Read Sahu 2 Petrus 2 Bible Online

2 Petrus 2 - Sahu bible

2 Petrus 2

¹Mada'a 'ua re 'au wali moju, nabi-nabi sa-sakala ri waiti toma ngowa-ngowa'a Israel manga sigolona. So'o gena ḏi'i, guru-guru sa-sakala ḏuanga i'a 'aḏi waiti masigogoro taninga sigolona. Ananga 'aḏi singosama manga do-doto'o ma banari ua, singadolo ngowa'a 'aḏi ngaku 'a Kristus riwara. Guru-guru sa-sakala gena-ge raḏi mangaku riwara Ma Jou, ga'a 'Ai kuasa ma pari cua re 'O tuusu ananga. Manga ga'a so'o gena, dadi ananga manga diri masiretene lai caiti sigasa toma sengene kasingado-ngadolo i'a.

²Mada'a ngowa'a ngaku Yesus manga repe 'aḏi cuḏuḏu'u guru-guru sa-sakala manga de'oso re ḏegoro ma jira singadolo ngowa'a lelegu ḏuanga i'a 'aḏi je-jengere do-doto'o banari ga'a sigasa ngowa'a ra Ma Jou'ongu Madutu.

³Guru-guru sa-sakala gena-ge 'aḏi nyafusu pipisi lai repe. Dadi ananga 'aḏi disa 'utungu madiga'a carita masiretene ra ngini. Ma di'ara ḏua Ma Jou'ongu Madutu ro sidodahe hukumu di'a ananga re ma 'orasa ri co-cori ḏua, wakutu Unanga ya'u singeta'a sengene kasingado-ngadolo i'a ra ananga.

⁴'Ua re 'au wali moju Ma Jou'ongu Madutu 'o singi-ngiranga ua 'Ai hukumu di'a mala'ekata-mala'ekata, wakutu ananga 'aḏi 'a'a ḏosa. Mada'a ya'u siupa'a ananga toma naraka ma dara re ya'u sigae ananga toma aḏu'u ga'a lai hafu. Toma ngi'i gena-ge ananga 'aḏi totoma singadolo ma wangere 'i ngadolo, wakutu Ma Jou'ongu Madutu 'o sijuruhakimi ngowa-ngowa'a.

⁵So'o gena ḏi'i, 'ua re 'au wali moju Ma Jou'ongu Madutu 'o singi-ngiranga ua 'Ai hukumu di'a dungia. Mada'a 'O singi-ngiranga dungia re ngowa-ngowa'a ga'a oḏu'u mete'e Unanga. 'A Nuh ga'a 'o singadolo mangale 'ahu loasa re banari, unanga re ngowa-ngowa'a lelegu nga tumudingi, pa'i ananga gena-ge 'aḏi sanga salamata.

⁶Ma tero ḏi'i sa'olo limau Sodom re Gomora. Ma Jou'ongu Madutu 'a singi-ngiranga reo u'u, la 'i dadi didina'o toma ngowa'a ma jira mo-moini, mangale na'o ananga 'aḏi oḏu'u mete'e Unanga, ananga Unanga ya'u sihukumu.

⁷Mada'a Ma Jou'ongu Madutu 'o sisalamata 'a Lot, sababu unanga ngowa'a loasa re banari. Lot 'ai 'akala re sinyingara 'i si-siḏi sababu 'o oḏi'i ananga manga ga'a 'i cira, ananga gena-ge ga'a 'aḏi oḏu'u mete'e Ma Jou'ongu Madutu.

⁸Re sababu unanga gena-ge ngowa'a loasa re banari, unanga 'ai 'akala re sinyingara 'i kangela wakutu unanga 'o 'ahu toma ngowa'a gena-ge manga sigolona. Sababu lobi'i re wangere unanga gena-ge 'o oḏi'i re 'o 'isene mangale ananga manga ga'a 'i cira tau-taunu.

⁹Dadi sababu Ma Jou'ongu Madutu 'o 'a'a mo-moini so'o gena-ge, Unanga 'a sijumu mangale Unanga nyengara 'o sisalamata ngowa'a loasa re banari wakutu ananga 'aḏi sanga sikisa.[2] Re ḏi'i Unanga nyengara 'o sihukumu tau-taunu ngowa'a ma jira singadolo ma wangere 'i ngadolo wakutu Unanga 'o sijuruhakimi ngowa'a mo-moini.

¹⁰Unanga 'ai hukumu ḏuanga i'a 'i lebe ḏubuso di'a ananga ga'a 'aḏi mete'e manga 'akala re sinyingara ma jira: 'aḏi su-sudala re 'aḏi je-jengere Ma Jou'ongu Madutu 'ai kuasa. Ngowa'a gena-ge, guru-guru sa-sakala, 'aḏi mojongo ua re 'aḏi momole singadolo ananga kamanga mojongo ua di'a 'aḏi je-jengere 'ori i'a rema kuasa ga'a manusia wa oḏi'i yoḏu'u.

¹¹Mala'ekata-mala'ekata ra Ma Jou'ongu Madutu 'ai biono, remanga kuasa lebe lamo'o i'a reo guru-guru sa-sakala, ananga mai ya'u je-jengere ua 'ori i'a rema kuasa ga'a manusia wa oḏi'i yoḏu'u.

¹²Wa sipari ua guru-guru sa-sakala gena-ge. Ananga 'aḏi je-jengere 'oru ga'a ananga ya waro ua. Sababu gena-ge, ananga 'aḏi ma tero sa'olo haiwani nga-ngabala ga'a mete'e enanga ma mau ḇato. Haiwani gena-ge 'i sibuoro di'a pa'i ngowa-ngowa'a ya dedele re ya sisengene. Guru-guru sa-sakala gena-ge, tantu ḏua 'aḏi sanga sengene kasingado-ngadolo i'a ra Ma Jou'ongu Madutu.

¹³Ananga ḏuanga i'a 'aḏi sanga hukumu ga'a 'i mete'e ananga manga ga'a masiretene. Toma 'orasa wa-wangere, ananga manga 'akala re sinyingara 'i sanangi na'o 'aḏi 'a'a 'oru ḇato di'a sisanangi ananga manga nyafusu ma cafarune. Na'o ananga gena-ge 'aḏi tegoro mamete'e ra ngini toma laya, ni basono mara'a, sababu 'aḏi 'etolo re 'aḏi mete'e ananga manga nyafusu ma cafarune.

¹⁴Ananga 'aḏi matogumu ua 'aḏi oḏi'i we-were'a tamanga 'akala re sinyingara rema nyafusu re 'aḏi matogumu ua disa donga di'a 'a'a ḏosa. Ananga 'aḏi baja ngowa'a manga ngo-ngaku ra Kristus ga'a 'i mereoso, la 'aḏi 'a'a 'ori i'a ma jira. Ananga raḏi biasa da-danata. Sababu ga'a ma jira mo-moini gena-ge Ma Jou'ongu Madutu ḏuanga i'a ya'u sisasi.

¹⁵Ananga 'aḏi mete'e ngo'omo boloto ua, mada'a ananga 'aḏi mete'e ngo'omo ma tero sa'olo 'ua re 'au wali moju nabi Bileam 'ai ngo'omo, unanga gena-ge 'a Beor 'ai ngowa'a. Bileam 'o nyafusu masala sanga bo-bangu tai ga'a ma jira.

¹⁶Mada'a unanga 'o sanga ḇangata ra Ma Jou'ongu Madutu, sababu 'ai ga'a ma jira gena-ge. Ma nyonyata 'ai keledai nyengara 'i kanau ma tero sa'olo ngowa'a 'aḏi kanau ra unanga. Sababu gena-ge, nabi Bileam 'a si'a'a riwara 'ai 'ulungu ma haga gena-ge.

¹⁷Guru-guru sa-sakala gena-ge 'aḏi aje na'o ngowa'a ya'u mete'e ananga sanga 'utungu; mada'a ananga sanga 'utungu ceka'a i'a mai ua. Ananga gena-ge ma tero sa'olo ḇanyo ma la'o, mada'a 'i dudungu re ma tero sa'olo kakamo masihafu tala 'o rato ya wusu mada'a besa'a 'i dadi ua. Dadi Ma Jou'ongu Madutu ra sidodahe ḏua toma ngi'i hafu-hafu madutu di'a ananga.

¹⁸Ananga 'aḏi matoro na'o 'aḏi kanau. Momongolo ua, ananga manga demo 'i parasaja. Guru-guru sa-sakala gena-ge remanga demo 'aḏi baja ngowa'a ga'a 'aḏi aro sieanga 'aḏi mete'e ngowa'a manga de'oso re ḏegoro ma jira. Ananga 'aḏi baja ngowa'a gena-ge reo manusia manga 'ulungu ma cafarune, la 'aḏi maḏibo mete'e de'oso re ḏegoro ma siḏa moju!

¹⁹Guru-guru sa-sakala gena-ge 'aḏi sijaji toma ngowa-ngowa'a na'o ananga 'aḏi mete'e manga do-doto'o, ananga ḏuanga i'a sanga bebasa di'a 'aḏi 'a'a 'oru ḇato mete'e manga nyafusu. Mada'a guru-guru sa-sakala gena-ge masiretene 'aḏi dadi budaka tamanga biasa ga'a sijira manusia. Sababu 'oru ḇato 'i ḏegoro ngene, ngene wo dadi budaka toma 'ori i'a gena-ge.

²⁰Na'o ananga gena-ge raḏi nana'o nanga Jou Yesus Kristus sa'olo Salamata ma Cimi re 'aḏi sanga woi'i toma dungia ma kuasa ga'a sigasa ngowa'a toma jira mo-moini, mada'a ananga 'aḏi maḏibo mete'e dungia ma jira moju singadolo manga 'ahu ri cira, sa'olo ma siḏa moju, ḏua ma ḏo-ḏogumu tala, ananga gena-ge lebe cira reo wakutu 'aḏi waro Ma Jou Yesus Kristus nyangu.

²¹Jobilaha na'o ngowa'a gena-ge kamanga wo-waro ua mangale ngo'omo boloto ra Ma Jou'ongu Madutu, reo ananga ya waro ḏua, mada'a ananga 'aḏi oḏu'u mete'e parenta-parenta ga'a 'i singadolo ḏua ra ananga.

²²'Oru ga'a ananga 'aḏi si'a'a ma tero sa'olo ete re dotumu manga demo: “Nunu'u dadunu ya 'omo enanga ma ngunanga,” re “Kalaha 'o soto ri ma'ori'i ḏua, enanga 'i maḏibo 'i malulu toma pece moju.”