Read Sahu 'Ibrani 4 Bible Online

'Ibrani 4 - Sahu bible

'Ibrani 4

¹Ma Jou'ongu Madutu 'ai jaji ga'a ngene wo osama toma ngo-ngomasa ma ngi'i mamete'e ra Unanga, jaji gena-ge 'i sigasa singadolo 'orasa nange-ne. Sababu gena-ge, ngene balasu wa kadiarata la-la ino, la awa 'age rema ngowa'a matengo i'a mai ua taninga sigolona ga'a ya sanga ua jaji mangale ngo-ngomasa ma ngi'i gena-ge.

²Sababu ra ngene ḏi'i Habari Roanga rena singadolo pasala ḏua ma tero sa'olo tananga ete re dotumu. Mada'a Habari Roanga 'i parasaja, sababu wakutu ananga ya 'isene, ananga ya ngaku ua.

³Mada'a ngene ga'a rewo ngaku, ngene wa dawongo ngomasa ga'a Ma Jou'ongu Madutu 'o sijaji pasala ḏua. Gena-ge 'i ma tero sa'olo ga'a Ma Jou'ongu Madutu 'o kanau, “Ngoi to porata re ta'u sisasi mangale ta'u simaha ua 'aḏi osama toma ngi'i di'a 'aḏi mangomasa mamete'e ra Ngoi.” Kalaha Ma Jou'ongu Madutu 'ai munara ri ḏuanga wakutu Unanga 'o sidadi diwanga re dungia nena-ne, Unanga 'o kanau so'o gena-ge.

⁴Sababu toma Boku 'Ofi-'Ofi 'i silefo ḏua mangale wangere ma soi tumudingi so'o ne: “Re Ma Jou'ongu Madutu 'o mangomasa Tai munara mo-moini toma wangere ma soi tumudingi.”

⁵'Age silefo ḏi'i mangale ngowa'a Israel so'o ne: “Ananga ḏuanga i'a 'aḏi osama toma ngo-ngomasa ma ngi'i yoḏu'u mamete'e ra Ngoi.”

⁶Sababu gena-ge, ngowa'a ga'a 'aḏi 'isene siḏa mangale Habari Roanga gena-ge ananga 'aḏi sanga mangomasa ua ga'a Ma Jou'ongu Madutu ro sijaji pasala ḏua, sababu 'aḏi ngaku ua Habari Roanga gena-ge. Mada'a Ma Jou'ongu Madutu 'ai maksudu ngowa'a lelegu nga'unu ya dawongo ngi'i ngo-ngomasa gena-ge.

⁷Sababu gena-ge, Ma Jou'ongu Madutu 'a sitantukanga pasala ḏua mangale wangere ma lelegu ga'a 'Olana Daud 'a si'aro'o “Wangere Nange-ne”. Musa ro sengene, re musungu rema latu-latu toma biono Ma Jou'ongu Madutu 'o pake 'Olana Daud di'a kanau 'Ai demo-demo so'o ne: “Wangere Nange-ne, na'o ngini 'isene Ma Jou'ongu Madutu 'ai iḏingi awa ngini ninga 'akala re sinyingara 'i dadi te'e.”

⁸'Ua re 'au wali, 'a Yosua 'o sigasa ngowa-ngowa'a Israel re singosama toma daeraha Kana'an. Na'o daeraha Kana'an ma tero sa'olo ngo-ngomasa ma ngi'i, Ma Jou'ongu Madutu 'o kanau riwara mangale wangere ma lelegu.

⁹Dadi di'a Ma Jou'ongu Madutu 'ai 'umata, Unanga 'o sijaji moju ra ananga gena-ge di'a ya'u singosama toma ngo-ngomasa ma ngi'i. Ngo-ngomasa gena-ge ma tero sa'olo Ma Jou'ongu Madutu 'o mangomasa toma wangere tumudingi.

¹⁰Sababu ngowa'a ga'a 'aḏi sanga ngomasa ga'a Ma Jou'ongu Madutu 'o sijaji ḏua ra ananga, 'aḏi matogumu tamanga munara mo-moini, ma tero sa'olo Ma Jou'ongu Madutu 'a togumu 'Ai munara wakutu 'A sitogumu sidadi diwanga re dungia nena-ne.

¹¹Sababu gena-ge, ino ngene wo makutale mode-mode'e di'a wo sanga ngomasa ga'a Ma Jou'ongu Madutu 'o sijaji pasala ḏua. Awa-awa 'age rema ngowa'a matengo i'a tananga sigolona 'o eta'a, sababu unanga 'o mete'e ngowa-ngowa'a manga duhu ga'a 'aḏi 'isene ua Ma Jou'ongu Madutu, 'ua re 'au wali.

¹²Sababu Ma Jou'ongu Madutu 'ai demo enanga 'i 'ahu-'ahu re lebe mangono reo samaranga ma doto romoḏiḏi. Samaranga gena-ge 'i lapasa toma donga-donga re nyi-nyiala ma bati. Gena-ge ma tero sa'olo Ma Jou'ongu Madutu 'ai demo ga'a osama singadolo toma nyawa re roh ma bati. Unanga 'ai demo gena-ge enanga ya waro manusia manga fikirana re 'akala re sinyingara.

¹³Re matengo i'a mai ua nga'unu 'o magogono ra Ma Jou'ongu Madutu 'ai momina. Mo-moini enanga 'i waiti re 'i welanga ra Ma Jou'ongu Madutu 'ai momina. Ra Unanga masiretene ngene balasu wo kanau mangale nanga de'oso re ḏegoro: bae ma la-la, bae ma jira.

¹⁴Ngene nanga 'Imam 'Agung La-lamo'o ga'a ro pere sie toma soroga singadolo osama talaḏi ra Ma Jou'ongu Madutu 'ai biono, Unanga gena-ge Yesus, Ma Jou'ongu Madutu 'ai Ngowa'a Nau'u. Sababu gena-ge, ngene balasu macako'o namo-namoto tananga ngo-ngaku re matogumu awa kanau 'oru ga'a wo ngaku.

¹⁵Sababu Yesus, ngene nanga 'Imam 'Agung gena-ge, Unanga 'o sahe mode-mode'e ngene nanga lamahana. Sababu Unanga masiretene 'a sanga bo-baja toma 'oru ḇato ma tero sa'olo ngene. Mada'a ma tero sa'olo ngene ua, Unanga kama ḏosa ua.

¹⁶Sababu gena-ge, ino ngene renanga mojongo awa wo talaḏi Ma Jou'ongu Madutu ga'a 'O parenta re sijumu 'Ai mura re dadalara ra ngene. Unanga gena-ge 'a sijumu 'Ai 'akala re sinyingara ma la-la re pula'a 'Ai mura re dadalara ra ngene, la ngene wo sanga ri-riono pasi-pasi enanga ma 'orasa.