Read Sahu 1 Yohanes 2 Bible Online

1 Yohanes 2 - Sahu bible

1 Yohanes 2

¹'Ari ngowa-ngowa'a, ngoi to lefo surata nena-ne re ta siḏingoto ra ngini, la awa ngini ni madaga'a ḏosa moju. Mada'a na'o matengo 'o madaga'a ḏosa, 'age nanga to golona matengo ga'a 'o kanau di'a ngene ra Ma Jou'ongu Madutu nanga Ḇaḇa. Unanga gena-ge Yesus Kristus ga'a kai ḏosa ua.

²Yesus gena-ge 'o dadi nanga du-duusu sababu Unanga 'o sidoa'a 'ai lese sa'olo jou-jou di'a nanga ḏosa-ḏosa. Sababu gena-ge Ma Jou'ongu Madutu nga'unu 'o singi-ngiranga nanga ḏosa-ḏosa. Re pa'i ngene nanga ḏosa ḇato ua, mada'a ngowa'a mo-moini manga ḏosa toma dungia sitabi donga ḏi'i.

³Na'o ngene wa mete'e tau-taunu 'oru ḇato ga'a Ma Jou'ongu Madutu 'ai parenta, gena-ge 'i dadi nana'o rimoi mangale ngene mode-mode'e wo nana'o Unanga.

⁴'Age rema ngowa'a matengo ga'a 'o kanau, “Ngoi to nana'o Ma Jou'ongu Madutu” mada'a ta mete'e ua Unanga 'ai parenta, unanga gena-ge ngowa'a sa-sakala, re 'ai 'akala re sinyingara 'a mete'e riwara Ma Jou'ongu Madutu 'ai do-doto'o banari.

⁵Mada'a na'o 'age rema ngowa'a matengo mete'e tau-taunu 'oru ḇato ga'a Ma Jou'ongu Madutu 'ai demo, ngowa'a gena-ge 'o sijumu rai 'ahu ma duhu mangale 'o dadalara mode-mode'e Ma Jou'ongu Madutu. 'Ahu ma duhu so'o gena-ge 'i dadi didina'o rimoi mangale ngene nanga 'ahu wo marimoi mode-mode'e ra Ma Jou'ongu Madutu.

⁶'A guna ḇato 'aḏi kanau, ananga gena-ge 'aḏi marimoi ra Ma Jou'ongu Madutu, ananga manga 'ahu ma duhu balasu 'i mete'e Kristus 'ai 'ahu ma duhu.

⁷Ioronongoḏu ngo-ngaku rimoi ga'a ngoi tunu dadalara, 'oru ga'a ngoi ta lefo ḏua, gena-ge parenta ma su-sungi ua! Enanga ma di'ara ḏua ga'a siajele ra ngini wakutu ngini mulaingi ni ngaku Yesus. Parenta gena-ge toma Habari Roanga ra Ma Jou'ongu Madutu tala ga'a ngini na isene ḏua.

⁸Kalaha so'o gena, Ma Jou'ongu Madutu 'ai parenta ga'a ngoi ta lefo ḏua, gena-ge parenta ma su-sungi ḏi'i. Parenta ma su-sungi gena-ge 'i banari sababu ri waiti ra Kristus 'ai 'ahu re ḏi'i ngini ninga 'ahu, sababu ninga 'ahu toma hafu-hafu enanga mulaingi sa'i 'i iranga, re ninga 'ahu toma tarangi banari enanga mulaingi 'i waiti.

⁹'Age rema ngowa'a 'aḏi kanau, ananga 'aḏi 'ahu toma tarangi ma dara, mada'a ngowa'a gena-ge 'aḏi dadalara ua manga ioronongoḏu ngo-ngaku rimoi. Ngowa'a gena-ge 'aḏi 'ahu toma hafu-hafu ma dara moju.

¹⁰Ngowa'a ga'a 'aḏi dadalara manga ioronongoḏu ngo-ngaku rimoi, ananga 'aḏi 'ahu toma tarangi ma dara singadolo manga ga'a 'i sigasa ua ananga toma ḏosa.

¹¹Mada'a ngowa'a ga'a dadalara ua manga ioronongoḏu ngo-ngaku rimoi, ngowa'a gena-ge 'aḏi 'ahu toma hafu-hafu. Ananga 'aḏi tagi masihafu, dadi ya waro ua 'aḏi tagi le'a, sababu 'aḏi 'ahu toma hafu-hafu ma dara 'i si'a'a ananga 'aḏi masioḏi'i ua.

¹²Ngoi to lefo surata nena-ne ra ngini ga'a ninga ngo-ngaku ma tero sa'olo ngowa 'olo-ngowa 'olo, sababu Ma Jou'ongu Madutu 'a singi-ngiranga ḏua ninga ḏosa-ḏosa sababu Kristus 'a si'a'a ḏua di'a ngini.

¹³Ngoi to lefo surata nena-ne ra ngini ga'a ninga ngo-ngaku ma tero sa'olo ḇaḇa-ḇaḇa, sababu ngini reni nana'o Unanga ga'a 'ua re 'au wali moju, rema enanga ḏua wakutu dungia 'i sidadi nyangu. Ngoi to lefo surata nena-ne ra ngini ga'a ninga ngo-ngaku ma tero sa'olo ngowa-ngowa'a tubaie, sababu ninga ngo-ngaku kama elala ua toma 'Iblisi ma bo-baja.

¹⁴Ngoi to lefo surata nena-ne ra ngini ga'a ninga ngo-ngaku ma tero sa'olo ngowa 'olo-ngowa 'olo, sababu ngini ni nana'o Ma Jou'ongu Madutu ḏua sa'olo ninga Ḇaḇa. Ngoi to lefo surata nena-ne ra ngini ga'a ninga ngo-ngaku ma tero sa'olo ḇaḇa-ḇaḇa, sababu ngini reni nana'o Unanga ga'a 'ua re 'au wali moju, rema enanga ḏua wakutu dungia 'i sidadi nyangu. Ngoi to lefo surata nena-ne ra ngini ga'a ninga ngo-ngaku ma tero sa'olo ngowa-ngowa'a tubaie, sababu ngini ngowa'a te-te'e taninga ngo-ngaku, re ninga de'oso re ḏegoro 'i mete'e Ma Jou'ongu Madutu 'ai do-doto'o re ninga ngo-ngaku kama elala ua toma 'Iblisi ma bo-baja.

¹⁵Awa ngini ni dadalara dungia bolo 'oru ḇato toma dungia ma dara.[1] Sababu na'o 'a guna ḇato 'o dadalara dungia, unanga 'o dadalara ua 'ai Ḇaḇa Ma Jou'ongu Madutu.

¹⁶'Oru ḇato toma dungia nena-ne ma dara, ga'a ngowa'a baraḏosa ya nyafusu re ya oḏi'i re nyanyaḏi bolo ya sitoro: mo-moini gena-ge ma 'asala ua ra Ma Jou'ongu Madutu ino, mada'a ma 'asala toma dungia ḇato.

¹⁷Re sababu ḏi'i dungia re ma dara mo-moini ga'a manusia ya nyafusu, soi moi enanga 'i iranga. Mada'a ngowa'a ga'a 'aḏi mete'e Ma Jou'ongu Madutu 'ai 'akala ma mau, ananga 'aḏi sanga 'ahu kasingado-ngadolo i'a.

¹⁸'Ari ngowa-ngowa'a, Kiamata ma Wangere sa'i ri co-cori! 'Au wali, siajele pasala ḏua ra ngini mangale unanga ga'a lawana Kristus, Kristus Sa-sakala ḏuanga i'a 'o sapolo. Nange-ne ḏi'i, ri waiti ngowa'a manga repe ga'a 'aḏi lawana Kristus. Gena-ge 'i dadi sa'olo didina'o rimoi mangale Kiamata ma Wangere ri co-cori.

¹⁹Ngowa-ngowa'a ga'a 'aḏi lawana Kristus, 'au nga'ene ananga gena-ge 'aḏi marimoi ra ngene mada'a nange-ne ananga gena-ge 'aḏi marimoi ra ngene riwara, sababu ananga raḏi sisoi'i tala ngene. Sababu na'o mode-mode'e ananga gena-ge raḏi ngaku Yesus, ananga 'aḏi sisoi'i tala ngene ua. Mada'a enanga 'i dadi so'o gena, la ngene wa oḏi'i re wa waro mangale ananga gena-ge raḏi marimoi riwara.

²⁰Mada'a ngini reni dawongo Ma Ngagara 'Ofi-'Ofi ga'a Kristus 'a sipa'ala ra ngini. Dadi ngini mo-moini ni nana'o do-doto'o banari.

²¹Sababu gena-ge, awa ngini ni fikiri mangale ngoi to lefo so'o gena-ge ra ngini sababu ngini ni nana'o nyangu do-doto'o banari. So'o gena-ge ua! Siḏibo ḏi'i sababu ngini na waro ḏua mangale do-doto'o gena-ge re ngini ni waro ḏi'i mangale do-doto'o 'i banari, gena-ge 'i sa-sakala ua.

²²'A guna ngowa'a matengo sa-sakala?! Ngowa'a matengo ga'a 'o kanau, “Yesus 'O Kristus ua ga'a Ma Jou'ongu Madutu 'o sijaji ḏua!” Unanga gena-ge Kristus Sa-sakala ga'a 'o dawongo ua Ma Jou'ongu Madutu nanga Ḇaḇa re 'Ai Ngowa'a Nau'u.

²³Ngowa'a matengo ga'a dawongo ua, Ma Jou'ongu Madutu 'ai Ngowa'a Nau'u, unanga 'o marimoi ua ḏi'i ra Ma Jou'ongu Madutu. Mada'a 'a guna ḇato 'o mangaku Yesus, Ma Jou'ongu Madutu 'ai Ngowa'a Nau'u, unanga gena-ge 'o marimoi ḏi'i ra Ma Jou'ongu Madutu.

²⁴Sababu gena-ge, ngini ninga de'oso re ḏegoro balasu mete'e tau-taunu Habari Roanga ra Ma Jou'ongu Madutu ino, ga'a na 'isene ḏua wakutu ngini mulaingi ni ngaku Kristus. Na'o ngini ni 'a'a so'o gena-ge, ngini ninga 'ahu ḏuanga i'a 'i marimoi tau-taunu ra Ma Jou'ongu Madutu re 'Ai Ngowa'a Nau'u.

²⁵Re Ma Jou'ongu Madutu 'ai jaji, ga'a 'a siajele pasala ḏua mangale 'Ahu kasingado-ngadolo i'a, di'a ngene.

²⁶Ngoi to lefo surata nena-ne ra ngini, sababu 'age rema ngowa'a 'aḏi makutale mau 'aḏi sihaga ngini.

²⁷Mada'a mangale ngini masiretene, Kristus 'a sipa'ala ḏua Ma Ngagara 'Ofi-'Ofi ra ngini. Sababu Ma Ngagara 'Ofi-'Ofi 'i tegoro taninga 'akala re sinyingara moju, ngini ni paralu ua ngowa'a lelegu 'aḏi doto'o ngini. Sababu Ma Ngagara 'Ofi-'Ofi masiretene 'I doto'o 'ori i'a mo-moini ra ngini re enanga ma do-doto'o mo-moini 'i banari; sa-sakala ua. Sababu gena-ge, ngini ninga de'oso re ḏegoro balasu na mete'e 'oru ḇato ga'a Ma Ngagara 'Ofi-'Ofi sidoto'o ngini, la ngini ni 'ahu marimoi tau-taunu ra Yesus Kristus.

²⁸Sababu gena-ge, 'ari ngowa-ngowa'a ni 'ahu marimoi tau-taunu ra Kristus. Dadi ḏuanga i'a ma 'orasa 'i ngadolo wakutu Unanga dadunu 'o sapolo moju, ngene nyengara wo talaḏi Unanga kananga mojongo ua re wo magogono ua, sababu wo mara'a ua.

²⁹Ngini na waro ḏua mangale Kristus 'ai de'oso re ḏegoro mete'e Ma Jou'ongu Madutu 'ai 'akala ma mau. Re ngini na waro ḏua ḏi'i 'a guna ḇato 'ai de'oso re ḏegoro mete'e Ma Jou'ongu Madutu 'ai 'akala ma mau, ngowa'a gena-ge Ma Jou'ongu Madutu 'ai ngowa-ngowa'a.