Read Sahu 2 Petrus 1 Bible Online

2 Petrus 1 - Sahu bible

2 Petrus 1

¹Ngoi, Simon Petrus, Yesus Kristus 'ai so-soma'a re ngoi ta Unanga ma tero sa'olo 'Ai budaka.[1] Ngoi to lefo surata nena-ne ra ngini ga'a ninga ngo-ngaku ra Yesus Kristus ma tero sa'olo ngomi minga ngo-ngaku. Yesus Kristus, Unanga Ma Jou'ongu Madutu re ḏi'i nanga Salamata ma Cimi. Unanga gena-ge 'O si'a'a ngene mo-moini wo ngaku Unanga re gena-ge 'i dadi sababu Unanga 'o 'adili.

²Ngoi to golo'o ra Ma Jou'ongu Madutu, la 'O pula'a 'Ai mura re dadalara re 'Ai dame pai-pai'i ra ngini sababu ngini reni nana'o Ma Jou'ongu Madutu re nana'o Yesus, nanga Jou.

³Ma Jou'ongu Madutu 'a siḏagi 'Ai kuasa 'O pula'a 'oru ḇato ga'a ngene paralu, la nanga 'ahu nyengara 'i cuḏuḏu'u Ma Jou Yesus. Nange-ne ngene nyengara wa si'a'a sababu ngene rewo nana'o Ma Jou'ongu Madutu. Re sababu 'Ai 'akala re sinyingara la-la masala re 'Ai kabasarana, Unanga gena-ge na 'aro'o ngene, la ngene dadi 'Ai ngowa-ngowa'a,

⁴re 'O pula'a ḏua barakati-barakati lai lamo'o masala ra ngene ga'a ma ijana lai hali ma pari cua ga'a 'O sijaji pasala ḏua. Unanga 'a si'a'a so'o gena-ge, la ngene nga'unu wo mete'e riwara dungia ma nyafusu, ga'a sijira ngowa'a, mada'a nyengara wo cuḏuḏu'u Ma Jou'ongu Madutu 'ai de'oso re ḏegoro.

⁵Sababu mo-moini gena-ge ga'a Ma Jou'ongu Madutu 'a si'a'a ḏua di'a ngene, ngini balasu makutale mode-mode'e, taninga ngo-ngaku ni sidogo de'oso re ḏegoro la-la toma ngowa'a lelegu. Re ni sidogo taninga de'oso re ḏegoro gena-ge, 'akala soro'unu.

⁶Re taninga 'akala soro'unu ni sidogo matahana diri, la ngini nyengara ni maki-kiḏanga toma dungia ma nyafusu re ni macako'o namo-namoto taninga ngo-ngaku. Re ni sidogo taninga de'oso re ḏegoro gena-ge, ni 'ahu ga'a 'i loasa re banari.

⁷Re taninga de'oso re ḏegoro gena-ge ni sidogo dadalara taninga ioronongoḏu ngo-ngaku rimoi. Ḏua ni sidogo taninga de'oso re ḏegoro, ni dadalara 'a guna ḇato.

⁸Na'o ngini ninga tabeata ma tero so'o gena-ge 'i sidogo de-de'e tau-taunu taninga de'oso re ḏegoro; gena-ge ma tero sa'olo sowo'o re barakati. Enanga gena-ge nana'o rimoi mangale ngini ni nana'o mode-mode'e Yesus Kristus, nanga Jou.

⁹Mada'a ngowa'a matengo ngaku Yesus kama de'oso re ḏegoro so'o gena-ge ua, unanga gena-ge ma tero sa'olo ngowa'a hafu ga'a 'ai momina tarangi riwara, sababu ra sidaioranga Ma Jou'ongu Madutu ro singi-ngiranga 'ai ḏosa-ḏosa ma siḏa.

¹⁰Sababu gena-ge 'ari ioronongoḏu ngo-ngaku rimoi, ngini balasu ni makutale lebe siḏi i'a, la ninga de'oso re ḏegoro la-la gena-ge 'i dadi lebe te'e taninga 'ahu. Na'o so'o gena-ge 'i dadi didina'o rimoi ga'a sijumu mode-mode'e Ma Jou'ongu Madutu nu'u 'aro'o re Nu'u cumutu di'a ngini ni mete'e re ni dadi 'Ai ngowa-ngowa'a. Na'o ngini na si'a'a so'o gena, ninga ngo-ngaku kama elala ua.

¹¹Ḏua Ma Jou'ongu Madutu ḏuanga i'a 'o dawongo ngini rai hormati wakutu ni osama ra Ma Jou Yesus Kristus 'ai Pareta kasingado-ngadolo i'a, Unanga ga'a nanga Salamata ma Cimi.

¹²Sababu gena-ge, kalaha ngini rena waro do-doto'o banari ga'a 'i osama mode-mode'e ḏua taninga 'akala re sinyingara ma dara; ngoi tunu si'elingi tau-taunu mangale do-doto'o gena-ge.

¹³Sababu ngoi ta basono tala paralu madutu 'ori i'a ga'a ta siajele ḏua ra ngini, ngoi ta si'elingi tau-taunu singadolo ngoi to sengene.

¹⁴Sababu ngoi reta waro Yesus Kristus nanga Jou 'o sitarangi ḏua ra ngoi, mangale ti'ara riwara ngoi ta sisoi'i tala dungia nena-ne.

¹⁵Sidogo ḏi'i, ngoi ḏuanga i'a ta si'a'a tau-taunu rari galasau'u ma duduala mo-moini singadolo ta sisoi'i tala dungia nena-ne, kara toma togumu. Dadi kalaha ngoi reto cua, ngini ni sidaioranga ua 'ori i'a gena-ge.

¹⁶Ngomi remi doto'o ra ngini mangale ngene nanga Jou Yesus Kristus, ḏuanga i'a dadunu 'o sapolo rai kabasarana. 'Oru ga'a ngomi remi doto'o, gena-ge ngomi madaga'a masiretene ua, mada'a ngomi minga la'o masiretene ma oḏi'i mangale Ma Jou Yesus Kristus 'ai kabasarana ma pari cua.

¹⁷Toma 'orasa rimoi, ngomi mi mame-mete'e Yesus toma kie re ngomi mi oḏi'i re mi 'isene Ma Jou'ongu Madutu, Unanga 'ai Ḇaḇa 'o silamo'o re 'O simulia Unanga. Ra Ma Jou'ongu Madutu toma soroga ma mulia, ngomi mi 'isene ma betongo so'o ne: “Unanga nena-ne 'Ari Ngowa'a Nau'u ga'a ta dadalara, Ngoi 'ari 'akala re sinyingara ma sanangi Ta sipa'ala ra Unanga!”

¹⁸Ngomi masiretene ma 'isene Ma Jou'ongu Madutu 'ai iḏingi da'u toma soroga tala, wakutu ngomi mame-mete'e Unanga toma kie 'ofi-'ofi.

¹⁹Sababu gena-ge, ngomi lebe ngaku mode-mode'e mangale Ma Jou'ongu Madutu 'ai habari ga'a nabi-nabi ma siḏa ya silefo pasala ḏua toma Boku 'Ofi-'Ofi. Habari gena-ge sa'olo lapuru malejanga toma hafu-hafu. Sababu gena-ge, ngini ni 'elingi tau-taunu taninga 'akala re sinyingara ma dara singadolo ma wangere ga'a Yesus Kristus dadunu 'o sapolo moju. Gena-ge ma tero sa'olo wangere ma la'o pilata re mumuḏungu toma wangere ma la'o ma tarangi ya 'erese.

²⁰Mada'a ma la-lamo'o ma re'u i'a, ngini balasu na 'elingi tau-taunu 'ori i'a nena-ne: Matengo i'a mai ua mete'e ananga manga wo-waro nga'unu ya sitarangi nabi 'ai habari ma ngale ga'a 'i silefo toma Boku 'Ofi-'Ofi.

²¹Soi moi i'a mai nyangu, nabi-nabi raḏi siajele Ma Jou'ongu Madutu 'ai habari 'i mete'e manusia manga mau, mada'a mete'e Ma Ngagara 'Ofi-'Ofi ya'u ḏegoro ra ananga gena-ge nabi-nabi di'a ya siajele habari ra Ma Jou'ongu Madutu.