Read Sahu Tingoýi 3 Bible Online

Tingoýi 3 - Sahu bible

Tingoýi 3

¹Yesus gena-ge 'o kanau ra ngoi ḏi'i, “Toma jama'ata Sardis ma mala'ekata, na lefo so'o ne: Nena-ne habari ra Ngoi ga'a to parenta Ma Jou'ongu Madutu 'ai Roh tumudingi[7] re to gu'u mumuḏungu ngai tumudingi Tari giama ma kuwiḏa. Ngoi ta waro mangale ninga de'oso re ḏegoro: Ngowa'a 'aḏi aje, ngini ni 'ahu-'ahu. Mada'a, mete'e ngoi, ngini rini sengene!

²Sababu gena-ge, ni momi'i re ma'istiari! Ngini ninga ngo-ngaku 'i sengene moini nyangu, dadi ninga ngo-ngaku ma jingianga gena-ge ni mate'e. Sababu 'oru ga'a ngini ni 'a'a, rimoi i'a mai nyangu Ngoi ta sanga ti-tiai Tari Jou'ongu Madutu 'ai momina.

³Sababu gena-ge, 'elingi do-doto'o ga'a ngini rena 'isene 'au nga'ene re na mete'e mode-mode'e gena-ge re ni maḏibo toma ngo'omo boloto. Na'o so'o gena ua, Ngoi ḏuanga i'a to sapolo sa'olo ngowa'a to-tori'i, re ngini ni waro ua ma 'orasa ga'a Ngoi to sapolo.

⁴Mada'a taninga sigolona toma limau Sardis, 'age rema ngowa'a loasa re banari. Sababu gena-ge, ananga gena-ge 'aḏi patasa di'a ḏuanga i'a 'aḏi tagi mamete'e ra Ngoi re 'aḏi mapake pakeanga bu-buḏo.

⁵'A guna ḇato 'ai ngo-ngaku ra Ngoi kama elala ua singadolo 'o sengene, ḏuanga i'a 'aḏi mapake juba bu-buḏo. Manga lomanga ta singi-ngiranga yoḏu'u toma ngowa'a 'ahu-'ahu manga boku.[8] Re Rari Ḇaḇa 'ai biono re mala'ekata-mala'ekata manga biono, Ngoi to mangaku to kanau ananga gena-ge Ngoi 'ari ngowa-ngowa'a.

⁶'A guna ḇato nga'unu 'o 'isene, balasu 'a totoho la-la ino 'oru ga'a Ma Ngagara 'Ofi-'Ofi 'i kanau toma jama'ata-jama'ata.”

⁷Yesus gena-ge 'o kanau ra ngoi ḏi'i, “Toma jama'ata Filadelfia ma mala'ekata, na lefo so'o ne: Nena-ne habari ra Ngoi ga'a 'Ofi-'Ofi re 'O Banari, re 'Olana Daud 'ai pareta ma kuci ma gu-gu'u. Dadi na'o Ngoi ta welanga, matengo i'a mai ua nga'unu ya kuci. Re na'o Ngoi ta kuci, matengo i'a mai ua nga'unu ya welanga.

⁸Ngoi reto waro mangale ngini ninga de'oso re ḏegoro: Kalaha ngini ni te'e siḏi nyangu ngini reni mete'e Ngoi 'ari do-doto'o mode-mode'e re ni masoloto ua nana'o Ngoi. Dadi oḏi'i, Ngoi to welanga ngalana ḏua di'a ngini. Ngalana gena-ge matengo i'a mai ua nga'unu ya kuci.

⁹'Elingi nena-ne: 'age rema ngowa-ngowa'a raḏi dadi 'o 'Iblisi ma me-mete'e, ngowa-ngowa'a sa-sakala ga'a 'aḏi mangaku re 'aḏi kanau, ‘Ngomi ne, ngowa'a Yahudi’ mada'a tamanga 'akala re sinyingara so'o gena ua. Ngoi ta'u gasa ananga gena-ge 'aḏi sapolo re 'aḏi maḏipolono taninga biono, la ananga 'aḏi waro Ngoi ta'u dadalara ngini.

¹⁰Ngoi ta waro ḏi'i ga'a ngini ni mete'e mode-mode'e 'Ari parenta: Ni tahana re ni pake 'akala ḇanyo wakutu na sanga sikisa. Sababu gena-ge, toma dungia sitabi donga wakutu ngowa'a 'aḏi sanga ma susa re sangisara, Ngoi masiretene tini saolo ngini. Gena-ge 'i dadi wakutu Ngoi tunu tai'i ngowa'a mo-moini toma dungia sitabi donga.

¹¹Ti'ara riwara, Ngoi to sapolo! Macako'o namo-namoto Tari do-doto'o ga'a ngini rena waro, la matengo i'a mai ua ya rabasa ninga ngogele.

¹²'A guna ḇato 'ai ngo-ngaku ra Ngoi kama elala ua singadolo 'o sengene, ḏuanga i'a Ngoi ta'u sidadi ananga sa'olo 'Ari Jou'ongu Madutu 'ai Wala ma ngasu'u lamo'o. Re ḏi'i unanga 'o tegoro Tari ngi'i gena-ge kasingado-ngadolo i'a. Re 'Ari Jou'ongu Madutu 'ai lomanga re 'Ari Jou'ongu Madutu 'ai limau ma lomanga — gena-ge Yerusalem su-sungi ga'a 'i 'uci da'u soroga tala Tari Jou'ongu Madutu — ḏuanga i'a ta silefo lomanga mo-moini gena-ge ra ananga manga lese matengo re matengo. Re 'Ari lomanga su-sungi ta silefo ra ananga manga lese matengo re matengo ḏi'i.

¹³'A guna ḇato nga'unu 'o 'isene, balasu 'a totoho la-la ino 'oru ga'a Ma Ngagara 'Ofi-'Ofi 'i kanau toma jama'ata-jama'ata.”

¹⁴Yesus gena-ge 'o kanau ra ngoi ḏi'i, “Toma jama'ata Laodikia ma mala'ekata, na lefo so'o ne: Nena-ne habari ra Ngoi ga'a si'aro'o 'a 'Amin. Ngoi gena-ge Sakisi ma cufala ga'a Ta sijumu tau-taunu 'ori i'a ba-banari ra Ma Jou'ongu Madutu ino, re Ngoi Unanga 'Ai do-dadi ma cimi.

¹⁵Ngoi reto waro mangale ninga de'oso re ḏegoro: Ngini ni cufala mai ua bolo ni ḇusuru mai ua ni mete'e Ngoi. Ngini ma tero sa'olo ḇanyo ga'a sa-sau'u mai ua bolo malata mai ua. Lebe rousu na'o ngini pa'i fara moi ḇato.

¹⁶Dadi sababu ngini ni tamarasu'u, sa-sau'u mai ua bolo malata mai ua, Ngoi ḏuanga i'a tini singunanga Tari madanga.

¹⁷Ngini nena-ne ni kanau, ‘Ngomi ngowa'a rema-enanga, minga 'ahu ti-tiai kama kuranga ua!’ Mada'a ngini ni masiwaro ua: Ngini ninga 'ahu 'i kuranga ma pari cua ma tero sa'olo ngowa'a ma dinga'unu ua ga'a ni wa-watolo re ni hafu.

¹⁸Sababu gena-ge, Ngoi to pula'a duga re domolo ra ngini: Ni tibo Ngoi 'ari guraci ga'a guraci madutu, la ni dadi ngowa'a rema-enanga. So'o gena-ge ḏi'i, ni tibo pakeanga buḏo ra Ngoi, la ni daku ninga mara'a. Re ngini ni tibo 'o sou'u di'a ni si'ese ninga la'o, la ni oḏi'i tarangi.

¹⁹Ngowa-ngowa'a ga'a Ngoi nena-ne ta'u dadalara, ananga gena-ge Ngoi ta'u ḇangata re Ta'u sihukumu di'a Ta'u doto'o. Sababu gena-ge, ngini balasu sibabata ninga dadalara ra Ngoi, re ni maḏibo toma ngo'omo boloto.

²⁰Oḏi'i! Ngoi toma de-de'oso taninga ngalana, re to tolo'o. Na'o 'a guna ḇato 'o 'isene 'Ari iḏingi, re 'a welanga ma ngalana, Ngoi ḏuanga i'a to osama ma'u sanga ra unanga, kara ngomi mi oromo mamete'e.

²¹'A guna ḇato 'ai ngo-ngaku ra Ngoi kama elala ua singadolo 'o sengene, Ngoi ta'u pula'a ma 'olana 'ai ḏe-ḏegoro Tari 'Olana 'ai ḏe-ḏegoro ma kaci moi i'a. So'o gena-ge ḏi'i, nange-ne Ngoi to tegoro toma 'Olana 'ai ḏe-ḏegoro Tari Ḇaḇa ma 'Olana 'ai ḏe-ḏegoro tai kuwiḏa, sababu Ngoi masiretene ḏi'i 'Ari ngo-ngaku ra Unanga kama elala ua singadolo To sengene.

²²'A guna ḇato nga'unu 'o 'isene, balasu 'a totoho la-la ino 'oru ga'a Ma Ngagara 'Ofi-'Ofi 'i kanau toma jama'ata-jama'ata.”