Read Sahu 'Ibrani 5 Bible Online

'Ibrani 5 - Sahu bible

'Ibrani 5

¹'Imam 'agung mo-moini Ma Jou'ongu Madutu ya'u cumutu toma manusia. 'Imam 'agung 'aḏi munara di'a Ma Jou'ongu Madutu sa'olo manusia manga nga-ngali. Ananga manga munara di'a sibere manusia manga bu-bula'a re jou-jou, la Ma Jou'ongu Madutu 'o si'ofi manusia tamanga ḏosa.

²'Imam 'agung masiretene, ananga ḏi'i manusia. Dadi ananga 'aḏi basono lamahana ma tero sa'olo ngene ḏi'i wakutu 'aḏi sanga bo-baja. Sababu gena-ge, manga 'akala re sinyingara 'i mereoso toma ngowa-ngowa'a ga'a 'aḏi 'a'a ḏosa sababu 'aḏi waro ua mangale ngo-ngaku ma ngo'omo.

³Re sababu unanga masiretene ngowa'a lamahana, unanga ḏi'i balasu gasa jou-jou di'a 'ai ḏosa-ḏosa masiretene ḏi'i, re pa'i 'umata manga ḏosa-ḏosa ḇato ua.

⁴Matengo i'a mai ua ga'a sitede unanga masiretene 'o dadi 'imam 'agung. Matengo i'a 'o dadi 'imam 'agung, pa'i na'o Ma Jou'ongu Madutu 'u 'aro'o ḇato; ma tero sa'olo 'a Harun.

⁵So'o gena ḏi'i Kristus, wakutu Unanga 'o dadi 'Imam 'Agung, Unanga 'a sitede 'ai diri masiretene ua, mada'a Ma Jou'ongu Madutu 'U tede Unanga. Re Ma Jou'ongu Madutu 'o kanau ra Unanga, “Ngana nena-ne 'Ari Ngowa'a Nau'u, toma wangere nange-ne Ngoi to dadi Ngana 'Ani Ḇaḇa.”

⁶Re toma bu-bula'a lelegu Ma Jou'ongu Madutu 'o kanau ḏi'i, “Ngana nena-ne no dadi 'Imam kasingado-ngadolo i'a ma tero sa'olo Melkisedek.”

⁷Wakutu Yesus 'o 'ahu-'ahu moju toma dungia nena-ne, Unanga 'o manyiata re 'o golo'o reo poa'a rai 'ongoro ra Ma Jou'ongu Madutu ga'a nga'unu sisalamata Unanga toma sengene. Sababu Unanga 'o ta'aloko rai 'akala re sinyingara sa-sanangi ra Ma Jou'ongu Madutu, Unanga 'ai go-golo'o Ma Jou'ongu Madutu 'a dawongo.

⁸Kalaha Yesus Ma Jou'ongu Madutu 'ai Ngowa'a Nau'u, Unanga 'o madoto'o ta'aloko sababu Unanga sanga sikisa.

⁹Reo ngo'omo gena-ge, Unanga 'o dadi Salamata ma Cimi ga'a ti-tiai. Re Unanga 'o dadi 'ahu ma cimi kasingado-ngadolo i'a di'a ngowa'a mo-moini ga'a 'aḏi ta'aloko ra Unanga.

¹⁰Re Ma Jou'ongu Madutu 'o tede Unanga 'o dadi 'Imam 'Agung ma tero sa'olo Melkisedek.

¹¹Mangale Yesus re Melkisedek manga ḏe-ḏegoro sa'olo 'imam 'agung, 'age ma repe paralu ngomi masiajele ra ngini, mada'a kangela ngomi ma sitarangi ra ngini sababu ngini na sahe kohi.

¹²Ma nyonyata, ma 'orasa 'i ngadolo ḏua wakutu ngini ni dadi guru, mada'a ngini balasu repe madoto'o moju toma ngowa-ngowa'a lelegu ga'a lebe waro mangale do-doto'o ma mulaingi. Ngini ma tero sa'olo ngowa kiau ga'a paralu susu moju sababu nga'unu nyangu ni oromo ngo-ngoromo te-te'e.

¹³Ngowa'a ga'a 'aḏi ka'e susu, ananga gena-ge ngowa kiau moju. Ananga ya waro nyangu ya siwo-wola 'ori i'a ma banari re 'ori i'a ma rapu.

¹⁴Ngo-ngoromo ga'a te-te'e gena-ge di'a ngowa'a bi-biri'i sababu ananga remanga wo-waro ḏua di'a ya siwo-wola de'oso re ḏegoro ma la-la re ma jira.