cua ra ngana. Mada'a nange-ne unanga rai faeda; pa'i ra ngoi ḇato ua, mada'a ra ngana ḏi'i.

¹²Dadi Onesimus ga'a ngoi tu dadalara gena-ge, retu siḏibo i'a ra ngana.

¹³Enanga ma banari nena-ne: Ngoi mau to tahana unanga mamete'e ra ngoi sa'olo ngana ni nga-ngali, la unanga nga'unu 'o riono ngoi ma di'ara to sanga tahana toma bui ma dara, sababu to singadolo Ma Jou'ongu Madutu 'ai Habari Roanga.

¹⁴Mada'a ngoi to tahana unanga ua sababu ngoi to 'a'a ua 'ori i'a rimoi i'a na'o dowara no 'akoru nyangu. Jobilaha, dowara na si'a'a rani 'akala re sinyingara sa-sanangi; ngoi tini simau-mau ua.

¹⁵Onesimus ma'u eanga ra ngana dowara pa'i ḏa doma moi ḇato, la nyengara dowara no dawongo unanga maḏibo kasingado-ngadolo i'a.

¹⁶Nange-ne, unanga 'o dadi pa'i budaka ḇato ua ra ngana, mada'a lebe la-lamo'o i'a ḏi'i 'o dadi ioronongoḏu ngo-ngaku rimoi ga'a ngana ḏuanga i'a no dadalara. Ngoi to dadalara masala unanga. Tantu ḏua ngana ḏuanga i'a lebe dadalara sa'olo 'ani budaka re sababu unanga gena-ge ro dadi gia nongoḏu ra Ma Jou.

¹⁷Dadi dowara, sababu no dawongo ngoi sa'olo ḏagilomu munara, dadunu no dawongo 'a Onesimus, ma tero sa'olo ngana dowara no dawongo ngoi.

¹⁸Na'o unanga rai ta-sala bolo rai banyatoro ra dowara, ngoi ta doiti mo-moini.

¹⁹'Ane ngoi masiretene ta lefo mo-moini. Ngoi Paulus ḏuanga i'a ta fangu mo-moini. Tantu ḏua, paralu ua ngoi tini si'elingi mangale dowara masiretene, 'ani banyatoro ra ngoi. Gena-ge ngana no dadi ngowa'a ngaku Yesus, sababu 'ari do-doto'o mangale Kristus.

²⁰Sababu gena-ge, ngoi to nyafusu ngana no riono ngoi pa'i sababu ngene wo gia nongoḏu ra Ma Jou ḇato. Dadi ngana dadunu no dawongo Onesimus, la sisanangi 'ari 'akala re sinyingara.

²¹Ngoi to lefo surata nena-ne, sababu ngoi to ngaku mode-mode'e dowara na si'a'a 'oru ga'a ngoi to golo'o. Sidogo ḏi'i, ngoi ta waro dowara na si'a'a 'i pai-pai'i.

²²Re ḏi'i, pahala no sidodahe kamara rimoi tani wala di'a ngoi. Sababu ngoi to nganono Ma Jou'ongu Madutu 'a dawongo ioronongoḏu ngo-ngaku rimoi mo-moini ninga nyiata, la ngoi nyengara to maḏibo ra ngini.

²³'A Epafras 'o mamete'e ra ngoi toma bui ma dara, sababu 'ai munara ra Kristus Yesus, 'o siḏingoto 'ai tabea ra ngana, dowara.

²⁴'Ari ḏagilomu munara, 'a Markus, 'a Aristarkhus, Demas re Lukas, 'aḏi siḏingoto ḏi'i manga tabea ra ngana, dowara.

²⁵Ngoi to golo'o Ma Jou Yesus Kristus mangale 'Ai mura re dadalara sieanga i'a ua ngini.