Read Sahu Tingoýi 18 Bible Online

Tingoýi 18 - Sahu bible

Tingoýi 18

¹Gena ḏua, ngoi to oḏi'i mala'ekata matengo 'o 'uci da'u soroga tala. Unanga 'ai kuasa 'i lamo'o re 'ai mulia 'i sitarangi toma dungia sitabi donga.

²Unanga 'ai iḏingi ma siḏi, 'o kanau, “Pinya'olo ḏua, Babel limau lamo'o 'i pinya'olo. Dadi toma 'orasa nange-ne 'i dadi roh-roh ma jira ma ngi'i, roh-roh ma jira fara muḏuo i'a 'i tegoro toma ngi'i gena-ge; re namo toma diwanga mo-moini ga'a najis re ngowa'a ya emono, enanga mo-moini 'i tegoro toma ngi'i gena-ge ḏi'i.

³Limau lamo'o Babel 'i pinya'olo ḏua, sababu bangsa mo-moini reya ka'e ma 'anggur su-sudala: 'Olana-'olana 'aḏi su-sudala reo we-were'a gena-ge re ngowa-ngowa'a 'aḏi mawu'unu re matibo 'aḏi dadi ngowa'a rema-enanga, sababu ngowa'a ga'a tegoro 'age ananga remanga nyafusu lamo'o woḏi.”

⁴Ḏua ngoi to 'isene iḏingi ma lelegu toma soroga tala ma betongo so'o ne: “ 'Ari 'umata 'age toma limau Babel ma dara, ni supu! Awa ngini ni mete'e ananga manga ḏosa-ḏosa, la awa ni sanga hukumu ma tero!

⁵Sababu manga ḏosa 'i madogo-dogo ngadolo da'u diwanga re Ma Jou'ongu Madutu 'a sidaioranga ua ananga manga kajahatana gena-ge.

⁶'Oru ga'a ananga nu'u 'a'a, ngini ḏi'i na balasa toma limau Babel soi ḏiḏi. Sibala 'anggur[22] tamanga sawo'o ga'a lebe mamaḏi reo 'anggur ma mulaingi ga'a ananga 'aḏi pula'a ra ngini.

⁷Nange-ne ni pula'a sangisara re 'akala re sinyingara kangela ma tero ra ananga, sa'olo ma siḏa ananga manga 'ahu pai-pai'i re sanangi ḏua, sababu ananga ma tero sa'olo we-were'a ga'a mo momole re mo kanau, ‘Ngoi nena-ne 'olana we-were'a ga'a to pareta; ngoi nena-ne, we-were'a balo ua, re ngoi ḏuanga i'a kama basono 'akala kangela ua!’

⁸Sababu gena-ge, pa'i toma wangere moi ma dara ḇato, ananga 'aḏi basono bahala sa'olo: bobaku, rerese ma gaḏi re sawini. Re limau Babel gena-ge ḏuanga i'a 'i ro'u simoini, sababu Ma Jou'ongu Madutu rai kuasa di'a sijuruhakimi limau Babel gena-ge.”

⁹'Olana-'olana toma dungia ga'a 'aḏi su-sudala reo we-were'a gena-ge, ananga gena-ge ḏuanga i'a 'aḏi rerese ma gaḏi wakutu ya oḏi'i u'u ma loworo 'i tubolo ie sababu limau Babel 'i ro'u.

¹⁰Ananga gena-ge ḏuanga i'a 'aḏi made-de'oso tatamo toma giḏanga sababu ananga ya mojongo sanga ma bahala ga'a ma tero. Ananga 'aḏi kanau, “Koḏu'u! Koḏu'u, limau ma lamo'o nena-ne! Limau Babel ga'a te'e! Kage-kage pa'i jam rimoi ḇato, ma hukumu 'i ngadolo ḏua!”

¹¹Ngowa-ngowa'a ga'a mawu'unu re matibo toma dungia ma dara 'aḏi rerese ma gaḏi re manga 'akala re sinyingara 'i kangela sababu limau Babel 'i pinya'olo ḏua. Dadi matengo i'a mai ua ya tibo manga bu-bu'unu.

¹²'A guna ua tibo ananga manga guraci, salaka, permata re mutiara. So'o gena ḏi'i manga ḇa'a lenan, ḇa'a 'ungu, ḇa'a salira, re ḇa'a ko-kolili madutu, ate mo-moini ga'a sanga rema susa, 'ori i'a 'i si'a'a toma gading bolo ate-ate ga'a ma ijana hali-hali bolo tamḇaga bolo ḇesi re pualam,

¹³ate mami ma 'eno'o, rampa-rampa, bo-bounu, mur re manyanyi; 'anggur re goroho, gulupung re gandum; sapi re doba, jarana re goroba, budaka-budaka re dawana-dawana.

¹⁴Ngowa-ngowa'a ga'a 'aḏi mawu'unu re matibo 'aḏi kanau toma limau Babel manga ngowa-ngowa'a, “ 'Ori i'a rana mo-moini ga'a ngana mau na sanga, enanga gena-ge 'i cua ḏua, re 'ani 'ahu ga'a 'i pai-pai'i re ga'a no matoro, gena-ge ri iranga. Re ngana na sanga riwara!”

¹⁵Ngowa-ngowa'a mawu'unu re matibo ananga ga'a dadi ngowa'a rema-enanga sababu 'aḏi mawu'unu re matibo toma ngowa'a limau gena-ge, 'aḏi made-de'oso toma giḏanga sababu ananga mojongo sanga ma bahala ga'a ma tero. Ananga gena-ge ḏuanga i'a manga 'akala re sinyingara 'i kangela masala dadi 'aḏi rerese ma gaḏi,

¹⁶re 'aḏi kanau, “Koḏu'u! Koḏu'u, limau ma lamo'o nena-ne! Biasa ngowa'a limau gena-ge 'aḏi mapake baju lenan, ḇa'a 'ungu, ḇa'a ko-kolili madutu, re manga lese 'i siromanga saya-saya guraci, permata re mutiara.

¹⁷Kage-kage pa'i jam rimoi ḇato harata mo-moini 'i iranga ma tero sa'olo wo wusu dufahe!” Kapala ma nyanyasele, kapala ma dotomo re ngowa'a munara, ananga mo-moini gena-ge toma kapala re ngowa'a mo-moini ga'a 'aḏi disa manga 'ahu toma ngoloto 'aḏi made-de'oso toma giḏanga.

¹⁸Re 'aḏi poa-poa'a wakutu ananga ya oḏi'i u'u ma loworo 'i tubolo ie sababu limau Babel 'i ro'u. Ananga 'aḏi kanau ya siduga-duga, “Site-tero yoḏu'u limau ma lelegu reo limau lamo'o Babel nena-ne!”

¹⁹Ḏua ananga ya ba-ba'ala korou'u tamanga sae'e 'i dadi didina'o rimoi mangale ananga manga 'akala re sinyingara 'i kangela re 'aḏi rerese ma gaḏi 'aḏi maboa-boa'a: “Koḏu'u! Koḏu'u, limau ma lamo'o nena-ne! Toma limau gena-ge ngowa-ngowa'a remanga kapala mo-moini 'aḏi dadi ngowa'a rema-enanga. Kage-kage pa'i jam rimoi ḇato mo-moini gena-ge 'i iranga ma tero sa'olo wo wusu dufahe!”

²⁰Hai, mo-moini ni tegoro toma soroga, ni monere sababu limau gena-ge ri pinya'olo ḏua. Hai, Ma Jou'ongu Madutu 'ai 'umata, Yesus 'ai so-soma'a re nabi-nabi, ngini gena-ge ni maroanga mo-moini, sababu Ma Jou'ongu Madutu 'o sihukumu ḏua ngowa-ngowa'a 'aḏi tegoro toma limau Babel. Unanga ra balasa ananga gena-ge manga de'oso re ḏegoro ga'a si'a'a ḏua ra ngini!

²¹Gena ḏua, mala'ekata rimoi lai te'e 'o gola'a maḏi lamo'o masala rimoi 'a upa'a toma ngoloto, 'o kanau: “Ma Jou'ongu Madutu 'o singi-ngiranga limau lamo'o Babel, ma tero sa'olo upa'a maḏi lamo'o gena-ge toma ngoloto, 'i iranga nena-ne re si'a!

²²Toma limau gena-ge kama 'isene riwara: ngowa'a ga'a ḇisa-ḇisa kecapi ma iḏingi, ngowa'a ga'a manyanyi manga iḏingi, ngowa'a ga'a wusu-wusu sulingi ma iḏingi, ngowa-ngowa'a ga'a wusu-wusu terompet ma iḏingi. Ngowa'a pahe mo-moini toma 'oru ḇato, ananga 'aḏi iranga nena-ne re si'a re gandum ma gulinga ma iḏingi, enanga gena-ge 'i kama 'isene riwara.

²³Ngowa'a kama oḏi'i riwara 'o poci ma lejanga, re kama 'isene riwara ngowa'a 'aḏi ribi re rame toma molo'ara ma laya toma limau gena-ge. Moi-moini gena-ge 'i dadi sababu ngowa'a 'aḏi mawu'unu re matibo toma limau gena-ge, ananga ngowa'a lebe la-lamo'o i'a toma dungia sitabi donga. Sababu ngowa'a ga'a 'aḏi 'a'a sarati toma limau gena-ge ananga 'aḏi sihaga ngowa'a toma dungia sitabi donga.

²⁴Ma Jou'ongu Madutu ro sihukumu limau Babel gena-ge, sababu toma limau gena-ge 'age ngowa'a ga'a sisengene nabi-nabi re Ma Jou'ongu Madutu 'ai ngowa-ngowa'a — siḇoko'o ḇato: ananga gena-ge raḏi sisengene ngowa'a mo-moini ga'a ya'u sisengene toma dungia sitabi donga.”