Read Sahu Yudas 1 Bible Online

Yudas 1 - Sahu bible

Yudas 1

¹Ioronongoḏu ngo-ngaku rimoi ngini ga'a sanga 'aro'o ḏua di'a ni dadi Ma Jou'ongu Madutu 'ai ngowa-ngowa'a. Ngini ga'a Ma Jou'ongu Madutu nu dadalara re nu kadiarata singadolo Yesus Kristus dadunu 'o sapolo moju. Ngoi, 'a Yudas ga'a ta Yesus Kristus ma tero sa'olo 'Ai budaka,[1] re gia nongoḏu ra Yakobus,

²to golo'o ra Ma Jou'ongu Madutu mangale Unanga 'o sijumu 'Ai 'akala re sinyingara ma la-la pai-pai'i, re 'O pula'a 'Ai dame re 'Ai dadalara pai-pai'i ra ngini.

³Ioronongoḏu ngo-ngaku rimoi ga'a ngoi tini dadalara! Ngoi mode-mode'e 'ari maksudu ma siḏa to lefo surata ra ngini mangale salamata ga'a ngene rewa basono. Mada'a nange-ne ngoi 'ari 'akala re sinyingara magaraki di'a tunu babata ngini ni lawana guru-guru sa-sakala, re mode-mode'e na kadiarata do-doto'o banari ga'a sipula'a Tai ngowa-ngowa'a ra Unanga ino re enanga gena-ge 'i singali yoḏu'u.

⁴Sababu ngene masiwaro ua, 'age rema ngowa'a ga'a 'aḏi sapolo ma'u capuru tananga sigolona. Ananga gena-ge ngowa-ngowa'a ga'a sito-to'u Ma Jou'ongu Madutu re 'aḏi doto'o ngowa'a mangale ananga nyengara 'aḏi mete'e 'akala re sinyingara manga nyafusu ma jira sababu Ma Jou'ongu Madutu ya'u dadalara. Dadi ananga gena-ge 'aḏi sicelolo habari mangale nanga Jou'ongu Madutu 'ai mura re dadalara, la 'aḏi sanga donga di'a mete'e ti-tiai manga 'akala re sinyingara ma jira. Ananga 'aḏi sito-to'u Yesus Kristus, pa'i nanga 'Olana re nanga Jou ḇato. 'Ua re 'au wali moju ananga manga hukumu ya sinubuata re 'i silefo ḏua toma Boku 'Ofi-'Ofi ma dara.

⁵Ngini rena waro mo-moini nena-ne: Mada'a ngoi mau tini si'elingi ngini moju mangale siḏa-siḏa Ma Jou'ongu Madutu 'o sisalamata 'Ai 'umata Israel ga'a 'aḏi tegoro toma nagara Mesir. Mada'a maha ḏuanga i'a Unanga ya'u sijira ngowa-ngowa'a ga'a ngaku ua tamanga sigolona.

⁶Ngini ni 'elingi ḏi'i mangale 'ua re 'au wali moju mala'ekata ga'a sito'u-to'u ananga manga kuasa, re tagi sisoi'i tala ananga manga ngi'i, Ma Jou'ongu Madutu 'a piri'u mala'ekata-mala'ekata gena-ge reo rate ga'a kama tola'a riwara, re ya'u singosama toma ngi'i hafu-hafu. Toma ngi'i gena-ge ananga gena-ge 'aḏi totoma singadolo ma wangere ma 'orasa 'i ngadolo wakutu Ma Jou'ongu Madutu singe-ngeta'a hukumu.

⁷Ngini ni 'elingi ḏi'i limau Sodom re Gomora re limau-limau ma sebanga ma manusia. Ananga manga ga'a 'i ma tero sa'olo mala'ekata-mala'ekata gena-ge. Ananga 'aḏi sudala re 'a'a 'ori i'a ma jira tau-taunu singadolo 'aḏi sanga hukumu toma u'u kama sengene ua, la 'aḏi dadi didina'o rimoi di'a ngowa'a ma jira mo-moini.

⁸Dadi so'o gena-ge ḏi'i guru-guru sa-sakala ga'a tamanga sigolona, ananga manga ga'a. Sababu manga nanele, ananga 'aḏi sudala singadolo 'aḏi sifaja manga lese. Ananga 'aḏi sito-to'u Ma Jou'ongu Madutu, re sipula'a mara'a makhluk 'ofi-'ofi toma soroga.

⁹Mada'a kalaha Mikhael mala'ekata ma sae'e masiretene, unanga gena-ge 'o 'a'a so'o gena ua. Wakutu unanga ma'u lawana re 'Iblisi sababu enanga ma'u rabasa 'a Musa 'ai mayeti, Mikhael 'o nau'u ua sijuruhakimi 'Iblisi reo demo sipula'a mara'a. Siḏibo ḏi'i unanga gena-ge pa'i 'o kanau ḇato toma 'Iblisi, “Ma Jou'ongu Madutu masiretene ni ḇangata ngana.”

¹⁰Mada'a ngowa-ngowa'a gena-ge 'aḏi sipula'a mara'a 'oru ḇato ga'a 'aḏi sahe ua. Ananga site-tero sa'olo haiwani ga'a mafikiri ua, mada'a pa'i 'a'a ḇato. Dadi de'oso re ḏegoro so'o gena-ge pa'i 'aḏi sahe ḇato. Re sababu ananga manga de'oso re ḏegoro gena-ge, ananga 'aḏi sanga hukumu lai ḏubuso ra Ma Jou'ongu Madutu tala.

¹¹Bahala ra ananga. Sababu ananga ya mete'e 'a Kain 'ai ngo'omo. Ananga gena-ge ma tero sa'olo Bileam ga'a sigasa ngowa'a 'aḏi iranga manga ngo'omo, la unanga 'o sanga pipisi. Re Ma Jou'ongu Madutu ḏuanga i'a 'o sihukumu ananga gena-ge sababu 'U lawana Unanga ma tero sa'olo 'ua re 'au wali Korah ga'a 'o lawana 'ai ngowa'a bi-biri'i.

¹²Wakutu ngini ni lomu di'a 'omo, 'age guru-guru sa-salaka gena-ge ga'a manga de'oso re ḏegoro 'i pula'a mara'a ngini: Ananga gena-ge 'aḏi oromo ḇato ma tero sa'olo ngowa'a danata sababu ananga manga mara'a 'i sengene re pa'i masinga'unu manga diri. Ananga ma tero sa'olo kakamo karawiana ya wusu, mada'a ma besa'a cua. Ananga ḏi'i site-tero sa'olo ate 'i sowo'o ua, kalaha 'orasa sowo'o 'i ngadolo; ate-ate ga'a ma utu'u ri wuru'u singadolo ri sengene.

¹³Ananga gena-ge manga de'oso re ḏegoro pa'i sipula'a mara'a ḇato ma tero sa'olo momoku toma ngoloto 'o rato ya wusu-wusu ga'a sibaolo jeremoto. Ananga ma tero sa'olo mumuḏungu-mumuḏungu ga'a 'i tagi le'a ḇato sababu sigasa ngowa'a toma ngo'omo 'i pale-pale. Dadi di'a ananga Ma Jou'ongu Madutu ya'u sidodahe ḏua manga ngi'i toma hafu-hafu masala ga'a kasingado-ngadolo i'a.

¹⁴'Ua re 'au wali, Henokh, a Adam 'ai ju'uda nani tumudingi tala, unanga ra sinubuata mangale ngowa-ngowa'a gena-ge. Unanga 'o kanau, “Oḏi'i, Ma Jou ḏuanga i'a 'o sapolo Rai mala'ekata 'ofi-'ofi rema cala-cala,

¹⁵di'a sijuruhakimi ngowa'a mo-moini. Unanga ḏuanga i'a 'o sihukumu ngowa-ngowa'a ga'a sito-to'u Unanga mete'e manga ga'a kajahatana. Re Unanga ḏi'i 'o sihukumu ngowa'a baraḏosa ga'a 'U sito-to'u Unanga sababu manga demo-demo ga'a 'aḏi sipula'a mara'a Unanga.”

¹⁶Ngowa-ngowa'a gena-ge pa'i tegoro magu-guḏubungu re sisala ngowa'a lelegu. Ananga gena-ge pa'i 'aḏi mete'e manga nyafusu ma jira masiretene ḇato, 'aḏi mahie manga diri re 'aḏi pake demo-demo ma mami di'a 'aḏi sanga ma 'utungu.

¹⁷Mada'a ngini nena-ne, ioronongoḏu ngo-ngaku rimoi ga'a ngoi tini dadalara, ni 'elingi 'oru ga'a nanga Jou Yesus Kristus 'ai so-soma'a raḏi sinubuata:

¹⁸Ananga reya siajele ra ngini, “Na'o co-cori 'orasa ma ḏo-ḏogumu, ngowa-ngowa'a 'aḏi sapolo sije-jengere ninga ngo-ngaku. Ngowa'a gena-ge manga 'ahu pa'i mete'e manga nyafusu ma jira masiretene.”

¹⁹Ananga gena-ge ngowa-ngowa'a ga'a ma'u sabi ḏuḏunu. Ananga Ma Ngagara 'Ofi-'Ofi ya'u ḏegoro ua, mada'a manga 'akala re sinyingara ma nyafusu 'i ḏegoro ananga!

²⁰Mada'a ngini nena-ne ioronongoḏu ngo-ngaku rimoi ga'a ngoi tini dadalara, balasu ni riono matengo re matengo, la ma do-doto'o 'ofi-'ofi ma pari cua ga'a da'u ra Ma Jou'ongu Madutu tala 'i ḏegoro ninga 'ahu madogo-dogo. Re ngini balasu ni manyiata tau-taunu mete'e Ma Ngagara 'Ofi-'Ofi ma mau.

²¹Re ḏi'i balasu ni 'ahu 'eli-'elingi Ma Jou'ongu Madutu 'ai dadalara di'a ngini. Ni 'elingi tau-taunu gena-ge sa'olo ni totoma ni ngaku mode-mode'e mangale nanga Jou Yesus Kristus dadunu 'o sapolo moju. Re wakutu Ma Jou dadunu 'o sapolo moju, Unanga 'o pula'a 'ahu kasingado-ngadolo i'a ra ngini, sababu 'Ai 'akala re sinyingara ma la-la.

²²Ngini balasu ni sijumu ninga 'akala re sinyingara ma la-la toma ngowa'a ga'a sitaka-taka 'oru ga'a ya'u ngaku ma siḏa.

²³Ngini balasu ni sisalamata ngowa'a ra Ma Jou'ongu Madutu 'ai hukumu ma tero sa'olo ni rabasa ngowa'a toma u'u malejanga. Re toma ngowa'a ma lelegu ga'a 'aḏi sito-to'u Ma Jou'ongu Madutu, balasu na'u sijumu ninga 'akala re sinyingara ma la-la. Mada'a balasu ni ma'istiari awa-awa ni mete'e manga ḏosa. Dadi ngini ni emono manga ḏosa ma tero sa'olo pakeanga ga'a nyengara 'i si'a'a ngini ni dadi najis ra Ma Jou'ongu Madutu 'ai momina.

²⁴Ni puji re silamo'o Ma Jou'ongu Madutu ga'a nga'unu 'o kadiarata ngini, la ni eta'a toma ḏosa awa re nga'unu 'o sigasa re sitalaḏi ngini ra Unanga ga'a mulia. Toma 'orasa gena-ge ngini ninga sala cua re ninga 'akala re sinyingara 'i romanga reo roanga.

²⁵Unanga gena-ge pa'i Ma Jou'ongu Madutu ga'a nanga Salamata ma Cimi sababu ngene rewo marimoi ra Yesus Kristus nanga Jou. Unanga gena-ge 'O mulia 'O kabasarana, 'Ai kuasa ma pari cua ga'a 'O parenta wakutu dungia re diwanga 'i sidadi nyangu singadolo nange-ne re kasingado-ngadolo i'a! 'Amin.