Read Sahu 'Ibrani 7 Bible Online

'Ibrani 7 - Sahu bible

'Ibrani 7

¹'Ua re 'au wali Melkisedek, unanga 'o dadi 'olana toma Salem re 'o dadi ḏi'i 'imam ra Ma Jou'ongu Madutu toma Gau'u. Wakutu 'a Abraham ro sita'aloko 'olana-'olana toma parangi, Unanga 'o maḏibo re Melkisedek 'o sapolo ma'u sanga, kara 'o sibarakati Abraham.

²Togumu i'a, Abraham 'o pula'a ma balangu moi toma balangu nyagi moi ino ra Melkisedek, 'oru ga'a unanga 'a sanga toma parangi ma dara. Melkisedek 'ai lomanga ma ngale: “ 'Olana Loasa re Banari.” Re ḏi'i sababu Unanga 'o 'olana toma Salem, 'ai lomanga ma lelegu ma ngale: “ 'Olana Dame.”

³Matengo i'a mai ua ya waro 'a Melkisedek 'ai ḇaḇa re ngina, bolo 'ai ete re dotumu, bolo 'ai buoro re sengene ma 'orasa. Unanga ma tero sa'olo Ma Jou'ongu Madutu 'ai Ngowa'a Nau'u sababu Melkisedek 'o dadi 'imam kasingado-ngadolo i'a.

⁴Dadi ngene nga'unu wa sahe mangale 'a Melkisedek, unanga gena-ge ngowa'a la-lamo'o. Sababu kalaha Abraham ngowa'a Yahudi mo-moini manga ḇaḇa, Unanga 'o pula'a ma balangu moi toma balangu nyagi moi ra Melkisedek 'oru ga'a unanga 'a sanga toma parangi ma dara.

⁵Kalaha ngowa'a Israel mo-moini Abraham 'ai ju'uda, mada'a mete'e Musa 'ai hukumu, 'imam-'imam ra Lewi 'ai ju'uda balasu 'aḏi sanga ma balangu moi toma balangu nyagi moi tamanga ioronongoḏu matengo re matengo toma ngowa'a Israel.

⁶Melkisedek ra Lewi 'ai ju'uda ua, mada'a unanga 'o sanga ma balangu moi toma balangu nyagi moi moju ra Abraham wakutu 'a Abraham 'o maḏibo toma parangi. Re unanga ḏi'i 'o sibarakati 'a Abraham, ga'a Ma Jou'ongu Madutu 'u pula'a 'Ai jaji ḏua.

⁷Tantu ḏua, ngowa'a matengo ga'a sibarakati, unanga gena-ge lebe la-lamo'o reo ngowa'a matengo ga'a sanga barakati.

⁸'Imam-'imam ga'a 'aḏi sanga ma balangu moi toma balangu nyagi moi, ananga gena-ge manusia biasa ga'a ḏuanga i'a 'aḏi sengene. Kalaha Melkisedek ma tero sa'olo 'imam 'o sanga ma balangu moi toma balangu nyagi moi ra Abraham, 'age toma Boku 'Ofi-'Ofi ma dara 'i silefo ua mangale Melkisedek 'ai se-sengene. Dadi unanga gena-ge 'o 'ahu-'ahu moju.

⁹Sidogo ḏi'i, ngene nyengara wo kanau wakutu Abraham 'o pula'a balangu nyagi moi ra Melkisedek, 'a Lewi re 'ai ju'uda, mo-moini ga'a raḏi sanga ma balangu moi toma balangu nyagi moi toma ngowa'a Israel, ananga gena-ge ḏi'i 'aḏi pula'a manga ma balangu moi toma balangu nyagi moi ḏi'i ra Melkisedek.

¹⁰Sababu kalaha sibuoro 'a Lewi nyangu wakutu 'a Abraham ma'u sanga ra Melkisedek, ma tero ḇato sa'olo 'a Lewi unanga gena-ge ḏua, sababu unanga Abraham 'ai ju'uda. Sababu gena-ge ngene nyengara wo kanau unanga ra Abraham 'ai lese ma dara moju.

¹¹Wakutu Ma Jou'ongu Madutu 'o pula'a 'Ai hukumu toma ngowa'a Yahudi, Unanga 'o sitede 'a Lewi re 'ai ju'uda sa'olo 'imam-'imam ga'a 'aḏi sigasa ngowa'a, la ananga gena-ge 'aḏi mete'e 'Ai hukumu. Mada'a 'imam-'imam 'aḏi si'a'a yoḏu'u ngowa'a 'aḏi dadi 'ofi-'ofi. Dadi 'age paralu 'imam lelegu. 'Imam gena-ge ma tero sa'olo 'imam Melkisedek, ra Harun 'ai ju'uda ua.

¹²Dadi na'o mete'e ua Musa 'ai hukumu wakutu 'imam matengo gena-ge 'o pili ra Lewi 'ai ju'uda riwara, tantu ḏua Musa 'ai hukumu balasu 'i ngali ḏi'i.

¹³'Imam gena-ge ga'a ngoi reto kanau, gena-ge nanga Jou. Unanga toma suku lelegu; tai suku matengo i'a mai nyangu 'o dadi 'imam.

¹⁴Mo-moini ngowa'a ya waro ngene nanga Jou 'ai 'asala toma suku Yehuda. Re 'a Musa 'o terongo ua mangale ngowa'a toma suku Yehuda nyengara 'aḏi dadi 'imam-'imam.

¹⁵Lebe tarangi na'o 'Imam ma lelegu ga'a ro masibaiti ma tero Melkisedek.

¹⁶Unanga gena-ge 'u sitede dadi 'Imam, mete'e ua Musa 'ai hukumu mangale 'Ai ete re dotumu 'a guna. Mada'a mete'e Unanga 'ai kuasa re 'ai 'ahu kama ḏo-ḏogumu ua.

¹⁷Toma Boku 'Ofi-'Ofi ma dara 'i silefo mangale Yesus so'o ne: “Ngana no dadi 'Imam kasingado-ngadolo i'a ma tero 'a 'imam Melkisedek.”

¹⁸Dadi nange-ne parenta ma siḏa ngene wa pake riwara, sababu enanga 'i te'e ua re ma faeda 'i cua,

¹⁹sababu Musa 'ai hukumu 'i nyengara si'a'a matengo i'a mai ua 'o dadi 'ofi-'ofi. Dadi hukumu gena-ge singali reo ngo'omo su-sungi ga'a 'i pula'a ngo-nganono ra ngene sababu Yesus 'o dadi nanga 'Imam. Sababu gena-ge, ngene nyengara wo maco-cori ra Ma Jou'ongu Madutu.

²⁰Sidogo ḏi'i, Yesus 'o dadi 'Imam mete'e sasi ra Ma Jou'ongu Madutu tala. 'Imam-'imam lelegu raḏi sitede kama sasi ua.

²¹Mada'a wakutu Yesus 'u sitede dadi 'Imam, Ma Jou'ongu Madutu 'o sisasi ma betongo so'o ne: “Ngoi, Ma Jou'ongu Madutu, To sisasi, re Ngoi to ngali 'Ari demo ua: ‘Ngana no dadi 'Imam kasingado-ngadolo i'a.’ ”

²²Sababu sasi gena-ge, Yesus ro dadi ngene nanga ngo-nganono mode-mode'e mangale jaji ma su-sungi ḏuanga i'a 'i sitotomo. Re jaji gena-ge lebe rousu reo jaji ma siḏa.

²³Re 'age hali rimoi ḏi'i: Mangale 'imam-'imam ra Lewi 'ai ju'uda, 'age manga repe moju sababu 'aḏi matai sengene; dadi manga munara ya siḏuanga ua.

²⁴Mada'a Yesus 'o 'ahu kasingado-ngadolo i'a, dadi 'Ai munara, sa'olo 'Imam singali yoḏu'u ra guna ḇato.

²⁵Sababu gena-ge, Yesus nyengara 'o sisalamata kasingado-ngadolo i'a ngowa'a mo-moini ga'a 'aḏi sapolo ra Ma Jou'ongu Madutu. Gena-ge 'i dadi sababu ananga gena-ge 'aḏi ngaku Yesus sa'olo manga 'imam, re sababu ḏi'i Unanga 'o 'ahu kasingado-ngadolo i'a 'o manyiata ra Ma Jou'ongu Madutu di'a ananga.

²⁶Dadi ngene wo paralu Yesus gena-ge sa'olo nanga 'Imam 'Agung. Unanga ngowa'a 'ofi-'ofi, kai sala re ḏosa ua. Ma Jou'ongu Madutu 'o siwola i'a Unanga toma ngowa-ngowa'a baraḏosa, re Unanga ro pere singadolo ma ngi'i ga'a lebe kau'u reo diwanga ma gau'u.

²⁷Unanga 'ai munara 'i mata-rapu reo 'imam-'imam 'agung lelegu ga'a wange moi-wange moi balasu 'aḏi gasa jou-jou sisiḏa di'a manga ḏosa-ḏosa masiretene, kara di'a ngowa'a kawasa manga ḏosa. Mada'a Yesus 'o gasa jou-jou pa'i soi moi ḇato di'a kasingado-ngadolo i'a, wakutu Unanga sipula'a 'Ai diri sa'olo jou-jou di'a nanga ḏosa.

²⁸Ngowa'a ga'a 'aḏi dadi 'imam 'agung mete'e Musa 'ai hukumu, ananga gena-ge ngowa'a lamahana ga'a 'aḏi matogumu yoḏu'u 'a'a ḏosa. Mada'a wakutu Musa 'ai hukumu togumu i'a, Ma Jou'ongu Madutu si'a'a jaji ma su-sungi reo sasi mangale ḏuanga i'a Unanga 'o tede 'Ai Ngowa'a Nau'u dadi 'Imam 'Agung. Yesus gena-ge 'Imam 'Agung ti-tiai kasingado-ngadolo i'a ga'a si'a'a ngowa'a dadi 'ofi-'ofi ra Ma Jou'ongu Madutu 'ai momina.