Read Sahu Tingoýi 4 Bible Online

Tingoýi 4 - Sahu bible

Tingoýi 4

¹Palisi i'a, ngoi, Yohanes tari tingoḏi'i ma dara to oḏi'i ḏi'i soroga ma ngalana rimoi 'i welanga, re to 'isene iḏingi ga'a to isene nange-ge. Iḏingi gena-ge ma tero sa'olo terompet 'i supu mete'e ngalana rema betongo so'o ne: “Ino, pere 'ane. Ngoi to sijumu ra ngana mangale ḏuanga i'a 'i dadi 'ori i'a i'a rimoi.”

²Gena ḏua, Ma Ngagara 'Ofi-'Ofi ri ḏegoro singadolo ngoi to oḏi'i toma soroga 'age ma 'Olana 'ai ḏe-ḏegoro rimoi re Matengo 'o tegoro toma ḏe-ḏegoro gena-ge.

³Matengo gena-ge 'ai biono ma ciḏoto ma tero sa'olo permata baiduri pandan re ma tero sa'olo permata delima. Re ngoi to oḏi'i kokobo ga'a ma ciḏoto ma tero sa'olo zamrud ya sigoloḏi ma 'Olana 'ai ḏe-ḏegoro gena-ge.

⁴'Age ḏi'i ma 'olana 'ai ḏe-ḏegoro ma lelegu nyagi romoḏiḏi re rata ya sigoloḏi ma 'Olana 'ai ḏe-ḏegoro rimoi gena-ge. Re bi-biri'i nga nyagi romoḏiḏi re nga ḏuata ya ḏegoro ra ma 'olana 'ai ḏe-ḏegoro gena-ge. Bi-biri'i gena-ge 'aḏi mapake baju bu-buḏo re manga lastari guraci.

⁵Ra ma 'Olana 'ai ḏe-ḏegoro rimoi gena-ge 'i pelete'e ḇeḇelanga rema lalaki rema murasa ma rurusu. Ra Ma 'Olana 'ai ḏe-ḏegoro rimoi gena-ge ma biono 'age rema 'oboro ngai tumudingi 'i leja-lejanga. 'Oboro gena-ge ma ngale Ma Jou'ongu Madutu 'ai Roh ngai tumudingi.[9]

⁶Ra Ma 'Olana 'ai ḏe-ḏegoro gena-ge ma biono ta oḏi'i ḏi'i 'ori i'a ga'a ma tero sa'olo ngoloto kaca, ma lara sa'olo kristal ga'a tatamo lapasa.[10] Ra Ma 'Olana 'ai ḏe-ḏegoro rimoi gena-ge ma ḇuḇuku rata, 'age makhluk fara rata 'i 'ahu-'ahu. Mahluk-mahluk gena-ge ma biono re ma ḏuḏunu 'i romanga reo la'o.

⁷Makhluk ma mulaingi ta oḏi'i i'a ma tero sa'olo singa, makhluk 'ahu-'ahu ma nyo-nyoimi romoḏiḏi ta oḏi'i i'a ma tero sa'olo sapi ma nau'u. Makhluk ma nyo-nyoimi ro'ange ta oḏi'i i'a ma biono ma tero sa'olo manusia, re makhluk ma nyo-nyoimi rata ta oḏi'i i'a ma tero sa'olo namo kareba wakutu 'i solo-soloro.

⁸Makhluk rata gena-ge, rimoi re rimoi ma kalatu'u rarama, ma lese 'i romanga reo la'o sidogo toma kalatu'u ma re'u re 'aḏu. Lobi'i re wangere makhluk gena-ge 'i kanau kama togu-togumu ua, ma betongo so'o ne: “ 'Ofi-'Ofi, 'Ofi-'Ofi, 'Ofi-'Ofi Ma Jou ga'a Ma Jou'ongu Madutu, Unanga ga'a 'Ai kuasa ma pari cua; Unanga nena-ne ga'a 'age ḏua toma 'ua re 'au wali moju, nange-ne re kasingado-ngadolo i'a.”

⁹Makhluk rata gena-ge 'i silamo'o re 'i simulia re 'i sibere ie murasa ma la ra Unanga ga'a tegoro ra Ma 'Olana 'ai ḏe-ḏegoro ga'a 'O 'ahu kasingado-ngadolo i'a. Re wakutu makhluk gena-ge 'i kanau so'o gena-ge,

¹⁰bi-biri'i nga nyagi romoḏiḏi re nga ḏuata 'aḏi mapagara manga biono tala kara 'aḏi silamo'o re siḏubuso Unanga ga'a 'o tegoro ra Ma 'Olana 'ai ḏe-ḏegoro re 'O 'ahu kasingado-ngadolo i'a. Ananga ya woi'i manga lastari ya sigare ra ma 'Olana 'ai ḏe-ḏegoro ma biono, re 'aḏi kanau,

¹¹“Ya Ma Jou'ongu Madutu, minga Jou. Pa'i Ma Jou'ongu Madutu ḇato 'o patasa di'a ngowa'a 'U simulia re 'U silamo'o sababu 'Ani kuasa ma pari cua. Sababu Ma Jou'ongu Madutu 'o sidadi dungia re diwanga re ma dara mo-moini, re sababu mete'e 'Ani 'akala ma mau 'ori i'a i'a mo-moini 'i dadi re 'i 'ahu.”