Read Sahu 1 Yohanes 4 Bible Online

1 Yohanes 4 - Sahu bible

1 Yohanes 4

¹Ioronongoḏu ngo-ngaku rimoi ga'a ngoi tunu dadalara, awa ngini cautu i'a ni ngaku ngowa'a ga'a 'aḏi aje remanga Roh ra Ma Jou'ongu Madutu tala. Mada'a ngini siḏa-siḏa ni disa waro, roh gena-ge ma 'asala ra Ma Jou'ongu Madutu tala, bolo ua. Sababu nange-ne nabi-nabi sa-sakala manga repe toma dungia sitabi donga.

²Ma duhu so'o ne, di'a ni disa waro roh gena-ge ma 'asala ra Ma Jou'ongu Madutu tala bolo ua: Ngowa'a ga'a 'aḏi mangaku Yesus Kristus 'o sapolo toma dungia nena-ne sa'olo manusia, ananga gena-ge Roh ra Ma Jou'ongu Madutu ya'u ḏegoro.[2]

³Mada'a na'o ngowa'a 'aḏi mangaku ua gena-ge mangale Yesus, roh gena-ge ma 'asala ua ra Ma Jou'ongu Madutu tala. Ngowa'a gena-ge, roh ra Kristus Sa-sakala ya'u ḏegoro. Ngini rena 'isene mangale roh gena-ge ḏuanga i'a 'i sapolo re nange-ne rema enanga ḏua toma dungia ma dara.

⁴Ngini, 'ari ngowa-ngowa'a, reni dadi Ma Jou'ongu Madutu 'ai ngowa-ngowa'a. Ngini reni 'utungu talaḏi toma nabi-nabi sa-sakala gena-ge. Sababu Ma Ngagara 'Ofi-'Ofi ga'a 'age ra ngini, lebe kuasa reo 'Iblisi ga'a ḏegoro dungia ma ngowa-ngowa'a, ananga gena-ge ga'a ngaku Yesus ua.

⁵Nabi-nabi sa-sakala gena-ge, ananga mode-mode'e dungia ma manusia. Sababu gena-ge ananga 'aḏi kanau mangale dungia ma mau-mau ḇato, re dadi dungia ma ngowa-ngowa'a 'aḏi 'isene ananga.

⁶Mada'a ngene Ma Jou'ongu Madutu 'ai ngowa-ngowa'a. Ngowa-ngowa'a ga'a 'aḏi nana'o Ma Jou'ongu Madutu, ananga ya 'isene ngene nanga demo. Ngowa'a ga'a Ma Jou'ongu Madutu 'ai ngowa-ngowa'a ua, ananga 'aḏi 'isene ngene nanga demo ua. Gena-ge 'i dadi didina'o rimoi mangale ma duhu sa'olo ngene wa waro 'a guna Ma Ngagara 'Ofi-'Ofi, ga'a doto'o ba-banari, ya'u ḏegoro, re 'a guna 'Iblisi ya'u ḏegoro re ya'u sihaga.

⁷Ngini, ioronongoḏu ngo-ngaku rimoi ga'a ngoi tunu dadalara! Ino ngene wo ma'u dadalara matengo re matengo, sababu dadalara gena-ge ma 'asala ra Ma Jou'ongu Madutu tala. Dadi na'o 'a guna ḇato 'o dadalara 'ai ioronongoḏu ngo-ngaku rimoi, unanga gena-ge Ma Jou'ongu Madutu 'ai ngowa'a re 'o nana'o Ma Jou'ongu Madutu.

⁸Ngowa'a ga'a kamanga dadalara ua, 'aḏi nana'o Ma Jou'ongu Madutu ua, sababu Ma Jou'ongu Madutu gena-ge dadalara ma cimi.

⁹Ma Jou'ongu Madutu ro sijumu 'ai dadalara ra ngene so'o ne: Unanga gena-ge 'o 'utusu 'Ai Ngowa'a Nau'u pa'i matengo ḇato toma dungia nena-ne, la ngene nga'unu wo sanga 'ahu ra Unanga

¹⁰Dadi nena-ne si'aro'o dadalara: Ngene wo siḏa ua wo dadalara Ma Jou'ongu Madutu, mada'a Unanga siḏa na dadalara ngene, singadolo 'O 'utusu 'ai Ngowa'a Nau'u di'a 'O sapolo toma dungia nena-ne re 'O sidoa'a 'Ai lese sa'olo jou-jou, la Unanga 'a singi-ngiranga nanga ḏosa-ḏosa.

¹¹Ioronongoḏu ngo-ngaku rimoi ga'a ngoi tunu dadalara. Sababu Ma Jou'ongu Madutu na dadalara ngene so'o gena; ngene ḏi'i balasu wo ma'u dadalara matengo re matengo.

¹²Matengo i'a mai nyangu 'o oḏi'i Ma Jou'ongu Madutu. Mada'a na'o ngene wo ma'u dadalara matengo re matengo, Unanga 'O marimoi ra ngene re 'Ai dadalara 'i waiti ti-tiai ra ngene nanga de'oso re ḏegoro.

¹³Ma Jou'ongu Madutu ro pula'a Ma Ngagara 'Ofi-'Ofi ra ngene. Sababu gena-ge, ngene wo waro mangale ngene rewo 'ahu marimoi ra Ma Jou'ongu Madutu re Unanga 'o 'ahu marimoi ra ngene.

¹⁴Ngomi masiretene mi oḏi'i ḏua Ma Jou'ongu Madutu 'ai Ngowa'a Nau'u, re ngomi ma sisakisi mangale Unanga gena-ge 'O sanga 'utusu Tai Ḇaḇa di'a sapolo toma dungia nena-ne, la 'O dadi dungia ma Salamata ma Cimi.

¹⁵Na'o 'a guna ḇato 'o mangaku mangale Yesus gena-ge Ma Jou'ongu Madutu 'ai Ngowa'a Nau'u, Ma Jou'ongu Madutu ḏi'i 'o 'ahu marimoi toma ngowa'a gena-ge. Re ngowa'a gena-ge 'ai 'ahu marimoi ra Ma Jou'ongu Madutu.

¹⁶Ngene masiretene rewa basono rewa ngaku mangale Ma Jou'ongu Madutu 'o dadalara ngene. Ma Jou'ongu Madutu dadalara ma cimi. Sababu gena-ge, 'a guna ḇato 'o 'ahu rai dadalara tau-taunu tai ioronongoḏu ngo-ngaku rimoi, ngowa'a gena-ge 'o marimoi ra Ma Jou'ongu Madutu. Re Ma Jou'ongu Madutu 'o marimoi toma ngowa'a gena-ge.

¹⁷'Ahu ma duhu so'o gena-ge, dadalara 'i ti-tiai ra ngene nanga 'ahu. Dadi ngene nyengara wo talaḏi Ma Jou'ongu Madutu kananga mojongo ua, wakutu ma wangere 'i ngadolo Ma Jou'ongu Madutu 'o sijuruhakimi ngowa'a. Sababu nanga de'oso re ḏegoro toma dungia nena-ne 'i ma tero sa'olo Kristus 'ai de'oso re ḏegoro.

¹⁸Ngowa'a ga'a mode-mode'e raḏi basono mangale Ma Jou'ongu Madutu 'o dadalara ananga, ananga gena-ge kamanga mojongo ceka'a i'a mai ua ra Unanga. Sababu 'Ai dadalara 'i ti-tiai ri singi-ngiranga manga mojongo tamanga 'akala re sinyingara ma dara. Dadi na'o ngowa'a 'aḏi 'ahu remanga mojongo moju mangale Ma Jou'ongu Madutu ḏuanga i'a ya'u sihukumu, ananga gena-ge 'aḏi basono mode-mode'e nyangu mangale Ma Jou'ongu Madutu 'o dadalara ananga.

¹⁹Ngene nyengara wo dadalara, sababu Ma Jou'ongu Madutu lebe siḏa na dadalara ngene.

²⁰Dadi na'o matengo i'a 'o kanau, “Ngoi to dadalara Ma Jou'ongu Madutu.” Mada'a unanga 'o dadalara ua 'ai ioronongoḏu ngo-ngaku rimoi, ngowa'a gena-ge ngowa'a sa-sakala. Sababu osama 'akala ua unanga gena-ge 'a dadalara ua 'ai ioronongoḏu ngo-ngaku rimoi ga'a 'a oḏi-oḏi'i, kara nyengara 'o dadalara Ma Jou'ongu Madutu ga'a unanga 'o oḏi'i ua!

²¹Nena-ne parenta ga'a Yesus ro pula'a ra ngene: 'A guna ḇato 'o dadalara Ma Jou'ongu Madutu, balasu dadalara ḏi'i 'ai ioronongoḏu ngo-ngaku rimoi.