Read Sahu 'Ibrani 11 Bible Online

'Ibrani 11 - Sahu bible

'Ibrani 11

¹Ioronongoḏu ngo-ngaku rimoi, ngo-ngaku ma ngale nena-ne: Kalaha wo oḏi'i nyangu 'oru ga'a Ma Jou'ongu Madutu ro sijaji, ngene wa sitaka-taka ua mangale 'oru gena-ge ga'a wo masinganono.

²'Ua re 'au wali Ma Jou'ongu Madutu ro sisanangi renanga ete re dotumu sababu manga ngo-ngaku,

³Sababu nanga ngo-ngaku, ngene wa waro mangale dungia nena-ne Ma Jou'ongu Madutu 'o sidadi 'o pake 'Ai 'Idini ḇato. Dadi 'oru ga'a ngene wa oḏi'i, 'i dadi toma 'oru ga'a ngene wa oḏi'i ua.

⁴Sababu Habel 'ai ngo-ngaku, unanga 'o pula'a jou-jou ra Ma Jou'ongu Madutu ga'a 'i lebe rousu ra Kain 'ai jou-jou. Sababu Habel 'ai jou-jou Ma Jou'ongu Madutu 'o sanangi re 'a dawongo 'a Habel sa'olo ngowa'a loasa re banari. Re kalaha Habel ro sengene, unanga 'ai ngo-ngaku gena-ge 'i dadi do-doto'o moju ra ngene nange-ne.

⁵Sababu Henok 'ai ngo-ngaku, unanga 'o sengene ua. Siḏibo ḏi'i Ma Jou'ongu Madutu 'u tede re 'u gasa ra Unanga masiretene. Matengo i'a mai ua sanga unanga sababu Ma Jou'ongu Madutu ro tede unanga toma soroga. Toma Boku 'Ofi-'Ofi 'i silefo so'o ne: Wakutu Ma Jou'ongu Madutu 'o tede Henok toma soroga nyangu, unanga ro sisanangi Ma Jou'ongu Madutu.

⁶Dadi sanga ua 'a guna ḇato kai ngo-ngaku ua nyengara sisanangi Ma Jou'ongu Madutu 'ai 'akala re sinyingara. Sababu ngowa'a ga'a mau 'aḏi silamo'o re siḏubuso Ma Jou'ongu Madutu balasu 'aḏi ngaku mangale Ma Jou'ongu Madutu Unanga 'age, re Unanga ḏuanga i'a 'o pula'a ngogele ra ananga ga'a 'aḏi disa Unanga mode-mode'e, la ananga 'U nana'o.

⁷Sababu Nuh 'ai ngo-ngaku, unanga gena-ge 'o mete'e Ma Jou'ongu Madutu 'ai parenta. Ma Jou'ongu Madutu 'u siajele ra Nuh mangale Unanga 'o siromanga dungia sitabi donga reo ḇanyo. Kalaha Nuh 'a oḏi'i nyangu enanga gena-ge 'i dadi, unanga 'o silamo'o re mojongo Ma Jou'ongu Madutu re dadi 'o mete'e 'Ai parenta. Dadi unanga 'o madiga'a kapala rimoi di'a sisalamata unanga re 'ai ngitu re ngale. Nuh 'ai ngo-ngaku gena-ge 'i dadi nana'o rimoi mangale ngowa'a mo-moini ga'a 'aḏi ngaku Ma Jou'ongu Madutu ua, ananga gena-ge ngowa'a ma jira. Sababu gena-ge Ma Jou'ongu Madutu 'o 'adili di'a sihukumu ngowa'a ma jira gena-ge wakutu 'O siromanga dungia sitabi donga reo ḇanyo. Sababu Nuh 'ai ngo-ngaku gena-ge, Ma Jou'ongu Madutu 'o si'aro'o unanga, ngowa'a loasa re banari.

⁸Sababu Abraham 'ai ngo-ngaku, unanga 'o mete'e Ma Jou'ongu Madutu 'ai parenta. Ma Jou'ongu Madutu 'o 'aro'o re 'o soma'a tagi toma ngi'i rimoi ga'a Unanga ḏuanga i'a 'o pula'a ngi'i gena-ge sa'olo 'ai warisi di'a 'ai ju'uda. Kalaha Abraham 'a waro ua 'o tagi le'a, unanga 'o sisoi'i 'ai nagara re 'o mete'e Ma Jou'ongu Madutu 'ai parenta.

⁹Sababu Abraham 'ai ngo-ngaku, unanga 'o tegoro toma ngi'i ga'a Ma Jou'ongu Madutu ro sijaji. Unanga ro tegoro toma suyu'u ma tero sa'olo ngowa'a tagi-tagi ino. So'o gena ḏi'i, 'ai ngowa'a nau'u 'a Isak re 'ai danongo 'a Yakub sanga jaji ma tero ra Ma Jou'ongu Madutu, re ananga gena-ge raḏi tegoro toma suyu'u ḏi'i.

¹⁰Abraham ro tegoro toma suyu'u sababu 'o totoma di'a tegoro toma limau ga'a ma bangini lai te'e. Limau gena-ge ga'a Ma Jou'ongu Madutu ḏuanga i'a 'A side'oso 'A mete'e 'Ai maksudu.

¹¹Sababu Abraham 'ai ngo-ngaku, kalaha unanga ro piri'i re ngo Sara mo ngonono, Ma Jou'ongu Madutu 'o pula'a de-de'e ra unanga, la unanga sanga ngowa'a nau'u. Gena-ge 'i dadi sababu Abraham 'o ngaku mode-mode'e mangale Ma Jou'ongu Madutu 'a sitotomo 'Ai jaji.

¹²Sababu gena-ge kalaha Abraham 'ai lese ma tero sa'olo ri sengene, 'ai ju'uda lai repe ma tero sa'olo mumuḏungu toma diwanga bolo dongi toma ngoloto ma 'uḏu, ga'a wa roimi nga'unu ua.

¹³Ananga gena-ge mo-moini 'aḏi ngaku tau-taunu singadolo 'aḏi sengene. Ananga 'aḏi dawongo nyangu 'oru ga'a Ma Jou'ongu Madutu ro sijaji di'a ananga; mada'a enanga 'i ma tero sa'olo ya oḏi'i toma giḏanga re 'aḏi maroanga. Dadi ananga 'aḏi makanau ananga masiretene ma tero sa'olo ngowa'a tagi-tagi ino re ananga 'aḏi tegoro nena re si'a ua toma dungia nena-ne.

¹⁴Ngowa'a ga'a 'aḏi kanau so'o gena-ge, ananga 'aḏi sitarangi mangale 'aḏi disa manga ngi'i moju ga'a 'i dadi ananga manga nagara masiretene.

¹⁵Nagara gena-ge ananga reya sisoi'i tala, ya si'elingi riwara. Sababu na'o ananga 'aḏi si'elingi moju nagara gena-ge, ananga rema ngo'omo di'a 'aḏi maḏibo, mada'a ananga 'aḏi maḏibo riwara.

¹⁶Mada'a ma nyonyata ananga si'elingi ie 'o nagara lebe rousu, gena-ge nagara toma soroga. Sababu gena-ge Ma Jou'ongu Madutu 'o mara'a ua, na'o ananga 'aḏi si'aro'o Unanga, Ma Jou'ongu Madutu ga'a ananga 'aḏi silamo'o re siḏubuso, sababu Unanga ra sidodahe limau rimoi di'a ananga.

¹⁷Sababu Abraham 'ai ngo-ngaku, unanga gena-ge 'o ḏu-ḏuanga ḏua di'a sidoa'a 'a Isak sa'olo 'ai jou-jou wakutu sanga tai'i ra Ma Jou'ongu Madutu. Kalaha Unanga ro sijaji ra Abraham so'o ne: “Pa'i 'ani ngowa'a nau'u matengo ḇato Isak unanga ḏuanga i'a sanga ju'uda ma repe,” Abraham 'o ḏu-ḏuanga ḏua di'a sidoa'a Isak sa'olo jou-jou.

¹⁸

¹⁹Abraham 'o ngaku mode-mode'e mangale Ma Jou'ongu Madutu nyengara dadunu si'ahu moju 'a Ishak toma ngowa'a senge-sengene manga ngi'i. Mada'a sababu Ma Jou'ongu Madutu 'o simaha ua unanga 'o sisengene Ishak, ngene nyengara wo kanau ma tero sa'olo unanga ro dawongo moju 'a Ishak toma ngowa'a senge-sengene manga ngi'i.

²⁰Sababu Ishak 'ai ngo-ngaku, unanga 'o sibarakati 'a Yakub re 'a Esau re 'o sitarangi Ma Jou'ongu Madutu 'ai barakati toma biono i'a ra ananga gena-ge.

²¹Sababu Yakub 'ai ngo-ngaku, wakutu unanga co-cori 'o sengene 'o sitarangi Ma Jou'ongu Madutu 'ai barakati ra Yusuf 'ai ngowa'a nau'u nga muḏiḏi. Re Yakub 'o silamo'o re siḏubuso Ma Jou'ongu Madutu wakutu unanga 'o masidiriwa tai didiki ma sae'e.

²²Sababu Yusuf 'ai ngo-ngaku, wakutu unanga 'o co-cori sengene 'o sitarangi mangale ḏuanga i'a ngowa'a Israel 'aḏi supu toma daeraha Mesir re 'o bererongo balasu ya gasa 'ai obongo ḏi'i.

²³Sababu 'a Musa 'ai ḇaḇa re ngina manga ngo-ngaku, ananga 'aḏi mojongo ua di'a 'aḏi mete'e ua 'olana 'ai parenta. Dadi sibuoro 'a Musa togumu i'a, ananga gena-ge 'u gogono ngara ro'ange sababu 'aḏi oḏi'i unanga lao rousu.

²⁴Sababu 'a Musa 'ai ngo-ngaku, wakutu unanga ro tubaie, unanga 'o oḏu'u ngowa'a 'aḏi si'aro'o unanga 'olana Mesir 'ai ngowa'a were'a ma ngowa'a.

²⁵Sababu unanga 'o oḏu'u 'ahu sa-sanangi di'a ti'ara ua mamete'e reo ngowa'a Mesir ga'a 'aḏi 'ahu toma ḏosa. Siḏibo ḏi'i unanga 'o makanau lebe bae di'a sanga 'ahu sangisara mamete'e ra Ma Jou'ongu Madutu 'ai 'umata.

²⁶Kalaha ngowa'a 'u si'u'ua sababu 'ai ngo-ngaku ra Kristus, unanga 'o fikiri gena-ge ma ijana lebe lamo'o i'a reo unanga 'o sanga Mesir manga harata, sababu Musa pa'i tatamo 'ai ngogele toma biono i'a.

²⁷Sababu Musa 'ai ngo-ngaku, kalaha 'olana Mesir 'o ruta, Musa kai mojongo ua 'a sisoi'i tala Mesir. Unanga tagi mete'e tau-taunu Ma Jou'ongu Madutu sababu ma tero sa'olo unanga ro oḏi'i Ma Jou'ongu Madutu ga'a oḏi'i yoḏu'u.

²⁸Sababu Musa 'ai ngo-ngaku, unanga 'o 'a'a Paskah. Sababu gena-ge, unanga 'o soma'a ngowa'a Israel di'a 'aḏi siji-jiri doba ma ngaunu tamanga wala ma ngalana, la mala'ekata sisengene ngowa'a awa 'o sisengene ngowa'a Israel manga ngowa'a nau'u ma jomolo bolo manga haiwani ma jomolo.

²⁹Sababu ngowa'a Israel manga ngo-ngaku, ananga gena-ge 'aḏi iwanga Ngoloto Kolili, ma tero sa'olo 'aḏi tagi toma tana'a dudungu. Mada'a ngowa'a Mesir ngoloto ya'u nyamolo wakutu tai'i 'aḏi iwanga.

³⁰Sababu ngowa'a Israel manga ngo-ngaku, ananga gena-ge 'aḏi koloḏi limau Yerikho wangere tumudingi, singadolo limau gena-ge ma hisa 'i ru'ata.

³¹Sababu ngo Rahab we-were'a su-sudala 'ami ngo-ngaku, munanga mo sengene ua mamete'e ra ananga 'aḏi tegoro toma limau Yerikho ga'a 'aḏi lawana Ma Jou'ongu Madutu. Munanga mo sengene ua sababu munanga mo dawongo ngowa'a tamo-tamolo rami 'akala re sinyingara sa-sanangi.

³²Ngoi mau to kanau moju mangale ngowa'a lelegu manga ngo-ngaku, mada'a to sanga donga ua di'a ngoi to sitarangi mangale 'a Gideon, Barak, Simson, Yefta, Daud, Samuel re nabi-nabi.

³³Sababu ananga gena-ge manga ngo-ngaku, ananga raḏi sita'aloko 'olana-'olana manga kuasa, kara ananga 'aḏi parenta reo ba-banari singadolo Ma Jou'ongu Madutu 'a sitotomo 'Ai jaji masiretene di'a ananga. Sababu manga ngo-ngaku singa-singa ma madanga mai kuci,

³⁴ananga nga muḏuo i'a 'aḏi ro'u ua toma u'u, 'aḏi masilalo'o wakutu ngowa'a mau ya'u sisengene reo samaranga. Ananga nga muḏuo i'a 'aḏi basono lamahana, mada'a 'aḏi dadi te'e. 'Age ananga nga muḏuo i'a toma parangi laḏi nau'u, singi-ngiranga ngowa'a tagi-tagi ino manga sordado.

³⁵Sababu we-were'a 'ami ngo-ngaku, ananga nga muḏuo i'a gena-ge ga'a manga ngowa-ngowa'a raḏi sengene re Ma Jou'ongu Madutu dadunu 'a si'ahu moju. Mada'a ananga nga muḏuo i'a ḏi'i remanga 'akala re sinyingara sa-sanangi 'aḏi sanga sikisa re 'aḏi sanga sangisara singadolo 'aḏi sengene sababu manga ngo-ngaku. Ananga gena-ge 'aḏi oḏu'u sanga bebasa sababu ḏuanga i'a Ma Jou'ongu Madutu dadunu 'a si'ahu moju, gena-ge 'i lebe rousu i'a.

³⁶Ananga nga muḏuo i'a 'aḏi sanga je-jengere, 'aḏi sanga ca'olo. Ananga nga muḏuo i'a ga'a 'aḏi sanga piri'u reo rate, re singosama toma bui.

³⁷Ananga nga muḏuo i'a 'aḏi sanga poini reo maḏi singadolo 'aḏi sengene, nga muḏuo i'a 'aḏi sanga tola'a reo gargaji re nga muḏuo i'a 'aḏi sengene reo samaranga. Ananga nga muḏuo i'a 'aḏi paradidu remanga pakeanga reo doba ma 'eno'o bolo 'abingi ma 'eno'o, ananga ngowa'a ma dinga'unu ua, ngowa'a ya'u sijira, re ngowa'a ya'u sikisa.

³⁸Sababu manga ngo-ngaku, dungia nena-ne 'i patasa ua di'a ananga manga ngi'i: Ananga nga muḏuo i'a 'aḏi tegoro toma ngi'i dongi-dongi, toma sau-sau, toma aḏu'u-aḏu'u re toma tana'a ma duso'o.

³⁹Ma Jou'ongu Madutu ro sisanangi ananga gena-ge sababu manga ngo-ngaku. Mada'a ananga 'aḏi dawongo nyangu 'oru ga'a Ma Jou'ongu Madutu 'a sijaji di'a ananga gena-ge.

⁴⁰Sababu Ma Jou'ongu Madutu ro sitantukanga di'a 'o sidodahe 'ori i'a ga'a lebe rousu di'a ngene: Pa'i ananga gena-ge mamete'e ra ngene ḇato ḏuanga i'a ananga 'aḏi dadi ti-tiai.