Read Sahu Tingoýi 2 Bible Online

Tingoýi 2 - Sahu bible

Tingoýi 2

¹Yesus gena-ge 'o kanau ra ngoi, “Toma jama'ata Epesus ma mala'ekata, na lefo so'o ne: Nena-ne habari ra Ngoi ga'a To gu'u mumuḏungu ngai tumudingi Tari giama ma kuwiḏa, re To tagi toma poci ma ngi'i ngai tumudingi ma sigolona ga'a si'a'a reo guraci.

²Ngoi reto waro mangale ngini ninga de'oso re ḏegoro: Ngini ni cufala munara re ni tahana wakutu ni sanga sikisa re sangisara sababu ninga ngo-ngaku ra Ngoi. Ngoi to waro ḏi'i ngini ni dawongo ua ngowa'a ma jira re ngini ni tai'i ngowa'a ga'a 'aḏi madadi sa'olo 'Ari so-soma'a, mada'a so'o gena-ge ua, ananga gena-ge ngowa'a sa-sakala ḇato.

³Re kalaha ngini sanga sangisara sababu ninga ngo-ngaku ra Ngoi, ngini ninga ngo-ngaku 'i elala ua re ninga 'akala re sinyingara 'i rapo'o ua.

⁴Mada'a 'age rema 'ori i'a rimoi ga'a ngoi to sanangi ua ra ngini: Ngini ninga dadalara ra Ngoi sa'olo ma mulaingi riwara.

⁵Sababu gena-ge, 'elingi re sidaioranga awa ma duhu sa'olo ninga dadalara toma mulaingi i'a lebe lamo'o i'a reo nange-ne! Maḏibo toma ngo'omo boloto! Maḏiga'a 'oru ga'a ngini ni 'a'a ḏua ma mulaingi. Na'o so'o gena-ge ua, ḏuanga i'a Ngoi to sapolo ra ngini re Ta 'oro ninga poci ma ngi'i.

⁶Mada'a 'age 'ori i'a ma la-la ra ngini: Ngini ni emono Nikolaus 'ai me-mete'e manga ga'a ma tero sa'olo Ngoi ḏi'i mai Ta'u emono.

⁷'A guna ḇato nga'unu 'o 'isene, balasu 'a totoho la-la ino 'oru ga'a Ma Ngagara 'Ofi-'Ofi 'i kanau toma jama'ata-jama'ata. 'A guna ḇato 'ai ngo-ngaku ra Ngoi kama elala ua singadolo 'o sengene, Ngoi tu pula'a watasa di'a 'o oromo ate 'ahu-'ahu ma sowo'o 'i konyo ra Ma Jou'ongu Madutu 'ai guḏa.”

⁸Yesus gena-ge 'o kanau ra ngoi ḏi'i, “Toma jama'ata Smirna ma mala'ekata, na lefo so'o ne: Nena-ne habari ra Ngoi nena-ne, Ma Mulaingi re Ma Ḏo-Ḏogumu, Ngoi ga'a reto sengene mada'a dadunu To 'ahu moju.

⁹Ngoi ta waro ḏua ngini ninga 'ahu kangela. Ngoi ta waro ngini ngowa'a ma dinga'unu ua, mada'a ma banari ngini ngowa'a rema-enanga. Ngoi to waro 'age rema ngowa'a Yahudi 'aḏi jajaha demo ra ngini, ananga gena-ge mode-mode'e ua ngowa'a Yahudi tamanga 'akala re sinyingara, mada'a 'o 'Iblisi ma me-mete'e.

¹⁰Ni mojongo awa, na'o ti'ara riwara ni sanga susa re sangisara. Ngoi to siajele ra ngini, mamuni'a ḏuanga i'a 'Iblisi singosama ngini toma bui di'a ni sanga tai'i. Re ngini gena-ge ḏuanga i'a sanga sikisa ma di'ara wangere nyagi moi. Mada'a ngini balasu ni macako'o namo-namoto ra Ngoi singadolo ni sengene, kara Ngoi to pula'a 'ahu kasingado-ngadolo i'a ra ngini sa'olo ngogele rimoi.

¹¹'A guna ḇato nga'unu 'o 'isene, balasu 'a totoho la-la 'oru ga'a Ma Ngagara 'Ofi-'Ofi 'i kanau toma jama'ata-jama'ata. 'A guna ḇato 'ai ngo-ngaku ra Ngoi kama elala ua singadolo 'o sengene, unanga gena-ge 'o basono sengene sou ḏiḏi ua.”[5]

¹²Yesus gena-ge 'o kanau ra ngoi ḏi'i, “Toma jama'ata Pergamus ma mala'ekata, na lefo so'o ne: Nena-ne habari ra Ngoi ga'a to gu'u samaranga mangono rimoi ma doto romoḏiḏi.

¹³Ngoi ta waro ḏua ngini ni tegoro toma limau ga'a 'Iblisi 'i dadi 'olana, mada'a ngini ni ngaku Ngoi tau-taunu. Re kalaha taninga limau gena-ge ananga 'aḏi sisengene 'a Antipas 'Ari sakisi ga'a cufala madutu, ngini ni masoloto ua taninga ngo-ngaku ra Ngoi.

¹⁴Mada'a 'age fara muḏuo i'a moju ga'a 'i sisanangi ua 'Ari 'akala re sinyingara: 'Age mamuni'a taninga sigolona 'aḏi mete'e Bileam 'ai do-doto'o. 'Ua re 'au wali, Bileam 'o doto'o 'a Balak 'o sigasa ngowa'a Israel 'aḏi eta'a toma ḏosa. Balak 'o baja tau-taunu ananga 'aḏi oromo ngo-ngoromo ga'a sipula'a ḏua toma jou'ongu ma somoara re 'aḏi madiga'a su-sudala.

¹⁵So'o gena ḏi'i ra ngini taninga sigolona 'age rema ngowa'a 'aḏi mete'e Nikolaus 'ai me-mete'e ma do-doto'o.

¹⁶Sababu gena-ge, ngini balasu ni maḏibo toma ngo'omo boloto! Na'o so'o gena-ge ua; ngasamoi Ngoi to sapolo re To parangi ngowa-ngowa'a gena-ge Rari samaranga Tari madanga.

¹⁷'A guna ḇato nga'unu 'o 'isene, balasu 'a totoho la-la ino 'oru ga'a Ma Ngagara 'Ofi-'Ofi 'i kanau toma jama'ata-jama'ata. 'A guna ḇato 'ai ngo-ngaku ra Ngoi kama elala ua singadolo 'o sengene, Ngoi to pula'a watasa oromo manna ga'a 'i gogono. Re Ngoi ḏi'i to pula'a maḏi bu-buḏo matengo ngai moi. Toma maḏi gena-ge 'i silefo lomanga su-sungi, matengo i'a mai ua ya waro, pa'i ngowa'a ga'a ya dawongo maḏi gena-ge, ananga gena-ge ya waro.”

¹⁸Yesus gena-ge 'o kanau ra ngoi ḏi'i, “Toma jama'ata Tiatira ma mala'ekata, na lefo so'o ne: Nena-ne habari ra Ngoi, Ma Jou'ongu Madutu 'ai Ngowa'a Nau'u, ga'a 'Ari la'o 'i leja-lejanga sa'olo u'u, 'Ari rou 'i ciḏo-ciḏoto ma tero sa'olo tau'u tamḇaga kara ya 'ese singadolo ma ja-jamanga 'i supu.

¹⁹Ngoi reto waro mangale ngini ninga de'oso re ḏegoro: Ngini ma'u dadalara matengo re matengo, ninga ngo-ngaku lai te'e ra Ngoi, ninga munara di'a Ngoi, ni tahana wakutu ni sanga susa re sangisara sababu ninga ngo-ngaku ra Ngoi. Sidogo ḏi'i, Ngoi ta waro ngini ni 'a'a lebe repe nange-ne reo ni 'a'a ma siḏa.

²⁰Mada'a 'age rema 'ori i'a rimoi ga'a Ngoi to sanangi ua ra ngini: Ngini ni dawongo taninga sigolona ngo Izebel, 'o we-were'a matengo mo magoro ino sa'olo Ma Jou'ongu Madutu 'ai nabi. Munanga gena-ge mo doto'o ngowa'a ga'a ta Ngoi ma tero sa'olo 'Ari budaka-budaka[6] mangale ananga nyengara 'aḏi 'a'a 'ori i'a su-sudala, re 'aḏi nyengara oromo ngo-ngoromo ga'a sipula'a ḏua toma jou'ongu ma somoara.

²¹Ngoi to pula'a ḏua donga di'a munanga mo maḏibo toma ngo'omo boloto. Mada'a mo oḏu'u. Siḏibo ḏi'i, munanga mo nyanyaḏi mo 'a'a 'ori i'a su-sudala tau-taunu.

²²Dadi ḏuanga i'a Ngoi timi sihukumu munanga gena-ge singadolo mo siḏi tami jingi'i. Re na'o ngowa'a ga'a 'aḏi 'a'a tinikai, 'aḏi maḏibo toma ngo'omo boloto ua, ananga gena-ge ya sanga ma si-siḏi ma tero munanga gena-ge ḏi'i.

²³Sidogo ḏi'i, ngo Izebel 'ami me-mete'e ga'a ma tero sa'olo 'ami ngowa'a, Ngoi ḏuanga i'a Ta'u sisengene, la Ngoi 'ari 'umata mo-moini ya waro mangale Ngoi nena-ne nga'unu to du-dumunu ngowa'a manga 'akala re sinyingara. Re Ngoi ḏuanga i'a to balasa mete'e ngini ni maḏiga'a masiretene.

²⁴Mada'a taninga sigolona toma limau Tiatira, 'age mamuni'a ga'a mete'e ua ngo Izebel 'ami do-doto'o gena-ge. Ngini gena-ge madoto'o ua do-doto'o ga'a silomanga 'Iblisi ma rahasia ga'a pa'i enanga gena-ge ḇato nga'unu sijumu. Sababu gena-ge, Ngoi to siajele ra ngini, to pula'a riwara parenta ra ngini,

²⁵pa'i ngini balasu ni macako'o namo-namoto Tari do-doto'o ga'a rena dawongo, singadolo Ngoi dadunu to sapolo moju.

²⁶'A guna ḇato 'ai ngo-ngaku kama elala ua singadolo 'o sengene re 'aḏi mete'e Ngoi 'ari mau singadolo ma ḏo-ḏogumu, ḏuanga i'a Ngoi to pula'a kuasa ra ananga ma tero sa'olo kuasa ga'a To dawongo Tari Ḇaḇa. Ananga 'aḏi sanga kuasa ra Ngoi di'a 'aḏi parenta bangsa-bangsa reo didiki ḇesi, re 'aḏi siwejere bangsa-bangsa ma tero sa'olo 'aḏi siwejere giu'u tana'a.

²⁸Ananga ḏi'i ḏuanga i'a 'aḏi dawongo mumuḏungu papolo wangere ma la'o ra Ngoi sa'olo didina'o 'utungu.

²⁹'A guna ḇato nga'unu 'isene, balasu 'a totoho la-la ino 'oru ga'a Ma Ngagara 'Ofi-'Ofi 'i kanau toma jama'ata-jama'ata.”