Read Sahu 1 Petrus 2 Bible Online

1 Petrus 2 - Sahu bible

1 Petrus 2

¹Sababu gena-ge, awa ni madaga'a 'ori i'a mo-moini ga'a 'i cira; awa ni sihaga ngowa'a, awa ngini ni dadi ngowa'a munafiki, awa ni kaleḏa ngowa'a re awa ni leleje ngowa'a lelegu manga lomanga, bolo awa ni sije-jengere ngowa'a.

²Mada'a ngini balasu ma tero sa'olo ngowa kiau aro sibuoro tala ga'a nyanyaḏi ḇowisi susu tau-taunu ra ma ngina. So'o gena ḏi'i, ngini balasu nyafusu masala di'a 'isene tau-taunu Ma Jou'ongu Madutu 'ai demo ga'a banari. Na'o ngini ni 'a'a so'o gena, ngini ninga ngo-ngaku ganapu te'e, singadolo enanga gena-ge 'i dadi ti-tiai.

³Awa ngini ni matogumu nyafusu isene Ma Jou'ongu Madutu 'ai demo, sababu ngini masiretene ni basono ḏua Ma Jou'ongu Madutu 'ai la-la.

⁴Dadi ni sapolo ra Ma Jou Yesus, Unanga gena-ge ma tero sa'olo maḏi ga'a 'i 'ahu ga'a manusia 'aḏi kanau Unanga ma tero sa'olo maḏi mapake ua. Momongolo ua, ra Ma Jou'ongu Madutu 'ai momina, Unanga ma tero sa'olo maḏi ma ijana lai hali ga'a Ma Jou'ongu Madutu 'a sitantukanga pasala ḏua, sa'olo maḏi di'a wala ma bangini.

⁵Ngini ḏi'i ma tero sa'olo maḏi ga'a 'i 'ahu, ga'a Ma Jou'ongu Madutu 'a pake di'a 'a simomi'i 'ai jama'ata. Re Ma Jou'ongu Madutu masiretene 'o cumutu ngini ni dadi 'Ai 'imam-'imam di'a ni pula'a jou-jou ra Unanga. Re ngini ni pula'a ninga 'akala re sinyingara mete'e Ma Ngagara 'Ofi-'Ofi ma mau sa'olo ninga jou-jou ra Unanga. Ma Jou'ongu Madutu nyengara 'a dawongo jou-jou gena-ge, sababu 'oru ga'a Yesus Kristus 'a si'a'a pasala ḏua di'a ngini.

⁶Sababu 'i silefo pasala ḏua toma Boku 'Ofi-'Ofi mangale Ma Jou Yesus ma tero sa'olo maḏi di'a wala ma bangini. Ma Jou'ongu Madutu 'o kanau so'o ne: “Ngoi ta siwola i'a ḏua maḏi rimoi gena-ge lai hali ta sijingi'i toma Sion sa'olo maḏi ma re'u i'a di'a wala ma bangini re ngowa-ngowa'a ga'a 'aḏi ngaku Unanga, maḏi gena-ge ananga manga ngo-ngaku 'i parasaja ua.”

⁷Ma Jou Yesus ma tero sa'olo maḏi ma la-lamo'o ma re'u i'a di'a wala ma bangini ga'a lai hali di'a ngini ga'a reni ngaku ra Unanga. Mada'a mangale ngowa'a ga'a 'aḏi ngaku Yesus ua 'age bu-bula'a toma Boku 'Ofi-'Ofi 'i silefo so'o ne: “Maḏi ga'a wala ma tukanga-tukanga ya upa'a, ma nyonyata maḏi gena-ge ri dadi maḏi ma la-lamo'o ma re'u i'a di'a wala ma bangini,”

⁸re “Ngowa-ngowa'a gena-ge ḏuanga i'a 'aḏi pele'e toma maḏi gena-ge. Ananga ḏuanga 'aḏi masiruba toma maḏi gena-ge.” Ananga 'aḏi masiruba sababu ananga 'aḏi ngaku ua Ma Jou'ongu Madutu 'ai demo. Enanga 'i dadi so'o gena sababu Ma Jou'ongu Madutu 'a sitantukanga pasala ḏua.

⁹Mada'a ngini ngowa-ngowa'a ga'a Ma Jou'ongu Madutu renu siwola i'a, re ngini ni dadi ma tero sa'olo 'Ai 'imam-'imam di'a munara ra Unanga sa'olo ninga 'Olana. Re ḏi'i, ngini ni dadi bangsa 'ofi-'ofi, re Unanga masiretene 'ai 'umata. Unanga 'o 'a'a so'o gena-ge, la ngini ni sihabari mangale 'Ai ga'a lai rousu. Unanga gena-ge ga'a 'O 'aro'o sisupu ngini toma hafu-hafu re 'O singosama ngini Tai tarangi ma dara ga'a ma pari cua.

¹⁰Ma siḏa ngini ni osama nyo-nyoimi nyangu ra Unanga 'ai 'umata, mada'a toma 'orasa nange-ne ngini reni osama nyo-nyoimi ra Unanga 'ai 'umata. Ma siḏa ngini ni basono nyangu Unanga 'ai 'akala re sinyingara ma la-la, mada'a 'orasa nange-ne ngini reni basono Unanga 'ai 'akala re sinyingara ma la-la.

¹¹Ioronongoḏu ngo-ngaku rimoi ga'a ngoi tunu dadalara! Ngini reni waro mangale ngini ma tero sa'olo ngowa'a tagi-tagi ino re ni tegoro nena re si'a ua toma dungia nena-ne. Sababu gena-ge, Ngoi to golo'o mode-mode'e ra ngini, awa ngini ni madaga'a 'oru ḇato 'i mete'e ninga nyafusu ma jira. Sababu nyafusu gena-ge 'i ma'u lawana reninga nyawa.

¹²Ngini ninga de'oso re ḏegoro balasu rousu re banari toma ngowa-ngowa'a ga'a 'aḏi nana'o Ma Jou nyangu. Kalaha ananga gena-ge 'aḏi kalaki ngini sa'olo ngowa'a ga'a madaga'a jira, ananga ya oḏi'i masiretene ngini ninga ga'a ma la-la. Dadi ḏuanga i'a enanga ma wangere 'i ngadolo Ma Jou dadunu 'o sapolo moju, ananga gena-ge 'aḏi puji re silamo'o Ma Jou'ongu Madutu.

¹³Ngini balasu ni ta'aloko toma ngowa'a la-lamo'o mo-moini ga'a manusia ya'u cumutu, sababu ni mete'e Ma Jou 'ai mau. Ngini balasu ni 'isene 'olana, ga'a 'ai ḏe-ḏegoro lai kau'u.

¹⁴So'o gena ḏi'i ni ta'aloko ra gubernur ga'a 'olana 'o pula'a watasa di'a singe-ngeta'a hukumu toma ngowa'a ma jira re ni silamo'o ngowa'a manga ga'a la-la.

¹⁵Sababu Ma Jou'ongu Madutu 'o mau na'o ngowa-ngowa'a ga'a nana'o Ma Jou'ongu Madutu nyangu 'aḏi oḏi'i ngini ninga ga'a la-la, ananga manga madanga 'i welanga yoḏu'u di'a sikanau ngini.

¹⁶Ni 'ahu sa'olo ngowa'a ga'a 'aḏi bebasa toma ḏosa, re kalaha ni dadi ngowa'a bebasa, awa ni madaga'a 'ori i'a ma jira na sigogono. Siḏibo ḏi'i, ngini balasu ninga de'oso re ḏegoro 'i patasa sa'olo ngowa-ngowa'a ga'a ta Ma Jou'ongu Madutu ma tero sa'olo 'Ai budaka-budaka;[2] Unanga gena-ge ga'a 'o sibebasa ngini toma ḏosa.

¹⁷Ni silamo'o 'a guna ḇato re ni dadalara ninga ioronongoḏu ngo-ngaku rimoi. Ni silamo'o re mojongo Ma Jou'ongu Madutu, re ni silamo'o 'olana ḏi'i.

¹⁸Ioronongoḏu ngo-ngaku rimoi ni dadi budaka, ngini balasu ni ta'aloko re ni silamo'o ninga tuanga. Awa pa'i ni ta'aloko re ni silamo'o tuanga la-la re 'adili ḇato, mada'a ni mete'e re silamo'o ḏi'i tuanga ga'a 'ai demo lai te'e.

¹⁹Na'o, kalaha ngini ni 'a'a sala ua, ninga tuanga 'o sisikisa ngini, re ngini ni matahana sangisara gena-ge sababu ni 'elingi Ma Jou'ongu Madutu 'ai 'akala ma mau, ngini ni sisanangi Ma Jou'ongu Madutu 'ai 'akala re sinyingara.

²⁰Ma 'utungu 'oru, na'o ngini sanga sangisara re ni matahana sangisara gena-ge sababu ni madaga'a sala?! Tantu ḏua, ma 'utungu 'i cua. Mada'a na'o ngini sanga sangisara re ni matahana sababu ni madaga'a 'ori i'a la-la, ngini ni sisanangi Ma Jou'ongu Madutu 'ai 'akala re sinyingara.

²¹Ma Jou'ongu Madutu 'o 'aro'o ngini di'a ni matahana sangisara gena-ge. So'o gena 'a Kristus ḏi'i 'o sanga sangisara di'a ngini. Duhu so'o gena-ge, Unanga 'o sijumu ngo'omo, la ngini ni 'a'a ma tero sa'olo Unanga:

²²Unanga kama 'a'a ḏosa ua re matengo i'a mai ua 'aḏi 'isene Unanga 'o kanau 'Ai demo ma sa-sakala.

²³Wakutu ngowa'a 'U je-jengere Unanga, Unanga 'A balasa ua. Wakutu ngowa'a 'U sisikisa Unanga, Unanga 'o sinati-nati ua di'a sisikisa ananga. Unanga pa'i 'a sidoa'a 'Ai 'ahu ra Ma Jou'ongu Madutu ga'a 'O dadi Juruhakimi 'adili.

²⁴'A Kristus masiretene 'a doiti nanga ḏosa wakutu ngowa'a 'U sisalib Unanga, la Ma Jou'ongu Madutu 'o sibebasa ngene tananga ḏosa. Re ḏi'i, la ngene nyengara wo 'ahu mete'e Ma Jou'ongu Madutu 'ai 'akala ma mau. Re Ma Jou'ongu Madutu 'o si-la ngini sababu 'a Kristus 'ai nyaboto toma salib.

²⁵Ma siḏa ninga 'ahu ma tero sa'olo doba 'i iranga. Mada'a nange-ne ngini sanga siḏibo di'a mete'e Unanga gena-ge ninga Sowohi ga'a 'O sioḏi'i ninga nyawa.