Read Sahu 'Ibrani 6 Bible Online

'Ibrani 6 - Sahu bible

'Ibrani 6

¹Sababu gena-ge ioronongoḏu ngo-ngaku rimoi, awa pa'i ino madoto'o do-doto'o ma mulaingi mangale Kristus ḇato. Siḏibo ḏi'i, ino madoto'o do-doto'o mangale site'e nanga ngo-ngaku. Awa pa'i ino madoto'o do-doto'o ma mulaingi ḇato bae sisoi'i tala ḏosa re maḏibo toma ngo'omo boloto, bae ngaku Ma Jou'ongu Madutu, la wo sanga ua sengene kasingado-ngadolo i'a,

²bae wo madoto'o mangale baptis, bae wo madoto'o mangale jama'ata ma bi-biri'i 'aḏi siteru manga giama toma ngowa'a manga sae'e, bae madoto'o mangale Ma Jou'ongu Madutu dadunu 'o si'ahu ngowa-ngowa'a sengene re Unanga 'o pula'a hukumu kasingado-ngadolo i'a.

³Mada'a na'o Ma Jou'ongu Madutu 'o pula'a loasa, ngene nanga ngo-ngaku lebe ti-tiai sababu wo madoto'o do-doto'o lebe ngido.

⁴Sababu na'o ngowa'a 'aḏi ngaku ra Yesus riwara, sanga ua ananga gena-ge 'aḏi siḏibo toma ngo'omo boloto moju! Ma siḏa, ananga gena-ge 'aḏi 'ahu toma tarangi ra Ma Jou'ongu Madutu, re ya basono ḏua Unanga 'ai cocatu re 'aḏi dawongo ḏi'i Ma Ngagara 'Ofi-'Ofi ma tero sa'olo ngowa'a lelegu.

⁵Re tamanga 'ahu ma dara ananga ya waro mangale Ma Jou'ongu Madutu 'ai demo ga'a lai rousu; re ya basono ḏi'i ma kuasa ga'a toma dungia su-sungi.

⁶Mada'a togumu i'a, na'o ananga 'aḏi ngaku ra Yesus riwara, sanga ua ngene nga'unu wa'u siḏibo ananga toma ngo'omo boloto moju. Sababu gena-ge ma tero sa'olo ananga mau 'aḏi sisalib soi moi moju Ma Jou'ongu Madutu 'ai Ngowa'a Nau'u re ananga 'aḏi sipula'a mara'a Unanga toma mandan.

⁷Ngowa'a ga'a Ma Jou'ongu Madutu 'o sibarakati, ma tero sa'olo tana'a 'i nga'unu besa'a kara ma go-gahu 'i konyo, re 'i pula'a ma hasili toma ngowa'a ga'a 'aḏi munara.

⁸Mada'a ngowa'a ga'a 'aḏi ngaku ra Yesus riwara ma tero sa'olo tana'a besa'a ya nga'unu mada'a rurubu dodowo'o ya dokonyo. Dadi ma faeda cua, re 'i sanga katula ra Ma Jou'ongu Madutu, re ma ḏo-ḏogumu sanga tau'u.

⁹Mada'a ioronongoḏu ngo-ngaku rimoi ga'a ngoi tini dadalara, kalaha ngomi minga demo ra ngini so'o gena, ngomi mi ngaku mode-mode'e mangale ngini reni dawongo 'ori i'a ga'a lebe rousu i'a, gena-ge ma ngale barakati-barakati[2] ga'a mamete'e ninga salamata.

¹⁰Dadi sababu Ma Jou'ongu Madutu 'o 'adili tau-taunu, Unanga gena-ge 'a sidaioranga ua ngini ninga munara ra Unanga. Re Unanga 'o 'elingi ḏi'i ninga dadalara na sijumu ra Unanga ḏua sababu ni riono ioronongoḏu ngo-ngaku rimoi, 'au nga'ene singadolo nange-ne.

¹¹Ngomi golo'o mode-mode'e ngini matengo re matengo ni cufala munara tau-taunu di'a ma'u dadalara singadolo ma ḏo-ḏogumu, la ni dawongo 'oru ga'a ngini na singano-nganono.

¹²Awa ngini ni dadi sa'olo ngowa'a pamalasa. Siḏibo ḏi'i ngomi mau ngini ni mete'e re ni cuḏuḏu'u ngowa'a ga'a raḏi ngaku Ma Jou'ongu Madutu re raḏi totoma remanga 'akala ḇanyo. Sababu gena-ge, ananga gena-ge raḏi sanga warisi ga'a Unanga ro sijaji.

¹³Wakutu Ma Jou'ongu Madutu 'o sijaji ra Abraham, Unanga 'o tede sasi 'o masisasi tala 'Ai lomanga masiretene, sababu pa'i Ma Jou'ongu Madutu ḇato 'Ai lomanga lai kau'u.

¹⁴'Ai sasi ma betongo so'o ne: “Ngoi masiretene to sijaji ra ngana mangale ḏuanga i'a no sanga barakati, re 'ani ju'uda 'i dadi repe.

¹⁵Abraham 'a totoma rai 'akala ḇanyo di'a jaji gena-ge, singadolo unanga 'a sanga.”

¹⁶Na'o ngowa'a 'aḏi tede sasi, balasu 'aḏi terongo ngowa'a manga lomanga lebe kau'u ra ananga. Dadi sasi gena-ge, ngowa'a ya lawana yoḏu'u.

¹⁷Ma Jou'ongu Madutu mau 'A site'e 'Ai jaji toma ngowa'a ga'a ḏuanga i'a 'aḏi sanga 'Ai jaji, la ananga gena-ge 'aḏi waro mode-mode'e Unanga 'a singali 'ai jaji ua. Sababu gena-ge Unanga 'o jaji re 'O tede sasi.

¹⁸Dadi 'age parkara fara ḏiḏi nena-ne ga'a 'i singali yoḏu'u: Sanga ua Ma Jou'ongu Madutu 'a singali yoḏu'u 'Ai jaji, bolo 'Ai sasi. Sababu gena-ge, ngene wo sanga babata di'a wo macako'o namo-namoto tananga ngo-nganono sababu Ma Jou'ongu Madutu 'Ai jaji ra ngene. Ngene ga'a rewo sapolo ra Ma Jou'ongu Madutu, la Unanga 'o saolo ngene, dadi ngene wo sanga hukumu ua.

¹⁹Ngene nanga ngo-nganono gena-ge ma tero sa'olo kapala ma tapu 'i otomo lai ngido toma ngoloto, la nanga ngo-ngaku 'i elala ua. Dadi sababu ngo-nganono lai te'e, enanga ma tero sa'olo ngene wo osama toma soroga ḏua. Gena-ge ma tero sa'olo nanga 'Imam 'Agung ga'a ro palisi ngalana ma da-daku kole-kole ro osama toma Kamara Lai 'Ofi-'Ofi.

²⁰Yesus ro osama siḏa toma ngi'i gena-ge, la ngene nyengara wo osama ḏi'i. Unanga gena-ge 'o dadi 'Imam 'Agung singado-ngadolo i'a, ma tero sa'olo 'imam Melkisedek.