Read Sahu Tingoýi 10 Bible Online

Tingoýi 10 - Sahu bible

Tingoýi 10

¹Ḏua, tari tingoḏi'i ma dara ngoi to oḏi'i mala'ekata matengo lao te'e 'o 'uci da'u soroga tala, kakamo 'u dasao, kokobo 'i rangi 'ai sae'e, 'ai biono ma lalaki sa'olo wangere ma la'o, re 'ai rou sa'olo u'u ma ngasu'u.

²Toma giama 'o gu-gu'u boku lo-lolo ma ngowa rimoi 'i wela-welanga. Re 'ai rou ma kuwiḏa 'o majo'u toma ngoloto, re 'ai rou ma kuḇali 'o majo'u toma tana'a dudungu.

³Ḏua unanga 'o poa'a ya siduga-duga ma tero sa'olo 'o singa 'i kaḏaḏasa. Mala'ekata gena-ge 'o poa'a togumu i'a, ma murasa tumudingi 'i te'iri ya sangoro iḏingi.

⁴Ma murasa tumudingi 'i te'iri ya sangoro iḏingi togumu i'a, ngoi mau to lefo ma sa-sangoro. Mada'a iḏingi da'u toma soroga tala ri kanau ma betongo so'o ne: “Ngana no gogono ma murasa ma sa-sangoro re na lefo awa!”

⁵Gena ḏua, mala'ekata ga'a ngoi ta oḏi'i 'ai rou 'a sijo'u toma ngoloto re toma tana'a du-dudungu, unanga gena-ge 'a tede 'ai giama ma kuwiḏa sie diwanga.

⁶Unanga 'o masisasi 'o mapake Ma Jou'ongu Madutu 'ai lomanga, ga'a 'O 'ahu kasingado-ngadolo i'a re 'O sidadi diwanga re ngoloto re ma dara mo-moini. Mala'ekata gena-ge 'o kanau, “Ma 'orasa 'i sijujuru riwara wakutu Ma Jou'ongu Madutu 'o 'a'a 'oru ga'a Unanga ro sijaji!

⁷Dadi wakutu mala'ekata ma nyo-nyoimi tumudingi 'o wusu terompet, Ma Jou'ongu Madutu 'a si'a'a Tai 'ulungu ma dara ga'a rahasia ma di'ara ḏua. 'Ulungu gena-ge Unanga 'A sihabari pasala ḏua Tai nabi-nabi ga'a 'aḏi de-de'oso Unanga ma tero sa'olo 'Ai budaka-budaka.”[15]

⁸Gena ḏua, iḏingi ga'a ngoi ta 'isene da'u soroga tala nange-ge 'i kanau ḏi'i ra ngoi ma betongo so'o ne: “Tagi na 'oro kartasi lo-lolo ga'a 'i wela-welanga toma mala'ekata 'ai giama ga'a 'ai rou kaci moi 'i sijo'u toma ngoloto re kaci moi 'a sijo'u toma tana'a du-dudungu.”

⁹Dadi ngoi to tagi re to golo'o, la unanga 'o pula'a kartasi lo-lolo ma ngowa gena-ge ra ngoi. Unanga 'o kanau ra ngoi, “Na 'oro re na oromo. Tani madanga na basono 'i mami sa'olo madu, mada'a tani po'olo ma dara 'i dadi mamaḏi.”

¹⁰Ngoi ta dawongo kartasi lo-lolo ma ngowa gena-ge re ta oromo. Tari madanga ta basono sa'olo madu mada'a ta nyamolo, tari po'olo ma dara ta basono mamaḏi.

¹¹Pasala i'a, mala'ekata gena-ge 'o soma'a ngoi to kanau, “Na sihabari soi moi moju habari ra Ma Jou'ongu Madutu ino toma bangsa-bangsa, nagara-nagara re demo-demo 'oru ḇato re toma 'olana-'olana.”