Read Sahu 'Ibrani 1 Bible Online

'Ibrani 1 - Sahu bible

'Ibrani 1

¹'Ua re 'au wali moju Ma Jou'ongu Madutu 'o pake nabi-nabi di'a 'O kanau ra ngene nanga ete re dotumu. Soi rai o'o i'a, Unanga 'o kanau toma nabi-nabi 'O pake ma duhu ma fara muḏuo i'a.

²Mada'a toma 'orasa nange-ne, Ma Jou'ongu Madutu 'o pake 'Ai Ngowa'a Nau'u, la 'O kanau ra ngene. 'Ua re 'au wali, Unanga ro pake 'Ai ngowa'a Nau'u di'a sidadi diwanga re dungia rema dara mo-moini. Re ḏi'i, Ma Jou'ongu Madutu ra sitantukanga mangale ḏuanga i'a 'Ai Ngowa'a Nau'u gena-ge 'o parenta 'oru ḇato.

³'Ai Ngowa'a Nau'u gena-ge 'A sijumu Ma Jou'ongu Madutu 'ai kuasa re 'Ai kabasarana. Unanga gena-ge 'ai duhu re ngari mo-moini ma tero Ma Jou'ongu Madutu. Unanga 'a pake 'ai demo ma kuasa di'a 'O jaga re 'O parenta mo-moini. Unanga 'o sigofi ngowa'a manga ḏosa togumu i'a, kara 'O tegoro ra Ma Jou'ongu Madutu 'ai giama ma kuwiḏa i'a da'u toma soroga.

⁴Dadi Ma Jou'ongu Madutu 'ai Ngowa'a Nau'u, Unanga sanga ḏe-ḏegoro lebe kau'u reo mala'ekata mo-moini re 'Ai lomanga ga'a Ma Jou'ongu Madutu 'U sitolumu lebe la-lamo'o reo lomanga-lomanga ga'a Ma Jou'ongu Madutu 'o pula'a toma mala'ekata mo-moini.

⁵Soi moi nyangu Ma Jou'ongu Madutu 'o kanau Tai mala'ekata matengo so'o ne: “Ngana nena-ne Ngoi 'ari Ngowa'a Nau'u; toma wangere nange-ne, Ngoi to dadi Ngana 'ani Ḇaḇa.” Re soi moi nyangu ḏi'i Ma Jou'ongu Madutu 'o kanau Tai mala'ekata ma lelegu so'o ne: “Ngoi ḏuanga i'a to dadi Unanga 'ai Ḇaḇa, re Unanga ḏuanga i'a 'o dadi Ngoi 'ari Ngowa'a Nau'u.”

⁶Re wakutu Ma Jou'ongu Madutu 'o 'utusu 'Ai Ngowa'a Nau'u ma jomolo toma dungia nena-ne, Ma Jou'ongu Madutu 'o kanau so'o ne: “Mala'ekata mo-moini balasu 'o silamo'o re siḏubuso 'Ari Ngowa'a Nau'u.”

⁷Re mangale mala'ekata-mala'ekata Ma Jou'ongu Madutu 'o kanau so'o ne: “Unanga 'o 'a'a 'Ai mala'ekata-mala'ekata 'aḏi dadi 'Ai falalomu-falalomu ma tero sa'olo karawiana re u'u.”

⁸Mada'a tai Ngowa'a Nau'u, Ma Jou'ongu Madutu 'o kanau so'o ne: “Ngana ga'a ma tero Ma Jou'ongu Madutu, 'Ani Pareta kasingado-ngadolo i'a, Ngana 'ani pamarenta 'i 'adili.

⁹Ngana no nyanyaḏi de'oso re ḏegoro ma loasa re banari re No emono de'oso re ḏegoro ma jira. Sababu gena-ge Ma Jou'ongu Madutu, 'Ani Jou'ongu Madutu, Ro cumutu Ngana re 'O pula'a ra Ngana ḏe-ḏegoro lebe kau'u reo 'Ani ḏagilomu ma lelegu, re ḏe-ḏegoro gena-ge 'i silamo'o Ngana re 'i sigasa monere Tani 'akala re sinyingara.”

¹⁰Ma Jou'ongu Madutu 'o kanau ḏi'i so'o ne: “ 'Ua re 'au wali wakutu dungia sidadi nyangu, Ngana 'age rema enanga ḏua, re Ngana no sidadi diwanga re dungia rema dara mo-moini.

¹¹Mo-moini gena-ge enanga 'i iranga, 'i 'acingi ma tero sa'olo pakeanga ri siḏa, mada'a Ngana kama soi re ngali ua.

¹²Dungia nena-ne rema dara mo-moini ḏuanga i'a 'a du'o sa'olo baju, re ḏuanga i'a Na singali dungia nena-ne reo dungia su-sungi. Mada'a Ngana kama soi re ngali ua, re 'Ani 'ahu kama ḏo-ḏogumu ua.”

¹³Soi moi nyangu Ma Jou'ongu Madutu 'o kanau Tai mala'ekata matengo i'a so'o ne: “Tegoro Tari giama ma kuwiḏa i'a, singadolo Ngoi ta 'a'a 'Ani lawa-lawana 'aḏi ta'aloko ra ngana.”

¹⁴Na'o so'o gena-ge, mala'ekata-mala'ekata gena-ge 'o 'oru?! Ananga gena-ge roh-roh ga'a 'i de-de'oso Ma Jou'ongu Madutu re 'i riono ngowa-ngowa'a ga'a ḏuanga i'a 'aḏi dawongo salamata.