Read Sahu Yakobus 1 Bible Online

Yakobus 1 - Sahu bible

Yakobus 1

¹'Ari ioronongoḏu ngo-ngaku rimoi, suku Israel nga nyagi moi re nga muḏiḏi[1] ga'a 'aḏi matai are toma dungia sitabi donga; Yakobus ga'a ta Ma Jou'ongu Madutu ma tero sa'olo 'Ai budaka[2] re so'o gena ḏi'i ga'a ta Ma Jou Yesus Kristus ma tero sa'olo 'Ai budaka, ngoi to siḏingoto 'ari tabea ra ngini.

²'Ari ioronongoḏu ngo-ngaku rimoi, ngini balasu ni basono sa'olo roanga na'o ngini sanga dola'aku re bo-baja.

³Sababu ngini ni waro ḏua na'o ninga ngo-ngaku kama elala ua ra Ma Jou'ongu Madutu wakutu ni sanga dola'aku re bo-baja gena-ge si'a'a ninga ngo-ngaku ganapu te'e singadolo ninga ngo-ngaku kama elala ua toma dola'aku re bo-baja 'oru ḇato.

⁴Na'o so'o gena, ngini ḏuanga i'a ni dadi ngowa'a ngaku Yesus ga'a manga ngo-ngaku enanga 'i la'ere re manga de'oso re ḏegoro 'i ma'u rapu ua: kama kuranga ua.

⁵Mada'a, na'o 'age matengo taninga sigolona 'ai 'akala soro'unu enanga 'i kuranga mangale ma duhu sa'olo unanga 'o 'ahu na'o 'o sanga dola'aku re bo-baja, unanga gena-ge balasu 'o golo'o ra Ma Jou'ongu Madutu. Ḏua Ma Jou'ongu Madutu ḏuanga i'a 'o pula'a 'akala soro'unu ra guna ḇato Rai 'akala re sinyingara sa-sanangi kama kuḏubungu ua.

⁶Mada'a na'o matengo i'a 'o golo'o ra Ma Jou'ongu Madutu balasu 'o ngaku mode-mode'e, awa 'o sitaka-taka. Na'o unanga 'ai 'akala re sinyingara ogoro ua, gena-ge ma tero sa'olo momoku toma ngoloto ga'a karawiana ya wusu si'a re sino.

⁷Unanga gena-ge 'ai 'akala re sinyingara 'i sa-salanga. Dadi 'o 'oro putusanga yoḏu'u, 'oru ḇato ga'a unanga 'o 'a'a. Sababu gena-ge unanga 'o masinganono awa 'o sanga 'ori i'a rimoi i'a ra Ma Jou'ongu Madutu.

⁹Ngini, ngowa'a ngaku Yesus ga'a ma dinga'unu ua, awa ninga 'akala re sinyingara ce-ceka'a. Siḏibo ḏi'i, ngini balasu ni maroanga, sababu Ma Jou'ongu Madutu sitede ngini sa'olo 'Ai ngowa-ngowa'a.

¹⁰Ngini, ngowa'a rema-enanga ga'a ngowa'a ngaku Yesus, ngini balasu ni maroanga ḏi'i, sababu Ma Jou'ongu Madutu 'o siholo ngini singadolo ngini reni ngaku ra Yesus. 'Elingi, ngini ga'a ngowa'a rema-enanga ḏuanga i'a ni iranga ma tero sa'olo rurubu ma saya.

¹¹Wakutu wangere ma la'o 'i pilata rema sa-sau'u ya 'erese, rurubu gena-ge 'i wa'alo re ma saya enanga 'i turono singadolo ma ro-rousu enanga 'i iranga. So'o gena ḏi'i, ngowa'a rema-enanga, wakutu 'a siḏagi 'ai dike, unanga ḏuanga i'a 'o sengene.

¹²Bara'utungu ngowa'a ga'a manga ngo-ngaku elala ua na'o sanga bo-baja toma 'Iblisi. Sababu wakutu bo-baja ma 'orasa ri togumu, ḏuanga i'a ya sanga 'ahu kasingado-ngadolo i'a sa'olo ngogele rimoi ga'a Ma Jou'ongu Madutu 'o sijaji pasala ḏua di'a ngowa-ngowa'a ga'a 'aḏi dadalara Unanga.

¹³Na'o 'age rema ngowa'a matengo ga'a 'o sanga bo-baja awa 'o kanau, “Bo-baja gena-ge ra Ma Jou'ongu Madutu ino.” Sababu matengo i'a mai ua nyengara 'o baja Ma Jou'ongu Madutu di'a 'o ga'a ma jira re matengo i'a mai ua 'o sanga bo-baja ra Unanga ḏi'i.

¹⁴Siḏibo ḏi'i, ngene matengo re matengo sanga bo-baja di'a 'o 'a'a ḏosa re 'o eta'a toma bo-baja ma dara, sababu nanga 'akala re sinyingara ma nyafusu ma jira.

¹⁵Na'o matengo i'a 'o mete'e 'ai 'akala re sinyingara ma nyafusu ma jira gena-ge, unanga 'o 'a'a ḏosa re na'o unanga 'o 'a'a ḏosa tau-taunu, ma ḏo-ḏogumu tala ḏuanga i'a Ma Jou'ongu Madutu 'u singeta'a sengene kasingado-ngadolo i'a ra unanga.

¹⁶'Ari ioronongoḏu ngo-ngaku rimoi ga'a ngoi tini dadalara, awa ngini ngowa'a nu'u sihaga:

¹⁷Bu-bula'a ma la-la bolo ti-tiai mo-moini, gena-ge ma 'asala toma soroga ino 'i 'uci da'u ra Ma Jou'ongu Madutu tala. 'Ori i'a ga'a ta-tarangi toma diwanga gena-ge Ma Jou'ongu Madutu 'ai do-dadi. 'Ori i'a ta-tarangi gena-ge 'i ngali tau-taunu, mada'a Ma Jou'ongu Madutu kama ngali-ngali ua. Unanga gena-ge sou moi nyangu 'o pula'a bu-bula'a ma jira.

¹⁸Mete'e Ma Jou'ongu Madutu 'ai 'akala ma mau masiretene, Unanga 'o sidadi ngene sa'olo 'Ai ngowa-ngowa'a sababu wo ngaku 'Ai habari banari, la ngene wo dadi Unanga 'ai do-dadi ma la-lamo'o ma re'u i'a Tai do-dadi mo-moini.

¹⁹'Ari ioronongoḏu ngo-ngaku rimoi ga'a ngoi tini dadalara! Totoho la-la ino ne: Matengo re matengo balasu na 'isene la-la si: Capati sangoro awa re capati ruta awa.

²⁰Ngowa'a tata-ruta, ananga gena-ge 'aḏi 'a'a 'ori i'a ma la-la ua ga'a 'aḏi sisanangi Ma Jou'ongu Madutu 'ai 'akala re sinyingara.

²¹Sababu gena-ge, ni matogumu toma biasa ma rapu re faja ra Ma Jou'ongu Madutu 'ai momina. Ḏua ngini ni siholo tala ninga 'akala re sinyingara, kara ni mete'e Ma Jou'ongu Madutu 'ai demo ga'a Unanga 'a so'ana sa'olo gisisi taninga 'akala re sinyingara ma dara, ga'a nyengara 'i sisalamata ngini.

²²Ngini balasu na mete'e Ma Jou'ongu Madutu 'ai demo, awa pa'i ni 'isene ḇato! Sababu na'o so'o gena, ngini ni masihaga ninga diri masiretene.

²³Ngowa'a ga'a ya 'isene Ma Jou'ongu Madutu 'ai demo, mada'a ya si'a'a ua, ngowa'a gena-ge ma tero saolo ngowa'a ga'a 'o maloḇe 'ai biono toma kasina.

²⁴Wakutu 'o maloḇe 'a tailako la-la togumu i'a, unanga aro 'o tagi re 'o sidaioranga ḏua 'ai biono ma duhu.

²⁵Ma Jou'ongu Madutu 'ai hukumu[3] enanga ti-tiai, rema de-de'e rema kuasa nyengara sibebasa ngowa'a toma 'Iblisi ma pareta. Dadi na'o matengo i'a awa pa'i 'isene ḇato re togumu i'a sidaioranga Ma Jou'ongu Madutu 'ai hukumu, mada'a unanga 'o mete'e tau-taunu Ma Jou'ongu Madutu 'ai hukumu, unanga gena-ge Ma Jou'ongu Madutu 'u sibarakati.

²⁶Na'o 'age rema ngowa'a matengo i'a ga'a 'o mabasono tala 'ai diri 'o cufala mete'e 'agama ma 'atoranga mada'a 'a jaga ua 'ai yai'i, ngowa'a gena-ge 'a sihaga 'ai diri masiretene re 'o cufala mete'e 'agama ma 'atoranga ma faeda 'i cua.

²⁷Mada'a 'agama ma 'atoranga ga'a 'i banari re 'i ti-tiai ra Ma Jou'ongu Madutu 'ai momina nena-ne: Ni riono ngowa'a daga re ngowa'a balo ga'a manga 'ahu kangela, re ni jaga ninga diri masiretene, la awa ni mete'e dungia ma nyafusu ma jira.