Read Sahu 'Ibrani 13 Bible Online

'Ibrani 13 - Sahu bible

'Ibrani 13

¹Ngini balasu ni ma'u dadalara tau-taunu matengo re matengo sa'olo ioronongoḏu ngo-ngaku rimoi.

²Awa ninga 'akala re sinyingara 'i taka-taka ni dawongo ngowa-ngowa'a ga'a ngini nana'o nyangu re 'aḏi sapolo ra ngini ninga wala. Sababu 'age mamuni'a ga'a raḏi dawongo mala'ekata tamanga wala, mada'a ananga ya waro ua enanga gena-ge mala'ekata.

³Ngini balasu ni 'elingi tau-taunu ninga ioronongoḏu ngo-ngaku rimoi toma bui, ma tero sa'olo ngini ḏi'i ni tegoro mamete'e ra ananga toma bui ma dara, la nga'unu na'u riono ananga. Re ni 'elingi tau-taunu ḏi'i ninga ioronongoḏu ngo-ngaku rimoi, ananga ga'a sanga sikisa ma tero sa'olo ngini ḏi'i ni sanga sikisa mamete'e ra ananga, la nga'unu na'u riono ananga.

⁴Ngini mo-moini balasu ni silamo'o molo'ara ma 'atoranga: Awa were'a bolo nau'u 'a'a tinikai. Sababu ngowa-ngowa'a ga'a 'aḏi 'a'a su-sudala re tinikai, ḏuanga i'a Ma Jou'ongu Madutu ya'u sihukumu.

⁵Awa ngini ni dadi pipisi ma budaka. Siḏibo ḏi'i, ngini balasu basono sanangi reo 'oru ga'a 'age ra ngini ḏua. Sababu Ma Jou'ongu Madutu ro kanau so'o ne: “Ngoi to sieanga i'a ngana ua, Ngoi to sisoi'i tala ngana ua.”

⁶Sababu gena-ge, ngene wo kanau re wo ngaku mode-mode'e so'o ne: “Ma Jou'ongu Madutu 'ari ri-riono, dadi ngoi to mojongo ua Sababu gena-ge 'oru ḇato ga'a manusia ya si'a'a ra ngoi?!”

⁷Awa ngini ni sidaioranga ninga bi-biri'i ma siḏa ga'a 'aḏi singadolo Habari Roanga ra ngini. Ni tailako la-la ino manga 'ahu ma duhu sa'olo ananga manga 'ahu re ma duhu sa'olo ananga manga sengene. Dadi ngini nga'unu ni cuḏuḏu'u ananga manga ngo-ngaku.

⁸Yesus Kristus kama ngali ua: bae 'au wali, bae 'orasa nange-ne bolo kasingado-ngadolo i'a.

⁹Awa ngini ni mete'e do-doto'o fara muḏuo i'a ga'a 'i ma tero ua sa'olo nanga do-doto'o ga'a 'i sigasa ngini iranga ngo'omo: Awa ngini ni macako'o toma 'atoranga-'atoranga ma siḏa mangale ka'e re oromo, sababu enanga gena-ge 'i site'e ua nanga 'akala re sinyingara, re ma faeda 'i cua. Siḏibo ḏi'i, ngene balasu wo mete'e do-doto'o ra Ma Jou'ongu Madutu ga'a 'i sigasa barakati ra ngene re 'i site'e nanga 'akala re sinyingara.

¹⁰Yesus 'o sidoa'a 'ai lese toma salib sa'olo jou-jou rimoi toma jou-jou ma meja di'a nanga ḏosa. Mada'a 'imam-'imam 'agung ga'a 'aḏi munara moju ra Ma Jou'ongu Madutu 'ai suyu'u re mete'e moju jou-jou ma 'atoranga ma siḏa, ananga gena-ge 'aḏi sanga haku ua di'a sanga 'utungu ra Yesus 'ai lese sa'olo manga jou-jou di'a manga ḏosa.

¹¹Ma siḏa, jou-jou ga'a 'imam 'agung 'a gasa toma Kamara Lai 'Ofi-'Ofi ma dara 'i sipula'a ra Ma Jou'ongu Madutu di'a singi-ngiranga ḏosa; gena-ge pa'i haiwani ma ngaunu. Mada'a ma lese ya tau'u da'a toma gamu ma ḏuḏunu singadolo 'i dadi korou'u.

¹²Ma sababu gena-ge, Yesus ḏi'i 'o basono sangisara singadolo 'o sengene toma limau ma ngalana lamo'o ma ḏuḏunu di'a sigofi 'Ai 'umata tamanga ḏosa rai ngaunu masiretene.

¹³Sababu gena-ge, ino ngene wo sisoi'i ngowa'a Yahudi manga ngo'omo ma siḏa re pa'i wo sapolo ra Yesus ḇato di'a sigofi nanga ḏosa. Re ino ngene wa dawongo mara'a ma tero sa'olo Yesus ro dawongo mara'a toma limau ma ḏuḏunu.

¹⁴Sababu toma dungia nena-ne, limau ga'a 'i kasingado-ngadolo i'a di'a ngene, 'i cua. Dadi ngene wo nganono re wo duka di'a limau toma soroga ga'a ngene wo tegoro kasingado-ngadolo i'a.

¹⁵Sababu gena-ge, ino ngene wo gasa nanga jou-jou ra Yesus sa'olo nanga 'Imam 'Agung di'a Ma Jou'ongu Madutu. Nanga jou-jou so'o ne: Ngene balasu wo puji re silamo'o Unanga tau-taunu re wo kanau mangale Unanga gena-ge Ma Jou'ongu Madutu ga'a ngene wo silamo'o re siḏubuso.

¹⁶Re ḏi'i awa ni sidaioranga 'a'a 'ori i'a ma la-la, re ni riono ngowa'a lelegu. Sababu de'oso re ḏegoro so'o gena-ge 'i dadi jou-jou rimoi ḏi'i ga'a sisanangi Ma Jou'ongu Madutu 'ai 'akala re sinyingara.

¹⁷Na mete'e ninga ngowa'a bi-biri'i—bi-biri'i re ni ta'aloko ra ananga. Sababu ananga 'aḏi sioḏi'i ngini re 'aḏi sihabari mangale manga munara gena-ge ra Ma Jou'ongu Madutu. Na'o ngini ni mete'e ananga gena-ge, manga munara 'i sigasa roanga ra ananga. Mada'a na'o ngini ni mete'e ua, ananga manga munara 'i sigasa sangisara ga'a 'i gasa 'utungu ua ra ngini ḏi'i!

¹⁸Ni manyiata tau-taunu di'a ngomi. Ngomi remi ngaku mangale minga 'akala re sinyingara ma kanau 'i 'ofi-'ofi sababu toma 'oru ḇato mo-moini ngomi mi 'a'a ba-banari.

¹⁹Ma la-lamo'o i'a ḏi'i, ngoi to golo'o mode-mode'e ra ngini mangale ngini ni manyiata, la ngoi nga'unu capati maḏibo i'a ra ngini.

²⁰Ngoi to manyiata ra Ma Jou'ongu Madutu, Unanga 'o dame ma cimi ga'a dadunu 'o si'ahu moju Ma Jou Yesus. Unanga gena-ge ro dadi ngene nanga Sowohi La-lamo'o re ngene wo dadi 'Ai doba-doba sababu Tai se-sengene. Re ḏi'i Tai se-sengene gena-ge si'aku sah Ma Jou'ongu Madutu 'ai jaji ga'a kasingado-ngadolo i'a di'a ngene.

²¹Dadi ngoi to golo'o ra Ma Jou'ongu Madutu ga'a 'O dame ma cimi ga'a 'O siti-tiai ngini reo 'ori i'a mo-moini ma la-la ga'a ngini paralu di'a na si'a'a Unanga 'ai 'akala ma mau. Ngoi ḏi'i to golo'o mangale sababu Yesus Kristus nanga lese to golona, Ma Jou'ongu Madutu 'o munara tananga 'akala re sinyingara 'oru ḇato 'i sisanangi Tai momina. Ino ngene wo puji re silamo'o Yesus Kristus kasingado-ngadolo i'a. 'Amin.

²²Ioronongoḏu ngo-ngaku rimoi, ngoi to golo'o mode-mode'e ra ngini mangale ni totoho la-la ino 'ari duga re domolo, sababu 'ari surata nena-ne 'i kiḏanga ua.

²³Ngoi to mau ngini ni waro mangale nanga ioronongoḏu matengo ngo-ngaku rimoi 'a Timotius ro sanga bebasa toma bui. Na'o unanga 'o sapolo ra ngoi 'ari ngi'i, ḏuanga i'a wakutu ngoi to tutumu ngini, ngoi to gasa unanga.

²⁴Singadolo ngomi minga tabea taninga bi-biri'i—bi-biri'i mo-moini re Ma Jou'ongu Madutu 'ai 'umata mo-moini. Na dawongo tabea ḏi'i tananga ioronongoḏu ngo-ngaku rimoi toma Italia ino.

²⁵Ngoi to golo'o mangale Ma Jou'ongu Madutu 'ai mura re dadalara 'i sieanga i'a ua ra ngini mo-moini.